Марк 10
10
ЯПШӀЭНЭРЭШЪХЬ
Шъхьэгьусэр тӀупщыжьыным ехьылӀагъ
(Маттэ 19:1-12)
1Исус а лъэныкъом икӀыжьи, Иудей хэкоу Иордан псыхъом иадрабгъу щыӀэм кӀуагъэ. Джыри зэ цӀыф купышхохэр ыдэжь къыщызэрэугъоигъэх, зэрихабзэуи Исус ахэмэ Тхьэм игущыӀэхэр аригъашӀэхэу ыублагъ.
2Джащыгъум фарисей заулэ Исус къыбгъодахьи, хагъэукъоным пае, къеупчӀыгъэх:
– ЛӀым ишъуз ытӀупщыжьыныр хабзэкӀэ хъущта?
3– Пегъымбар Мусэ унашъоу сыда къышъуфишӀыгъэр? – ариӀожьыгъ Исус.
4– ЛӀы горэм ишъуз зэритӀупщыжьырэ тхылъ ытхымэ, шъузыр ытӀупщыжьынэу пегъымбар Мусэ фит ышӀыгъ#10:4 Мусэ фит ышӀыгъ – еплъ Пегъымбар Мусэ ятфэнэрэ тхылъэу ытхыгъэм 24:1., – къаӀожьыгъ ахэмэ.
5– Шъуигуркъагъэ пае пегъымбар Мусэ а унашъор къышъуфитхыгъ, – ариӀожьыгъ Исус. 6– Ау ублапӀэм дэжь Тхьэм щыӀэр зэкӀэ къызегъэхъум, «хъулъфыгъэрэ бзылъфыгъэрэ къыгъэхъугъ»#10:6 хъулъфыгъэрэ бзылъфыгъэрэ къыгъэхъугъ – еплъ Пегъымбар Мусэ апэрэ тхылъэу ытхыгъэм (УблапӀэм) 1:27.. 7«Ащ къыхэкӀыкӀэ#10:7-8 Ащ къыхэкӀыкӀэ – еплъ Пегъымбар Мусэ апэрэ тхылъэу ытхыгъэм (УблапӀэм) 2:24. хъулъфыгъэм яти яни ыбгынэнхэшъ, ишъуз гъусэ фэхъунышъ, 8итӀур зыпкъ хъущтых». Аущтэу ахэр зыпкъых нахь, пкъитӀу хъужьыхэрэп. 9Арышъ, а тӀоу Тхьэм гъусэ зэфишӀыгъэхэр цӀыфым зэгуигъэкӀыжь хъущтэп.
10ЕтӀани унэм исхэу, игъогу рыкӀохэрэр а ӀофымкӀэ Исус къеупчӀыгъэх. 11Исус ариӀуагъ:
– Хэтми зишъуз зытӀупщыжьэу, нэмыкӀ бзылъфыгъэ къэзыщэжьырэм апэрэ шъузымкӀэ зинэ ышӀагъэу мэхъу. 12Шъузыри илӀ гокӀыжьэу нэмыкӀ лӀы горэм дэкӀожьмэ, ащи зинэ ышӀагъэу мэхъу.
Исусрэ сабыйхэмрэ
(Маттэ 19:13-15; Лука 18:15-17)
13ЕтӀанэ цӀыфхэм сабыйхэр Исус къыфащагъэх, Тхьэм ынэшӀу ахэмэ къащифэным пае, Исус ыӀэхэр атырилъхьэнхэу Ау Исус игъогу рыкӀохэрэм ахэмэ афадагъэп. 14Исус ащ гу зылъетэм, ыгу ябгъэу ариӀуагъ:
– Сабыйхэр садэжь къэрэкӀох, пэрыохъу шъуафэмыхъу, сыда пӀомэ, ащ фэдэхэр Тхьэм и Тетыгъошхо ыӀэчӀэгъ чӀэтых. 15Шъыпкъэр шъосэӀо, сабыим Тхьэм и Тетыгъошхо зэридэрэм фэдэу, хэтми Тхьэм и Тетыгъошхо зымыдэрэр а Тетыгъошхом ыӀэчӀэгъ чӀэхьащтэп.
16ЕтӀанэ Исус сабыйхэм ӀаплӀ арищэкӀи, ыӀэхэр атырилъхьи, Тхьэм ынэшӀу къащифэнэу афелъэӀугъ.
КӀэлэ баир
(Маттэ 19:16-30; Лука 18:18-30)
17Исус гъогум зытехьажьым, ыдэжь лӀы горэ къачъи, лъэгонджэмышъхьэкӀэ ыпашъхьэ къитӀысхьи, къеупчӀыгъ:
– Дин гъэсэкӀо дэгъу, мыкӀодыжьын щыӀэныгъэ ӀахьышӀоу къыслъыӀэсыным пае, сыда сшӀэщтыр?
18– Сыда дэгъукӀэ укъызкӀысаджэрэр? – риӀожьыгъ Исус а лӀым. – Тхьэм нэмыкӀэу зи дэгъу щыӀэп. 19Тхьэм иунашъохэр ошӀэх: «ЦӀыф умыукӀ, зинэ умышӀэ, умытыгъу, нэмыкӀ цӀыфхэм пцӀы атемылъхь, цӀыфхэм яӀэр гъэпцӀагъэкӀэ къатемых, уятэрэ уянэрэ лъытэныгъэ афэшӀ».
20– Дин гъэсакӀу, – къыриӀожьыгъ а лӀым Исус, – сикӀэлэгъу къыщегъэжьагъэу ахэр зэкӀэ сэгъэцакӀэх.
21Джащыгъум Исус а лӀым еплъи, ыгу еӀуи, риӀожьыгъ:
– УзыщыкӀэрэр зы. КӀуи, уиӀэ пстэури щэжьи, ахъщэр тхьамыкӀэхэм ят. Джащыгъум уашъом мылъкушхо щыуиӀэ хъущт. ЕтӀанэ къакӀуи, сауж къырыкӀу.
22Ар Исус къызеӀом, лӀым ынэгу къызэхахьи, ыгу къеоу ӀукӀыжьыгъ, сыда пӀомэ, мылъкушхо иӀагъэти ары.
23Исус зиплъыхьи, игъогу рыкӀохэрэм ариӀуагъ:
– Мылъку зиӀэхэмкӀэ Тхьэм и Тетыгъошхо ыӀэчӀэгъ чӀэхьанхэр сыдэу къин!
24Исус игъогу рыкӀохэрэм а гущыӀэхэр зызэхаххэм, лъэшэу агъэшӀэгъуагъ. Ау Исус джыри зэ ариӀуагъ:
– Синыбджэгъухэр, мылъкум щыгугъыхэрэмкӀэ Тхьэм и Тетыгъошхо ыӀэчӀэгъ чӀэхьанхэр сыдэу къин! 25Баир Тхьэм и Тетыгъошхо ыӀэчӀэгъ чӀэхьаным нахьи, махъшэр мэстанэм икӀыныр нахь ӀэшӀэх.
26Исус игъогу рыкӀохэрэм ар нахьыбэу агъэшӀагъуи, зэраӀожьыгъ:
– Ащыгъум, ежь зимыгъэкӀодэу, хэт зыкъэзгъэнэжьын зылъэкӀыщтыр?
27Исус ахэмэ яплъи, къыӀуагъ:
– ЦӀыфхэм ежьхэм замыгъэкӀодэу зыкъагъэнэжьын алъэкӀырэп, ау Тхьэм елъэкӀы; сыда пӀомэ, Тхьэм ымылъэкӀын Ӏоф зи щыӀэп.
28– Моу къэдаӀолъ, тэ тиӀэгъэ пстэури къэдгъани, о уауж тыкъихьагъ, – Петрэ Исус риӀоу ыублагъ.
29,30– Шъыпкъэр шъосэӀо, – къыӀуагъ Исус, – хэт щыщми е зиунэ, е зышхэр, е зышыпхъухэр, е зянэ, е зятэ, е зишъуз, е зилъфыгъэхэр, е зичӀыгухэр сэщ паерэ къэбарышӀум паерэ къэзгъэнагъэу, джы мы дунаим унэхэр, шыхэр, шыпхъухэр, ныхэр, лъфыгъэхэр, чӀыгухэр фэдишъэу щызымыгъотыжьыщт цӀыф зи щыӀэп, а цӀыфми къиныбэ рагъэщэчыщт. Адрэ дунаими мыкӀодыжьын щыӀэныгъэ щыриӀэ хъущт. 31Ау апэ итхэм ащыщхэу бэхэр ауж къинэщтых, ауж итхэри апэ хъущтых.
Ежь зэраукӀыщтри лӀагъэхэм къызэрахэтэджыкӀыжьыщтри ящэнэрэу Исус къызэриӀуагъэр
(Маттэ 20:17-19; Лука 18:31-34)
32ЕрусалимкӀэ дэкӀуаехэу гъогум зытетхэм, игъогу рыкӀохэрэм апэ итэу Исус кӀуагъэ. Ахэмэ агъэшӀагъоу, щынагъо агухэм арылъэу, ыуж итхэу кӀощтыгъэх. Исус джыри зэ игъогу рыкӀорэ нэбгырэ пшӀыкӀутӀур зы лъэныкъокӀэ Ӏуищыхи, ежь къехъулӀэщтыр ариӀоу ыублагъ.
33– Мары, тэ джы ЕрусалимкӀэ тыдэкӀуае, – ыӀуагъ. – Ащ ЦӀыф Лъэпкъым ы Къо дин пэщэшхохэмрэ Тэурат егъэджэкӀо пащэхэмрэ щаӀэкӀэхьащт. Ахэмэ ежь
укӀ къытыралъхьащт, хымэ лъэпкъхэми#10:33 хымэ лъэпкъхэр – мыщ дэжьым къикӀырэр рим цӀыфхэу тетыгъо зиӀэхэр ары. аӀэкӀалъхьащт. 34Ахэр къыкӀэнэкӀэщтых, къытеужъунтхэщтых, къамыщкӀэ къеощтых, аукӀыщт. Мэфищ нэужми ежь лӀагъэхэм къахэтэджыкӀыжьыщт.
Якъубэрэ Иуанрэ Исус зыкӀелъэӀугъэхэ Ӏофыр
(Маттэ 20:20-28)
35Зебедей ыкъохэу, Якъубэрэ Иуанрэ Исус къыбгъодахьэхи, къыраӀуагъ:
– Дин гъэсакӀу, тэ тыкъызэрэолъэӀущтыр къытфэпшӀэнэу тыфай.
36– Сыда къышъуфэсшӀэнэу шъузыфаер? – ариӀуагъ Исус.
37– О уищытхъушхо къызыскӀэ, зыр уиджабгъукӀэ адрэр уисэмэгубгъукӀэ тыкъэтӀысынэу фит тышӀ, – къыраӀожьыгъ ахэмэ.
38– Шъо шъузыкӀэлъэӀурэр шъушӀэрэп, – ариӀуагъ Исус. – Къиным ишъуалъэ итэу сэ сызэшъощтым шъо шъуешъон шъулъэкӀыщта, хьауми цӀыфхэм Ӏаеу сызэраумэхъыщт шӀыкӀэм фэдэу, зяжъугъэумэхъын шъулъэкӀыщта?
39– ТлъэкӀыщт, – къыраӀожьыгъ ахэмэ.
– Къиным ишъуалъэ итэу сэ сызэшъощтым шъори шъуешъощт, – ариӀуагъ Исус. – ЦӀыфхэм сэ Ӏаеу сызэраумэхъыщт шӀыкӀэм фэдэу, шъори шъуаумэхъыщт. 40Ау сэ сиджабгъукӀэ е сисэмэгубгъукӀэ шъукъэтӀысынэу фит шъусшӀын слъэкӀыщтэп. А тӀысыпӀэхэр Тхьэм зыфигъэхьазырыгъэхэ цӀыфхэм яй.
41Адрэ нэбгырипшӀэу Исус игъогу рыкӀохэрэм ар зызэхахым, Якъубрэ Иуанрэ афэгубжыгъэх. 42Ащ дэжьым Исус игъогу рыкӀохэрэм къяджагъ.
– Шъо шъошӀэ, – ариӀуагъ Исус, – мы дунаим пщыкӀэ заджэхэрэр цӀыфхэм апшъэ зэрэдэсхэрэри, ятхьэматэхэм цӀыфхэм тетыгъо зэрафыряӀэрэри шъошӀэ. 43Шъо шъузэрэзэфыщытын фаер арэп. Шъуащыщэу ины хъу зышӀоигъор Ӏофтабгэ къышъуфэхъун фае. 44Шъуащыщэу апэ ит зышӀоигъори пстэуми пщылӀ афэхъун фае. 45Сыда пӀомэ, ЦӀыф Лъэпкъым ы Къо#10:45 ЦӀыф Лъэпкъым ы Къо – еплъ Маттэ 8:20. цӀыфхэм яшӀуагъэ ежь зэригъэкӀыжьыныр арэп къызкӀэкӀуагъэр, ежь ишӀуагъэ цӀыфхэм аригъэкӀыныр, цӀыфыбэхэми апае ыпсэ шъхьэщэфыжьэу ытыныр ары нахь.
Бар-Тимай зыцӀэ нэшъур Исус зэригъэхъужьыгъэр
(Маттэ 20:29-34; Лука 18:35-43)
46Исусрэ игъогу рыкӀохэрэмрэ къалэу Ерихон#10:46 къалэу Ерихон – еплъ Маттэ 20:29. къэкӀуагъэх. ЦӀыф купышхо ягъусэу ахэр къалэм дэкӀыжьхэ зэхъум, Тимей ыкъоу Бар-Тимай зыцӀэ лъэӀокӀо нэшъу горэ гъогу напцэм Ӏусыгъ. 47Назарет щыщ Исус зэрэблэкӀырэр зызэхехым, мэкъэшхокӀэ къэджагъ: – Даутэ ы Къо#10:47 Даутэ ы Къо – еплъ Маттэ 9:27. Исус, гукӀэгъу къысфэшӀ!
48ЦӀыфыбэхэм амыдэу «Щыгъэт!» – раӀуагъ. Ау ар джыри нахь мэкъэшхокӀэ къэджагъ: – Даутэ ы Къу, гукӀэгъу къысфэшӀ!
49Исус къызэтеуцуи, къыӀуагъ: – Моу шъукъедж. – Умыщын, къэтэдж, ежь къыоджэ, – аӀуи, нэшъум къеджагъэх. 50Нэшъум ищыгъын кӀыӀутелъ зытыридзи, къызщылъэти, Исус дэжь къэкӀуагъ.
51– Сыда къыпфэсшӀэнэу узыфаер? – риӀуагъ Исус а лӀым. – Рабби, сынэхэр къэгъэплъэжь, – къыриӀуагъ нэшъум.
52– КӀожь, – риӀуагъ Исус. – О уишӀошъхъуныгъэ уигъэхъужьыгъ. Ардэдэм нэшъум ынэхэр къэплъэжьыгъэх, Исуси ыуж итэу гъогум техьагъ.
Currently Selected:
Марк 10: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
