Kuɛ̈n 16
16
Agönh de Kɔra, Dathan ku Abiram
1 #
Jud 11. Ëtɛ̈ɛ̈n, Kɔra wën de Yidhar, Yidhar wën de Koɣath, Koɣath wën de Lebai ku Dathan ku Abiram wɛ̈ɛ̈t ke Eliap, ku On wën ë Peleth wɛ̈ɛ̈t ke Ruben, 2mɛ̈tkï në kɔc ke Yithriɛl kɔ̈k lëu bot kaarou ku thiërdhïc, kɔc cï kuɛ̈ny bei në akutnɔm de Yithriɛlic kɔc tiëc rin, 3acïk bɛ̈n guëër në Mothe lɔ̈ɔ̈m kekë Aron ku göthkï në keek luelkï an, “Këdun acäk ŋuak nɔm arëët! Akutnɔm de Yithriɛl ëbɛ̈n aɣeric acïn raan tök. Ku Bɛ̈nydït atɔ̈u ke keek. Ka yeŋö ya wek röt tïŋ cït ka wär kɔc?”
4Na wën, apiŋ ë Mothe ee jamë, ke cuɛt rɔt piny ku lɛ̈ŋ. 5Ku lëk Kɔra kekë kɔc cath në yen an, “Miäk aduduur, Bɛ̈nydït abï wo nyuöth raan ee raande, ku raan ɣeric, ku abï tɔ ɣëët në yelɔ̈ɔ̈m. 6Miäk aduduur yïn Kɔra wekë kɔc mät në yïn nɔ̈mkï abɔ̈c ke tool, 7ku kuɛ̈nykï keyiic mac, tääukï wɛ̈ɛ̈l ŋïïr de tool thïn, ku bɛ̈ɛ̈ikï në Bɛ̈nydït nɔm. Raan le Bɛ̈nydït lɔc yen abï ya raandɛn ɣeric. Këdun acäk ŋuak nɔm, wek wɛ̈ɛ̈t ke Lebai.
8Ku be ë Mothe lɛ̈k Kɔra an, “Piɛŋkï apiɛth, wek wɛ̈ɛ̈t ke Lebai: 9Luɔi cïï Nhialic de Yithriɛl we kuɛ̈ny bei në akutnɔm de Yithriɛl yic ëbɛ̈n, ku tɛ̈ɛ̈u week në kenïïm yak yök ee ke piɔlic? Nɔn ya wek ɣet në yelɔ̈ɔ̈m, ku luööikï Nhialic në paany de mätic, ku luööikï amatnɔm de Yithriɛl ayadäŋ rɛɛc? 10Luɔi cï yen cuöt në yelɔ̈ɔ̈m wedhie wekë wɛ̈ɛ̈takɛckun Lebai cïï piɛth? Ka yïn ŋoot ke yï be bäänydïït de kake Nhialic kɔɔr ayadäŋ? 11Ku ënɔɔnë, acie Aron yen gɔ̈th wek në yen wekë kɔc mät në yïn, ee Bɛ̈nydït, acïn këde Aron tɔ̈u thïn.
12Go Mothe Dathan tɔ lɔ bïïyë kekë Abiram wɛ̈ɛ̈t ke Eliap, gokï lɔ jai luelkï an, “Wok cïï lɔ. 13Kɛ̈në loi në biäk cï yïn wo jɔt ë Rip, piny ee wat ë ca ku miök ë kiëc, ku bä wo bɛ̈n tɔ thou në jɔ̈ɔ̈ric eenë? 14Acïn piny ee wat ë ca ku miök ë kiëc ë bïï yïn wo thïn, ku acïn duum cï gäm wook, duum ke rap, ku nɔn yen duum ke tiim. Ku ënɔɔnë, akɔɔr bä wo bɛ math. Wok ë jai, wok cïï lɔ.
15Go Mothe piɔ̈u diu ku lëk Bɛ̈nydït an, “Duk miɔ̈c de ee kɔckë be gam. Acïn kë cä wäc keek, acïn këdɛn cä nööm na cakaa muul akɛ̈n nööm.
16Ku lëk ë Mothe Kɔra an, “Bä miäk në paany de mät thok, wekë bot kaarou ku thiërdhïc ke kɔc mät në yïn. Ku Aron abï tɔ̈u ëtɛ̈ɛ̈n ayadäŋ. 17Raan ëbɛ̈n në weyiic, wek bot kaarou ku thiërdhïc, ë nöm abɔ̈ny de tool, ku ë kuɛ̈nyë yic mac, ku wɛ̈l nɔm wɛ̈ɛ̈l ŋïïr de tool, ku bïï në Bɛ̈nydït nɔm. Ayï Aron abï bɛ̈n kekë abɔ̈nyde ayadäŋ. 18Na ɣɔn amiäk, ke raan ëbɛ̈n ë nöm abɔ̈nyde, ku kuɛ̈nyë yic mac, ku wɛ̈l nɔm wɛ̈ɛ̈l ŋïr, ku bï bɛ̈n kɔ̈ɔ̈c në paany de mät thok tueŋ në Mothe kekë Aron ëtök. 19Ku ëtɛ̈ɛ̈n, Kɔra ë akutnɔm de kɔc ke Yithriɛl bɛ̈n bɛ̈ɛ̈i, bïï keek bɛ̈n tɔ kääc në paany de mät thok ke ke wel kenïïm Mothe kekë Aron. Ago riau de dhuëëŋ ë Bɛ̈nydït guɔ tul ëthiäu tëde raan cï guëër ëbɛ̈n. 20Ku lëk ë Bɛ̈nydït Mothe kekë Aron an, 21“Nyaaikï në ee akutnɔm de kɔckë lɔ̈m ke ke riääk keek ënɔnthiinë.
22Go Mothe yenɔm guöt piny kekë Aron lɛ̈ŋkï luelkï an, “Acie yen Nhialic, yïn aye Nhialic de pïïr de këriëëc ëbɛ̈n. Bä akutnɔm dïït ë kɔc nɔ̈k në baŋ de kërɛɛc ë raan tök?
23Go Bɛ̈nydït lɛ̈k Mothe an, 24“Tɔ akutnɔm de kɔc nyaai në paany de Kɔra lɔ̈ɔ̈m, kekë paany de Dathan, ku paany de Abiram.
25Go Mothe jäl kekë röördït ke Yithriɛl lekkï të nu Dathan ke ke, Abiram. 26Ku lëk akutnɔm de kɔc an, “Jälkï në pɛɛny ke kɔc rɛckë lɔ̈m, wek läŋ keek, ku duökï de ke jakï në kakeniic. 27Ago kɔc jäl në paany de Kɔra lɔ̈ɔ̈m, ku paany de Dathan, ku paany de Abiram.
Ku ëtɛ̈ɛ̈n, Dathan kekë Abiram acïk bɛ̈n bei në pɛɛnyken yiic, bïk bɛ̈n kɔ̈ɔ̈c në pɛɛny thook në diäärken, ku mïthken. 28Go Mothe lɛ̈k kɔc an, “Yen ke bä wek en jɔ ŋic kï ëgɔk nɔn ë tooc ë Bɛ̈nydït Ɛn bä ee kake bɛ̈n looi kedhie, ke cie yɛn ë tak en në nɔmdï. 29Të le kɔckë thou në thon ë jäŋ ke cïn kë lui ë Bɛ̈nydït keek, ke Bɛ̈nydït akën Ɛn tooc. 30Ku na man na lɔ Bɛ̈nydït ke nɔ̈k në nääk mɛɛn kënë kɔn piŋ, nääk liep ë piny rɔt ku tuiic keek apïr në këriëëcden ëbɛ̈n, abïk ɣet paan ë thuɔɔu ke ke pïr, abäk jɔ ŋic ëgɔk nɔn cïï kɔckë Bɛ̈nydït rɛɛc ë yic.”
31Na wën, aa cï Mothe thök në jam, ke piny tuer rɔt në Dathan cök piny kekë Abiram, 32Ku tuiic keek në bɛ̈iken, mɛtkï në Kɔra, ku kɔc mät në yen kedhie, ayï këriëëcden ëbɛ̈n. 33Agokï lɔ piny ke ke pïïr paan ë thuɔɔu në kaken ëbɛ̈n, Go tiɔp rɔt thiöök ë kenïïm, agokï riäär taitai ë amatnɔmic. 34Ago kɔc ke Yithriɛl wën nu kat kedhie në kiɛɛuden. Gokï lɛ̈k röt an, “Kɔtku! Tɛk däŋ bï piny wo tuiic ayadäŋ!
35Go mac bɛ̈n nhial tëde Bɛ̈nydït ku nyop bot kaarou ku thiërdhïny ë raan wën muk abɔ̈c ke wal ŋïr.
Abɔ̈c ke Tool.
36Go Bɛ̈nydït lɛ̈k Mothe an, 37“lɛ̈kë Eleyadhar wën ë Aron, bɛ̈ny de kake Nhialic ë nöm abɔ̈c ke tool cï cuëëc në ateek, abɔ̈c ke kɔc wën cï nyop. Ku tɔ wɛl keyiic wei në mac tëdäŋ, në biäk ye abɔ̈c ke tool kaɣeriic. 38Acïk yiic ɣɛɛr të wën gëmë keek Bɛ̈nydït në yïk nɔm. Tɔ nöm abɔ̈c ke tool ke kɔc cï näk awänyden, ku thɔ̈ɔ̈th kek aduuk ke ye akum de yïk nɔm. Yen abï kɔc ke Yithriɛl jɔ aa jɔ̈ɔ̈ny ë ceŋ. 39Go Eleyadhar, bɛ̈ny de kake Nhialic, abï maläŋ nööm, ku le keek tɔ thäth ke ye akum de yïk nɔm. 40Yen ee kënë, aaye jäny jiëënyë kɔc ke Yithriɛl, nɔn cïn en raan däŋ pei bï wɛ̈ɛ̈l ŋïïr ye nyop bï ya gam në yïk nɔm, të cïn kuat de Aron. Na lɔ raan däŋ ye gam, ka abï riɔ̈ɔ̈k cït man ë Kɔra kekë kɔcke. Go Eleyadhar këriëëc cïï Bɛ̈nydït lɛ̈k Mothe looi.
Aron Aluäk Kɔc.
41Na ɣɔn amiäk, ke akutnɔm de kɔc ke Yithriɛl ë dok ëbɛ̈n në Mothe kekë Aron luelkï an, “Wek ë kɔc ke Bɛ̈nydït nɔ̈k. 42Na wën, aacï akutnɔm guëër në Mothe lɔ̈ɔ̈m kekë Aron ke ke göth në keek, ke ke liec paany de mät, gokï tïŋ acïï luät paat piny, ku tïŋkï riau de dhuëëŋ ë Bɛ̈nydït acï tuöl. 43Go Mothe lɔ në paany de mät thok tueŋ kekë Aron. 44Go Bɛ̈nydït lɛ̈k Mothe kekë Aron an, 45“Nyaaikï në ee akutnɔm de kɔckë lɔ̈m ke riääk keek ënɔnthiinë në cökiic ëtɛ̈ɛ̈n.
Gokï kenïïm guöt piny kedhie kaarou, 46Ku lëk ë Mothe Aron an, “Nöm abɔ̈nyduön ë tool, ku kuɛ̈nyë yic mac në yïk nɔm, ku yiëkë nɔm wɛ̈ɛ̈l ŋïïr de tool, ku dap kat we yen, lɔ tol akutnɔm de kɔc ke ke bä ke teem gup. Dap kat agönh ë Bɛ̈nydït ë tïc, ka jɔɔk acïk kɔc guɔ dɔm. 47Go Aron jam de Mothe gam, ku nööm abɔ̈ny de tool, ku kɔt ke lɔ të tɔ̈u ë amatnɔm thïn. Na wën, atïŋ nɔn cïï jɔɔk kɔc päär, ke tɛ̈ɛ̈u wɛ̈ɛ̈l ŋïr në abɔ̈c yic, ku jɔ kɔc teem gup. 48Go kɔc ŋuɛ̈ɛ̈n, go Aron döŋ ke kääc në kɔc cï thouwiic, mɛtkï në kɔc pïr. 49Ago aguum kathiëër ku ŋuan ku bot kadhorou thou të cïn kɔc ë thou në Kɔra ëtök. 50Na wën, acï jɔk kɔ̈ɔ̈c, ke Aron ë puk enɔm Mothe në paany de mät thok.
Currently Selected:
Kuɛ̈n 16: dip-JPB
Highlight
Copy
Compare
Share
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.