Yoane 11

Naye ono Lasaro

1 # Luk 10:38-39 Oŋuai nyia obo atulo alla anya Lasaro. Amanya nyia inyi Betani, abore gala ninyia amanyarik bo Maria iko haniyonyi Marta. 2#Yoa 12:3(Maria ania ninyia ottu 'to iyalana ariaa ihejek Lamonye, ette ifufus to oofir honyi. Illanyi nyia Lasaro, ollo oŋuai 'to alia.) 3Ifahini nyia aniyarak hunia eram jio Yesu jiojio: “Lamonye, oŋuai orriahata hoi elle imuno iyye bebe.”

4Ninyia itaniŋu Yesu eram ania, ette inyi jiaran, “Obeŋ adi esidi ono aŋuai ania ara naye ono Lasaro. Ati iyaŋuno adi inyi akuatan jio Hollum, oŋida” itahuye Lonyi Hollum tenyi.

5Obuor nyia ataji Yesu Marta iko haniyonyi buo Lasaro. 6Ania, ninyia itaniŋu inyi jio oŋuai Lasaro, ette inyi inyiak itoŋonia omuk oŋitek arrihai jio amaji ninyia awanari inyi. 7Attati inyi jiaran jio lejifak honyi jio, “Hacahatti ifau Yudea.”

8Buo lejifak ette itarraŋ jiojio, “Hettiyanani, hetehi nyia bu aati hia jiaran eruoŋ iyye ta amoruoi. Iwak iyye inyiak icaharu diya?”

9Itarraŋ nyia Yesu isi ojio, “Obeŋ soho oloŋ abotie owon iko asahien 'tomon harrihai? Alla adaha obo atulo ta afanni, ittallik inyi ibosonia eju; nyio, igonyu inyi afaŋan ono afau ana. 10Buo alla adaha obo atulo ta narue, oremik inyi ibosonia eju; nyio, obeŋ afaŋan jihonyi.” 11Ninyia iken Yesu erre hunia, ette inyi jiaran jio lejifak honyi, “Ajotoro motte hohoi Lasaro, halo ni itaheny inyi.” 12Buo lejifak itarraŋi ojio, “Lamonye, alla ajotoro inyi jotoro, oŋida adi fe inyi.”

13Ati ikiana nyia Yesu jio aye Lasaro, buo isi igigiloi jio, ojio nyia Yesu ojoto Lasaro luŋa joto. 14Attati Yesu ipulonia jihosi jiojio, “Aye Lasaro. 15Ati te eram hatai, amuno ni nyio, abeŋ nyia ni awon ikonyi. Tania, ifuatta adi itai iruk ariŋ anna alo ni ihanio. Hafatta jihonyi.”

16Attati Tomaso (elle iloŋoi Aturoti) jiaran jio lejifak hullomuk jio, “Hafatta 'daŋ iko ettiyanani oŋida efuo iye ikonyi!”

Yesu, inyi Nebuhuna iko Nesu

17Ninyia lafany Yesu, onyurak nyia inyi Lasaro anuhani ilume. Allaŋi nyia oŋitek aŋuan. 18Onyiha nyia abore gala Betani iko Yerusalem. Ara nyia inyi ihuo amaili arrihai. 19Ofuonni nyia Yudei arriai jio Marta iko Maria inefuniere jihosi atuari illasi.

20Ninyia itaniŋu Marta jio lattu Yesu, ette inyi leten irraŋuna inyi buo Maria owon itua haji. 21Ikiana nyia Marta jio Yesu jio, “Lamonye, elle iwon nyia iyye dini, obeŋ nyia illaŋ oye! 22Ati ara duadi bu ihuania, amijak ni jio isiarak adi Hollum luŋa jihoi erre 'daŋ hunne imojo iyye jihonyi.”

23Buo Yesu ette iramana inyi jio, “Ibuhu adi illahoi.”

24Itarraŋ nyia Marta inyi ojio, “Amijak ni jio, ibuhu adi inyi iholoŋ ono esidi fau.”

25Buo Yesu ette jiaran jihonyi jio, “Ani ebuhuna iko nesu. Isu adi lia, elle iruk 'to jihoŋ duadi bu oye inyi. 26Obeŋ adi lia, alla amanya 'to toni, buo fe iruk jihoŋ ojio aye 'tuŋ. Iruk iyye erre hunia?”

27Itarraŋ nyia inyi ojio, “Lamonye, eruk ni jio iyye Olonyimoto, Lonyi Hollum, linyia ojiori ottu adi jio afau ana.”

Oyyoo Yesu

28Ninyia ikenu Marta erre hunia, ette inyi icaharu, ette iloŋuna haniyonyi Maria, ette imuaŋana jihonyi jio, “Ettiyanani olo dini, iloŋo iyye.” 29Ninyia itaniŋu Maria erre hunia, ette inyi dioto, ette iruharu jio Yesu. (30Hobeŋ nyia Yesu afany itua miji. Harasa nyia inyi jio amaji ninyia oruaŋarik isi iko Marta.) 31Ijifarai nyia ayyook tuari hunyia owoni 'to iko Maria itua haji inyi, ninyia igonyuni isi adioto honyi yek, ette leten. Igigiloi nyia isi jio olo adi inyi iyyoo ilume.

32Attati Maria ifanyan jio amaji ninyia awanari Yesu. Ninyia igonyu inyi Yesu, ette inyi irruaŋana ahuan honyi ihejek honyi, ette jiaran jihonyi, “Lamonye, iwon nyia iyye dini, obeŋ nyia illaŋ oye!”

33Ninyia igonyu Yesu ayyoo Maria iko ayyoo waati hunyia owoni 'to ikonyi, ette ataji honyi imehino bebe; 34ette inyi ifiyo isi jiojio, “Ajia inuhana itai inyi?”

Itarraŋi nyia isi inyi ojio, “Lamonye, waŋ imija.”

35Oyyoo nyia Yesu, 36buo aati hua, ette jiaran, “Ike imijata, obuor ataji honyi ayaani alia bebe!”

37Ati ojiori nyia omuk jio, “Itaŋida nyia inyi oŋite oloŋodo; nyio nyiati ittallik inyi itik aye Lasaro?”

Itubuhuni Lasaro Toye

38Inyiak nyia ataji Yesu imehino bebe, ette inyi leten ilume ninyia ara 'to ahinom onno ottuhoni ekat honyi ta amoruo; 39ette ihum iramana jio, “Ittabororo amoruo ania addi!”

Buo Marta, haniye ayaani alia, ette itarraŋ ojio, “Lamonye, ŋadi oŋuoju. Nyio, arai oŋitek ihuania aŋuan many to ninyia onuhanierek inyi!”

40Buo Yesu ette jiaran jihonyi jio, “Abeŋ duo ni eramak itai jio igonyuna adi itai akuatan Hollum elle iruhoto itai?” 41Ania ette isi ittabororo amoruo nyia addi; ette Yesu ibonno ahide, ette jiaran, “Monye, esio ni jihoi ahumo te etayirio hoi jihoŋ. 42Amijak ni jio itayiratio iyye jihoŋ motie motie, ati ekiana ni ihuania te eram eluluŋ tulo ana jio, oŋida isi iruhi jio iyye nyia ifahu ani.” 43Ninyia lattohu inyi ekiana ania, ette inyi iloŋ woŋ woŋ jiojio, “Lasaro, ojiŋu allet!” 44Buo ayaani alia ette ijiŋuna allet, buo ahas iko eejek honyi obubunai ta aboŋojin hunyia onuhanierek inyi, buo fe aboŋo atara ihomom honyi. Attati Yesu iramana isi jio, “Ohouna aboŋojin addi, ijiara inyi hételo.”

Ewwahuna Ittohori Yesu

(Mat 26:1-5; Mar 14:1-2; Luk 22:1-2)

45Attati aati arriai hunyia ofuonni 'to jio Maria iruk jio Yesu, ninyia igonyuni isi erre hunyia ihan Yesu. 46Ati acaharai nyia omuk hulosi jio Farisei, ette iramana isi erre hunyia ihan Yesu. 47Ania, ette Farisei iko ehumak elettaha itiloŋ ewwaha ono Olokikoi Yudei, ette jiaran, “Ehan adi anyio? Ike imijata eduariti 'daŋ hunne ihanio atulo alia! 48Elle edehi inyi ihuo nyia, ette adi aati 'daŋ iruk jihonyi, buo gala Roma ette adi ifuanna itattur Aaji hohoi emojit enne ittokon iko afau hohoi!”

49Attati obo olosi, afure honyi Kaifas, linyia ara 'to a hehumani elle ittokon te eeŋa nyia jiaran jihosi jio, “Jai, obeŋi hossi! 50Ibiaŋata itai imijana jio iyyak jio atulo abotie iyeri ta aati 'daŋ, agalik afau 'daŋ itturori?” 51Obeŋi nyia ekenita hunia ofuonnii to hou honyi, ati ta arahan honyi ehumani elle ittokon te eeŋa nyia, ikilu nyia inyi jio olo adi Yesu iye te eram Israele. 52Obiaŋara nyia tesi hama, ati ittubaniere amaji abotie aati Hollum 'daŋ hunyia isarrahini 'to.

53Itterio to oloŋ nyia many ahosiere, iwwahuni nyia elettaha Yudei ekoi onno ofuarik ittohori Yesu. 54Tania, obeŋ nyia Yesu inyiak idaha sool ihiji Yudei. Olo nyia inyi teya jio obo amaji etteger hidiofo, jio obo abore gala anna anya Efreim, ette itoŋo diya iko lejifak honyi.

55Iliaha nyia eyom ono allaŋan, ette aati ifuatan Yerusalem to misihi hosi italiboriere ahuattek hosi hobeŋ oloŋ enne iyomorik. 56Ottifiai nyia isi Yesu. Buo ninyia attubanie isi itua Haji emojit enne ittokon, ette isi ifiyo ahuattek hosi jio, “Igigiloti itai aŋai? Oremik attadi inyi hode ittuna jio neyom ana?” 57Ihumi nyia ehumak elettaha iko Farisei iramana eram jio, elle igonyu obo atulo Yesu, ijiara inyi iramak isi, oŋida bati isi enefu inyi.

Currently Selected:

Yoane 11: EA2003

Highlight

Copy