Lk 9
9
Öri Tyëngwöödø Gɑ Pyɑ̈rø Wïdɑ́ryew yi Yëso
(Mt 10.5-15; Mk 6.7-13)
1Kɑ tyëngwöödø gɑ pyɑ̈rø wïdɑ́ryew, cwøøl kej ɑ́kyel yi Yëso, kɑ gï thödhe ki tegø kì kömi wëyrijjø bënn, kí tegø me yïëëd gen ki rɑ̈ɑ̈m dëllì bënn. 2Jøg-ɑ ɑ́ör, gï ɑ́öre’ be köbbi ji kwøbbi Pödhi Jwøk, o ji yiel yi gen ki rɑ̈ɑ̈m dëlli gen. 3#Lk 10.4-11; Gwøg 13.51 Gï ɑ́köbbe kinni, “Ko di gïn kɑ̈lli yi wun, wu ko kɑ̈ddi ki lodh, wu ko kɑ̈ddi ki beg, wu ko kɑ̈ddi ki gïncɑm wɑlɑ̀ ngyëny, kɑ dhɑnhø ko kɑ̈ddi ki ógudh ɑ́ryew. 4Bëëd wun kì gøl-ɑ ótöngi yi wun ceth, gïti keny-ɑ ódhwödh wun kì kenyɑni. 5Keløg e dɑ kɑɑl men-ɑ óbɑny wun, kedhu wɑ̈g kì kɑɑlɑni kɑ tør teng wun kì tyelli wun, e bɑ ngɑ̈ji gen.”
6Codhe, kɑ tyëngwöödø ókedhø ge owïïnø kì yethi myërr bënn, ge pwöny-ɑ Wöndøj. O ge oyïëdø ki ji kì myërrɑni bënn.
Muumi Wïj Ërödøs
(Mt 14.1-12; Mk 6.14-29)
7 #
Mt 16.14; Mk 8.28; Lk 9.19 Kɑ modïr, Ërödøs olïngø ki møg-ɑ kømmi yi teedø kì ri Yëso, kí gïg-ɑ ɑ́cwöb bënn, kɑ wïje omuumø, mɑ́ kwï ji okööbø kinni, “Jøn Jɑljwɑ̈g ɑ́dhwödh kì yij thøø.” 8Møøgø okööbø kinni, “Eliyɑ̀ ɑ́dwöög mɑl.” Thyew, kwï møøgø okööbø kinni, “Ákyel kì kelli jøtöng mø kɑ̈ge dööng ɑ́dwöög mɑl.” 9Akööb Ërödøs kinni, “Jøn wïje ɑ́kïbɑ wɑ̈g, de jɑɑl bɑ men, ɑ ree lïngɑ kwøbb-ɑ ni møg?” Kɑ Ërödøs oyɑ̈bø ki keny yode Yëso, o gø di lidhe.
Cɑɑmi Ji Mø Ngenyø yi Yëso
(Mt 14.13-21; Mk 6.30-44; Jn 6.1-14)
10Keny-ɑ ɑ́dwöög tyëngwöödø, ɑ́köbbi Yëso yi gen ki gïg-ɑ ɑ́gwøg yi gen bënn. Codhe, ɑkïdhi gen pɑc me cwøl ɑ́ Betsɑidɑ̀ yi Yëso, kun cuggi gen ki bëëdø keti gen kì kej ɑ́kyel. 11De keny-ɑ ɑ́kedhi yi Yëso ɑ́yod yi teedø, kɑ ge løg-ɑ bɑnge kunɑni. Kɑ Yëso oyïëyø yïddø ki gen, kɑ gï köbbe kì ri Pödhi Jwøk, kɑ tyëng-ɑ ɑ́dwɑddi yielø ki rɑ̈ɑ̈m dëllì, yiele.
12Abëën jøg-ɑ ɑ́ör gɑ pyɑ̈rø wïdɑ́ryew yï Yëso keny-ɑ ɑ́cyɑ̈ngi cɑ̈ng ki buddø, kɑ ge okööbø kinni, “Köbbí teedø kedh gen. Wiy ge kedhi gen yethi bɑ̈gg geki myërr-ɑ cyɑ̈gi o ge yïddi gen ki kɑ̈jj mø buddi yi gen, kí gïg cɑm yi gen, mɑ́ e bong ji mø bëëdø kì keny.”
13De ge ɑ́köbbi yi Yëso kinni, “Thödhu gen ki gïn cɑm yi gen.”
Alöggi gen kinni, “Yï wøn dɑ ópùn ɑ́bïj kí rij ɑ́ryew, codhi gen. Keløg ri gen pɑ ngëwwi, bong gïn gwøg yi gen ki dhɑnhø men bëne.” 14Kwɑnni ji møg-ɑ kenyɑni bɑ gïn ni ɑ́lïp ɑ́bïj.
Kɑ Yëso jøbɑnge köbbe kinni, “Köbbu ji pëggi gen piny gɑ ɑkudd; ɑkud ɑ́kyel yije dɑ ji pyɑ̈r ɑ́bïj.”
15Codhe, ɑgwøøg møgɑni yi jøgɑni. Kɑ ji pɑ̈ngi gen gɑ pyɑ̈r ɑ́bïj, pyɑ̈r ɑ́bïj. 16Codhe, kɑ ópùnɑni gɑ ɑ́bïj kí rij ɑ́ryew møgɑni kwɑny yi Yëso, kɑ Jwøk pwøje, e nenn-ɑ mɑl, kipe gïncɑm menɑni. Codhe, ɑpɑ̈nge gïncɑm, kɑ gø mëgge jøbɑnge, o ge thödhi gen ji. 17Acyɑ̈ɑ̈m ji bënn, kɑ ge oyɑ̈ngø, kɑ men-ɑ ɑ́döng cøng kej ɑ́kyel. Kɑ dhöng pyɑ̈rø wïdɑ́ryew opɑ̈ngø yi thulli ópùn-ɑ ɑ́döng kì bɑng tyëng-ɑ ɑ́cyɑ̈ɑ̈m.
Møg-ɑ Ákwøb yi Pïtør kì ri Yëso
(Mt 16.13-19; Mk 8.27-29)
18Tyelø ɑ́kyel Yëso ɑ́bëëd e mɑll-ɑ Jwøk kì wɑ̈ye, de jøbɑnge ɑ́bëëd ge cyɑ̈gi ki en, kɑ gï pyëje kinni, “Teedø okööbø i yɑ bɑ men?”
19 #
Mt 14.1-2; Mk 6.14-15; Lk 9.7-8 Alöggi gen kinni, “Kwï ji okööbø i yï bɑ Jøn Jɑljwɑ̈g. Møøgø okööbø i yï bɑ Eliyɑ̀. O dɑ møøgø mø kööbø i yï bɑ ɑ́kyel kì kelli jøtöng mø kɑ̈ge dööng, me dwöög mɑl.”
20 #
Jn 6.68-69
Apëjji Yëso kinni, “De wun ø, wu okööbø kinni yɑ bɑ men?”
Alöggi Pïtør kinni, “Yï bɑ Mesiy mi Jwøk.”
Kwøbbi Yëso kì ri Orɑnge kí Thøwe
(Mt 6.20-28; Mk 8.30–9.1)
21Akyëddi gen ki mendwøng yi Yëso kinni, ko di dhɑnhø me köbbi møgɑni yi gen. Kɑ Yëso okööbø kinni, 22“Nyɑɑr Dhɑnhø órɑngi yi gïg mø gïïr. Óbɑny yi jøgdøngø geki ókwërr-ɑ døngø, kí jøpwönyi Cigg. Ónɑ̈g, o ódhwödh kì yij thøø bɑng cyɑ̈ng ɑ́dɑ̈g.”
23 #
Mt 10.38; Lk 14.27 Aköbbi ge bënn yi Yëso kinni, “Ngɑn dwɑddi cyɑ̈dhø ki yɑn, wiye jɑmm-ɑ tyer yi pyëwe. Kɑ yɑdh ɑrïwe byelle yethi cyɑ̈ng bënn, kɑ luge kì bɑngɑ. 24#Mt 10.39; Lk 17.33; Jn 12.25 Ngɑn dwɑddi yieli wëye gï lɑ̈ɑ̈nye’ lɑ̈ɑ̈nyø, de ngɑn-ɑ ólɑ̈ɑ̈ny wëye kiperɑ, gï yiele’ yielø. 25Dɑ gïndøj me yod yi ji, cɑgg piny bëne göögø ki mi gen, o men-ɑ́ gen kì ri gen, ge rum lɑ̈ɑ̈nyø, wɑlɑ̀ ge bɑ ɑtyɑm? Bogøn kinni tek! 26Keløg yɑ obɑnyø yi ji, o kwøbbɑ bɑny yi gen, ge ólony ki bɑnyø yi Nyɑɑr Dhɑnhø keny-ɑ óbëëne ki mɑ̈re, geki mɑ̈ɑ̈r Jwøk kí wëywödde kwërø. 27Dyër ɑ köbbɑ wun kinni, kelli ji-ɑ cungi kì keny èn, dɑ møg koo thøw, pïd keny-ɑ ólidh gen Pödhi Jwøk.”
Wili Rɑw
(Mt 17.1-8; Mk 9.2-8)
28 #
2 Pït 1.17-18
Kì ri cyɑ̈ng ɑ́bïdɑ̈g kì bɑng kɑ ɑ́rum Yëso ki kwøbi møgɑni, ɑkwɑnye Pïtør, kí Jøn, kí Yɑgob, kɑ ge kedh-ɑ wïj kït be mɑ̈ddø. 29Kɑ̈ng-ɑ ɑ́bëëd Yëso e ómɑ̈ddø, kɑ bøle ree wile, kɑ ógudhe ótɑ̈rø ge ceg-ɑ orɑ̈ng. 30Codhe, kɑ jøg ɑ́ryew, ɑ løg Mosɑ̀ geki Eliyɑ̀, okööbø ki Yëso. 31Ge ɑ́cwöb ki dhwɑ̈ɑ̈ng mɑl kì ri gen, kɑ ge okööbø ki kwøbbi kër-ɑ óthøwe kì Yerusɑlem, e tyëg-ɑ møg-ɑ ɑ́gwir yi Jwøk. 32Pïtør geki jøg-ɑ kyeelø ɑ́bëëd ge ceg-ɑ nwɑyyø, de keny-ɑ ɑ́yieb gen nyingi gen kidøøj, ɑlidh gen mɑ̈ɑ̈r Yëso kí jøg-ɑ cungi ki en gɑ ɑ́ryew. 33Ri kedhi Mosɑ̀ kí Eliyɑ̀, kɑ ge ódɑ̈ngø ki en, ɑköbbi Yëso yi Pïtør kinni, “Wuö, døøj ke ying wɑ keny. Wiy wø gëëd wøn ki ud ɑ́dɑ̈g, ɑ́kyel mií, ɑ́kyel mi Mosɑ̀, ɑ́kyel mi Eliyɑ̀.” Pïtør gïn-ɑ kømmi yi en kwïje.
34Kɑ̈ng-ɑ ɑ́nudd e kwøb-ɑ møgɑni, kɑ pøølø obëënø, kɑ ge rïm yi pøølɑni, kɑ ge obwøgø keny-ɑ ɑ́rïïm gen yi pøølø. 35#Icɑ 42.1; Mt 3.17; 12.18; Mk 1.11; Lk 3.22 Kɑ cwɑg obëënø ge kɑ̈ɑ̈l-ɑ yij pøølɑni kinni, “Men bene Wɑ̈dɑ men-ɑ ɑ́yieny yi yɑn, lïngu møge!”
36Keny-ɑ ɑ́rum cwɑggɑni ki kwøb, döngø ɑ́ Yëso kete kì kenyɑni. Jøbɑnge møgɑni ɑ́cög ge okudø, o bong ngɑn mɑ ɑ́köbbi gïn-ɑ ɑ́lidh yi gen kì yethi cyɑ̈nggɑni.
Yieli Nyelthinh ki Wëy Me Rɑj yi Yëso
(Mt 17.14-18; Mk 9.14-27)
37Dhuki, ɑyïnhi gen piny kì wïj kït, kɑ teedø mø ngenyø bï-ɑ yï Yëso. 38Kɑ jɑl megø kì kelli teenɑni óryeerø e köbb-ɑ Yëso kinni, “Jɑlpwönyø, yɑ kwɑjj-ɑ yïn, bï lidh wɑ̈dɑ, bɑ wɑ̈dkyel. 39Dɑ wëy me rɑj me nyi mɑgii, kɑ nyi ceg-ɑ ì kɑɑg ki ɑkiw. Nyelthinh nyi tɑ̈ɑ̈ye’ piny e pwöd-ɑ ree, dhøge othungø ki óböy. Nyi gögg-ɑ men-ɑ́ gïjø me rɑɑj yi wëyɑni, o pɑ nyi wiy yi en ki keny me bɑ̈ɑ̈r. 40Jøbɑngí ɑ́kwɑjjɑ, kinni cïïr ge gøn wɑ̈g, de ɑ́dhɑ̈li lwɑ̈ngø yi gen.”
41Alöggi Yëso kinni, “Wu bɑ ji mø yï wun bong yïëyø, o bëëdi wun rɑɑj. Yɑ ógït-ɑ wɑɑng yɑ obëëdø kì kelli wun, yɑ torø yi kwøbbi wun kinnï? Kɑ̈ɑ̈l wɑ̈dí keny.”
42Kɑɑm-ɑ ɑ́kedhi nyelthinh yï Yëso, ɑleengii piny yi wëyrɑj kɑ ree pwöde. De Yëso ɑ́cwøw ki menteg, kɑ wëy-ɑ rɑj köbbe bëe wɑ̈g. Kɑ nyelthinh yiele, ɑdögge gøn wïye. 43Teedø bëne ɑ́ngɑ̈ng kɑ ge obwøgø yi tegi Jwøk.
Cigi Yëso Kwøb kì ri Thøwe
(Mt 17.22-23; Mk 9.30-32)
Kɑ̈ng-ɑ ɑ́bëëd ji ge ceg-ɑ omøy yi gïg-ɑ ɑ́gwøg yi Yëso, ɑköbbe jøbɑnge kinni, 44“Wɑ̈thi wun ko wïl ki gïn-ɑ köbbɑ wun ɑnɑn, Nyɑɑr Dhɑnhø ócïb cinggi ji.” 45De kwøbbɑni nuti gɑmø yi wɑ̈thi jøbɑnge, kí gïn-ɑ wɑngi yi møgɑni; gïn-ɑ wɑngi yi møgɑni ɑ́bëëd ɑ́ ɑkɑn kipe rummi gen, o ge cög gen møgɑni pɑ yod yi gen. De ge ɑ́bwøg ki pëjjii møgɑni.
Á Men A Ti Döng?
(Mt 18.1-5; Mk 9.33-37)
46 #
Lk 22.24
Kɑ jøbɑng Yëso ócɑ̈gø pëmø ki ri gen, ki mɑ́ løge men ɑ ti döng kì kelli gen. 47Kɑ møg-ɑ rømmi yi gen yod yi Yëso, codhe ɑcwödde ki nyelthinh, kɑ nyelɑni cuunge kì bute. 48#Mt 10.40; Lk 10.16; Jn 13.20 Akööb Yëso kinni, “Ngɑn yïëy nyelthinh men ki nyingɑ, yïëy-ɑ yɑn. O ngɑn-ɑ óyïëy yɑn, yïëy-ɑ Ngɑn-ɑ ɑ́ör yɑn, mɑ́ ngɑn-ɑ thinh kì kelli wun bënn, bene en ngɑn-ɑ dwøng kidyër.”
Ngɑn Pɑ Rïwwi Bøli Wun Ying-ɑ Tuung Wun
(Mk 9.38-40)
49Alöggi Jøn kinni, “Wuö, jɑl megø ɑ́lidh yi wøn e cïïr-ɑ wëyrijjø wɑ̈g kì ri ji ki nyingí. De ɑ́kyëddi yi wøn, mɑ́ e pɑ ying yij ɑkudee.”
50De Yëso ɑ́kyëëd kinni, “Ko kyëddi wun, mɑ́ ngɑn pɑ rïwwi bøli wun ying-ɑ tuung wun.”
Bɑnyi Yëso yi Pɑc Megø kì Myërri Sɑmɑriyɑ̀
51Keny-ɑ ɑ́cyɑ̈ngi bøli kej kedhe mɑl, ɑkööbe cem e dwɑdd-ɑ kedhi Yerusɑlem. 52Kɑ öd-ɑ bøle ki jøg mø kedhi be gwiri gøl-ɑ ópëgge kì pɑc ɑ́kyel kì kelli myërri Sɑmɑriyɑ̀. 53De tyëng pɑnɑni ɑ́kyëëd i ge ko töngi pɑɑ gen, mɑ́ Yëso kedh-ɑ Yerusɑlem. 54#2 Rɑ̈nhì 1.9-16 Kɑ jøbɑng Yëso, ɑ løg Yɑgob geki Jøn, okööbø kinni, “Odwɑddø yi yïn Wuö, kinni cwööl wøn mɑc piny kì mɑl, o rɑ̈be tyëngɑni, ni men-ɑ ɑ́gwøg yi Eliyɑ̀?”
55De Yëso ree ɑ́luge gïn, kɑ gï cɑ̈wwe. 56Codhe, kɑ ge kedh-ɑ pɑc megø.
Tyëng-ɑ Ólugi kì Bɑng Yëso
(Mt 8.19-22)
57Kɑ jɑl megø Yëso köbbe, e ócyɑ̈dhø kì yöö kinni, “Yɑ ólugi kì bɑngí kì yethi kɑ̈jj-ɑ ókedhi yi yïn.”
58Aköbbii yi Yëso kinni, “Ógwøgg dɑ burrì mø yethi gen nyi buud yi gen. O winy dɑ uddi gen, de Nyɑɑr Dhɑnhø yïe bong keny ywööme wïje.”
59Kɑ jɑl megø köbbi yi Yëso kinni, “Lugí kì bɑngɑ!”
De jɑlɑni ɑ́kööb kinni, “Wuö, wiy yɑ kedhɑ be konyi wïyɑ møti.”
60Kɑ köbbi yi Yëso kinni, “Wiy ji-ɑ thøø kony gen tyëngthøø mø gen. De men-ɑ́ yïn, kedh kɑ yï pwönyí Wöndøj mi Pödhi Jwøk.”
61 #
1 Rɑ̈nhì 19.20
Kɑ jɑl megø okööbø kinni, “Yɑ ólugi kì bɑngí Wuö, de wiy yɑ kedhɑ be mɑ̈dhi wɑddi wøn møti.”
62Kɑ köbbi yi Yëso kinni, “Ngɑn cïb cinge ri kwer, kɑ nyi lïïdh-ɑ ngɑ̈je, pɑ kyëëw ki Pödhi Jwøk.”
Currently Selected:
Lk 9: shkDCB
Highlight
Share
Copy
Want to have your highlights saved across all your devices? Sign up or sign in
Shilluk DC Bible © Bible Society in South Sudan, 2011.
