Piilimka 24

1Yɔgyɔgla de Abrayam yaa jam kpaŋ ate wa benaŋa a cheŋ. Naawen a jam niak wa kama nna yegayega. 2Wa yaa weeni tomteerɔma meena kpagni waai ale a nya wa ŋantaŋa meena zuk la ayen, <<Pai fi nisaŋa a yik m kɔsukku tɛŋka. 3Mi a yaali ka fi pɛ Naawen yuenni, Wen dii ale soa wenzuk ale tɛŋka la nyiŋ ayen fi kan yaali nipok Keenan demma ate mi bo ale ba la liema po a te m nidoabinni, 4alege fi le cheŋ ka m dek tɛŋka ale m nuruma jigi a yaali nipok a te m nidoabinni Aizik.>>

5Tomteerɔwa yaa bek Abrayam ayen, <<Alege nipowa a nin kaa yaali ayen wa va mi a jam tɛŋka de? M ta fi nidoabinni a ŋman cheŋ fi ale nyini tɛŋ kaai la yaa?>>

6Abrayam yaa weeni ayen, <<Seba ate fi kan ta m nidoabinni a ŋman cheŋ dula.>> 7Abrayam ŋman weeni ayen, <<Naawen, Wen dii ale soa wenzukku la, waai ale ta mi nyini m kowa yenni po ale m dek tɛŋka po a nyini la, ale biisi ale mi ale pɛ a puulim a weeni ayen, <Fi ŋaaŋsaŋa m le pa tɛŋka de a te ba la,> wa le tom wa maarɔwa ate wa dɛ fi niŋ ate fi baga a yaali nipok a te m nidoabinni. 8Nipowa a dan kaa siagi ayen wa va fu a jamu, fi le yeeri fidek mi pumpuulimaŋa de po. Tin kan ta m nidoabinni a ŋman cheŋ dula.>> 9Tomteerɔwa yaa pai wa nisaŋa a yik wa kpagni Abrayam kɔsukku a yaa pɛ a magsi ale wanni de.>>

10Tomteerɔwa yaa yik wa kpagni laalaakomiba pi a cheŋ. Wa maa ta wa kpagni ŋanmaŋsa tɔgatɔga a cheŋ. Wa yaa lo suik po a duŋ Araam Nayaraim a ga taam paari Nayo tɛŋka. 11Wa yaa basi ate laalaakomima a kpi duna tɛŋ a moata vinni tɛŋka peelim. Ku jam tuak ka junɔi geŋ, diipo ate nipooba a nyini ga a ŋari nyiam la.

12Tomteerɔwa yaa puusi ayen, <<Naawen yaa, mi kpagni Abrayam Wenni, te nakdeka jinla, abe fi sak ŋmanteka ale m kpagni Abrayam. 13Nya, mi za ka bulika dɛ tɛŋ, ate tɛŋka demma liema a jam ayen ba ŋari nyiam. 14Be basi ate m dan weeni nipokbili ayen, te ti fi liikka siŋ tɛŋ ate m nyu nyiam, ate wa weeni ayen, <Nyu abe fi ge ate m te fi laalaakomima mɛ>, basi ate wala chim waai ate fi lueri a magsi fi tomteerɔwa Aizik la. Kude le basi ate m seba ayen fi sak ŋmanteka ale m kpagni.

15Alege ate wa nueri puusaŋa la, nipokbili wa yuei ale Aribeka deri nyini ale wa liikka wa ŋmankpala zuk. Wa jam ka Milka nidoabinni Betuel lie. Milka jam ka Abrayam suoku Nayo pok. 16Nipokbinni jam nala ka nna yegayega, waai ale kan seba nidoa. Wa yaa cheŋ bulika a ŋari wa nyiamu a sueri liikka a ŋman jam.

17Abrayam tomteerɔwa yaa kpabi a tu wa a weeni ayen, <<Te mu nyiam maga dega fi liikka po.>>

18Wa yaa weeni ayen, Be ŋoa a nyu, m nyɔnɔ, ale kpabi te liikka a siŋ tɛŋ a te wa.

19Wa le te ate wa nyu la ŋaaŋnyiŋ, wa yaa weeni ayen, <<M le dari nyiam a te fi laalaakomima mɛ, ate ba ga nyu nueri.>> 20Wa yaa nye nwuli a kpiiri nyiamu a nyo jaab po, a chali ŋman cheŋ vinni a ga dari nyiam yega a te laalaakomima meena. 21Nuruwa an jam weeni wari ya alege kpesi a nya nipokbinni ase Naawen a niak wa chelimu ya.

22Laalaakomima ale nyu nyiamu a nueri la, nuruwa yaa yeeri ligmɔniŋ nifelinni ale ligmɔniŋ baŋsa siye. 23Wa yaa bek wa ayen, <<Fi ka wana lie? Weeni mu. Dɔk a bo fi kowa yenni po ate tama maari a goa?>>

24Wa yaa tulisi wa ayen, <<Mi ka Betuel lie. Betuel ka biik kaai ate Milka a biak a te Nayo la.>> 25Wa weeni gum du ayen, <<Ti ta wuuk kama a zuak, a ta dɔk mɛ a magsi fi goom yokku de.

26Nuruwa yaa koori tɛŋ a puusi Naawen, 27a weeni ayen, <<Mi a pak Naawen, mi kpagni Abrayam Wenni, waai ale kan zɛri mi kpagni Abrayam, waai ale kan zɛri mi kpagni ŋmanteka ale wensie sakka la. Dan ka mi Naawen a dɛ mi niŋ kama m chelimu po, a ta mu jam m kpagni mabisaŋa yenni.>>

28Nipokbinni yaa chali ga weeni wa mawa yenni demma wieŋa de. 29Aribeka jam ta ka suok wa yuei le Laban. Laban yaa kpabi a nyini cheŋ nuruwa jigi bulika. 30Wa le nya ligmɔniŋka nifelinni ale baŋsaŋa wa toawa nisima po la, ale wa za laalaakomima tɛŋ a moata bulika la. 31Wa yaa weeni wa ayen, <<Jam, fi waai ate Naawen a niak la, ka boa ate fi za peelim dela? Mi gomsi yenni kama ale jigi a magsi laalaakomima.>>

32Nuruwa yaa cheŋ yenni, ate ba yeeri ŋantaŋa laalaakomima zuk. Ba yaa ta wuuta jam te laalaakomima. A ta nyiam jam te wa ale wa nuruma ate ba sugri ba naŋsaŋa. 33Ba yaa zaani ŋandiinta wa niŋ, alege wa weeni ayen, <<M kan dɛ se ka m nin weeni m le ta diila. >> Laban yaa weeni ayen, <<Be weeni ti.>>

34Wa yaa weeni ayen, <<Mi ka Abrayam tomteerɔ. 35Naawen a niak mi kpagni Abrayam ka nna yegayega, ate wa jigsi. Wa te wa piisa ale niiga ale kpana ale ligmɔniŋ ale yɔm ale dɔklieba ale laalaakomiba ale bonsa. 36Mi kpagni powa Saara a biak ka nidoabili wa kpaŋsa po a te wa, ate wa pai jaab meena ate wa soa la a te wa. 37Ate mi kpagni basi ate mi a pɛ. Wa weeni ayen, <<Kan yaali Keenan demma ate mi bo ba tɛŋka po la lie a te m nidoabinni, 38alege cheŋ m kowa dɔkdemma, m dek buuni jigi a yaali nipok a te m nidoabinni.

39Mi yaa bek m kpagni ayen, <<Alege nipowa nin kaa siak wa va mu jamu?>>

40Wa yaa tulisi ayen, <<Naawen ate mi a cheŋ wa niŋ la, ale tom wa maarɔwa ate wa cheŋ ale fu abe wa niak fi chelimu, ate fi baga a yaali nipok a te m nidoabinni a nyini m buuni po, m kowa dɔkdemma po. 41Fi dan cheŋ m buuni jigi fi le yeeri fidek pɛka de po ase ba nin poom zɛri an pai wa te fu.

42<<Mi ale jam paari bulika jinla la, m yaa weeni ayen, <Naawen, mi kpagni Abrayam Wenni, fi daa yaali, niak m chelimu ate mi cheŋ jam nna. 43Nya, mi za ka bulika de tɛŋ. Nipokbili a dan jam ayen wa dari nyiam ate mi weeni wa ayen, <<Mi a saalim te mu nyiam maga fi liikka po,>> 44ate wa weeni mi ayen, <<Be ŋoa a nyu, m le dari nyiam a te fi laalaakomima mɛ,>> Basi ate wa chim waai ate Naawen a lueri magsi mi kpagni nidoabinni la.>

45<<Alege ate mi nueri puusaŋa mi suinummu po la, Aribeka a deri nyini ale liik wa ŋmankpala zuk. Wa yaa cheŋ siŋ bulika a dari nyiam, ate mi a weeni wa ayen, <Mi a saalim te mu nyiam ate m nyu.>

46<<Ate wa nye nwuli a te nyiamu nyini wa ŋmankpaluku zuk a siŋ tɛŋ ayen, <Be nyu, m le te fi laalaakomima mɛ a nyu.> Ate mi nyu, ate wa te laalaakomima mɛ a nyu.

47<<Mi yaa bek wa ayen, <Ka wana lie ale fi?> Wa yaa tulisi ayen, <Mi ka Nayo nidoabinni Betuel lie. Milka ale biak Betuel a te wa.> Ate mi yaa pai nifelinni a su wa nyuenni ale pai baŋsaŋa a su wa nisimaŋa, 48ate mi yaa koori tɛŋ a puusi Naawen, mi pak Naawen, mi kpagni Abrayam Wenni, waai ale basi ate mi nya suik maŋ a ga yaali mi kpagni suoku ŋaaŋ a te wa nidoabinni la. 49Yɔgyɔgla de ni daa sak jiirim ale wensie ale mi kpagni, ni weeni mu be dan kaa daa di ni weeni mu, ate m seba mi nin va suik kuui la.>>

50Laban ale Betuel yaa tulisi ayen, <<Kude nyini ka Naawen jigi, ti an baga a weeni wari ayen kan nna yaa ku daa di. 51Aribeka ale nna, ta wa a cheŋ ate wa chim fi kpagni nidoabinni pok, a va chaab ale Naawen ale dak diila.

52Abrayam tomteerɔwa ale wom ba le weeni diila, wa yaa koori tɛŋ Naawen niŋ. 53Tomteerɔwa yaa yeeri ligmɔniŋ ale kpana ŋanta ale gatta a te Aribeka. Wa pai ŋan baai diak ale pagra la tiirita a te wa toawa ale wa mawa. 54Wa le nuru baai ale jam bo le wa la, a dɛ ale a nyu ale goa dula.

55Alege wa toawa ale wa mawa yaa tulisi ayen, Basi ate nipokbinni a wari bo ale ti daa pi abe fi cheŋ.

56Alege weeni ba ayen, ni kan peri mu, yɔgyɔgla de ate Naawen a niak m chelimu la. Ni basi ate m cheŋ m kpagni jigi.

57Ba yaa weeni ayen, ni te ti wi nipokbinni a bek wa ku wari. 58Ba yaa wi Aribeka a bek wa ayen, <<Fi le cheŋ ale nuruwa de?>> Wa yaa weeni ayen, <<Mi le cheŋ ale wa.>>

59Ba yaa basi Aribeka suik ale wa dɔkliewa ale Abrayam tomteerɔwa ale wa nuruma. 60Ba yaa niak Aribeka ale weeni wa ayen, <<Ti toa, be nya niaka a paari tusa abe fi ŋaaŋsaŋa a tuesi ba dachaasaŋa nansuiŋtaŋa a tara.>>

61Aribeka ale wa dɔkliema yaa gomsi badek a do laalaakomima a cheŋ ale nuruwa. Tomteerɔwa yaa ta Aribeka a cheŋ.

62Yɔgyɔgla de Aizik yaa nyini Beer Layai Aroi a jam, diila wa jam bo ka Negev. 63Wa yaa nyini cheŋ peelim junɔi ayen wa poli, wa le zak zuk la, wa nya laalaakomiba a cheena. 64Aribeka mɛ yaa zak nya Aizik. Wa yaa nyini laalaakomiwa zuk a siŋ 65a bek tomteerɔwa ayen, <<Ka nuru boa le la a nyini peelimmu po a cheena ayen wa tu ti?>> Tomteerɔwa yaa tulisi ayen wa ka m kpagni. Wa yaa pai wa garukku a lik wadek.

66Tomteerɔwa yaa weeni Aizik wa le nye dii meena la. 67Aizik yaa ta wa jam jo wa mawa Saara viuku po a faari Aribeka. Wa yaa chim wa pok, ate wa a yaali wa. Aizik sui a jam yɔk kama wa mawa kummu ŋaaŋnyiŋ.

Currently Selected:

Piilimka 24: BWU

Highlight

Copy