LUKA 10

Jesu kuduma wandu mirongo mfungade

1Nao nyuma ya agho, Jesu ukawika wazima sena wandu mirongo mfungade, ukawiduma wawi-wawi wimkirie kughenda iyo mizi orekundieghe kuighenda. 2Ukawizera, “Mvono ni mungi, ela wabonyi kazi ni watini, mlombenyi uo Bwana wa mvono uwighenje wabonyi kazi mvononyi kwake.#Mat. 9.37-38 3Ghendenyi chia enyu; olenyi namduma fwana ya ng'ondi aghadi ya vikwau.#Mat. 10.16 4Msakedwa mfuko ghwa pesa, hata kikuchu, hata vadu, sena msemroghuo mndungi chienyi.#Mat. 10.7-14; Mk. 6.8-11; Lk. 9.3-5 5Kasikira mwangia nyumba ingi, izerenyi kande, ‘Sere ndeikaie aighu ya nyumba ihi.’ 6Na ikakaia mndungi wa sere oko andenyi ya nyumba ija, sere enyu ichakaia aighu kwake; ela iji useko, sere enyu ichammburia. 7Nenyo kaienyi andenyi ya iyo nyumba cheni, mkija na kunywa ivo vose mchaanekwa, angu yafwana m'bonyi kazi ulipo mafungu ghake. Nenyo msakelunguwa-lunguwa kufuma nyumba ihi hata nyumba ija.#1 Wakor. 9.14; 1 Tim. 5.18 8Iji mwangia muzi ghungi, na wandu wamkaribisha, jenyi ivo vindo vose mchaanekwa; 9wiboisenyi wakongo wiko ahoeni, muwizere, ‘Wuzuri ghwa Mlungu ghwameria kumchea kaavui.’ 10Ela mkangia muzi ghungi na wandu ndewimkaribishagha, fumenyi chienyi kwawo mghambe,#Mab. 13.51 11‘Hata na teri ya muzi ghonyu iyo yakakadia maghu ghedu damghughuduya, ela sena manyenyi angu Wuzuri ghwa Mlungu ghwameria kucha kaavui.’ 12Namghoria loli, Sodoma ichakaia baa kutanyonyi kuchumba muzi ghuja.#Kuz. 19.24-28; Mat. 11.24; 10.15

Mizi iserumirie

(Mat. 11.20-24)

13“Ni bugha kwako Korazini! Ni bugha kwako Bethsaida! Angu weke mwakilimbiti wibonyekie kwako, ngera wedebonyerwa Tiro na Sidoni, kumangu wamerie kuhea koicho, wikirwa nguwo ra magunia na kusea kidombo ivunyi.#Isa. 23.1-18; Eze. 26.1–28.26; Joe. 3.4-8; Amo. 1.9-10; Zek. 9.2-4 14Ela ichakaia baa kwa Tiro na Sidoni kuchumba inyo Ituku ja Kutanywa. 15Na oho Kafarnaumu, kwaghamba kujoke kuvike mlungunyi? Kuchaserwa hata Andu kwa Wafu.”#Isa. 14.13-15

16Nao Jesu ukawizera wanughi wake, “Uo umsikiragha inyo, uanisikira ini, na uo umleghagha inyo, uanilegha ini, na uo unileghagha ini, uamlegha uo orenidumieghe.”#Mat. 10.40; Mk. 9.37; Lk. 9.48; Joh. 13.20

Kuwuya kwa wandu mirongo mfungade

17Nao waja wandu mirongo mfungade wikawuya kwa kuboilwa kubaa wikighamba, “Bwana hata pepo rawikilo aisi kodu kwa irina jako.” 18Nao ukawizera, “Neremmbonieghe Shetani ukipotoka sa luhehia kufuma mlungunyi. 19Olenyi namneka nguma rekanyanga aighu ya choka na vishushe, na kurisima ndighi rose ra uja m'maiza, hata ndekuwadie kindo chingi chichaam'bonya ilagho jingi anduangi.#Zab. 91.13 20Elaima msakeboilwa kwa iri, wei pepo rawikilo aisi konyu, ela boilonyi angu marina ghenyu ghaandikilo mlungunyi.”

Kuboilwa kwa Jesu

(Mat. 11.25-27; 13.16-17)

21Ngelo ija cheni, Jesu ukaboilwa andenyi ya Roho Mweli, ukaghamba, “Nakuneka chawucha oho Aba, Bwana wa mlungunyi na ndoenyi, angu korewivisireghe wandu wa akili na suku maza iri, kukawifunukuya wanake watini, ee Aba, angu ulo nulo lorekoghe lukundo lwako. 22Nanekelo vilambo vose ni Aba; hata ndekuwadie mndungi ummanyagha Mwana nani, ela Aba moni, sena mndungi ndemmanyagha Aba nani, ela Mwana moni, na uo ose Mwana uchaamsaghua umfunukuye.”#Joh. 3.35; 10.15

23Nao njamenyi ukawighalukia wanughi wake ukawizera, “Warasimilwa awa wiwonagha maza iri muriwonagha inyo! 24Angu namghoria welee, walodi wengi na wazuri werekundieghe kuriwona iri muriwonagha inyo wisedime, na kusikira iri murisikiragha inyo, ela ndewerepatireghe anduangi.”

Mfwano ghwa Msamaria mucha

25Nao mwalimu umu wa Sharia ukacha kumtima ukighamba, “Mwalimu, nibonye wada ima nipate ifwa ja irangi ja kala na kala?”#Mat. 22.35-40; Mk. 12.28-34 26Jesu ukamtumbulia, “Yaandikilo wada Sharienyi? Kwashomagha wada?” 27Ukatumbulia, “Kumkunde Bwana Mlungu wako kwa ngolo yako yose, na kwa roho yako yose, na kwa ndighi rako rose, na kwa akili rako rose, na mmbenyu kumkunde sa iji kukukundagha kumoni.”#Wal. 19.18; Wuk. 6.5 28Nao ukamzera, “Kwatumbulia nicha, bonya agho na oho kuchakaia moyo.”#Wal. 18.5 29Ela uo ukikunda kukuneka hachi ukamzera Jesu, “Mmbedu nani?” 30Jesu ukamtumbulia, “Mndumu orekoghe ukisea kufuma Jerusalemu kwenda Jeriko, nao chienyi ukawadwa ni viting'a, vikamrua nguwo, na kumkaba na ndighi; wikamsigha kaavui na kufwa. 31Nao mkohani umu ukasea ukimaria ija chia, hata iji wammbona, ukaida chia na mbai, 32wokoni na Mlawi umu ukisea ukammbona, nao moni wori ukaida chia na mbai. 33Ela Msamaria umu ukidamba charonyi ukavika andu orekoghe, na iji wammbona, ukangilwa ni wughoma,#2 Mal. 28.15 34ukamghendia na kumfunga ngoru rake, ukamshinga mavuda na divei ukamjosa aighu ya nyamandu yake, ukamreda kwa nyumba epangisha ukamrwarisha. 35Ituku ja kawi, ukafunya pesa dinari iwi, ukamneka uja mundu wa nyumba ukighamba, ‘Mrwarishe mundu uhu, na icho chose kuchaatumia kuchumba aighu yake, ngelo ya kuwuya kwapo nichalipa.’ 36Idana kwa awa wandu wadadu, ni uao kumririkanyagha kukaia mmbao wa uja mundu orekabiloghe ni viting'a?” 37Ukatumbulia, “Ni uja oremmbonyereghe wughoma.” Jesu ukamzera, “Ghenda na oho kubonye wokoni.”

Jesu kuwiselia Marita na Maria

38Nao iji Jesu na wanughi wake werekoghe wikighenda chia yawo, ukangia muzi ghumu, na muka umu uwangwagha Marita ukamkaribisha nyumbenyi.#Joh. 11.1 39Nao orekoghe na mruna wa waka uwangwagha Maria, uo oreserieghe kidombo maghunyi kwa Jesu ukighisikiria mafundisho ghake. 40Ela Marita orekoghe wasumbuka kwa kudumika nandighi ukamghendia Jesu ukamzera, “Bwana ndekutalagha kuwona angu mwanidu wanisighia wudumiki niekeri? Mzere uche unitesie.” 41Ela Bwana ukamtumbulia, “Marita, Marita, kwaja wasi na kusumbulwa ni maza nyingi; 42jeekundika ilagho jimweri tu, Maria waasaghua ifungu icha, najo ndechaasokwa ni mndungi anduangi.”

Currently Selected:

LUKA 10: TAITA

Highlight

Copy