Luk 4

Thëm de Yecu

(Math 4:1-11; Mak 1:12-13)

1Na wën, ke Yecu dɔk enɔm ë Jordan, ke cï thiäŋ ke Wëidït ɣer, ku jɔ Wëidït thɛl ë jɔ̈ɔ̈ric, 2ku jɔ tɔ̈u ë nïn kathiërŋuan ë jɔ̈ɔ̈ric, ke ye them ë jɔŋdït rac. Ku acïn kë cï cam ee köölë, na wën, aacï nïnkë thök, ke jɔ cɔk nɔ̈k.

3Go jɔŋdït rac yɔ̈ɔ̈k an, “Na ye wën ë Nhialic, yɔ̈ɔ̈kë kuurë bïï rɔt tɔ ye kuïn.”

4 # Nyöŋ 8:3. Go Yecu puk nɔm an, “Acï gɔ̈ɔ̈r an, ‘Raan acïï bï pïïr në kuïn etök, ee wël ke Nhialic ëbɛ̈n, yen abï en ke pïïr.”’

5Na wën, ke leerë jɔŋdït rac ë kuurdït bäär nɔm, ku jɔ dap nyuöth bɛ̈i ëbɛ̈n raantök, bɛ̈i ceŋ bäny ke piny nɔm ëbɛ̈n. 6Go jɔŋdït rac yɔ̈ɔ̈k an, “Yïn bä miɔɔc në bɛ̈ɛ̈ny de bɛ̈ike kedhie, ayï dhuëëŋden: cï guɔ yiɛ̈n Ɛn, ku abä gäm raan cä tak. 7Ku yïn, na lam ɛn, käŋ kedhie abïk aa kaku.”

8 # Nyöŋ 6:13. Go Yecu puk nɔm an, “Waanë ë yakɔ̈u ciëën, Catan: acï gɔ̈ɔ̈r an, ‘Yïn bï Bɛ̈nydït Nhialicdu aa lam, ku yen etök yen abä ya luööi!”’

9Na wën, ke bïï Jeruthalem, ku jɔ tääu ë Luaŋdït nɔm, ë këërkëër nɔm, go yɔ̈ɔ̈k an, “Na ye wën ë Nhialic, cuatë rɔt piny ëtënë: 10#Diɛt 91:11,12. acï gɔ̈ɔ̈r an, ‘Abï tuuckɛnhial yiɛ̈n thok në këdu, bïk yïn aa tiit:’ 11ku an, ‘Abïk yï geeny ë kecin, ke yï cïï rɔt bï yuöp ë kuur kɔ̈u.”’

12 # Nyöŋ 6:16. Go Yecu puk nɔm, an, “Acï lueel an, ‘Yïn cïï Bɛ̈nydït Nhialicdu bï them.”’

13Na wën, aacï jɔŋdït rac thëm thöl ëbɛ̈n, ke jɔ jäl ë yelɔ̈ɔ̈m, atit akööldɛn bï rɔt yök.

Yecu Agɔl Luɔide ë Galili

(Math 4:12-17; Mak 1:14-15)

14Go Yecu enɔm dhuöny Galili në riɛl ë Wëidït: go rinke thiëi ë pinyë nɔm ëbɛ̈n. 15Go lɔ wëët ë ɣöötkɛn ë Nhialic yiic, ke leec ë kɔc kedhie.

Yecu acï Rɛɛc ë Nadhareth

(Math 13:53-58; 6:1-6)

16Ku jɔ bɛ̈n Nadhareth, paan ë dïït en thïn: na wën, ke jɔ lɔ ɣön ë Nhialic ëkööl ë Thabath, cït man ë luɔi ee cool ë looi en en, ku jɔ rɔt jɔt bï këcïgɔ̈ɔ̈r bɛ̈n kueenic 17go yiɛ̈n këcïgɔ̈ɔ̈r de tiët Yithaya. Na wën, aacï këcïgɔ̈ɔ̈r liepic, ke yök të cï gɔ̈ɔ̈r an,

18 # Yith 61:1,2 (LXX). “Wëidït ke Bɛ̈nydït acïk nyuc ë yaguöp,

En aa tɔc en a guöp, bä kɔc kuanynyïïn aa guiëër wëlpiɛth.

Acï a tooc bä kɔc cï piɔ̈ɔ̈th jiɛth bɛ̈n duut piɔ̈ɔ̈th,

Ku bä kɔc cï mac bɛ̈n guiëër luny bï ke lony,

Ku guiëër cöör yïn bï kek bɛ yïn,

19Ku guiëër kɔc bɛ̈n de ruöön piɛth ë Bɛ̈nydït

kööl bï En kɔc yɔŋ kony wëi.”

20Na wën, ke jɔ këcïgɔ̈ɔ̈r matic, ku yïn raan ë käŋ looi, ku jɔ nyuc, go kɔc ë nu ɣön ë Nhialic kedhie agokï ye toom guöp ë kenyïïn. 21Go jam gɔl ke keek an, “Köölë këcïgɔ̈ɔ̈rë acï tɔ ye yic ë weyïth.”

22Go kɔc piath de yenthok gam kedhie, ku jɔkï gäi në wël de yiic dhuëëŋ wël ë bɔ̈ bei ë yethok, gokï röt thiëëc an, “Cie wën ë Jothep?”

23Go lɛ̈k keek an, “We bï a dhil lɛ̈k ë kääŋë an, ‘Akïïm, tɔ rɔt dem.’ Këriëëc cuk piŋ an, cï ke looi ë Kapernaum, jɔ ke looi paandun ee tënë. 24#Jɔn 4:44. Go lueel an, “Wek yɔ̈ɔ̈k ë yic an, Acïn tiët cï gam ë paanden guöp. 25#1 Mel 17:1. Ku wek lɛ̈k yic an, Diëër abɛɛr juëc aake nu paan ë Yithriɛl ɣɔn nu Elija, ɣɔn cï tënhial thiöök ë run kadiäk ku pɛ̈i kadhetem, ku nu cɔŋ dït ë piny nɔm ëbɛ̈n. 26#1 Mel 17:8-16. Ku akënë Elija tuöc tiiŋ tök ë keyiic, ee Dharepath etök, paan ë Thidon, yen aa toocë yen thïn, tuc tiiŋ abaar ëtɛ̈ɛ̈n. 27#2 Mel 5:1-14. Ku nu kɔc juëc de gup wɛth paan ë Yithriɛl ɣɔn nu ë tiët Elica, ku acïn raan tök ë keek cï tɔ waar, ee Naaman etök, raan ë Thiriya.”

28Na wën, aa cïk kakë piŋ, kek kɔc nu ɣön ë Nhialic kedhie, ke ke jɔ gɔ̈th arëët. 29Ku jɔkï röt jɔt, ku cieeckï wei pänydït, ku thelkï ë kuurdït nɔm kuur cï pänydɛndït yïk ë yenɔm, an, bïk dɛɛny piny. 30Go jɔ tëëk ë keyiic cil, ku jɔ jäl.

Raan de Guöp Jɔŋ Rac

(Mak 1:21-28)

31Go bɛ̈n Kapernaum, pänydïït ë Galili, ku jɔ keek aa wɛ̈ɛ̈t ë akööl ë Thabath. 32#Math 7:28,29. Gokï gäi në wëëtde: nɔn ciɛthë wëlke në riɛl. 33Ku ade mony nu ɣön ë Nhialic, mony cïï jɔŋ rac dɔm, go cööt ë röl dït an, 34“Cai! Eeŋöda në yïn, yïn Yecu de Nadhareth? Ë yï bɔ̈ bä wo bɛ̈n nɔ̈k? Yïn ŋiɛc nɔn ee yïn Raan ɣeric de Nhialic!”

35Go Yecu jɔ̈ɔ̈ny an, “Mim, ku bä bei ë yeguöp.” Na wën, ke jɔŋ rac jɔ raan wit ë kɔc yiic cil, ku jɔ bɛ̈n bei ë yeguöp, ku kën yiëk tëtök.

36Gokï gäi kedhie, ku jɔkï jam kapäc an, “Ee wël ŋö ëkakë? Ee jɔɔk rac yɔ̈ɔ̈k në riɛl dït, agokï bɛ̈n bei!” 37Go rinke tïc ë baai yic ëbɛ̈n ë pinyë nɔm.

Yecu atɔ Kɔc Juëc Dem

(Math 8:14-17; Mak 1:29-34)

38Na wën, ke jɔt rɔt, ku jël ɣön ë Nhialic, le ɣön ë Thimon. Ku dhiɔm ë Thimon aa tök arëët aye juäi dɛ̈ɛ̈p guöp, ku jɔkï Yecu lɔ̈ŋ në këde. 39Na wën, ke jɔ kɔ̈ɔ̈c ë yenɔm, ku jɔ juäi jɔ̈ɔ̈ny, go juäi päl piny, go rɔt jɔt ënɔnthiinë, ku jɔ ke guiëk.

40Na wën aa lɔ akɔ̈l piny, ke kɔc de kɔckɛn tök ë juän kithic ke ke jɔkï bɛ̈ɛ̈i të nu yen, go ecin thany ë raan guöp ëbɛ̈n, ku jɔ ke tɔ dem. 41Ku bɔ̈ jɔɔk rac bei ë kɔc juëc gup, ke ke cöt an, “Yïn ee Kërtho wën ë Nhialic.”

Go ke jɔ̈ɔ̈ny, ku cïï ke pɛ̈l jam: në ŋïny ŋic kek en nɔn ee yen Kërtho.

Yecu Awɛ̈ɛ̈t në Ɣööt ke Nhialic Yiic

(Mak 1:35-39)

42Na wën, aacï piny ruu, ke jɔ jäl, le jɔ̈ɔ̈ric: go kɔc lɔ kɔɔr, aɣeet kek të nu yen an, bïk pëën, ke cïï bï jäl ë kelɔ̈m. 43Go keek yɔ̈ɔ̈k, Yɛn bï pɛ̈ɛ̈nydït kɔ̈k dhil guëër wëlpiɛth ke Ciɛɛŋ de Nhialic: en aa tuucë yɛn.

44Go wël aa guiir ë ɣööt ke Nhialic yiic piny de Galili.

Currently Selected:

Luk 4: dip-JPB

Highlight

Copy