LUKA 11

Jesu kufundisha aighu ya kulomba

(Mat. 6.9-13; 7.7-11)

1Ituku jimu Jesu orekoghe andu kumu ukilomba. Uendameria kulomba, mnughi umu wake ukamzera, “Bwana difundishe kulomba seji Johane orefundishireghe wanughi wake.” 2Jesu ukawizera, “Iji mwakalomba ghambenyi:

‘Aba,

Irina jako jiele,

Wuzuri ghwako ghuche.

3Kudineke vindo vedu va ituku ituku,

4kudileke kaung'a redu

angu na isi wori dadawilekia awo widikoseragha;

kusakedikumba matimonyi.’”

5Nao ukawizera wanughi wake, “Nani konyu uko na mghenyi wake, nao umghendie kio ghadi umzere, ‘Mghenyi wapo, niazime mikate idadu; 6nachelwa ni mghenyi wafuma charonyi, nani siwadie kindo chingi chemneka anduangi.’ 7Nao moni kondenyi umtumbulie umzere, ‘Kusakenijisha wasi, mnyango ghwameria kurughwa, nani na wana wapo dameria kulala. Sidimagha kuwuka nikuneke kindo chingi.’ 8Namghoria, hata ngera saki ndekunde kuwuka umneke kindo chingi, angu wei ni mghenyi wake, ela angu wafunga ndighi kumlomba kuseko waya, loli uchawuka na kumneka vose ukundagha. 9Nani namzera, lombenyi nenyo mchanekwa, lolenyi nenyo mchawona, kongodenyi nenyo mcharughuilwa. 10Angu kula mundu ulombagha wadanekwa, na uo ulolagha wadawona, na uo ukongodagha wadarughuilwa. 11Ni ndee mwana uao konyu, kasikira walombwa samaki ni mwanwake, uchaamneka choka wulalo ghwa samaki? 12Angu ulombe ighi, nao umneke kishushe? 13Ikakaia inyo muko wawiwi, mwaichi kuwineka wana wenyu manosi mecha, Aba wa mlungunyi uchachumba saki kuwineka Roho Mweli awa wimlombagha?”

Jesu na Beelizebuli

(Mat. 12.22-30; Mk. 3.20-27)

14Nao Jesu orekoghe ukiwinga pepo kituri, hata iji pepo yameria kufuma, uja kituri ukadeda na wandu wikashinika. 15Ela wamu wikaghamba, “Wadariwinga pepo kwa ndighi ra Beelizebuli m'baa wa pepo.”#Mat. 9.34; 10.25 16Na wazima kwa kumtima, wikalola mwakilimbiti kwake kufuma mlungunyi.#Mat. 12.38; 16.1; Mk. 8.11 17Ela Jesu ukighimanya maririkanyo ghawo ukawizera, “Kula wuzuri ghusesikiranagha ghoni ndeghuduagha, na kula kinyumba chiwaghikie chadaaghwa. 18Na ngera Shetani wakuwagha uo moni-lee, wuzuri ghwake ghuchamanga wada? Angu mwaghamba nadawinga pepo ngidimishwa ni Beelizebuli. 19Angu ngera ini nariwinga pepo ngidimishwa ni Beelizebuli-lee, wana wenyu awo wariwinga kwa ndighi rani? Kwa huwu niwo wichaamtanya. 20Ela ikakaia naawuyariwinga kwa ndighi ra Mlungu, aho loli Wuzuri ghwa Mlungu ghwameria kumchea. 21Ngelo mundu uwadie ndighi uko na maswagha ghake, uilindiagha nyumba yake moni, vilambo vake vadakaia banana. 22Ela ukacha mundu mzima uwadie ndighi kumchumba uo, nao umkabe na kumsima, wadamsoka ghaja maswagha ghake ukusaghikagha nagho, na kuriwaghanya mali rake waridwa wunyika. 23Uo disekwanye wadalwa nani, na uo usetumbanyagha andwamweri nani, wadasaghisa.#Mk. 9.40

Kuwuya kwa pepo ya makakala

(Mat. 12.43-45)

24“Iji pepo ya makakala yamfuma mundu, yadaenda andu kuomie ikilola andu kohora, nayo iji yasowa yadaghamba, ‘Nichaiwuria ija nyumba yapo nereifumieghe.’ 25Hata iji yacha yadaikua ifwagirilo na kuboiswa nicha; 26niko yadaghenda na kureda pepo zima mfungade rizamie kuchumba iyo cheni, naro radangia na kukaia aho, na kutua kwake mundu uo, wadakaia uzamie kuchumba imbiri.”

Kuboilwa kwa loli

27Nao iji Jesu waghora agho, muka umu izungunyi ukaghora kwa lwaka lubaa, “Charasimilwa kifu cherekuvaeghe na nyodo koreiongieghe.” 28Ela uo ukaghamba, “Ela warasimilwa kuchumba awa wijisikiragha ilagho ja Mlungu na kujiwadia.”

Kukunda mwakilimbiti

(Mat. 12.38-42)

29Nao iji izungu jerekoghe jikichurikia ukazoya kuwizera, “Ichi ni kivalwa cha wuwiwi; chialola weke mwakilimbiti, nacho ndechichaanekwa mwakilimbiti ungi, ela uja moni wa Jona.#Mat. 16.4; Mk. 8.12 30Angu sa iji koni Jona orewurieghe mwakilimbiti kwa Waninawi, ni huwo koni Mwana wa Mdamu uchawuya mwakilimbiti kwa kivalwa ichi.#Jon. 3.4 31Ituku ja Kutanywa, Malkia wa kusinyi uchashuhudia kukaia wandu wa kivalwa ichi wakosere. Angu uo orechieghe kufuma kutua kwa ndoenyi uisikire hikima ya Solomoni, na aha oko umu m'baa kumchumba Solomoni.#1 Waz. 10.1-10; 2 Mal. 9.1-12 32Ituku ja Kutanywa wandu wa Nineve wichashuhudia kukaia wandu wa kivalwa ichi wakosere, angu awo wereghalukieghe na kuhea shwa-shwa nyuma ya kusikira machilo gha Jona, na aha oko umu m'baa kumchumba Jona.#Jon. 3.5

Taa ya mumbi

(Mat. 5.15; 6.22-23)

33“Ndekuwadie mndungi ukoragha taa na kuivisa, angu kuifinikira pishi; ela wadaiwika aighu ya kilambo charo, awa wingiagha wighuwone mwengere.#Mat. 5.15; Mk. 4.21; Lk. 8.16 34Iriso ni sa taa ya mumbi ghwako. Iji iriso jako jiko banana, mumbi ghwako ghose ghuachua mwengere; ela jikakaia mkongo, mumbi ghwako ghose ghuachua kira. 35Kwa huwu lindia ugho mwengere ghuko andenyi kwako ghusewuye kira. 36Idana ngera mumbi ghwako ghose ghwachua mwengere, ghusewadie andu kungi kuko na kira, ghuchachua mwengere loli-loli, sa iji taa ikunekagha mwengere.”

Jesu kuwirasha Mafarisayo na walimu wa Sharia

(Mat. 23.1-36; Mk. 12.38-40)

37Jesu uendameria madedo agho, Mfarisayo umu ukamkaribisha uje vindo nyumbenyi kwake, nao ukaghenda na kusea kidombo mezenyi. 38Uja Mfarisayo ukashinika angu ujie vindo imbiri useoghie. 39Nao Bwana ukamzera, “Inyo Mafarisayo, mwadaoghosha vikombe na sahani cha shighadi, ela nandenyi mwachua kusoka na wuwiwi ghose. 40Inyo wakelu, welee, uo orebonyereghe cha shighadi nderebonyereghe nandenyi wori anguwada? 41Ela funyenyi makuwio gha ivo viko nandenyi, nenyo olenyi vilambo vose vichakaia vielie konyu.

42“Ela ni bugha konyu inyo Mafarisayo, angu mwafunya mafunyo gha malemba gha marumba mecha, na kula mbogha, ela mwaisigha hachi na lukundo lwa Mlungu. Maza iri eremfwanieghe muribonye, na iro zima wori mserisighe.#Wal. 27.30 43Ni bugha konyu inyo Mafarisayo, angu mwakunda vifumbi va ishima andenyi ya sunagogi, na kurogholwa sokonyi. 44Ni bugha konyu angu mwafwanana na makaburi ghisewonekagha na wandu wadaghiwadia wisemanyagha.”

45Mwalimu umu wa Sharia ukamzera, “Mwalimu, kukaghora huwo kwaawuyadiposhua na isi wori!” 46Nao ukaghamba, “Ni bugha konyu inyo wori walimu wa Sharia, angu mwadadukishira wandu misigo ilemere, inyo mmbeni msedimagha kuiadada kwa chala cheni. 47Ni bugha konyu angu mwaagha makaburi gha walodi awo werebwaghiloghe ni weke ndeyo. 48Niko huwu mwashuhudia na kurumiriana na mabonyo gha weke ndeyo, angu werewibwaghieghe, na inyo mwaagha makaburi ghawo. 49Kwa wundu ughu hikima ya Mlungu ereghambieghe, ‘Nichawidumia walodi na wadumi; wamu wawo wichawitirira na kuwibwagha,’ 50eri ipate kukotelwa kwa kivalwa ichi, bagha yose ya walodi idirilo kufuma kuzolwa kwa wurumwengu. 51Kufuma bagha ya Abeli, hata bagha ya Zakaria uo oretotesheroghe aghadi ya madhabahu, na Andu kwa Wueli. Ee namghoria loli, ichakotelwa kwa kivalwa ichi.#Kuz. 4.8; 2 Mal. 24.20-21

52“Ni bugha konyu inyo walimu wa Sharia, angu mwaghuinjire mfunguo ghwa kumanya, inyo mmbeni ndemorengirieghe, na awo werengiagha mkawighiria.” 53Nao iji orekoghe ukifuma aja, walimu wa Sharia na Mafarisayo wikazoya kumtindiria wikimkotia makoto mengi kwa lumenyo; 54na kumlaliria kwa agho madedo mengi wipate ilagho jimu kwake ja kumshitakia.

Currently Selected:

LUKA 11: TAITA

Highlight

Copy