Yoane 10
10
Etarriamai ono Eyyahani
1Attati Yesu jiaran jio, “Hode hode, eramak ni itai jio, lia, ollo obeŋ 'to ojiŋa itua bore kioro totto kol, buo ojiŋa to obo ekoi hama, ara inyi olohoho buo fe a hahoroni. 2Buo lia, ollo ojiŋa 'to diya totto kol, inyi eyyahani. 3Aŋahi errirriani kol jihonyi ekat, ette akioro itaniŋuna etuk honyi, buo inyi ette iloŋ akioro honyi ta afureta hosi ababo, ette iyyaharu isi. 4Itajiŋu nyia inyi isi addi totua bore, ette leten to osiere hosi, buo isi ijifarai ehalu honyi, nyio, omijani isi etuk honyi. 5Obeŋi adi isi ijifarai obo atulo ollo olufa, ati ofuhororoi adi isi addi jihonyi, nyio, otimoi isi etuk honyi.”
6Iramak nyia Yesu jihosi etarriamai ana, ati obeŋi nyia isi omijani awoyo hiram honyi.
Yesu Eyyahani Oloyijio
7Ania, ette Yesu inyiak jiaran jihosi jio, “Hode hode, eramak ni itai; ani akol kioro. 8Hia 'daŋ, hunyia ofuonni 'to habeŋ ni attu, arai isi ahahalak, buo fe ahahorok. Ati obeŋi nyia akioro itayirie jihosi. 9Ani akol. Italuahuni adi hia 'daŋ hullo ojiŋuni 'to tottoloŋ; ojiŋuni adi isi attua, buo fe ojiŋari allet, iŋiyere amiyaŋ. 10Ottu olohoho ihoholiere, ittohiere, buo fe ittarrohojiere. Ati attu ni isiaraniere jihatai nesu; nesu enne ifut 'to bebe.
11“Ani eyyahani oloyijio, alla aremik 'to iye te eram hosi. 12Ati ofuhororo adi atulo ollo ojurunie ijuruno, elle igonyu inyi elewo ottu. Nyio, obiaŋara inyi eyyahani kuyya lamonye kioro. Idiaharu adi inyi akioro hunia buo elewo ette ihonya isi, ette itisarrahina isi. 13Ofuhoro atulo ollo ojurunie ijuruno, nyio, ara inyi olojurata ijiai buo fe obeŋ igigilo te eram akioro hunia. 14-15#Mat 11:27; Luk 10:22Nani eyyahani oloyijio. Ihuo onno omijaniere Monyoŋ nani, buo fe ni amijak inyi; ihuo nyia buo fe amijak ni akioro hoŋ, buo fe isi omijani ani. Aremik buo fe ni luŋa iye tesi. 16Owoni buo fe omuk akioro hoŋ hunno obeŋi owoni jio abore ana. Alo adi ni luŋa iyaŋuno isi dini. Itayirie adi isi ekiana hoŋ, ette irahan#10:16 ette irahan : igioroni omuk egierita jio, owon adi. eluluŋ kioro abotie, iko eyyahani abotie.
17“Obuor ataji Monyoŋ nani, nyio, aremik ni isiarana nesu hoŋ, inyiahari ifuotuniere inyi. 18Obeŋ obo oremik iduhara nesu addi jihoŋ, ati nani ta ahuan hoŋ aramik isiarana inyi. Awon ni iko agolon isiaraniere inyi addi, buo fe inyiahuniere inyi. Ariŋ ania ninyia ojio Monyoŋ ijiara nani luŋa ehanio.”
19Te ekenita hunia, inyiak egigilo waati Yudei ibuanya. 20Ojiori nyia arriai hosi jio, “Owon inyi iko aminiaŋati! Isita inyi! Nyio itayiriete itai jihonyi?” 21Buo hullomuk ojiori jio, “Ittallik atulo miniaŋati ikiana erre hunna arai 'to ihuo hunia? Aŋai oremik aminiaŋati itaŋida oŋite ŋodok?”
Ehara Waati Yesu
22Oŋitek huno ayafajin hacoro nyia hunia, isi oŋitek hunne iyomorik aati Neyom enne isiaranierek Aaji emojit enne ittokon otto Yerusalem jio Hollum. 23Ilatta nyia Yesu idafata ono Solomon, Ihaji emojit enne ittokon, 24ania, ette Yudei ittubanio jihonyi, ette jiaran jio, “Many baya adi ibeŋ iyye ipulok jihohoi eram hoi? Opulok jihohoi sar sar, elle ira iyye Olonyimoto.”
25Itarraŋ nyia Yesu isi ojio, “Eramak nyia ni itai, ati ibiaŋata nyia itai iruhoto. Itahutani adi erre hunne ehan ni ta agolon ono Monyoŋ jio, nani ŋai. 26Ati ibiaŋata itai iruhoto, nyio, ibiaŋata itai irata akioro hoŋ. 27Itayirie akioro hoŋ ekiana hoŋ. Amijak ni isi, buo fe isi ijifatie ani. 28Esiarak adi ni jihosi nesu 'tulaŋ; obeŋi adi isi oye jio 'tuŋ. Obeŋ adi tulo ohororo isi jihoŋ. 29Agalik Monyoŋ, elle isio 'to isi jihoŋ#10:29 Agalik Monyoŋ, elle isio 'to isi jihoŋ : igioroni omuk egierita jio: Monyoŋ erre isio 'to isi jihoŋ, agalik inyi., aati 'daŋ. Ittallik obo atulo ihororo isi ta has honyi. 30Nani iko Monye, era hohoi ihuo atulo abotie.”
31Attati aati inyiak ihuruna amoruoi iruoŋiere inyi. 32Buo Yesu ette jiaran jihosi, “Ehan ni erre ayijok arriai jihatai hunyia isiarak Monyoŋ jihoŋ ihaniere. Anani jihosi enne iwahatti itai iruoŋiere nani?”
33Itarraŋi nyia isi jio, “Ebeŋ hohoi ewak eruoŋio iyye te ehanio hoi erre ayijok, ati te etarrohojo hoi afure Hollum. Iyye atulo asai, buo iyye iwak jiaran jio, iyye Hollum!”
34Itarraŋ nyia Yesu isi ojio, “Igioroni Ifahita hatai jio, ojio Hollum jio, ‘Irata itai ajiohin.’ 35Emijak hohoi jio, arai erre hutto Buk Hollum ahode, buo fe Hollum iloŋo aati hunyia isiarani asayyo honyi, ajiohin.
36“Onyimu nyia Monye nani, ette ifahuna jio afau ana; aŋai ati ijiatta itai etarrohojo ni afure honyi, ta ajiaran hoŋ jio, ‘Nani Lonyi Hollum’? 37Hèruhoto ati eram hoŋ, alla abeŋ ni ehanio erre hunno ojio Monyoŋ oŋida nani ehanio. 38Buo elle ehanio ni erre hunia, duadi bu ibiaŋata itai iruhoto ani, iruhoto ati erre hunne ehanio ni, oŋida bati imijana 'daŋ jio owon Monye jihoŋ, buo fe ni awon jio Monye.”
39Awahi nyia isi inyiak inefuna inyi, buo inyi ette ipulucaro jihosi.
40 #
Yoa 1:28
Attati Yesu icaharu ifohor owore Yordano tole, amaji ninyia itifuociere Yoane batisimo jio aati, ette leten itoŋo diya. 41Ofuonni nyia aati arriai jihonyi, ette jiaran jio, “Obeŋ nyia Yoane ihan obo eduarit, ati arai erre 'daŋ hunyia ikiana inyi te eram atulo olo hode.” 42Iruhi nyia arriai waati hunyia owoni 'to diya eram honyi.
Currently Selected:
Yoane 10: EA2003
Highlight
Share
Copy
Want to have your highlights saved across all your devices? Sign up or sign in
© The Bible Society in South Sudan 2003
