Mak 2
2
Yecu Atɔ Raan cï Duany Waar
(Math 9:1-8; Luk 5:17-26)
1Na wën, aacï nïn liaakäŋ lɛɛr, ke be lɔ Kapernaum, go kɔc piŋ nɔn nu yen ɣööt. 2Go kɔc juëc dap guëër ɣöt, arëk acïn të lääu be nu, acakaa ɣöt thok aya, acïn të lääu: go ke guiëër wël. 3Na wën, ke kɔc ë ke bɔ̈ kɔc bïï raan cï duany tëde yen, aɣɛ̈ɛ̈cë ë kɔc kaŋuan. 4Na wën, aacï ciën të ɣëët kek ë Yecu lɔ̈ɔ̈m, në baŋ de kut ë kɔc, ke ke ŋany ɣöt nɔm biäk nu yen: na wën, aacï ɣöt nɔm ɣɔ̈ɔ̈r, ke ke jɔ agen luaai piny, agen wën dhɔt ë raan ë yenɔm. 5Të cï Yecu gämden tïŋ, ke yöök raan cï duany an, “Mɛnhdï, karɛcku acï ke päl yïn.”
6Ku ade kɔc kɔ̈k rɛ̈ɛ̈r ëtɛ̈ɛ̈n kɔc ë löŋ gɔ̈ɔ̈r, kɔc wën jam ë kepiɔ̈ɔ̈th an, 7“Eeŋö jiɛɛmë raanë aya? Ë Nhialic lat, eeŋa duëër päl ë karɛc lëu, cie Nhialic Etök?”
8Na wën, ke ŋic Yecu ënɔnthiinë nɔn jɛɛm kek aya ë kepiɔ̈ɔ̈th, go ke yɔ̈ɔ̈k an, “Eeŋö tɛɛrkï ë wepiɔ̈ɔ̈th wäkya?” 9Ee kënou piɔl ë keek të yɔ̈ɔ̈k ɛn raan cï duany an, ‘Karɛcku acï ke päl yïn,’ ku të luɛɛl ɛn en an, ‘Jɔt rɔt, jɔt agendu, cathë?’ 10Ku ënɔɔnë, luɔi bä wek e ŋic nɔn ciɛthë Wën ë Raan ke riɛl ë piny nɔm riɛl bï en karɛc pɔ̈l (ke yöök raan cï duany an,) 11“Yïn yɔ̈ɔ̈k an, Jɔt rɔt jɔt agendu, ku lɔ paandu!”
12Go rɔt jɔt ënɔnthiinë, ku jɔt agende, ku jël ë kɔc nïïm kedhie, arëk abïk gäi kedhie, ku piɔnykï Nhialic, luelkï an, “Kë cït eekënë akënku kɔn tïŋ ananda.”
Yecu Acɔl Lebi
(Math 9:9-13; Luk 5:27-32)
13Na wën, ke be lɔ biic le ë Baar ë Galili yɔu, ku bɔ̈ kut ë kɔc ëbɛ̈n të nu yen, go ke wɛ̈ɛ̈t. 14Ku të tëëk en kueer, ke tïŋ Lebi wën ë Alapayo, arɛ̈ɛ̈r tën ee miriic guaaric nööm thïn, go yɔ̈ɔ̈k an, “Kuany a cök.” Go rɔt jɔt, ku kuɛny cök.
15Na wën, ke Yecu rɛ̈ɛ̈r tën ee cam ɣön ë Lebi, ku rɛ̈ɛ̈r kɔc juëc në yen ëtök ku kɔckɛn ë piööcë, kɔc ë athölbö tɔ kut ku kɔc ee kërac looi: luɔi juëc kek, ku yek kuany cök. 16Na wën, aacï kɔc ee löŋ gɔ̈ɔ̈r ku Parithai e tïŋ acäm kekë kɔc ë athölbö tɔ kut ku kɔc ë kërac looi, ke ke thiëc kɔckɛn ë piööcë an, “Eeŋö ciëm en kekë kɔc ë athölbö tɔ kut ku kɔc ë kërac looi?”
17Na wën, aacï Yecu ye piŋ ke ke yöök an, “Kɔc piɔl gup acïkï akïïm ee kɔɔr, ee kɔc tök tei: yɛn ëcïï bɔ̈ bä kɔc piɛthpiɔ̈ɔ̈th bɛ̈n cɔɔl, në puŋ bï kek kepiɔ̈ɔ̈th puk, ee kɔc ë kërac looi, kek abä bɛ̈n cɔɔl.”
Thiëc në Biäk de Reec ë Cäm
(Math 9:14-17; Luk 5:33-39)
18Ku kɔcpiööcë Jɔn kekë kɔcpiööcë Parithai aake ye cäm rɛɛc: gokï bɛ̈n tëde yen, bïk ku thiëckï an, “Eeŋö ye kɔcpiööcë Jɔn cäm rɛɛc ayï kɔcpiööcë Parithai, ku cïï kɔckuön ë piööcë cäm ee rɛɛc?”
19Go Yecu ke yɔ̈ɔ̈k an, “Duëër wɛ̈ɛ̈t riëëc ë monythiëk cäm aa rɛɛc, të ŋootë monythiëk ke rɛ̈ɛ̈r ke keek? Të ŋoot kek ë ke cath ë monythiëk, acïkï cäm duëër aa rɛɛc. 20Ku akööl abïk bɛ̈n, akööl bï ke monythiëk jɔt ë keyiic, yen abï kek cäm jɔ aa rɛɛc ë aköölkë.”
21“Acïn raan ë lupɔ kënë kɔn cieŋ kaac ë lupɔ thɛɛr kɔ̈u: na loi en aya, ke lupɔ cï piac looi abï lupɔ thɛɛr tɔ rɛɛtic, go të ye rɛɛt tɔ dït awär man wään. 22Ku acïn raan ë mɔ̈n cï piac dhiim tääu ë atheep thɛɛr yiic: na loi en aya, ke mɔ̈n cï piac dhiim abï atheep reet yiic, go mɔ̈u lɔ wei, ku riääk atheep: mɔ̈n cï piac dhiim aye tääu ë atheep cï piac coŋ yiic.”
Thiëc në Biäk de Thabath
(Math 12:1-8; Luk 6:1-5)
23 #
Nyöŋ 23:25. Na wën, ke tëk ë duum ke rap yiic ëkööl ë Thabath: go kɔckɛn ë piööcë gokï rap jɔ dhoŋ, të ciɛth kek. 24Go Parithai thiëc an, “Tïŋ, eeŋö looi kek kë cï pɛ̈n kɔc ë kööl ë Thabath!”
25Go keek yɔ̈ɔ̈k an, “Kɛ̈nkï kɔn kueen ë awerekic në kë cïï Debid looi, ɣɔn dɛk ë käŋ tëde yen, wään nɛ̈k ë cɔk en, yen ku kɔc cath në yen? 26#Leb 24:9. #1 Tham 21:1-6. Luɔi cï en lɔ ɣön ë Nhialic, ɣɔn ye Abiathar bɛ̈nydïït ë kake Nhialic, go kuïn cï pam ɣeric cï gäm Nhialic cam kuïn cï pam, kuïn cïï raan däŋ duëër cam, ee bäny ke ka ke Nhialic kapäc, acï cam, ku miɔɔc kɔc cath në yen aya.”
27Go ke yɔ̈ɔ̈k an, “Thabath acï cak në baŋ de raan, ku acie raan en ë cak në baŋ de Thabath. 28Yen tëde ka, Wën ë Raan ee Bɛ̈nydïït de Thabath ayadäŋ.”
Currently Selected:
Mak 2: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
