KUZOYA 20

Abrahamu na Abimeleki

1Kufuma aho, Abrahamu ukaghenda cha Negebu, ukakaia ghadi na ghadi ya Kadeshi na Shuri, ukakaia Gerari kwa ngelo ndini. 2Na aho Abrahamu ukamghora mkake Sara kukaia ni mruna. Abimeleki mzuri wa Gerari ukaduma uredelo Sara upate kummbusa.#Kuz. 12.13; 26.7 3Nao Mlungu ukamchea Abimeleki ndodonyi nakio ukamzera, “Ola kuchafwa, kwa kukaia kwawusa muka wa wandu.” 4Aho Abimeleki nderekoghe wamsoghodera anduangi. Niko ukaghamba, “Wele BWANA, kuchawibwagha wandu wisewadie ikosa? 5Nechi odeghora moni wei ni mruna, na uo muka wori ukaghamba wokoni wei ni mruna; niko nani ngaghibonya agha kwa ngolo ielie putu, ini sine ikosa jingi.” 6Nao Mlungu ukamzera uko ndodonyi, “Ee loli kwaghamba kwabonya huwo kwa ngolo ielie, ela ni ini moni nikutangalie kusenibonyere kaung'a; niko ngakughira kusemuadade. 7Idana kummbunje kwa mumi wake, angu uo moni ni mlodi, nao uchakulombia oho kusechefwa, niko kuchakaia moyo. Ela kukalegha kummbunja, manya loli kuchafwa na wandu wako wose.”

8Nao Abimeleki ukawuka nakesho kio, ukawiwanga wadumiki wake wose, ukawighoria malagho agho, nawo wikangilwa ni wowa loli-loli. 9Niko Abimeleki ukammbanga Abrahamu ukamzera, “Welee, kwadibonyere wada huwu? Ni kaung'aki dikubonyere, hata kukanishekeria ini na wuzuri ghwapo kungia andenyi ya kaung'a ihi mbaa? Kwanibonyere maza risefwane.” 10Abimeleki ukachuria kumzera Abrahamu, “Koregheshereghe wada kukibonya huwu?” 11Abrahamu ukamzera, “Nedeghesha wei wandu ndewimuobuagha Mlungu aha, nawo wichanibwagha kwa wundu ghwa muka wapo. 12Ela kwa loli ni mwanidu, aba ni umweri ela mae ni mzima; niko nimlowue. 13Iji Mlungu orenifunyireghe kwa aba nikaie omara-mara nedemzera muka wapo huwu, ‘Wucha kuchaanibonyera ni ughu: andu uko kose dichaavika, kunighore kukaia ini ne mwanyinyu!’”

14Nao Abimeleki ukawusa ng'ondi na ng'ombe, na wazumba wa womi na wa waka, ukamneka Abrahamu na kummbunjira mkake Sara ukighamba, 15“Ola isanga japo heji, kaia andu uko kose kuchaakunda oho kumoni.” 16Ukamzera Sara, “Ola namneka mwanyinyu vibelele va feza elfu imweri, kukaia wushuhuda ghwa loli mesonyi kwa wose mkwanye angu ndekubonyere wuwiwi ghungi, na angu koko na hachi imbiri ya wose.” 17Niko aho Abrahamu ukawilombia kwa Mlungu, na Mlungu ukawiboisa Abimeleki na mkake, na wazumba wake wa waka wipate kuva wana; 18angu Mlungu orekoghe wawifunga kuva waka wose wa nyumba ya Abimeleki, kwa wundu ghwa Sara mkake Abrahamu.

Currently Selected:

KUZOYA 20: TAITA

Highlight

Copy