Yoane 9
9
Itaŋida Yesu obo Latulo elle Isiuni ollo Oŋodo
1Ninyia alari Yesu, ette inyi igonyuna obo atulo linyia isiuni ollo oŋodo. 2Attati lejifak honyi ifiyo inyi jiojio, “Hettiyanani, eyyata ŋai hunne itisiuni 'to atulo olo oŋodo? Hunonyi kuyya huno esiok honyi?”
3Itarraŋ nyia Yesu isi jio, “Obeŋ aŋodo honyi ara te eram ono eyyata honyi kuyya huno esiok honyi. Oŋodo inyi jio, oŋida bati itahutani egiama ono eduarit Hollum tenyi. 4Hafaŋ ihua ana, haduloro luŋa ihanio egiama lia, linyia ifahu 'to nani; nyio attari onno ottu, enne ittallihorik aati igiamari. 5#Mat 5:14; Yoa 8:12Hawon ni ifau dini, ara ni jihonyi afaŋan.”
6Ninyia ikenu inyi erre huna, ette inyi imitana amilak ifau, ette inyutuna efuoto ta amilak hua, ette irrinyana ihoŋite oloŋodo alia, 7ette iramana inyi jio, “Ilo imujulai itafar Silowam.” (Ojio awoyo hiram Silowam jio, “Efahina.”) Ania, ette oloŋodo alia leten, ette imujula omom honyi, ette icohuno ollo omijio. 8Attati onyihari honyi iko aati hunyia amijani 'to emimojo honyi jiaran jio, “Obiaŋara soho atulo olo elle itoŋotio 'to buo imimojo?”
9Ojiori nyia omuk jio, “Inyi alia,” buo omuk ojiori jio, “Obeŋ, iyyalu inyi atulo lia iyyaluna.”
Ania, attati atulo alia ta ahuan honyi iramana isi jio, “Ani luŋa alia.”
10Buo isi ette ifiyo inyi jio, “Aŋai ati omijie oŋite hoi?”
11Buo inyi ette itarraŋ ojio, “Atulo alla anya 'to Yesu nyia inyutu efuoto, ette irrinyana ihoŋite hoŋ, ette ifahina ani imujulari itafar Silowam. Teya teya, ninyia emujula ni, ette ni imijio.”
12Attati isi ifiyo inyi jio, “Tali inyi?”
Buo atulo alia ette itarraŋ ojio, “Atimo ni.”
Ottifotie Farisei Awoyo Hiram ono Etaŋidario Ania
13Attati isi iyaru atulo linyia oŋodo 'to alia jio Farisei. 14Inyutu nyia Yesu efuoto nyia to noloŋ Sabatto, ette itaŋida oŋite atulo alia. 15Attati Farisei inyiak ifiyo atulo alia jio, aŋai nyia itaŋidari oŋite honyi. Buo inyi ette iramana isi jio, “Orrinyak nyia Yesu efuoto ihoŋite hoŋ, ette ni imujula, ania amijiere ni ihuania.”
16Attati omuk hulo Farisei jiaran jio, “Obeŋ atulo elle ihan 'to ariŋ ana ottu jio Hollum nyio, obeŋ inyi oniŋio efahi ono Sabatto.”
Ati ojiori nyia omuk jio, “Aŋai ti oremik eyyani ihanio eduariti hunna arai 'to ihuo hunia? Ania, awanari abuanya ihiji hosi.”
17Tania, inyiahi Farisei ifiyo atulo alia jio, “Te etaŋida honyi iyye, ijio ati iyye ara atulo alia anyio?”
Itarraŋ nyia inyi isi ojio, “Ara inyi a hekianani Hollum.”
18Ati obeŋi nyia elettaha Yudei awahi iruk jio oŋodo nyia atulo alia, ati inyiak inyi mijio; ania ette isi iloŋuna esiok honyi, 19ette ifiyo isi jio, “Lonyi hatai olo, elle ijiatta itai jio isiuni nyia ollo oŋodo? Aŋai ti oremik inyi mijio ihuania?”
20Itarraŋi nyia esiok atulo alia jio, “Emijak hohoi jio, Lonyi hohoi alia, buo fe emijak jio isiuni nyia inyi ollo oŋodo. 21Ati etimo hohoi aŋai oremik inyi inyiak imijio, kuyya ŋai itaŋida oŋite honyi. Ifiata inyi, abolo inyi ikianari ta ahuan honyi!” 22Ikianai nyia esiok honyi ihuania nyio, abaŋi nyia isi elettaha Yudei. Ojiori nyia elettaha Yudei jio, atulo 'daŋ ollo ojio 'to jio ara Yesu Olonyimoto, ijiara luŋa ifuhari addi to hasik imojiti. 23Inyi onno ojiarik esiok honyi jio, “Ifiata inyi, abolo inyi, aremik ekiana!”
24Enyiahi etarrihi, iloŋuni nyia isi atulo linyia oŋodo 'to alia, ette jiaran jihonyi, “Ittuŋoi luŋa jio Hollum jio, ilo iyye iramuna erre hunna arai 'to ahode! Emijak hohoi jio ara atulo linyia itaŋida 'to iyye a heyyani.” 25Itarraŋ nyia inyi isi jio, “Atimo ni arahan honyi a heyyani kuyya obeŋ. Ati amijak ni ariŋ abotie; aŋodo nyia ni, ati ihuania, amijio ni.”
26Attati isi ifiyo inyi jio, “Anyio riŋ nyia enne ihan inyi jihoi? Itaŋida nyia inyi oŋite hoi aŋai?”
27Itarraŋ nyia inyi isi ojio, “Eramak duo ni itai, buo itai ibiaŋata itayiriete. Nyio iwahata itai ani enyiak iramana jihatai eram ania? Iwahata buo fe itai irahan a hejifak honyi?”
28Omori nyia elettaha hulia atulo alia, ette jiaran, “Iyye atibuo ira a hejifani honyi, buo hohoi era a hejifak Mose. 29Emijak hohoi jio, ikiana nyia Hollum jio Mose; ati etimo hohoi ottu atulo alia tai!”
30Itarraŋ nyia atulo alia isi ojio, “Jai! Agalik eram ania ossi waati! Itaŋida inyi oŋite hoŋ, ati itimoti itai ottu inyi tai! 31Emijak hohoi jio obeŋ Hollum itaniŋio eram heyyak, ati itaniŋio inyi eram tulo ollo omojo 'to jihonyi buo fe ihanio erre hunna awak inyi. 32Many tetteri fau hobeŋ tulo itaniŋu jio, itaŋida obo atulo oŋite tulo elle isiuni ollo oŋodo. 33Ittallik duo atulo olo ihan obo ariŋ, alla abeŋ duo inyi ottu jio Hollum.”
34Itarraŋi nyia isi inyi jio, “Isihini nyia iyye iyyata. Aŋai ti iremik iyye ittiyenio hohoi.” Ania, ette isi ifuhara inyi addi totua haji emojit.
35Ninyia itaniŋu Yesu jio ifuhari atulo alia addi, ottu nyia inyi, ette irumana atulo alia, ette ifiyo inyi jio, “Iruk iyye jio Lonyi Tulo?”
36Itarraŋ nyia atulo alia inyi ojio, “Lettok, iramak nani ŋai inyi; oŋida ani eruk jihonyi!”
37Itarraŋ nyia Yesu inyi ojio, “Igonyu iyye inyi. Inyi elle ikiana 'to alia jihoi.”
38Buo inyi ette itarraŋ ojio, “Lamonye, eruk ni,” ette irigoŋo ihosiere Yesu. 39Buo Yesu ette iramana inyi jio, “Attu ni ifau dini isalaniere eyyata waati; oŋida aŋodok omijie, buo hullo omijie 'to, oŋodoi.”
40Attati omuk Farisei hinyia onyihai 'to jihonyi itaniŋuna ekiana ania, ette ifiyo inyi jio, “Eŋodo ti hohoi?”
41Itarraŋ nyia Yesu ojio, “Elle iŋodoti duo itai, obeŋ duo obo epali jihatai. Ati ijiatta itai jio imijiete itai, tania harasa epali jihatai.”
Currently Selected:
Yoane 9: EA2003
Highlight
Share
Copy
Want to have your highlights saved across all your devices? Sign up or sign in
© The Bible Society in South Sudan 2003
