Luka 12

Ihumata Mijio Etihanak Huattek

(Mat 10:26-27)

1 # Mat 16:6; Mar 8:15 Ninyia attubanie alif waati arriai, many ifudarik nyik nyik, many irririei eejek hosi, ette Yesu ikiana do jio lejifak honyi jio, “Ihumata mijio olobou ono Farisei. Ajio ni etihanio hosi huattek. 2#Mar 4:22; Luk 8:17Asalani adi erre 'daŋ hunne imuho 'to, buo fe omijani adi erre 'daŋ hunne idimai 'to. 3Ofuonni adi itayiruna ta afanni erre 'daŋ hunne ikianati itai idumele. Itakuati adi buo fe to sihidihien hasik, erre 'daŋ hunne ihahayati itai itua hasik hatai.

Oŋida Ebaŋ Ŋai

(Mat 10:28-31)

4“Eramak ni itai mottiarak hoŋ, hèbaŋata hia hullo ottohori 'to ahuan, buo ihalu ittallihi ihanio omuk erre hunna agalihini ta arrohoji. 5Etahutak adi ni itai jio oŋida ibaŋata ŋai. Abaŋata Hollum, ollo owon 'to iko agolon ittohori, buo ihalu 'tohoro ibironia ihima onno osio 'to 'tulaŋ. Aafe eramak ni itai, abaŋata luŋa inyi!

6“Obeŋi soho itinyiaŋani olodili miyet ta amillimi arrihai? Ati obeŋ Hollum oguhi obo olodil. 7Ara duadi bu oofir hutto hossi hatai, iheni isi 'daŋ. Tania, hèbaŋata, nyio agalik ayiji tulo abotie olodili arriai!

Eruhonia iko Ehara Kristo

(Mat 10:32-33; 12:32; 10:19-20)

8“Eramak ni itai, lia elle iruhok 'to ani ihosiere waati, iruhok adi buo fe Lonyi Tulo inyi ihosiere ajilohien Hollum. 9Buo lia, elle iha 'to ani ihosiere waati, iha adi buo fe Lonyi Tulo inyi ihosiere ajilohien Hollum.

10 # Mat 12:32; Mar 3:29 “Lia, elle ittarrohojio 'to afure Lonyi Tulo, oremehini adi ihohina eyyata honyi; buo lia, elle ittarrohojio 'to afure ono Loholio Olibo, obeŋi adi oremehini ihohina eyyata honyi.

11 # Mat 10:19-20; Mar 13:11; Luk 21:14-15 “Alla afuoi itiwwahio itai ihasik imojiti, ihosiere mondiri, kuyya buo fe ihosiere lettaha, hèhawwati jio ifuata dai itai itarraŋ aŋai kuyya anyio adi enne ifuata itai ikiana. 12Nyio, jio nasaa nyia, ittiyanak adi Loholio Olibo itai erre hunne ifuata ikiana.”

Etarriamai ono Lasamani ollo Obeŋ Hou

13Attati lobo atulo tehiji iluluŋ jiaran jio Yesu, “Hettiyanani iramak illaŋ ehor ikoŋ erutaa hunyia idiaharu monye hohoi.”

14Buo Yesu ette itarraŋ inyi jiojio, “Illa, ŋai ihanak ani ahaŋotoni hiram kuyya ahaharani saŋ hunia jihatai?” 15Attati Yesu jiaran jihosi 'daŋ, “Ihumata imijio, hèlaha obo eŋaru ojiŋak itajia hatai; nyio obeŋ amanya tulo ara ta aluaji hirre hunno owoni 'to jihonyi.”

16Attati Yesu iramana jihosi etarriamai ana: “Owon nyia obo asamani iko amana honyi anna aŋidari amat honyi. 17Otto inyi igigilo ta ahuan honyi jiojio, ‘Abeŋ ni awon iko amaji ittunaniere amat hoŋ 'daŋ. Ehan adi ni anyio?’ 18Ette inyi jiaran, ‘Ehan adi ni ihua ana, etattur adi ni amuguo hoŋ, ette ni iduhonia omuk hunne ettaha hunna alari ni ittunaniere emma iko erre hoŋ 'daŋ hunnomuk. 19Attati ni jiaran jio ahuan hoŋ, osiru miji! Owoni erre 'daŋ jihoi hunne iyarai aŋasi arriai. Abalai ta allalla, oŋiye, amatai, buo fe omunoi!’ 20Ati ojio nyia Hollum jihonyi, ‘Jai, obeŋ hou! Arue ono ahana iduhari adi esu hoi addi; ofuonni 'tadi erre hunne ittunak iyye ahunohoi irahan ahunaŋai?’ ”

21Otto Yesu itisidonia ekiana honyi jiojio, “Ara adi inyi ihuo nyia jio hia, hulle ifuroni 'to esamiti ahunosi, buo obeŋi asami to hosiere Hollum.”

Iyihina jio Hollum

(Mat 6:25-34)

22Attati Yesu jiaran jio lejifak honyi, “Ihuania, eramak ni itai, hèhawwati ta anyio enne iwahata itai, ta esu hatai, kuyya ta aboŋojin hunne iyyafatiete itai ihuattek. 23Nyio, agalik ayiji ono esu ayiji ŋiria, buo fe ayiji huan agalik ayiji boŋojin. 24Ike imijata olohurahi; obeŋi isi oyehini enyomo buo fe obeŋi odeŋuni amat; obeŋi buo fe amuguo iko ebecio jihosi, ati itaŋiyo Hollum isi! Igalihina itai aheny ta ayiji! 25Ŋai jihatai ollo oremik 'to noŋitek huno esu honyi te ehawwa? 26Elle ittallihoto itai ihan ariŋ ollo omuta 'to a lia, nyioti ihawwati itai te erre hunnomuk? 27Ike imijata obolori ayaburita hutto mur aŋai. Obeŋi isi igiamai buo fe obeŋi ihuhumie aboŋojin hosi. Ati eramak ni itai jio ara duadi bu hobu Solomon iko esamiti honyi 'daŋ, obeŋi nyia aboŋojin honyi ilamani ihuo ayaburita hunia. 28Ati elle itiyyefio Hollum amiyaŋ otto mur, onno owon 'to ahana buo motie osuahini iyali, obeŋ 'tadi inyi itiyyef itai agalik bebe? Aii! Itai aati hullo omuta eruk!

29“Hèhawwati, buo fe hèfuurati motie motie aniyo adi enne iŋiyete itai kuyya enne imatati itai. 30Nyio, ottifiai aati atimok Hollum erre hunia, ati omijak Monyatai jio iwahata itai erre hunia. 31Ottifiati do Olobie Honyi, buo arai adi erre hunia 'daŋ ahunatai.

Esamiti Huttedou

(Mat 6:19-21)

32“Itai eluluŋ onno omuta 'to, hèbaŋata, nyio, omuno Monyatai esiarana jihatai Olobie. 33Itinyiaŋana asaŋ hatai, isiatta arobiyaa hua jio alociaŋak. Ihuhumuna olobooni hatai hunno obeŋ 'to ojiori emaruak. Ottunana esamiti hatai idou, amaji onno obiaŋarik isi omumutararai, nyio, ittallik olohoho ifanyan diya, buo fe eŋenyu ittallik ittarroho. 34Nyio, odulo adi ataji hoi jio amaji onno ottunarik esamiti hoi.

Egiamak hulle Irririai 'to

35 # Mat 25:1-13 “Ihumata irra, ottodonia aboŋojin egemita buo fe itawulohina allomohien hatai, 36#Mar 13:34-36ihuo egiamak hulle itilai 'to acohuno lettok hosi to hafula ono nayama. Ninyia lattu inyi ette ikukuk ekat, ette isi iŋahina ekat jihonyi kuak. 37Hotomunohi egiamak hullo ottu elettok hosi nyurani homijei, buo fe itilai ta acohuno honyi! Ahode eramak ni itai, ottodok adi inyi aboŋojin honyi ehoriti ŋiria ette iloŋuna isi iŋiyo, ette isiarana isi aŋiria. 38Hotomunohi isi alla acohuno inyi ara duadi bu te ehiji harue kuyya hobeŋ ataŋatio motie afaŋ buo onyurak isi ihuo nyia. 39#Mat 24:43-44Ati omijana jio, hara duo onno omijak lamonye haji jio ottu adi olohoho ihaji honyi baya; obeŋ duo inyi obusak olohoho ahahalaru erre hutta haŋ honyi. 40Ihumata buo fe irra, nyio, ottu adi Lonyi Tulo ta asaa enne itimoti itai.”

Egiamani Oloyijio Kuyya Egiamani Olorroho

(Mat 24:45-51)

41Ette Petro jiaran, “Lamonye, ikiana soho etarriamai ania to hohoi hama, kuyya ta aati 'daŋ?”

42Itarraŋ Lamonye ojio, “Ŋai 'tadi alla ara ahegiamani oloyijio buo fe ilofioro? Inyi adi elle ihanak lamonye haŋ isioriere aŋiyo jio egiamak hullomuk alla attuba asaa ŋiyo. 43Hotomunoi egiamani lia alla attu elettok honyi inyurana inyi ihanio egiama ania. 44Hode eramak ni itai, ihanak adi inyi egiamani alia elettok ollo oŋuahatio 'to erre honyi 'daŋ. 45Buo alla ajio legiamani alia ta ataji honyi jio, ‘Illiŋia elettok hoŋ icohuniere’ ette itterio ebibahio egiamak hullomuk, aliawa iko aŋoruo 'daŋ, ette ŋiyo ette imata many orumari. 46Attati elettok egiamani alia icohuno nyia obo oloŋ, ta asaa onno otimo egiamani alia buo fe obeŋ igigilo ta attuna honyi. Ittigemio adi elettok alia inyi, ette ifuhara inyi jio egiamak arrohojak.

47“Legiamani ollo omijak 'to anyio anna awak elettok honyi oŋida inyi ihan, ati obeŋ inyi ihuhum ahuan honyi kuyya obeŋ ihan ihuo awak elettok, ofodohi adi inyi bebe. 48Buo lia, ollo otimo 'to awak elettok honyi anyio, buo ihan erre hunno osiruni 'to ta afodohio, ofodohi adi inyi kai. Jio lia, elle isiori arriai, awahi adi buo fe jihonyi arriai; buo jio lia, elle isiori arriai bebe, awahi adi buo fe jihonyi arriai bebe.

Iyaŋuno Yesu Abuanya

(Mat 10:34-36)

49“Attu ni isuahiniere afau, ati ojio atua hoŋ ŋaduo inyi ihuania awulo! 50#Mar 10:38Owon obo batisimo anna ajio ni efuotu, ati obeŋ ataji hoŋ oyiri many otuhori inyi! 51Igigiloti itai jio attu ni iyaŋuno nelik fau? Eramak ni itai, obeŋ. Ati eyaŋuno ni abuanya. 52Ahana many moi, ibibuanya adi ahaŋ ono aati miyet; oliwarik adi hula hunihoi hula arrihai, buo fe hula arrihai oliwarik hula hunihoi. 53Oliwarik adi monyie lonyirok hosi, buo fe lonyirok oliwarik monyie hosi. Oliwarik adi honyie ŋarriok hosi, buo fe ŋarriok oliwarik honyie hosi; oliwarik adi aŋoruo, honyie habiok hosi; buo fe honyie oliwarik aŋoruo lonyirok hosi.”

Amijana Saa Nyia

(Mat 16:2-3)

54Attati Yesu jiaran jio eluluŋ waati, “Elle igonyuna itai edohuo ofuonni tetteddorro holoŋ, buo itai ijiatta jio alo ahide sayo, buo inyi ette sayo hode. 55Elle igonyuna itai oyyami ohutuno otto junub, buo itai ijiatta jio alo oloŋ nahan, buo inyi ette nahan hode. 56Itai etihanak huattek hulo! Imijana itai etamijanita hirre hutteduo iko hutta fau, nyioti itimoti itai awoyo hiram ono asaa ana?

Itimuoru Olosuari Hoi

(Mat 5:25-26)

57“Nyio ibiaŋata itai iŋototo ariŋ onno obis 'to jihatai ihaniere? 58Elle itiloŋoro obo atulo iyye ilokikoi, imuarati luŋa ikonyi hèbiaŋata itai ifanyata imaji lokikoi, ŋadi inyi ipihoro iyye many ihosiere haŋotoni hirre buo aŋotoni hirre ette isiarana iyye jio bolis, buo isi ette ifitana iyye ibabus. 59Eramak ni iyye, ibeŋ adi iyye ihouno many idumaniere iyye edumiti 'daŋ hunno oŋotok aŋotoni hiram jihoi.”

Currently Selected:

Luka 12: EA2003

Highlight

Copy