Марк 16

ЯПШӀЫКӀУХЭНЭРЭШЪХЬ

Исус лӀагъэхэм къызэрахэтэджыкӀыжьыгъэр

(Маттэ 28:1-8; Лука 24:1-12; Иуан 20:1-10)

1Шэмбэтыр зыблэкӀым, Магдалэ щыщ Мерэм, Саломий, Якъубэ янэ Мерэми къэунэм кӀонхэу, Исус ихьадэ дагъэ щафэным пае, мэ ӀэшӀу зыпихырэ щыфэн дагъэхэр ащэфыгъэх. 2Тхьэмафэм иапэрэ мафэм#16:2 тхьэмафэм иапэрэ мафэр – тхьаумэфэ мафэр ары. жьы дэдэу, тыгъэр къыкъокӀыгъэ къодыеу, къэунэм кӀонхэу гъогу техьагъэх.

3– Къэунэ чӀэхьапӀэм мыжъошхоу Ӏулъыр хэт тфыӀуигъэукӀорэикӀына? – зэраӀожьыгъ ахэмэ.

4Зэплъэхэм, мыжъошхор, ар мыжъо ин дэдагъ, ӀугъэукӀорэикӀыгъэу алъэгъугъ. 5Къэунэм зычӀахьэхэм, щыгъын фыжь кӀыхьэкӀэ фэпагъэу, кӀалэ горэ джабгъу лъэныкъомкӀэ щысэу алъэгъуи, агучӀэ изыгъ.

6– ШъумыгумэкӀ, – къариӀуагъ ащ ахэмэ. – Назарет щыщ Исусэу къащым тыраӀулӀагъэм шъузэрэлъыхъурэр сэшӀэ. Ар мыщ щыӀэжьэп. Ар лӀагъэхэм къахэтэджыкӀыжьыгъ! Мары чӀыпӀэу зычӀалъхьажьыгъэр. 7Ау шъо шъукӀуи, Петрэрэ адрэ лӀыхэу Исус игъогу рыкӀохэрэмрэ яшъуӀу: «Шъо шъуапэ ар Галилей кӀощт. КъызэрэшъуиӀуагъэм тетэу ащ дэжьым щышъулъэгъущт».

8Джащыгъум агучӀэ изыгъэти, бзылъфыгъэхэр кӀэзэзхэу къэунэм къычӀэкӀыжьхи, хэхьажьыгъэх. Зыми зи раӀуагъэп, сыда пӀомэ, джащ фэдизэу щынагъэхэти ары.

Исус Магдалэ щыщ Мерэм зыкъызэрэригъэлъэгъугъэр

(Маттэ 28:9-10; Иуан 20:11-18)

9Тхьэмафэм иапэрэ мафэм жьэу Исус лӀагъэхэм къызахэтэджыкӀыжьым, ыпэ рапшӀэу Магдалэ щыщ Мерэм зыкъыригъэлъэгъугъ. А Мерэм ары Исус джынэпцӀибл зыхифыгъагъэр. 10Ар Исус игъусагъэхэу, джы шъыгъохэу гъыщтыгъэхэм адэжь кӀуи, хъугъэ-шӀагъэр ариӀуагъ. 11Исус зэрэпсаури Мерэм ар зэрилъэгъугъэри зызэхахым, ашӀошъ хъугъэп.

Игъогу рыкӀохэрэм ащыщхэу нэбгыритӀу Исус зыкъызэраригъэлъэгъугъэр

(Лука 24:13-35)

12ЕтӀанэ игъогу рыкӀохэрэм ащыщхэу нэбгыритӀу губгъомкӀэ кӀохэзэ, нэмыкӀ теплъэ иӀэу, Исус зыкъаригъэлъэгъугъ. 13Ахэми агъэзэжьи, адрэ цӀыфхэу Исус игъогу рыкӀохэрэм къэбарыр араӀотэжьыгъ, ау ахэмэ ашӀошъ хъугъэп.

Исус игъогу рыкӀохэрэм апшъэ рилъхьэгъэ Ӏофыр

(Маттэ 28:16-20; Лука 24:36-49; Иуан 20:19-23; Апостол. 1:6-8)

14Ащ ыуж игъогу рыкӀорэ нэбгырэ пшӀыкӀузыр шхэхэзэ, Исус зыкъаригъэлъэгъугъ. Ахэмэ яшӀошъмыхъуныгъэмрэ ягуркъагъэрэ апаий, ежь лӀагъэхэм къахэтэджыкӀыжьыгъэу зылъэгъугъэхэм къаӀотагъэр ашӀошъ зэрэмыхъугъэм паий ягыигъ.

15– Дунаир зэкӀэ къэшъукӀухьи, цӀыф пстэуми къэбарышӀур яжъугъэӀу – ариӀуагъ Исус ахэмэ. 16– Хэти зышӀошъ хъоу, зязгъэумэхъырэр мыкӀодэу Тхьэм къыгъэнэжьыщт, ау хэти зышӀошъ мыхъурэр Тхьэм ыгъэмысэщт. 17ШӀошъхъуныгъэ зиӀэ цӀыфхэм мы нэшанэхэр ягъусэщтых: Сэ сцӀэкӀэ цӀыфхэм джынапцӀэхэр ахафыщтых; амышӀэрэ бзэхэмкӀэ гущыӀэщтых; 18аӀэхэмкӀи блэхэр къаштэщтых; узгъэлӀэн къызхэкӀын шъоным ешъохэми, зи къаришӀэщтэп; ахэмэ аӀэхэр зытыралъхьэрэ сымаджэхэр хъужьыщтых.

Исус уашъом зэрэдэкӀоежьыгъэр

(Лука 24:50-53; Апостол. 1:9-11)

19Зиусхьан Исус игъогу рыкӀохэрэм къызадэгущыӀэм ыуж, Тхьэм ар уашъом дищэежьыгъ, Тхьэм иджабгъукӀи щысынэу готӀысхьагъ. 20Исус игъогу рыкӀохэрэр ежьагъэхэу, Тхьэм игущыӀэхэр тыдэкӀи щагъэӀущтыгъэх. Зиусхьаныр адэлажьэу, нэшэнэ гъэшӀэгъонхэу ежь игущыӀэхэм гъусэ афишӀыщтыгъэхэмкӀэ а гущыӀэхэр ыгъэшъыпкъэжьыщтыгъэх. Амин.

Currently Selected:

Марк 16: AdgNT14

Highlight

Copy