Luka 13

Idehina Eyyata Hatai Kuyya Oyeti

1Jio asaa nyia, owoni nyia omuk aati diya hinyia iramani 'to Yesu attohoro Pilato omuk aati hulo Galilea buo isi isiorie ehumita jio Hollum. 2Itarraŋ nyia Yesu isi ojio, “Ta attohoro waati hulo Galilea hulia ihuo nyia, igigiloti itai jio itahutak inyi jio agalihini nyia eyyata hosi huno aati Galilea hullomuk 'daŋ? 3Ahode obeŋ! Eramak ni itai jio, elle ibiaŋata itai idehina eyyata hatai, iyeti adi itai 'daŋ ihuo onno oyerik isi. 4Ara bu aati hinyia 'tomon hohottohunik hulo Silowam, hunyia oritihonio aaji onno ohodo jihosi ette ittohoro isi, igigiloti itai jio itahutak inyi jio agalihini nyia eyyata hosi huno aati 'daŋ hulla amanyai 'to Yerusalem? 5Ahode, obeŋ! Eramak ni itai jio elle ibiaŋata itai idehina eyyata hatai, iyeti adi itai 'daŋ ihua ninyia oyerik isi.”

Etarriamai ono Ayyani Ŋaboli onno Obeŋ 'to Oŋi

6Attati Yesu iramana jihosi etarriamai ana: “Owon nyia obo atulo iko aŋaboli ninyia isur 'to imana fino honyi. Ette inyi leten ittifia aŋabolo jihonyi, ati obeŋ nyia inyi orumak obo. 7Ania ette inyi jiaran jio legiamani mana honyi, ‘Imijie, aŋasi hunihoi, attutta ni dini ittifiari aŋabolo jio aŋaboli ana, ati habeŋ ni anyurak obo. Olloŋok inyi ifau! Anyio ittarrohojio inyi aboro obojiai?’ 8Ati itarraŋ nyia egiamani lia jiojio, ‘Lettok, idehi inyi do obo eeŋa abotie. Arom adi ni awoyo honyi atto ni ihanana omuk aworot diya. 9Alla aŋi inyi eeŋa otto tua, oyyu adi! Buo alla abeŋ, iremik iyye italloŋonia inyi ifau.’ ”

Itaŋida Yesu obo Aŋotte to Oloŋ Sabatto

10Ittiyenio nyia Yesu ihaji emojit to obo oloŋ Sabatto. 11Owon nyia obo aŋotte diya ninyia owon 'to iko aminiaŋati ninyia itaŋuai 'to inyi aŋasi 'tomon hohottohunik. Ikudura nyia inyi buo fe ittallik itabisana ahuan honyi. 12Ninyia igonyu Yesu inyi, ette inyi iloŋuna inyi, ette jiaran jihonyi, “Haniye, abusak aŋuai ania iyye!” 13Ette Yesu ittironia ahas honyi jihonyi, buo teya teya, ette aŋotte ania itabisana ahuan honyi ahide, ette itahabuyo Hollum.

14Ati iloŋojita nyia elettok olo aaji emojit, nyio, itaŋidario Yesu to oloŋ Sabatto. Ette jiaran jio aati hia, “Owoni oŋitek ille hunne igiamarik aati, ifuanna to oŋitek hunia oŋida itaŋidari itai; ati obiaŋara to noloŋ Sabatto!”

15Itarraŋ nyia Lamonye inyi jiojio, “Itai etihanak huattek hulo! Obeŋ obo jihatai ohohi attamot kuyya asigiria honyi to bore to oloŋ Sabatto, ette leten itamacio inyi? 16Ijiara ti obeŋi ohohini, to oloŋ Sabatto eto otto woyo Abramo ana enne ifitak Sittan aŋasi 'tomon hohottohunik?” 17Attati etarraŋi honyi itanyahina amiorok honyi ariri; buo aati 'daŋ ette imuno te erre 'daŋ hunno obolori 'to hunyia ihanio inyi.

Etarriamai ono Aŋerio Cahai

(Mat 13:31-32; Mar 4:30-32)

18Attati Yesu ifiyo ojio “Ara Olobie ono Hollum ihua anyio? Etarriamahi adi ni inyi iko anyio? 19Ara inyi ihua aŋerio cahai enne iyaru obo atulo ette idulana imana honyi. Isuru inyi, ette ibolori ayyani, buo aheny ette iduho asik hosi itanata honyi.”

Etarriamai ono Olobou

(Mat 13:33)

20Inyiak Yesu ifiyo ojio, “Etarriamahi adi ni Olobie Hollum iko anyio? 21Ara inyi ihua olobou enne iduhu aŋotte, ette icaŋana ihifua hunno oremehini ahiriehien hunihoi, many odohuniere inyi 'daŋ dou.”

Ekat ollo Ottida 'to

(Mat 7:13-14, 21-23)

22Olo nyia Yesu totto borejin gala iko totto misihi buo ittittiyanaru aati, buo inyi olo atany a Yerusalem. 23Attati obo atulo ifiyo inyi ojio, “Lamonye, italahuni 'tadi aati kaiyo ijiai?”

24Itarraŋ nyia Yesu isi ojio, “Ihumata ittifia ekoi ijiŋari te ekat ollo ottida 'to; nyio, oluaji adi aati hulla awahi 'to ijiŋari attua, ati ittallihi adi isi ijiŋara. 25Odioto adi lamonye haji, ette ihianana ekat. Iwotiati adi itai illet, buo ikukuhoti ekat buo ijiatta, ‘Lettok, aŋahi hoi ekat!’ Ati itarraŋ adi inyi itai jiojio, ‘Abeŋ ni amijak tai ifuanna itai!’ 26Buo ittata adi itarraŋ jiojio, ‘Eŋiyo nyia hohoi buo fe emata ikoye; buo fe iyye nyia ittiyenio itua bore gala hohoi!’ 27Ati inyiak adi inyi jiaran, ‘Abeŋ ni amijak tai ifuanna itai. Ifuatta addi, itai ehanak hirre hunno orrohoji 'to!’ 28#Mat 22:13; 25:30#Mat 8:11-12Owon adi ayyoo iko aŋuruta hala ta adiaha elle igonyuna itai Abramo, Isako, Yakobo iko ekianak Hollum 'daŋ owoni Ilobie Hollum buo opuasari itai allet! 29Ofuonni adi aati tetteduoŋi holoŋ iko tetteddorroi holoŋ, buo fe totto sumal iko totto junub, ette itoŋo iŋiyere Ilobie Hollum. 30#Mat 19:30; 20:16; Mar 10:31Attati aati hulla arai 'to ihuania ecuŋita irahan adi etterita buo hulla arai 'to ihuania etterita, ette irahan adi ecuŋita.”

Abuaran taji Yesu Yerusalem

(Mat 23:37-39)

31Ta asaa tonyia ofuonni nyia omuk Farisei jio Yesu ette jiaran jihonyi, “Ilo tene addi, nyio, awak Erode ittohoro iyye.”

32Itarraŋ nyia Yesu isi jiojio, “Ifuatta iramana olobeyok lia io, ‘Efuhatio ni aminiaŋa buo fe etaŋidario aati ahana iko motie. Atuhok adi ni egiama hoŋ iholoŋ etahunihi.’ 33Ati oŋida ani adaha ahana iko motie many talialoŋ nyio, obeŋ osiru ittohori ekianani Hollum jio obo abore gala hama, arari fe Yerusalem.

34“Yerusalem, Yerusalem! Ittohio iyye lekianak Hollum, buo fe irruoŋ ta amoruo leyak sayyo hinyia ifahu Hollum jihoi! Enyiahita omuk ajia hunyia awahari ni imosouniere aati hoi 'daŋ ta ahas hoŋ, ihuo enne imosouniere ahohoro ekiyehi honyi itua hiwwa. Ati ibeŋ iyye ani iŋatak! 35Tania, idehini buo fe oyur adi Aaji hoi emojit enne ittokon. Eramak ni iyye, ibeŋ adi iyye igonyu ani, many afanyari nasaa enne ittuniere iyye ijiari jio, ‘Ijiara lia hotomunoi ollo ottu 'to ta afure ono Lamonye.’ ”

Currently Selected:

Luka 13: EA2003

Highlight

Copy