Марк 14
14
ЯПШӀЫКӀУПЛӀЭНЭРЭШЪХЬ
Исус тхьагъэпцӀыгъэкӀэ аукӀынэу Тхьэмэтэ Хэсэшхом хэт тхьэматэхэм гухэлъ зэрашӀыгъэр
(Маттэ 26:1-5; Лука 22:1-2; Иуан 11:45-53)
1ӀутӀыжъ зыцӀэ мэфэкӀ мэфэшхомрэ Хьалыгъу мыкӀу-мыпшэ зыщашхырэ мэфэкӀ мэфэшхохэмрэ#14:1 ӀутӀыжъ зыцӀэ мэфэкӀ мэфэшхомрэ Хьалыгъу мыкӀу-мыпшэ зыщашхырэ мэфэкӀ мэфэшхохэмрэ – еплъ Маттэ 26:2. къэсынхэкӀэ мэфитӀу къэнэжьыгъагъ. Дин пэщэшхохэмрэ Тэурат егъэджэкӀо пащэхэмрэ Исус аукӀыным пае, тхьагъэпцӀыгъэкӀэ зэраубытыщт шӀыкӀэм лъыхъущтыгъэх. 2Сыда пӀомэ, ахэмэ аӀуагъ:
– ЦӀыфхэм бырсырышхо къамыӀэтыным пае, мэфэкӀ мэфэшхом тефэу орэмыхъу.
Бзылъфыгъэ горэм осэшхо зиӀэ дагъэр Исус зэрэщифагъэр
(Маттэ 26:6-13; Иуан 12:1-8)
3ЕтӀанэ Исус къуаджэу Бет-Ание щыӀэу, Симонэу шъоджэ уз Ӏае зиӀагъэм иӀанэ пэсэу шхэщтыгъ. Шхэзэ, бзылъфыгъэ горэ унэм къихьагъ. А бзылъфыгъэм алабастэр зыцӀэ мыжъом хэшӀыкӀыгъэу, дэгъалъэ ыӀыгъыгъ. Нард зыцӀэ къэкӀыгъэм идагъэ къабзэу, осэшхо зиӀэу, мэ ӀэшӀу зыпихырэр а дэгъалъэм итыгъ. Бзылъфыгъэм дэгъалъэр ыкъути, Исус ышъхьэ дагъэр тырикӀагъ.
4Ар залъэгъум, зы куп губжи, моущтэу зэраӀожьыгъ:
– Мы дагъэу осэшхо зиӀэр хьаулыеу сыд пае ыгъэкӀодыгъа? 5А дагъэр ащагъэмэ, динар шъищым нахьыбэ къыхьыщтыгъ, тхьамыкӀэхэми афагощын алъэкӀыщтыгъ. Аущтэу аӀозэ, бзылъфыгъэм щыхьагъэх.
6– Ыуж шъуикӀ, – ыӀуагъ Исус. – Сыд пае бзылъфыгъэр жъугъэукӀытэра? Ащ шӀу къысфишӀагъ. 7ТхьамыкӀэхэр къышъухэт зэпытых, сыдигъо шъуфаеми шӀу афэшъушӀэн шъулъэкӀыщт, ау сэ сышъухэт зэпытыщтэп. 8Мы бзылъфыгъэм ылъэкӀыгъэр ышӀагъ. Ащ сэ спкъы дагъэ щифи, сызэрэчӀалъхьажьыным сыфиухьазырыгъ. 9Шъыпкъэр шъосэӀо, чӀылъэм зэкӀэ къэбарышӀур#14:9 къэбарышӀур – еплъ 8:35. тыдэ щагъэӀуми, мы бзылъфыгъэм ышӀагъэр къаӀотэжьыщт, цӀыфхэм а бзылъфыгъэр шӀукӀэ агу къагъэкӀыжьыным пае.
Исус дин пэщэшхохэм аригъэубытынэу Иудэ зэрадиштагъэр
(Маттэ 26:14-16; Лука 22:3-6)
10Исус игъогу рыкӀорэ нэбгырэ пшӀыкӀутӀум ащыщэу Иудэ Искариот дин пэщэшхохэм адэжь кӀуагъэ, Исус аригъэубытыным пае. 11Ахэмэ ар зызэхахым, гушӀуагъэх, ахъщи Иудэ къыратынэу къагъэгугъагъ. Аущтэу Исус ахэмэ аригъэубытыным пае, Ӏэрыфэгъу уахътэ паплъэу Иудэ ыублагъ.
Исус ӀутӀыжъ пчыхьэшъхьашхэр игъогу рыкӀохэрэм зэрадишӀыгъэр
(Маттэ 26:17-25; Лука 22:7-14, 21-23; Иуан 13:21-30)
12Хьалыгъу мыкӀу-мыпшэ зыщашхырэ мэфэкӀ мэфэшхохэм иапэрэ мафэу ӀутӀыжъ шъынэр зыщышӀуабзыщтыгъэм игъогу рыкӀохэрэм Исус къыраӀуагъ:
– ӀутӀыжъ пчыхьэшъхьашхэр щыпшӀынэу тыдэ тыкӀонышъ, щыдгъэхьазырынэу уфая?
13Аущтэу Исус игъогу рыкӀохэрэм ащыщэу нэбгыритӀу къалэм ыгъэкӀуагъ, моущтэу ариӀозэ:
– Къалэм шъудахьи, лъы горэм псы къошын ыхьэу шъурихьылӀэщт. А лӀым ыуж шъуитэу шъукӀу. 14А лӀыр зэрыхьэрэ унэр зием ешъуӀу: «Дин гъэсакӀом еӀо: Сэррэ сигъогу рыкӀохэрэмрэ ӀутӀыжъ пчыхьэшъхьашхэр зыщытшӀыщт хьакӀэщыр тыдэ щыӀа?» 15Джащыгъум унэ зэтетым ышъхьагърэ къатым тетэу, гъэкӀэрэкӀагъэу, хьэкӀэщышхоу тегъэпсыхьагъэр шъуигъэлъэгъущт. Ащ зэкӀэри къыщытфэжъугъэхьазыр.
16Исус игъогу рыкӀохэрэр ежьэхи, къалэм дэхьагъэх. Исус зэрариӀуагъэм тетэу пстэури къагъоти, ӀутӀыжъ пчыхьэшъхьашхэр агъэхьазырыгъ.
17Пчыхьэ зэхъум, Исус игъогу рыкӀорэ нэбгырэ пшӀыкӀутӀур игъусэу къэкӀуагъ. 18Ахэр Ӏанэм пэсхэу шхэхэ зэхъум Исус къыӀуагъ:
– Шъыпкъэр шъосэӀо, шъо сэ къыздашхэхэрэм шъуащыщ горэм тетыгъо зиӀэхэм саригъэубытыщт.
19Ахэмэ агу къеуагъ. Зым зыр ыуж итэу къыраӀонэу фежьагъэх:
– Ар сэрэп, ныӀа?
20– Шъо пшӀыкӀутӀум шъущыщэу мы апсым хьалыгъу къыздыхэзгъаорэр ары тетыгъо зиӀэхэм сязгъэубытыщтыр, – ариӀуагъ Исус. 21– Шъыпкъэ, ЦӀыф Лъэпкъым ы Къо дунаим ехыжьыщт, ежь ехьылӀагъэу Тхьэм игущыӀэ тхыгъэхэм зэрарытым фэдэу. Ау ЦӀыф Лъэпкъым ы Къо тетыгъо зиӀэхэм язгъэубытырэр гъогу мыгъо теуцуагъ! А цӀыфыр къэмыхъугъэмэ, ежьыркӀэ нахьышӀущтыгъ.
Зиусхьаным ипчыхьэшъхьашх
(Маттэ 26:26-30; Лука 22:15-20; 1 Кор. 11:23-25)
22Ахэр шхэхэ зэхъум, Исус хьалыгъур къыштагъ, Тхьэм щытхъу фишӀи, зэгуичи, ахэмэ арити, къыӀуагъ:
– Ма, шъушхы, мы хьалыгъур сэ спкъы ары.
23ЕтӀанэ шъуалъэр къышти, Тхьэм щытхъу фишӀи, аритыгъ. Ахэр зэкӀэ ащ итым щыщ ешъуагъэх.
24– Мы сэнэпсыр сэ слъэу Тхьэм ежьыррэ ицӀыфхэмрэ азыфагу дилъхьэгъэ зэзэгъыныгъэр къэзгъэшъыпкъэжьырэр#14:24 Сэ слъэу… зэзэгъыныгъэр къэзгъэшъыпкъэжьырэр – еплъ Маттэ 26:28. ары, – ариӀуагъ Исус. – ЦӀыфыбэхэм ишӀуагъэ якӀынэу, лъэу сэ къыскӀэкӀыщтыр ары. 25Шъыпкъэр шъосэӀо, Тхьэм и Тетыгъошхо къызыкӀощтым нэсыфэ, сэнэшъхьэпсым сешъожьыщтэп. А мафэм кӀэу сешъожьыщт.
26ЕтӀанэ Исусрэ игъогу рыкӀохэрэмрэ тхьэщытхъу орэд къызаӀо ужым, унэм икӀыхи, Елеон Ӏуашъхьэм кӀуагъэх.
«Сэ сызыщыщыр умышӀэу къэпӀощт» Исус Петрэ зэрэриӀуагъэр
(Маттэ 26:31-35; Лука 22:31-34; Иуан 13:36-38)
27– Шъо пстэуми сизакъоу утыгум сыкъишъунэщт, – ариӀуагъ Исус игъогу рыкӀохэрэм, – сыда пӀомэ, Тхьэм къызэриӀорэр игущыӀэ тхыгъэхэм арыт#14:27 Тхьэм… игущыӀэ тхыгъэхэм арыт – еплъ Пегъымбар Зэчрей тхылъэу ытхыгъэм 13:7.: «Сэ мэлахъор сыукӀыщт, мэлхэри зэбгырыкӀыжьыщтых». 28Ау лӀагъэхэм сыкъызахэтэджыкӀыжьыкӀэ, шъуапэ Галилей хэкум сыкӀощт.
29– Пстэуми утыгум укъыранэми, сэ укъисынэщтэп, – къыриӀуагъ Петрэ Исус.
30– Шъыпкъэр осэӀо, – риӀожьыгъ Исус Петрэ, – мы нычэпэ дэдэм атакъэр тӀо Ӏоным ыпэкӀэ, сэ сызыщыщыр умышӀэу гъогогъуищэ къэпӀощт.
31– Сэ сыбдэлӀэн фаеми, узыщыщыр сымышӀэу сӀощтэп, – теубытагъэу къыӀуагъ Петрэ. Ащ фэдэ къабзэу Исус игъогу рыкӀорэ адрэ лӀы пстэуми къаӀуагъ.
Исус Гефсимание хатэм Тхьэм зэрэщелъэӀугъэр
(Маттэ 26:36-46; Лука 22:39-46)
32Ащ нэужым Гефсимание#14:32 Гефсимание – еплъ Маттэ 26:36. зыцӀэ чӀыпӀэм нэсыгъэх.
– Моу шъуетӀысэх, сэ Тхьэм селъэӀуфэ, – ариӀуагъ Исус игъогу рыкӀохэрэм. 33Исус етӀанэ Петри, Якъуби, Иуани зыдищагъэх; къэнэшхъэеу, гумэкӀэу ыублагъ.
34– СилӀыкӀыным нэсэу инэу сыгу хэкӀы, – ариӀуагъ Исус. – Шъумычъыеу шъусакъэу моу шъущыӀ.
35ЕтӀанэ тӀэкӀу ӀукӀоти, чӀыгум зыридзыхи, амал иӀэмэ, къин щэчыным исыхьат блигъэкӀынэу Тхьэм елъэӀугъ.
36– Аббэу#14:36 Аббэ – «ты» ары. сэ ся Т, о умылъэкӀын Ӏоф зи щыӀэп, – ыӀуагъ. – Мы къин щэчыным ишъуалъэ сӀых. Ау сызыфаер мыхъоу, о узыфаер орэхъу.
37Ащ ыужым Исус игъогу рыкӀорэ нэбгырищымэ адэжь къыгъэзэжьи, чъыехэу къарихьылӀэжьыгъ.
– Симон, очъыя? – риӀуагъ Исус Петрэ. – Зы сыхьат закъо умычъыеу усакъын плъэкӀыгъэп, ара? 38Шъумычъыеу шъусакъ, псэкӀодшӀэным шъудимыхьыхынэуи Тхьэм шъуелъэӀу. Гур фай, ау пкъым ылъэкӀырэп.
39Исус етӀанэ ӀукӀыжьи, а гущыӀэ дэдэхэмкӀэ Тхьэм елъэӀугъ. 40Джыри зэ къызегъэзэжьым, а нэбгырищыр чъыехэу къарихьылӀэжьыгъ, сыда пӀомэ, анапӀэхэр онтэгъу хъугъэхэти ары. Ахэмэ Исус къыраӀожьыщтыр ашӀагъэп. 41Исус ящэнэрэу къызегъэзэжьым, ахэмэ ариӀуагъ:
– Шъо джыри шъочъыя, зышъогъэпсэфа? Икъун! Сыхьатыр къэсыгъ. Мары, ЦӀыф Лъэпкъым ы Къо псэкӀодышӀэ цӀыфхэм аӀэкӀэхьащт. 42Шъукъэтэдж! НекӀо, мары, ахэмэ сязгъэубытыщтыр къэблэгъагъ.
Исус зэраубытыгъэр
(Маттэ 26:47-56; Лука 22:47-53; Иуан 18:3-12)
43Исус джыри къэгущыӀэзэ, игъогу рыкӀорэ нэбгырэ пшӀыкӀутӀумэ ащыщэу Иудэу Исус тетыгъо зиӀэхэм язгъэубытыщтыр ардэдэм къэкӀуагъ. Чатэхэмрэ умэхэмрэ аӀыгъхэу, цӀыф купышхо игъусагъ. Дин пэщэшхохэри, Тэурат егъэджэкӀо пащэхэри, нахьыжъхэри ары ахэр къэзгъэкӀогъагъэхэр.
44– Сэ сызэбэущтыр ары зыфасӀорэр, – ыӀуи, аубытыщтыр зэраригъэлъэгъущт шӀыкӀэр игъусэхэм ариӀогъагъ Иудэ. – Ар шъуубыти, шъуфэсакъызэ Ӏушъущ.
45Иудэ къызэрэнэсэу Исус екӀуалӀи,
– Рабби! – ыӀуи, Исус ебэугъ.
46Аущтэу Исус аубытыгъ. 47Ащ дэжьым щытхэм ащыщ горэм ичатэ къырихи, дин пэщэшхом иунэӀут еуи, ытхьакӀумэ лъэныкъо гуиупкӀыгъ.
48– ХъункӀэкӀо горэ шъуубытыщтым фэдэу, чатэхэмрэ умэхэмрэ шъуӀыгъхэу шъукъыспэгъокӀыгъа? – ариӀуагъ Исус ахэмэ. 49– Мафэ къэси Тхьэм иунэшхо цӀыфхэм Тхьэм игущыӀэхэр щязгъашӀэхэу сышъухэтыгъ, ары шъхьакӀэ сышъуубытыгъэп. Ау мыр зыкӀэхъугъэр Тхьэм игущыӀэ тхыгъэхэр къэшъыпкъэжьынхэр ары.
50Джащыгъум Исус игъогу рыкӀорэ пстэури ежь утыгум къырани, хэхьажьыгъэх.
КӀалэу хэхьажьыгъэр
51КӀалэ горэ чэсэй фыжь ыпкъ ещэкӀыгъэу, Исус игъусэхэм ахэтыгъ. А кӀалэр къаубытэу аублагъ, 52ау кӀалэм чэсэй фыжьыр ахэмэ къаӀэкӀини, пцӀанэу аӀэкӀэкӀи, хэхьажьыгъ.
Исус Тхьэмэтэ Хэсэшхом ыпашъхьэ зэрэращагъэр
(Маттэ 26:57-68; Лука 22:54-55, 63-71; Иуан 18:13-14, 19-24)
53Исус дин пэщэшхом дэжь ащагъ. Адрэ дин пэщэшхохэри, нахьыжъхэри, Тэурат егъэджэкӀо пащэхэри зэкӀэ ащ дэжь къыщызэӀукӀагъэх. 54Петри чыжьэкӀэ Исус ыуж итэу, дин пэщэшхом ищагу нэсыфэ къыкӀэлъыкӀогъагъ. Ащ дэжьым машӀом зыщыригъэоу, къэрэгъулхэм ахэсыгъ.
55Дин пэщэшхохэмрэ Тхьэмэтэ Хэсэшхом#14:55 Тхьэмэтэ Хэсэшхор – еплъ Маттэ 5:22. щыщхэу адрэ тхьэмэтэ пстэумрэ Исус укӀ тыралъхьаным пае, шыхьат лъыхъущтыгъэх, ау зи къагъотыгъэп. 56Шыхьат нэпцӀыбэхэм Исус пцӀы Ӏэджи тыралъхьагъ, ары шъхьакӀэ къаӀуагъэхэр зэтефагъэхэп.
57Аущтэу зэхъум, шыхьат нэпцӀ куп къэтэджи, мыр Исус тырилъхьагъ:
58– Мы лӀым мыщ фэдэу къыӀоу зэхэтхыгъэ: «Тхьэм иунэшхоу цӀыфхэм аӀэкӀэ ашӀыгъэр сэ зэхэскъутэнышъ, цӀыфхэм аӀэкӀэ амышӀыгъэу нэмыкӀ унэшхо мэфищкӀэ зэтезгъэуцожьыщт».
59Ау а шыхьатхэми Исус тыралъхьагъэхэр зэтефагъэхэп.
60ЕтӀанэ дин пэщэшхор къэтэджи, утыгум къиуцуагъ.
– Сыд мы лӀыхэм о къыптыралъхьэрэр? Сыда зи къызкӀэмыӀорэр? – еупчӀыгъ ар Исус.
61Исус зиушъэфи, зи къыӀуагъэп.
– Ора Христосэу щытхъушхор зиӀэ Тхьэм ы Къо? – еупчӀыгъ джыри зэ дин пэщэшхор.
62– Сэры, – къыӀуагъ Исус, – лъэкӀышхор зиӀэ Тхьэм иджабгъукӀи госэу, ошъуапщэхэми ахэтэу, ЦӀыф Лъэпкъым ы Къо къакӀоу шъулъэгъущт.
63Ар къызеӀом дин пэщэшхом ищыгъынхэр къызэгуитхъыгъэх#14:63 ищыгъынхэр къызэгуитхъыгъ – еплъ Маттэ 26:65..
– Сыда нэмыкӀ шыхьат зэрэтищыкӀэгъэжьыр? – къыӀуагъ ащ. 64– Тхьэр зэригъэпцӀыгъэр шъо зэхэшъухыгъ. Сыдэущтэу шъухаплъэра? Ахэмэ зэкӀэмэ Исус укӀ ифэшъуашэу къаӀуагъ. 65Зы купым Исус теужъунтхэхэу аублагъ. Ынэгуи рахъуи, бжымкӀэ еуагъэх.
– Упегъымбармэ, къыоуагъэм ыцӀэ къаӀо! – раӀуагъ. Къэрэгъулэхэри Исус енэпэшъоуагъэх.
Петрэ Исус зыщыщыр ымышӀэу къызэриӀуагъэр
(Маттэ 26:69-75; Лука 22:56-62; Иуан 18:15-18, 25-27)
66Петрэ ыхэкӀэ щагум зыдэтым, дин пэщэшхом иунэӀут пшъашъэхэм ащыщ къэкӀуагъ. 67Петрэ машӀом зыщыригъэоу зелъэгъум, еплъи риӀуагъ:
– Ори а Исусэу Назарет щыщым уригъусагъ.
68– Хьау, о зыфапӀорэр сэ сшӀэрэп, къызгурыӀорэп, – ыӀуагъ Петр. ЕтӀанэ щагум дэкӀи, идэхьапӀэ уцугъэ. Атакъэр къэӀуагъ.
69УнэӀут пшъашъэм Петрэ ащ дэжьым щытэу зелъэгъум, а чӀыпӀэм щытхэм джыри зэ ариӀожьэу ыублагъ:
– Мыр ахэмэ ащыщ.
70– Хьау, сэ ахэмэ сащыщэп, – ыӀуагъ Петрэ джыри зэ. ТӀэкӀу тешӀагъэу ащ дэжьым щытхэм джыри зэ Петрэ къыраӀожьыгъ:
– Шъыпкъэу ори ахэмэ уащыщ; сыда пӀомэ, Галилей хэкум ущыщба? ЯгущыӀакӀэкӀэ укъэгущыӀэ.
71– Тхьэр сэгъэпцӀы къасӀорэр мышъыпкъэмэ, а лӀэу зыфашъуӀорэр сшӀэрэп, – ыӀуи, Петрэ тхьарыӀо ышӀэу ыублагъ.
72Ардэдэм ятӀонэрэу атакъэр къэӀуагъ. Джащыгъум Исус къыриӀогъэгъэ гущыӀэхэр Петрэ ыгу къэкӀыжьыгъэх:
– Атакъэр тӀо Ӏоным ыпэкӀэ, сэ сызыщыщыр умышӀэу гъогогъуищэ къэпӀощт. Ар ыгу къызэкӀыжьым, Петрэ къэгъыгъ.
Currently Selected:
Марк 14: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
