KUZOYA 24

Isaaka na Rebeka

1Idana Abrahamu orekoghe mghosi wa miaka mingi, na BWANA orekoghe wamrasimia kwa vilambo vose. 2Abrahamu ukamzera mdumiki wake m'baa wa nyumba yake, na mzighaniri wa vilambo vake vose orekoghe navo, “Ngira mkonu ghwako aha barenyi kwapo, 3nani nichakughemesha kwa irina ja BWANA, Mlungu wa mlungunyi na ndoenyi, angu ndekuchaamlolia mwana wapo muka kufuma kwa Wakanaani awa nawuyakaia aghadi kwawo. 4Ela kuchaghenda mzedu, kwa kivalwa chapo, kumpatire mwana wapo Isaaka muka kufuma aho.”

5Nao mdumiki ukaghamba, “Ikaiagha wada iji mwai walegha disakechanya isanga iji? Welee aho ni suti nimmbunje mwana wako isanga korejifumieghe anguwada?” 6Abrahamu ukamzera, “Manya, kukulindie kusemmbunje mwana wapo aho. 7BWANA, uo Mlungu wa mlungunyi orenifunyireghe nyumbenyi kwa aba, na kufuma ijo isanga nivailo, sena uo oreghorieghe nani na kunilaghira ukighamba, ‘Kivalwa chako nichachineka isanga iji,’ uo uchamkirisha malaika wake imbiri kwako, na oho kuchampatira mwana wapo muka kufuma aho. 8Ela iji uo mwai walegha kunughana na oho, aho niko kuchafungulwa ighemi japo. Oho kukulindie tu kusemmbunje mwana wapo aho.” 9Niko uo mdumiki ukangira mkonu ghwake barenyi kwa Abrahamu bwana wake, nao ukamghemesha karakara na agho ghose oreghighorieghe.

10Niko aho uja mdumiki ukawusa ngamila ikumi ra bwana wake, ukafuma ukidwa manosi malazi mazima mazima kufuma kwa bwana wake, ukaghenda muzi orekaieghe Nahori isanga ja Mesopotamia. 11Nao ukaridungisha ngamila ngokoro shighadi ya muzi kaavui na kiriwa cha machi, ngelo ya luma lwa kenyi lwa waka kudaya machi. 12Nao uo mdumiki ukalomba ukighamba, “Ee BWANA Mlungu wa bwana wapo Abrahamu, nakulomba kunibonyere seji nawuyakunda idime, sena kuwonyere lukundo lwako kwa bwana wapo Abrahamu. 13Zighana nakaia kimusi aha kaavui na kiriwa cha machi, na wai wa wandu wa muzi ughu wawuyacha aha kudaya machi. 14Ndeikaie uo mwai nichaamzera, ‘Nakulomba kuduo mtungi ghwako ninyo machi,’ nao unizere, ‘Nywaa, na ngamila rako nicharinyosha;’ ikaie nuo moni kwamsaghuya mdumiki wako Isaaka. Kwa iji ini nichamanya angu oho kwawonyera lukundo kwa bwana wapo Abrahamu.”

15Nao usendeemeria ilombi jake, Rebeka ukabusa na mtungi ghwake ghwa machi waghuduka maweghenyi kwake. Nao ni mwai wa Bethueli, uvalo ni Milka mka Nahori, mruna Abrahamu. 16Na uo mwai orekoghe ughokie na ndighi, mwai loli usemanyiro jingi ni mndwawomi ungi anduangi. Ukasea kiriwenyi, ukachura mtungi ghwake machi, ukajoka. 17Uja mdumiki ukabonya shwa-shwa kummara ukamzera, “Nakulomba kunineke machi matinieri gha mtungi ghwako ninyo.” 18Nao ukaghamba, “Nywaa bwana wapo.” Ukadua mtungi ghwake shwa-shwa, ukaghuwadia mkonunyi kwake nao ukanywa. 19Hata iji wameria kunywa, uja mwai ukamzera, “Nicharidaia ngamila rako wori, naro reni rinyo machi rikoje.” 20Shwa wori ukaghidungiria agho machi andu konyoshera mfugho, ukakimbia sena cha kiriwenyi, ukaridaia ngamila rose. 21Na uja mdumiki orekoghe ukimzighanira kima, upate kuwona ngera loli BWANA wam'boisira charo chake.

22Nao iji ngamila rameria kunywa machi, uja mdumiki ukafunya pete ya dhahabu iko na wulemeri ghwa nusu shekeli, ukamngira mbuonyi kwake, na bangili iwi riko na wulemeri ghwa shekeli ikumi ra dhahabu, ukamngira vikotonyi kwake. 23Ukamkotia, “Oho ko mwai wani? Moko na wulalo ghungi gholala nyumbenyi kenyu?” 24Nao ukamzera, “Ini ne mwai wa Bethueli uvalo ni Milka mka Nahori.” Nao ukachuria kughora, 25“Kedu koko na vindo vikate va mfugho, na andu korarisha waghenyi wori.” 26Uja mdumiki ukaghoghomesha chongo chake, ukamtasa BWANA 27ukighamba, “Ndekaso BWANA Mlungu wa bwana wapo Abrahamu, angu useliwie lukundo, na wuloli ghwake kwa bwana wapo.”

28Niko uja mwai ukakimbia cha mzinyi, ukaghenda nyumbenyi kwa mae na kuwighoria wose maza iro. 29Rebeka orekoghe na mruna wa womi uwangwaghwa Labani, nao ukakimbia cha kiriwenyi upate kummbona uja mundu. 30Labani uendawona ija pete na bangili vikotonyi kwa mruna, na kusikira seji orededanyeghe na uo mundu, ukamghendia; ukamkua uko kimusi kaavui na ngamila kiriwenyi. 31Ukamzera, “Karibu mzinyi oho mrasimilwa wa BWANA. Kwaki kwakaia kimusi shighadinyi? Nameria kuboisa wulalo ghwako na ghwa ngamila wori.”

32Niko uja mundu ukacha na kungia nyumbenyi, na Labani ukaifungua mizigo erekoghe aighu ya ngamila ukaisera, ukarineka nyasi na vindo vizima, ukamredia uja mundu chiaimweri na wandu wake machi gheoghosha maghu. 33Ukaredelwa vindo, ela ukaghamba, “Sijagha kungi hata nameria kughora malagho ghapo agha ghanireda.” Labani ukamzera, “Ghora.”

34Nao ukaghamba, “Ini ne mdumiki wa Abrahamu. 35BWANA wamrasimie bwana wapo kwa wungi ukawuya mzuri wa mali, nao wamnekie ng'ondi, mfugho, feza, na dhahabu, na wadumiki wa womi na wa waka, ngamila na punda. 36Na Sara, muka wa bwana wapo oremvaieghe bwana wapo mwana wa womi ngelo ya wukeku ghwake, na uo mwana wanekelo mali rose uko naro bwana wapo. 37Na bwana wapo wanighemeshere ukighamba, ‘Kusakemlolia mwana wapo muka kufuma kwa wai wa Wakanaani awa waisanga nikwanye nawo, 38ela kuchaghenda kwa nyumba ya aba, na kwa kichuku chapo, kumpatire mwana wapo muka kufuma aho.’ 39Na ini ngamkotia bwana wapo, ‘Ikaiagha wada uja mwai ukalegha disechanye?’ 40Nao ukaghamba, ‘Uo BWANA unighenjagha, uchamduma malaika wake ukirie imbiri kwako kukuboisira chia, na oho kuchampatira mwana wapo muka kufuma kwa kivalwa chapo, na kwa nyumba ya aba. 41Kukavika kwa kichuku chapo nawo wileghe kukuneka uo mwai, niko aho kuchafungulwa ighemi japo.’

42“Niendavika kiriwenyi idime, nalombieghe sa huwu: ‘Ee BWANA Mlungu wa bwana wapo Abrahamu, ngera kwadaniboisira charo chapo, 43ola nakaia kimusi aha kiriwenyi. Iji mwai ungi wachadaya machi, nao nimzera unineke machi matinieri gha mtungi ghwake ninyo, 44nao urumirie kunineka sena unyoshe ngamila rapo, ndeukaie uo nuo moni muka kwamsaghuya mwana wa bwana wapo.’ 45Nao imbiri nisemerie kulomba, ngammbona Rebeka ukicha na mtungi ghwake maweghenyi kwake, ukasea kiriwenyi na kudaya machi; nani ngamzera, ‘Nineke machi ninyo.’ 46Nao ukadua mtungi ghwake shwa-shwa ukanizera, ‘Nywaa, na ngamila rako nicharinyosha wori.’ Nganywa nao ukarinyosha na ngamila wori. 47Niko ngamkotia, ‘Ko mwai wani?’ Nao ukaghamba, ‘Ne mwai wa Bethueli mwana wa Nahori uvalo ni Milka.’ Aho niko ngamngira iyo pete mbuonyi kwake, na iro bangili vikotonyi kwake. 48Nao ngaghoghomesha chongo na kumtasa BWANA Mlungu wa bwana wapo Abrahamu, uhu wanireda nicha na kumpata mwai wa kichuku cha bwana wapo, kwa wundu ghwa mwana wake. 49Idana ngera kucham'bonyera nicha na loli uo bwana wapo, kunighorie; na ngera siko kungi, kunighorie nimanye jebonya.”

50Aho Labani na Bethueli wikaghamba, “Maza iri raafuma kwa BWANA moni, na isi ndedidimagha kutumbulia ilagho jingi jizamie angu jiboie anduangi. 51Rebeka moni hoyu imbiri kwako, mmbuse kughende nao upate kukaia muka wa bwana wako, sa iji BWANA moni waghora.” 52Nao iji mdumiki wa Abrahamu wasikiria madedo ghawo, ukaghoghoma imbiri ya BWANA hata ndoenyi. 53Nao ukafunya manosi gha vilambo va zoghori mbaa va feza na dhahabu na nguwo, ukamneka Rebeka. Wokoni ukafunya vilambo va zoghori mbaa ukamneka mruna na mae.

54Niko aho uja mdumiki na awo wandu werekwanyeghe wikaja, wikanywa, nawo wikalala aho kio icho. Hata iji wawuka nakesho, uja mdumiki ukaghamba, “Nisighenyi niwuye kwa bwana wapo.” 55Ela Labani na mae wikaghamba, “Leka mwai dikanyekanye sa matuku ikumi huwu ima mghende nao.” 56Ela uja mdumiki ukaghamba, “BWANA moni wameria kuniboisira malagho ghapo. Nisighenyi niwuye kwa bwana wapo.” 57Nao wikaghamba, “Ndedimmbange mwai moni dimkotie.” 58Wikammbanga Rebeka wikamkotia, “Welee, kwendanya na uhu mundu?” 59Ukatumbulia, “Ee, nighenda.” Nao wikamfunya mruna Rebeka chiaimweri na mwai wake wa kazi, wighendanye na mdumiki wa Abrahamu na wandu wake; 60wikamrasimia Rebeka wikighamba,

“Mwanidu kukaie mae wa milioni nyingi,

kivalwa chako chisime mizi ya wamaiza wawo.”

61Niko Rebeka na wai wake wa kazi wikawuka wikajoka ngamila, wikamnugha uja mundu. Nao uja mdumiki ukamdwa Rebeka na kughenda.

62Nao Isaaka orekoghe wafuma Beer-lahai-roi, nao orekoghe ukikaia aja Negebu. 63Ukafuma ukakaia ukisela-sela mbuwenyi luma lwa kenyi ukawusira meso ghake ukazighana ukawona longo lwa ngamila lukicha. 64Rebeka ukazighana, nao iji wammbona Isaaka, ukasea kufuma ngamilenyi; 65ukamkotia uja mdumiki wa Abrahamu, “Welee, uja mundu uselaa-sela mbuwenyi akimonu aja wawuyacha nokunu nani?” Nao ukamtumbulia, “Nuo bwana wapo.” Nao Rebeka ukawada kitambaa ukafinikira wushu ghwake. 66Aho uja mdumiki ukamghoria Isaaka maza rose oreribonyereghe. 67Niko Isaaka ukammbwada Rebeka ukamngira ija hema mae orekoghe, ukawuya muka wake; ukamkunda loli-loli. Huwu Isaaka ukahoreshwa na ndighi nyuma ya kifwa cha mae.

Currently Selected:

KUZOYA 24: TAITA

Highlight

Copy