LUKA 9

Jesu kuduma wanughi ikumi na wawi

(Mat. 10.5-15; Mk. 6.7-13)

1Nao Jesu ukawiwanga chiaimweri waja wanughi ikumi na wawi, ukawineka ndighi na nguma aighu ya pepo rose na kuboisa makongo. 2Ukawiduma kuchila Wuzuri ghwa Mlungu na kuboisa wakongo. 3Ukawizera, “Msakekudwaia kilambo chingi cha charonyi sa mzata, mfuko, mkate, pesa hata nguwo iwi.#Lk. 10.4-11; Mab. 13.51 4Iji mwakaribishwa nyumba ingi, kaienyi ahoeni hata ngelo ya kufuma ugho muzi. 5Wandu wangi wikalegha kumkaribisha, mkakafuma ugho muzi, mghughuduo teri kufuma maghunyi konyu, ikaie wushuhuda kwawo.” 6Nao wikafuma wikaighendia mizi yose wikichila ijo Ilagho Jiboie na kuboisa wakongo kula andu.

Herode kukambwa ni chongo

(Mat. 14.1-12; Mk. 6.14-29)

7Nao iji mzuri Herode waghisikira agho ghose gherebonyeroghe, ukakambwa ni chongo, angu wandu wamu wereghorieghe wei Johane waruka kufuma kwa wafu.#Mat. 16.14; Mk. 8.28; Lk. 9.19 8Wamu wikaghora wei Elija wameria kucha, na wazima wikaghamba wei, umu wa walodi wa kala waruka. 9Herode ukaghamba, “Johane neremdumbueghe chongo, ela uhu nimsikiragha malagho ghake nani?” Nao ukakaia ukilola chia emmbona.

Jesu kuwijisha wandu elfu isanu

(Mat. 14.13-21; Mk. 6.30-44; Joh. 6.1-14)

10Waja wadumi wiendawuya, wikamghoria Jesu malagho ghose wereghibonyereghe. Jesu ukawidwa wiekeri na kuwighenja muzi ghuwangwagha Bethsaida. 11Na jija izungu ja wandu wiendamanya, wikamnugha. Jesu ukawikaribisha na kuwighoria malagho gha wuzuri ghwa Mlungu, ukawiboisa awo werekundieghe kuboiswa.

12Ndoe iendawoka kuswa, waja wanughi ikumi na wawi wikacha wikamzera, “Aha diko ni kireti, na ndoe yalighisa kuswa, wizere wandu wighende noko cha mzinyi na nyumbenyi wikulolie weni vindo na andu kolala.” 13Ela uo ukawizera, “Winekenyi vindo mmbeni.” Wikamzera, “Isi deeka na mikate misanu, na samaki iwi tu; isaakaia ngera dighende na kuwighuya vindo.” 14Angu werekoghe sa wandu elfu isanu. Nao ukawizera wanughi wake, “Serenyi wandu kidombo mazungu gha mirongo-misanu mirongo-misanu.” 15Nawo wikabonya wokoni, wikawisera kidombo wose. 16Nao ukaiwusa ija mikate misanu na iro samaki iwi, ukazighana aighu mlungunyi, ukairasimia na kuichikanya-chikanya; ukawineka wanughi wake wiiwaghie wandu. 17Wikaja wose wikaghuda na wanughi wikatumbanya masighariko vikapu ikumi na viwi.

Wushuhuda ghwa Petro aighu ya Jesu

(Mat. 16.13-19; Mk. 8.27-29)

18Ituku jimu Jesu orekoghe ukilomba uekeri, na wanughi wake werekoghe kaavui; nao ukawikotia, “Wandu waghambagha ini nani?” 19Wikamtumbulia, “Wamu waghamba ko Johane M'baputizi, na wamu Elija, na wazima wei ko umu wa walodi wa kala urukie kufuma kwa wafu.”#Mat. 14.1-2; Mk. 6.14-15; Lk. 9.7-8 20Ukawizera, “Ela inyo mwaghamba ini nani?” Nao Petro ukatumbulia, “Oho ko Kristo wa Mlungu.”#Joh. 6.68-69

Jesu kughora aighu ya matiriro na kifwa chake

(Mat. 16.20-28; Mk. 8.30–9.1)

21Nao ukawilaghira nandighi wisakemghoria mndungi ilagho ijo, 22ukawizera, “Ni suti Mwana wa Mdamu utiriro maza nyingi, na kuleghwa ni wabaa na wakohani wabaa, na walimu wa Sharia, sena ubwagho, ela ituku ja kadadu ucharukishwa.”

23Nao ukawizera wose, “Ngera mndungi wakunda kunughana nani, ndekukane uo moni, ughuduke msalaba ghwake matuku ghose uninughe.#Mat. 10.38; Lk. 14.27 24Angu uo ose uchaajikira irangi jake uchajilaghasha; ela uo ujilaghashagha irangi jake kwa wundu ghwapo uchajikira.#Mat. 10.39; Lk. 7.33; Joh. 12.25 25Angu ichamfwanaki mundu kughupata wurumwengu ghose, na kulaghasha angu kukutotesha moni? 26Angu uo ose uchaaniwonia waya ini na malagho ghapo, Mwana wa Mdamu uchammbonia waya wokoni kasikira wacha na wubaa ghwake, na wubaa ghwa Ndee, na ghwa weke malaika wielie. 27Nani namghoria loli, koko na wandu wiko kimusi aha wisechaawona kifwa, hata wameria kughuwona wuzuri ghwa Mlungu.”

Jesu kughaluka fwana

(Mat. 17.1-8; Mk. 9.2-8)

28Nao matuku wunyanya ghiendasia, nyuma ya malagho agho kughorwa, Jesu ukawidwa Petro, Johane, na Jakobo ukaghendanya nawo mghondinyi kulomba.#2 Pet. 1.17-18 29Hata iji orekoghe ukilomba, fwana yake ikaghaluka, na marwao ghake ghikawuya gha chokwa choo gha kung'ala-ng'ala. 30Nao ola wandu wawi wikawoneka wikidedanya nao, nawo ni Musa na Elija, 31werewonekieghe na wubaa wikidedanya malagho gha kufwa kwake uchaaghikatisha Jerusalemu. 32Petro na awo werekwanyeghe werewadiloghe ni dilo nyingi, hata iji wawuka wikaghuwona wubaa ghwake, na waja wandu wawi wiko kimusi andwamweri nao. 33Nao iji awo wandu werekoghe wikisighana na Jesu, Petro ukamzera Jesu, “Kwaboie saki isi kukaia aha: ndediaghe viwanda vidadu, chimu chako kumoni, na chimu cha Musa, na chimu cha Elija.” Ela nderekoghe ukimanya agho ughoragha anduangi.

34Nao ukighora agho jikacha iwingu jikawingiria kiju; wikaobua iji werefinikiroghe ni ijo iwingu. 35Lukacha lwaka andenyi ya jija iwingu lukighamba, “Uhu ni Mwana wapo, msaghulwa wapo, msikirenyi.”#Isa. 42.1; Mat. 3.17; 12.18; Mk. 1.11; Lk. 3.22 36Nyuma ya lwaka ulo, Jesu ukawoneka uekeri. Nawo wikanyama kima, hata matuku ghaja ndeweremghorieghe mndungi agho mawono anduangi.

Jesu kum'boisa mwana orekoghe na pepo izamie

(Mat. 17.14-18; Mk. 9.14-27)

37Ituku ja kawi, wimeria kusea kufuma mghondinyi, wikakwana na izungu ibaa ja wandu. 38Nao mndumu kufuma izungunyi ukakema ukighamba, “Mwalimu nakuvoya kumzighane mwanwapo, angu ni mwanwapo wa ititi. 39Wadawadwa ni pepo, nao ahoeni uakema mchungu, nao iamghusha na kumkuna, nao uafunya ifuo na kuvavirika na ndighi; hata ndeimsighagha shwa-shwa anduangi. 40Naghorie na wanughi wako wiiwinge, ela ikawilema.” 41Jesu ukatumbulia, “Inyo kivalwa cha lubando, chisewadie irumirio, niduanya nenyo hata lii? Nirumaghianya nenyo hata lii? Mrede mwanwako aha.” 42Nao iji orekoghe ukicha, ija pepo ikamghusha na kumkuna. Ela Jesu ukaikania ija pepo ya makakala, ukam'boisa uja mwana na kumneka ndee. 43Wandu wose wikashinikia iro ndighi mbaa ra Mlungu.

Jesu kughora sena aighu ya kifwa chake

(Mat. 17.22-23; Mk. 9.30-32)

Nao iji wandu werekoghe wikishinikia iro maza rose oreribonyereghe Jesu, ukawizera wanughi wake, 44“Deghenyi madu msikire agha malagho nicha; Mwana wa Mdamu uchafunywa mikonunyi kwa wandu.” 45Ela wanughi wake ndeweretambukiloghe ni madedo agho anduangi, ghikawivisikia wisedime kughimanya, nawo wikaobua kumkotia agho malagho.

Nani uko M'baa

(Mat. 18.1-5; Mk. 9.33-37)

46Nao ikawuka nganyi aghadi ya wanughi, wikikotiana ngera nani uko m'baa wa wambao.#Lk. 22.24 47Ela Jesu ukimanya maririkanyo ghawo, ukammbwada mwanake mtini, na kummbika kaavui nao, 48ukawizera, “Uo ose uchaammbusa mwanake uhu kwa irina japo, uaniwusa ini; na uo ose uniwusagha ini, uammbusa uo orenidumieghe. Angu uo uko mtini putu aghadi konyu, nuo moni m'baa.”#Mat. 10.40; Lk. 10.16; Joh. 13.20

Uo usemtangalagha oko cha mzenyu

(Mk. 9.38-40)

49Nao Johane ukamzera, “Mwalimu, deremmbonieghe mundu ukiwinga pepo kwa irina jako dikamkania angu usekanyagha nesi.” 50Ela Jesu ukamzera, “Kusakemkania, angu uo ose usemtangalagha, ni onyu.”

Wasamaria kulegha kumkaribisha Jesu

51Nao iji matuku ghalighisa gha uo kudwalwa mlungunyi, ukakata shauri eghenda Jerusalemu. 52Ukaduma wadumi wimkirie, nawo wikaghenda na kungia muzi ghwa Wasamaria, wim'boisire wulalo. 53Ela awo wandu wikalegha kumkaribisha, angu orekatireghe shauri eghenda Jerusalemu. 54Wanughi wake, Jakobo na Johane wiendawona agho, wikamzera, “Bwana, kwakunde dilombe modo kufuma mlungunyi ghuwikore?”#2 Waz. 1.9-16 55Nao ukawighalukia ukawikania [ukaghamba, “Ndemmanyire ni roho ifwane wada muko nayo; angu Mwana wa Mdamu nderechieghe kutotesha marangi gha wandu anduangi, ela kughikira.”] 56Nao wikaghenda muzi mzima.

Awo wichaakaia wanughi wa Jesu

(Mat. 8.19-22)

57Nao iji werekoghe wikighenda chienyi, mndumu ukamzera Jesu, “Nichakunugha andu kose kuchaaghenda.” 58Jesu ukamzera, “Mizozo eko na miruma, na nyonyi reko na vijungu, ela Mwana wa Mdamu ndewadie hata andu korarishira chongo chake anduangi.” 59Nao ukamzera mundu mzima, “Ninughe.” Ela uo mundu ukaghamba, “Bwana nisighe nighende nimrike aba.” 60Jesu ukamzera, “Wisighe wafu wirike wafu wawo, ela oho ghenda kuchile malagho gha Wuzuri ghwa Mlungu.” 61Mundu mzima ukamzera, “Bwana nichakunugha oho, ela nisighe kande nilaghane na wandu wa nyumbenyi kwapo.”#1 Waz. 19.20 62Jesu ukamzera, “Ndekuwadie mndungi ukazoya kulima na ighembe ja ng'ombe, sena uzighaneghe na nyuma, ufwanagha kwa Wuzuri ghwa Mlungu anduangi.”

Currently Selected:

LUKA 9: TAITA

Highlight

Copy