KUZOYA 23

Kifwa cha Sara na Abrahamu kughua ndoe erikia wandu

1Sara orekaieghe moyo miaka ighana na mirongo iwi na mfungade, 2nao ukafwa aja Kiriath-araba, nigho Hebroni isanga ja Kanaani. Abrahamu ukamlilia muka wake Sara na kum'bonyera ifwa. 3Nao Abrahamu ukafuma andu gharia ya mkake erekoghe ukawighendia Wahiti ukawizera, 4“Ini ne mghenyi na mundu oida aghadi konyu, namlomba muniuzire ndoe erikia wandu eri nipate kuirika gharia ya muka wapo, nisesindeiwona.”#Waeb. 11.9,13; Mab. 7.16 5Nao Wahiti wikamzera Abrahamu, 6“Disikire bwana, oho ko mundu m'baa aghadi kodu. Rika gharia ya muka wako andu kose kuboie kuchaakusaghua kwa agha makaburi ghedu, ndekuwadie mndungi kodu uchaakuima kaburi yake, angu kukughiria kuseirike gharia ya muka wako anduangi.” 7Abrahamu ukawuka ukawighoghomia Wahiti, awo wandu wa isanga. 8Nao ukawizera, “Ikakaia mkunde niirike gharia ya muka wapo nisesindeiwona, nisikirenyi; munilombie kwa Efroni mwana wa Sohari, 9unineke ija mbanga ya Makpela uko nayo, iko kutuonyi kwa mbuwa yake. Unineke kwa ighuri jaro tiki niilipe imbiri konyu, niiwunje andu korikia wandu.”

10Efroni moni orekoghe kidombo aghadi ya Wahiti. Nao ukamtumbulia Abrahamu Wahiti wose wiko kidombo mbengenyi ya muzi ghwawo wikisikiria, 11“Sikira bwana, ini nichakuneka mbuwa chiaimweri na iyo mbanga iko andenyi yaro, nakuneka imbiri ya waisanga; kuirike gharia ya muka wako.” 12Abrahamu ukawighoghomia waisanga, 13ukamzera Efroni waisanga wose wikisikira, “Nakulomba kunisikire; nichakulipa ighuri jaro; jiwuse wokoni, niwoneirika gharia ya muka wapo.” 14Efroni ukamtumbulia Abrahamu, 15“Bwana wapo, sikira. Loli aka kambuwa ka shekeli maghana ana ra feza ni kilamboki aghadi ya ini na oho? Rika gharia ya muka wako.” 16Abrahamu ukarumiriana na Efroni, nao ukammpimia vibelele maghana ana va feza, sa iji koni oreghorieghe Wahiti wose wikisikira, kunughana na vipimo va pesa ra kibiashara.

17Niko huwo mbuwa ya Efroni iko Makpela cha mashariki ya Mamre, mbuwa chiaimweri na mbanga, na midi yose erekoghe andenyi yaro, 18erewurieghe ifwa ja Abrahamu, Wahiti wose werekoghe mbengenyi ya muzi ghwawo wiko aeni. 19Niko aho Abrahamu ukamrika mkake Sara andenyi ya mbanga ya mbuwa ya Makpela, iko Mashariki ya Mamre (niyo Hebroni), andenyi ya isanga ja Kanaani. 20Niko huwo iyo mbuwa ya Wahiti na mbanga yaro verewurieghe mali ya Abrahamu, na kubonywa andu korikia wandu.

Currently Selected:

KUZOYA 23: TAITA

Highlight

Copy