Jon 19

Ghɨ jis na ghɨ kəta hi banti Jisòs a kàkfùtàfù

1Balèt lyi fo Jisòs na ghɨ sam. 2Sojàsù ba a fot a tu tùŋà so a wun a tû. Mâk njumù tù fə̀n su baŋasu a wun wu wùn, 3hì motè kə ni bê time a wun ashyə̂ bɨ̂nà wûn jîsà na, “Yuchwî yi satani yi ghɨt a Jûs.” Bɨ̂ŋtè ni sama wûn a yi kə̀k.

4Balèt kaha fwu ben jis ha ghɨt a Jûs ghe na, “Mu ti lyê fwo bênàlò nì wûn ha ghàn shyəma ghàn hi khə na mu tà yen jə gha ye wù bobhe.” 5Jisòs fwu bên ma wù ti mak nju mù tù fə̀n nì fota tu tùŋà a wun a tû. Balèt jis ha ghɨt atɨ̂na na, “Wùt àtɨ̂n wunâ!”

6Ngàŋsù ndâ Fùyènsu nì sojà se su ndùku chînà ndâ Fùyèn yì chìk yen ben nì wûn ni yîmì hì bwata jîsà kə na, “Ma ghɨ banti wûn a kàkfùtàfù!”

Balèt jis ha ghɨna na, “Ghàn lyi lê wûn ma ghàn yê banti. Mu tà yen jə gha ye wù bobhe.”

7Ghɨt a Jûs ghê fî jis kpenhi kə na, “Sak yahi chwùtè na wù kəta hi kpû beka wù jìsà na yi mò Wâ Fùyèn.”

8Balèt yu ni hì fânà. 9Wù fî kaha lyi Jisòs lyi nì wûn a tôk buf ha wûn na, “Wò lo nâ afa?”

Jisòs tê fîsì. 10Balèt buf ha wun na, “Wò wun mu agha? Wò khə wi na mu kətalò jyaka hi jìs na, ghɨ de wò makə hi jìs na ghɨ banti wò a kàkfùtàfù?”

11Jisòs fîsì jis na, “Wò kəta wi jyak ale a mu a tû, a bu kə ghe a Yènfù fo ha wò. Yi chwûtè na be yì chìk mò ma à ni wùt we wù ye fo mu ha wò.”

12Balèt yu ni hì khɨŋa hi dè wûn, biyani ghɨt a Jûs ghê hì fê bwate jîsà kə na, “Wò ki de wùt wunâ wù lô, ma à hi mô na wò kòŋà wi fə̀n wù chìk a Lûm. À jìsà nâbi nde na yi mò fə̀n ma à hi mô na wù nò fə̀n wù chìk a Lûm.”

13Balèt yu ni, lyi fwu ben nì Jisòs, ndokò wu wən a yi ti saki, ghɨ toŋte yi jìs yi Hibùlùs na, “Gabatà.” 14À ndùku mò ni, ma à hì mô kə nâ nchwì tâ, a mô tuk we ghɨ ndùku fate wunu na tuku yu ma yimi hi yə tuk wu Daŋa chyalanu. Balèt ndokò wu kpòk ki jîs ha ghɨt a Jûs ghe na, “À mò fə̀n wânù ni!”

15Biyani ghɨna bwati jis kə na, “Lô nì wûn! Lô nì wûn! Ma ghɨ banti wûn a kàkfùtàfù!”

Balèt buf ha ghɨna na, “Ghàn jìsà na mu banti fə̀n wânù agha?”

Ngàŋsù ndâ Fùyènsu jis na, “Ghàh kəta wi fə̀n wùlè a bu kə fə̀n wù chìk a Lûm.”

16Balèt ki fo Jisòs na ghɨna yê banti.

Ghɨ banti Jisòs a tô kàkfùtàfù

(Mat 27.32-44; Mâk 15.21-32; Lûk 23.26-43)

Jisòs hì gbê chyâ kə sojàsu wu wô. 17Wù bêkà kâkfùtàfù wun fu kə nì ngɨŋ à wûn lyi yen nì funfu wu lùk afa ghɨ ndùku toŋte na Wok yi tu, ghɨ toŋte luk wu tɨnu yi jìs yi Hibùlùs na, “Golgotà.” 18Ghɨ banti Jisòs afû, fî banti kəbi ghɨt ale à bà, banti wù mòk a kàkfùtàfù lefu a Jisòs a bàh à kpen wu wo ta, fî banti wùlè a wun a bàh à kpen wu wo kôwì. Jisòs hì mô fùtɨ̂n, fùtɨ̂n. 19Balèt jîs ghɨ nyak a tô shyə̀ na, “Wun mò Jisòs a wù Nasalì fə̀n à ghɨt a Jûs,” ghɨ bantî à ghɨ̂n a tô kàkfùtàfù. 20Ghɨt a Jûs nâ hidù hì taŋa agha atɨna, beka luk we ghɨ tì bante Jisòs atɨ̂n ndùku bakhe yênà yi tèk, gha mu ghê mô ma ghɨ tì nyak yi jìs yi Hibùlùs fî nyak yi jìs yi Lûm nì yi jìs yì Gɨlìs. 21Ngàŋsu ndâ Fùyènsu hì tunhe ha Balèt na wù wijə fə̀n à Jûs. Jis ha wun na wù bɨ̀li nyak na, ‘Wùt wunâ chehì jîsà na yi mò fə̀n à Jûs.’

22Balèt fîsì na, “Gha tɨni nè faŋa kə te mu jìsa na ghɨ nyak.”

23À hì mô te sojàsu bante mihe Jisòs, ghɨna jyâtì njusu wunsu wu bàh wù kìk nâbi nde hì lyê kə a bâh à mòk, à ben faŋ kə sùju sê wù tì màka a fùtɨ̂n, su mô ma ghɨ tum kə sufûblù teka ghɨ yuŋ luk wule. 24Sojà sê jis kə ha ngɨŋsu ghɨna su na, “Kə ghàhnà nè bâtè sìnâ. Ma ghàhnà tum byè, ma ghɨ yen na à kəta nde agha.” Gha mi yîn gan ni shyəma gha ye ghɨ tì nyàka a ŋwàklù Fùyèn kpen na,

“Ghɨ tî jyâtì nju samsu

hì tuma byè hi yə nju samsu.”

Sojà mu sîn ni gha mi yîn.

25Ghɨ banti Jisòs, nè wûn nì wâ nè wûn wùlè bakha nì Mèli ywê Kèlobàs nì Mèli wù Madalà yen timi bakha a wûn a ngwùŋ à kàkfùtàfù. 26À hì mô te Jisòs yena nè wûn afû, fî yen hi kî yen jùmtìbàm à wûn yìlè we wù ndùku kôŋà yâ, wù jis ha nè wûn na, “Wùt ywên, wo khə na wùna mò wan wâ.”

27Fî kaha jis ha jùmtìbàm àtɨ̂n na, “Wo khə na wùna mò nâ.” Hi yìmi wu tuk afû jùmtìbàm à Jisòs àtɨ̂n lyi nè Jisòs, ghê wûn hi chyə̂ a wun a bɨn.

Jisòs kpû

(Mat 27.45-56; Mâk 15.33-41; Lûk 23.44-49)

28Yu tì kpên, Jisòs yen na nâbi ghə ti mî, wù hì fê khɨŋa hi lunhe gha ye ghɨ ndùku mô ma ghɨ ti nyak a ŋwàklù Fùyèn ki jîs na, “Kuŋ à mòlû yimalò mu.”

29Ghɨ ben nì sàl à mu lùk ma mù ti tâ, ghɨ chwu a kùncha fahi lihi a tô fùkàk chin kokhi yen a wun a yi jwô. 30Te wù fye lùk mù tɨ̂n jis na, “Yi ti mî.”

Ni yâ, tuŋhi a to wuna a chyə̂ fo gokhì a yohnà wuna.

Ghɨ so yi bi là yi Jisòs

31À ndùku mô ni ghɨ fate wu wun na tuku yu ma ghɨ yə tuk wu laku, wu mô hanɨ̂ŋ, beka à ndùku mô kəbi tuk wu Daŋa Chyalanu. Ghɨt a Jûs jis na Balèt ni ma khɨmti fwəni ghɨna ma ghɨna tahi nyàŋhè kpû, ma chwohi gun tu ghɨna tu a chyə̂. 32Sojàsu bên khɨmti fwəni wùt we ghɨ tì bante ghê Jisòs, fî yen ha wùlè we khɨmtilò. 33Shihi yèn ha Jisòs, yen ma wù shyə kpû, tê fê khɨmte jə̀ fwəni wuni. 34Sojà wùlè ki bɨlà lyè yi woŋ ki so bùk a bàh a wùn a wuna atɨ̂n, luŋû bîn hì fwo bakhe nì mòlû. 35À gha mi yîn fòkti wùt we wù tì yena te yi gana. Wu khə na yi jìsà kə nâ hamok, fôktè gha mi yîn na wò yu ma wò boŋà bimi. 36Gha mɨ ghɨ̂n gan shyəma gha ghe ghɨ nyaka a ŋwàklù Fùyèn kpen na, “Nâ wufa wuna à mòk ghɨ bè khɨma wi.” 37Kəbi nì yê ghɨ tì nyàka na, “Ghɨta bè hì kelò wûn we ghɨ so buka.”

Ghɨ gûmà Jisòs

(Mat 27.57-61; Mâk 15.42-47; Lûk 23.50-56)

38Jisòs tî kpû, Josèf wù Àlìmàtiyà yen jis ha Balèt na yi khɨŋa hi lyè gun yi Jisòs hi gùmà. Josèf ndùku mô yâ, a mô kəbi jùmtìbàm à Jisòs, kòŋà wi hi fwu a ndan beka wù ndùku fânà ghɨt a Jûs. Wù buf ni, Balèt bimî, wù lo yen hi lyè lò nì gun yi tɨni. 39Wù ndùku gbê ghê Nìkòdemùs we wù tì ye mote ghê Jisòs ntuksu yâ. Nìkòdemùs yen nì mə̂ bakhi nì yûhì yìlè ma ghɨ ti fəh a nam a chika. 40Ghɨna yen yok yûhì yê wu bàh wu sùnju, lɨm Jisòs atɨ̂n. Ghɨna ndùku nê ki gha ye ghɨt a Jûs ye shihi gùmà wût, ghɨ nilò. 41Ghɨ tì banti Jisòs wu lùk fuk à mtama bakha bênà afû, sî yile mô a fùk afû, teka ma ghɨ ye timè guma wùt atɨ̂n. 42Ghɨ gûmà Jisòs atɨ̂n, beka sî tɨni ndùku bakhe bê afû ni, ghɨ fê fate wu wun na tuku yu ma ghɨ yə tuk wu laku ghɨt a Jûs.

Currently Selected:

Jon 19: bmv

Highlight

Copy