Yoane 21

Oleyehino Yesu jio Lejifak Hattarik

1Ihalu erre huna, inyiak Yesu ileyehino jio lejifak honyi teger tafar enne ittokon ono Tiberias. Oleyehino nyia inyi te ekoi ihuo ana: 2Owoni nyia lejifak hulo arabotie; isi ba Simone Petro, Tomaso (alla anya 'to Aturoti), Nataniel (olo Kana otto Galilea), lonyirok Sebedeyo, buo omuk lejifak Yesu arrihai. 3#Luk 5:5Attati Simone Petro jiaran jio hullomuk hulia jio, “Alo ni iyafoho.”

Itarraŋi nyia isi ojio, “Efuo fe 'daŋ.” Ania, ette isi idahina itua togol, ette ifuatan. Ayafohoi nyia isi arue 'daŋ; ati obeŋi nyia isi ayafohuni hami. 4Ojio ninyia alo oloŋ iduoŋ, owotia nyia Yesu ilotifor, ati otimoi nyia lejifak hulia jio, Yesu lia. 5Attati inyi ifiyo isi ojio, “Monyomiji, iyafohuna itai omuk aham?”

Itarraŋi nyia isi jiojio, “Obeŋ.”

6 # Luk 5:6 Ania, ette inyi jiaran jihosi, “Ibironia aboi hatai ania aŋati iŋet ono atogol ania. Iyafohuna adi omuk.” Ania, ette isi ibironia aboi attua hari. Ati ittallihi nyia isi ipihuna aboi ania attua togol, nyio, oluaji nyia bebe aham hutta aboi ania.

7Attati lejifani ollo obuor ataji Yesu jiaran jio Petro, “Lamonye alia!” Ninyia itayiru Petro jio Lamonye alia, ette inyi iyyafana aboŋojin honyi (nyio, ohou nyia inyi isi addi), ette isuronia itua hari; 8buo lejifak hullomuk ofuonni ilotifor ta atogol. Ipihunie nyia isi aboi enne ifut iko aham. Obeŋi nyia isi alamaji to otifor. Ara nyia alamaji hosi ihuo ayardahien esiha abotie (100). 9Ninyia alluuni isi to togol ette ifuanna ilotifor, igonyuni nyia isi eema huk igak diya, buo ahami omuda diya, buo fe omuk emunio owoni aŋati diya. 10Attati Yesu jiaran jihosi, “Iyaŋuniete omuk aham hunne hétehata itai iyafohuna hunia.”

11Adak nyia Simone Petro itua togol, ette ipihoro aboi ania alotifor. Ifut nyia inyi iko aham hunne ittaha, esiha abotie iko atomuana miyet hohunihoi (153). Duadi bu oluaji nyia aham hunia, obeŋ nyia aboi ofuto. 12Attati Yesu jiaran jihosi, “Ifuanna eŋiyo.” Obeŋ nyia obo jihosi orinyak efiyo inyi jiojio, “Ŋai iyye?” Nyio, omijani nyia isi jio, Lamonye alia. 13Ania, ette Yesu ittuna diya, ette iduhuna emune, ette isiarana jihosi; ette buo fe iduhuna ahami, ette isiarana jihosi.

14Enyiahi etahunihi nyia ania ninyia oleyehiniere Yesu jio lejifak honyi ninyia itubuhuni inyi toye.

Yesu iko Petro

15Ninyia anyai isi, ette Yesu ifiyo Simone Petro jio, “Simone, lonyi Yoane, obuor soho ataji hoi nani agalik huno hullomuk?”

Itarraŋ nyia inyi ojio, “Aafe, Lamonye imijak iyye jio obuor ataji hoŋ iyye.”

Buo Yesu ette jiaran jihonyi jio, “Ihuma iyyahatio olosobio hoŋ.” 16Inyiak fe Yesu ifiyo Petro enyiahi etarrihi ojio, “Simone, lonyi Yoane, obuor ataji hoi nani?”

Itarraŋ nyia Simone inyi ojio, “Aafe Lamonye, imijak iyye jio obuor ataji hoŋ iyye.”

Buo Yesu ette jiaran jihonyi jio, “Ihuma iyyahatio akioro hoŋ.” 17Enyiahi etahunihi, ette Yesu inyiak jiaran jihonyi jio, “Simone, Lonyi Yoane, obuor ataji hoi nani?”

Tania, ette Petro ijiriŋa, te efiyo Yesu inyi enyiahi etahunihi jio, “Obuor ataji hoi nani?” ette jiaran jio Yesu jio, “Lamonye, imijak iyye erre 'daŋ, buo fe imijak jio obuor ataji hoŋ iyye!”

Buo Yesu ette jiaran jihonyi, “Ihuma iyyahatio akioro hoŋ. 18Hode hode, eramak ni iyye jio, ninyia hèra iyye olo monyomiji, ihuhum nyia iyye ahuan hoi, ette iyye leten jio amaji enne iwak iyye. Ati elle imaruak iyye, ihalamak adi iyye ahas hoi, buo obo atulo ette irihoro iyye jio amaji enne ibeŋ iyye iwak ilari.” 19(Ikenu nyia Yesu erre huna, itahutaniere ekoi anna alari adi Petro iyeri, iyaŋuniere akuatan jio Hollum.) Attati Yesu jiaran jihonyi, “Ijifunie nani!”

Yesu iko Lejifani Ollobo

20 # Yoa 13:25 Oyito nyia Petro, ette igonyuna lejifani ollo obuor ataji Yesu linyia itoŋo 'to ros iger Yesu to ninyia oŋiyerek isi. Ifiyo nyia lejifani alia Yesu jiojio, “Lamonye, ŋai olo itinyiaŋara iyye?” 21Ninyia igonyu Petro lejifani alia, ette Petro ifiyo Yesu ojio, “Lamonye, aŋai eram atulo olo?”

22Itarraŋ nyia Yesu inyi ojio, “Alla awak ni inyi oŋida amanya many attuniere ni, anyio buo hunohoi? Ijifunie ani!”

23Attati eram ana isarrahina ihiji héjifak Yesu jio obeŋ adi lejifani alia ojio aye. Ati obeŋ nyia Yesu ojio obeŋ adi lejifani alia ojio aye. Ojio nyia inyi jio, “Alla awak ni inyi oŋida amanya many attuniere ni, anyio buo hunohoi?”

24Inyi lejifani alia nyia ikiana erre huna. Inyi nyia buo fe igiorok isi. Emijak hohoi jio, arai erre hunne ikiana inyi ahode.

Etisidi Hiram

25Ati owoni buo fe erre arriai hunyia ihanio Yesu. Elle igioroni duo isi 'daŋ ababo, egigilo ni obiaŋarak duo amaji jio afau ana ittunaniere abuhi hunne igioronierek isi.

Currently Selected:

Yoane 21: EA2003

Highlight

Copy