Matiyò 19

Jisòs yikî kum hi jyàhì malâ

(Mâk 10.1-12)

1À hì mô te Jisòs jìsa mihe gha mɨ ghɨ̂n, wù lô a Galìlî daŋ yen a bàh a Jùdiyà, a jin yi jwô à Jodàn. 2Ghɨta hì jûmtè wûn, dô kə ni wù chwuk ghe ghɨ ndùku yafa a ghɨna fùtɨ̂n.

3Ghɨt a Falàsî ale ben hi yute jwo wuni ki buf nâ, “Saki bimelò nâ wùt làhi jùm à ywê wûn nâbi a yìni gha wù kòŋà agha?”

4Jisòs fîsì na, “Ba ghàn ti taŋ yen a ŋwàklù Fùyèn na, à ndùku mô te mbyî yìme, Yènfù fati wùt lɨmà nì wùt ywên agha? 5Yènfù tì fati yâ ki jîs na ‘Kum ni, wùt lɨmà bè lô de lò bè wûn nì nè wûn, ma wù yê chinti ghê ywê wûn, ma ghɨna à bà chîntè hi mô kə shyə à mòk,’ 6Yi mô ni ma ghɨna hì fê bu ghɨt à bà, mô kə wùt wù mòk. Yi chwûtè na Yènfù kwut nâbi ghə kə wùt yènti.”

7Ghɨna buf ha wun nâ, “Yi mô te wò jìsa, Musìs ki fê jîs na wùt lɨmà mò hi jùm a ywê wûn, wu nyak a ŋwàklù wu fo ha wûn njwô ghə?”

8Jisòs jis ha ghɨna na, “Musìs tì bimi na ghàn hi jûmà ywen ghana beka təm ghana ta. À bu na a mò ya te Yènfù tì lèma a yìmi. 9Mu jìsà ha ghàn na, a ki jûmà nâbi nde ywê wûn, a bu kə na wùt ywên àtɨ̂n chyə lò nì wùt lɨmà wùlè, ma à hi mô na wù ti khəm sak yi malâ.”

10Jùmtìsùbàmsu wunsu jis ha wun na, “Yìna hì mô chyənà ye wùt lɨmà ghê wùt ywen mò hi tè chyə, ma yi nê hi jwòfà kə na wùt faŋ ha kwè.”

11Jisòs jis ha ghɨna na, “À wijə ghɨt à jɨ̀m a ghɨ mô hi chyə̂ te jis yin jìsà, a mò kə hi chyə ghɨt ghe Yènfù mò ma fu ti fô jyaka na ghɨna chyə wu lum afân. 12Beka gha dò kə ni a mô hi nì na wùt faŋ ha kwè. Ghɨ ale faŋa ha kwè ma ghɨ bwɨ kə ni, ghɨ le faŋa ha kwè beka à ni à ghɨ̂t, ghɨ le tunhe malâ kum fə̀n wù Fùyènù. À mò nâbi nde hi chyə te gha mi yîn jìsà wu hi tòkà yutê.”

Jisòs bonhi mwəlà mù tetamù

13Ghɨt ale lyi ben nì mwəlà mù tetamù na Jisòs lem wo a ghɨna tû ma wù chyati ha ghɨna, biyani jùmtìbàmsu wunsu hì njaŋâ ha ghɨt atɨna na kə ghɨna ben nì mwəlà hi fo ngə̂k ha Jisòs. 14Jisòs ki jîs ha jùmtìbàmsu wunsu na, “Ghàn de mwəlà ma ghɨna ben ha mu. Kə ghàn fi tamti ghɨna beka fə̀n wù Fùyènù kəta ghɨt ghe ghɨ mô te ghɨna.” 15Wù jis ni lem a wo a ghɨna tû bonhi ghɨna lo afû hì gbê yênà.

Jisòs yiki kum ghaki nì fə̂n wù Fùyènù

(Mâk 10.17-31; Lûk 18.18-30)

16Wùt wùlè tî bèn buf ha Jisòs na, “Chichà, mu mò hi nì nâ yìni gha jûŋì hi khɨte chyəna ghe ghɨ bè mê wi agha?”

17Jisòs buf ha wun nâ, “Njwô ghə te wò bufa gha jûŋì ha mu agha? À jwòfà kpene kə Fùyèn. Wò hì kôŋà hi khɨti chyəna ghe ghɨ bè mê wi, wò hi ywo gha yè saktu Fùyèn tu jìsà, lêmà.”

18Wùt àtɨ̂n buf ha Jisòs na, “Wò jìsà tɨni saktu agha?”

Mu jìsà na, “Te tu jîsà na, kə wùt ywi, kə wùt chyə nì ywê wùt makə lɨm à wùt, kə wùt chwoŋ, kə wùt timi bɨ̀n à sak yi fêm, 19ngumli bâ nì nâ, kòŋ wâ nâ kə yi ghəl te wò kòŋà ngɨŋ yâ.”

20Wan wù kpuŋ mu we jis ha Jisòs na, “Mu ti lem sak tɨ̂n nâ tù jɨ̀m. À faŋ ghə shyəma mu ni?”

21Jisòs jis ha wûn na, “Wò shìki kôŋ hi tè jwòfà kpenâ a Yènfù ashyə̂ wo yen bəklî mwə̀ mâ nâ mù jɨ̀m wo fo ka tɨnu ha ghɨt a fufana, ma wò khɨti ghaki a nyə̂. Wò ni yâ, wò ben jûmtì mu.”

22Te wan wù kpuŋ we ywo gha mi yîn ni, lo gûnà kə̂kà beka wù ndùku kəta mwə̀lû mu dô kə ni.

23Jisòs ki jîs ha jùmtìbàmsu wunsu na, “Mu jìsà ha ghàn hamok na, yi talò shyəma wùt wù chìk bê lye lùk wu fə̀n Fùyènù. 24Mu fè fòktè ha ghàn. Na yi bonelò shyəma nyàm à kwaŋ lye tohna a bùk a saka chyâ shyəma wùt wù chìk lyi a lùk wu fə̀n Fùyènù.”

25Jùmtìbàmsu wunsu yu gha mi yin ni, jwo yîm ghɨna. Ghɨna buf na, “Yi shìki mô ni ma à bê bon nâ nde?”

26Jisòs ki ghɨna ni jis na, “Gha mi yîn mò kə hi ta ghak a wùt, biyani gha jɨ̀m bone kə ni ha Yènfù.”

27Bità buf ha Jisòs na, ba wò ti yen te ghàh de mwə̀ mù jɨ̀m hì jûmtì wò, ghàh bè khɨte ghə?

28Jisòs fîsì ha ghɨna na, “Mu jìsà ha ghàn hamok na, a bè hì mô a mbyî yì fê a lùk afa Wâ Wùt ndòko kpoko tu fə̀n wu wunu atɨ̂n à dɨ̀ŋ afa wù kəta, ma ghàn ghe ghàn chehì jûmtè wûn ma ghàn boŋà ndòko a mu kpòk mù tù fə̀n njwòsù bà saka te Isalì ghɨ̂n njwòsù bà. 29Nâbi nde we wù de bɨn a wuna makə wana ne nì jâmtùsù wunsu makə bè wûn makə nè wûn makə wâ wûn makə mu fùk mù wûn kum mu, bè fê khɨti mwə̀ muna hidù nì chyəna ghe ghɨ bè mê wi. 30Ghɨt a dona ghe ghɨ mô chîn ashyə̂, bè hì mô yi bàm, ma dùdû ye yi mò yi bàm ma yì bê hi mô ashyə̂.”

Currently Selected:

Matiyò 19: bmv

Highlight

Copy