Kuɛ̈n 20
20
Kak ë Loi Röt në Kadec.
1Akutnɔm de kɔc ke Yithriɛl ëbɛ̈n lɔ piɔ̈ɔ̈t në Kadec, në jɔ̈ɔ̈r de Dhin në pɛɛi tueŋ. Go Miriam lɔ thou ëtɛ̈ɛ̈n, go thiɔ̈k.
2 #
Bɛ̈n 17:1-7. Ku acïn pïïu ë nu të wään cï akutnɔm piɔ̈ɔ̈t thïn. Gokï guëër në Mothe lɔ̈ɔ̈m kekë Aron. 3Ku dokkï në keek luelkï an, “Aŋuän na ë wo cï thou në paany de Bɛ̈nydït thok në kɔckuɔn wään thou ëtök. 4Eeŋö bɛ̈ɛ̈i wek amatnɔm në ee jɔ̈ɔ̈rë yic, buk bɛ̈n thou eenë, wook në ɣɔ̈kkuɔ? 5Eeŋö bɛ̈ɛ̈i wek wook bei Rip, bɛ̈ɛ̈ikï wook ee të rɛɛc cïn ke ye cil thïn? Piny cïn rap, ku cïn ŋaap, ku cïn enap, ku cïn Pomegraneet, ayï pïïu aya aliukï. 6Go Mothe kekë Aron jäl në amatnɔm lɔ̈ɔ̈m, ku lek kɔ̈ɔ̈c në paany de mät thok. Gokï kenïïm guöt piny, go riau de dhuëëŋ ë Bɛ̈nydït tuöl tëde keek.
7Go Bɛ̈nydït lɛ̈k Mothe an, 8“Nöm thieec, ku matkï akutnɔm de kɔc nïïm kedhie wekë Aron wänmuuth. Ku jäämë kuur në kenïïm, ku pïïu abïk tuöl në kuur kɔ̈u. Yen kueer bï yïn kɔc yɔ̈k pïïu ka në kuur kɔ̈u, ayï ɣɔ̈kken. 9Go Mothe thieec nööm cït man cïï Bɛ̈nydït ye lɛ̈k en.
10Go Mothe kekë Aron amatnɔm tɔ guëër në kuur lɔ̈ɔ̈m. Ku lëk ë Mothe keek an, “Piɛŋkï apiɛth, wek adhuɔŋ lööŋ! Buk week gäm pïïu në ee kuurë kɔ̈u?” 11Go Mothe thieec yɔɔk ku yum en kuur kɔ̈u raan rou, go pïïu juëc lɛ̈u. Go akutnɔm de kɔc dek kedhie ku dëk këriëëcden ëbɛ̈n.
12Go Bɛ̈nydït lɛ̈k Mothe kekë Aron an, “Në baŋ kɛ̈n wek Ɛn gam apiɛth, ku kɛ̈nkï riɛldï nyuöth kɔc ke Yithriɛl, ayï ɣɛɛr de yayic, wek cä keek bï bɛ tɔ ɣeet amatnɔmë piny bä gäm keek.
13Kënë aa loi rɔt në Meriba,#20:13: meriba: Rinkë në Ɣeberuu ee “dok.” të ɣɔn dok ë kɔc ke Yithriɛl në Bɛ̈nydït, go Bɛ̈nydït ke nyuöth luɔi ɣeer en yic.
Bɛ̈ny de Edom Apën Yithriɛl Tëëk.
14Mothe ë kɔc bɛ̈n tooc Kadec, tuc keek melik de Edom, lek lɛ̈k en an, “Ke mïthëkɔckun lueelkï, kɔc ke Yithriɛl. Acïk lueel an katuc cuk guum ëbɛ̈n aŋiɛckï keek. 15Luɔi wään cïï wärkuɔ lɔ Rip, ku lek cieŋ ke ke rɛɛr ëtɛ̈ɛ̈n. Ayï luɔi cïï kɔc ke Rip wook bɛ̈n akuöc luööi. 16Na ɣɔn acuk luääk lip tëde Bɛ̈nydït, ke piŋ wothook, ku tuc wook tunynhial bï wo bɛ̈n bɛ̈ɛ̈i bei Rip. Ku ënɔɔnë, wokï rɛ̈ɛ̈r Kadecë, wun tɔ̈u në aken ë pinydun nɔm. 17Ka yïn, pätë wook, tɔ wo tëk pinydu. Wok cï bï tëëk në duumiic, ayï dum ke tiim, ku cuku dëk në yïthkun. Ee kueer yen abuk kuanyic, ke wok cïï röt yiɛl cuëëc ku cuku röt yiɛl ciɛɛm,#20:17: kueeric; nɔn ee Kueer de Melikic. abuk pinydun winy thok.
18Go kɔc ke Edom puk nɔm an, “Wok ë jai, wek cuku bï tɔ tëk pinyda. Të la wek tëëk, wek buk gëk.
19Go kɔc Yithriɛl lueel an, “Ee kueer yen buk kuanyic, na lok pïïukun dek, ku nɔn ee ɣɔ̈kkuɔ kek lɔ dek, ka abuk keek cuat piny. Tɛk tei yen ta wek wook tëk, acïn däŋ kɔɔrku.
20Go kɔc ke Edom ŋoot ke ke jai, luelkï an, “Wok ë jai. Ku gɔpkï tɔŋdïït agök, tɔŋ ril yïnkï Yithriɛl. 21Yen luɔi ë pën ë kɔc ke Edom Yithriɛl tɛk ka, go Yithriɛl yenɔm puk.
Thon de Aron.
22Ago kɔc ke Yithriɛl akutnɔm ë bɛ̈n jäl Kadec kedhie lekkï në Kuur de Ɣor, 23në aken Edom nɔm. Go Bɛ̈nydït lɛ̈k Aron ëtɛ̈ɛ̈n, kekë Mothe an, 24“Në baŋ wään cä wek löŋdï dhoŋ kɔ̈u në Meriba, Aron acï bï bɛ ɣet piny gäm Yithriɛl. Abï thou. 25Ka yïn, jɔt Aron kekë Eleyadhar wënde, lɛɛrë keek në kuur ë ɣor nɔm. 26Na cak ɣet ëtɛ̈ɛ̈n, ke yï yɔ̈ɔ̈t lupɔɔ ke bääny de kake Nhialic bei në Aron kɔ̈u, ku tääuwë keek në Eleyadhar kɔ̈u. Aron abï thou ëtɛ̈ɛ̈n. 27Go Mothe ke cïï Bɛ̈nydït lueel looi. Agokï lɔ nhial në kuur ë ɣor nɔm, ke ke woi në akutnɔm de kɔc ke Yithriɛl. 28#Bɛ̈n 29:29; Kuɛ̈n 33:38; Nyöŋ 10:6. Na wën, ke Mothe ë yɔ̈ɔ̈t lupɔɔ ke bääny de kake Nhialic bei në Aron kɔ̈u, ku tɛ̈ɛ̈u keek në Eleyadhar kɔ̈u. Go Aron thou nhial ëtɛ̈ɛ̈n në kuur nɔm, ku bïï Mothe piny kekë Eleyadhar. 29Na wën, apiŋ akutnɔm en nɔn cïï Aron thou, go ë baai de Yithriɛl ëbɛ̈n ye dhiëëu në nïn kathiërdiäk.
Currently Selected:
Kuɛ̈n 20: dip-JPB
Highlight
Copy
Compare
Share
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.