Piilimka 25
25
1Abrayam yaa ŋman faari nipok, wa yuei jam le Ketura. 2Wa jam biak ka Zimran ale Joksan ale Medan ale Midian ale Isbak ale Suya a te Abrayam. 3Joksan jam ka Siiba ale Dedan ko. Dedan ŋaaŋbisa jam le Assur demma ale Letus demma ale Leummi demma. 4Midian nidoabilisaŋa jam le Efa ale Efer ale Yanok ale Abida ale Eldaa. Bade meena jam ka Ketura ŋaaŋbisa.
5Abrayam yaa jam basi jaab meena ate wa soa la a te Aizik. 6Alege wa le jam diem vua la wa yaa te wa pooma nidoabilisaŋa tiirita a yaa basi ate ba va kori geŋka alege Aizik.
7Abrayam benaŋa meena ate wa goa la jam ka kook ale pisiyopɔi ale ŋanu. 8Abrayam jam kpaŋ kama a nya bena zuak alege kpi a cheŋ wa nuruma jigi. 9Wa nidoabilisaŋa Aizik ale Ismael yaa jam gu wa Makpela vɔrumu po a moata Mamre, Zoyar nidoabinni Efron Yit denɔwa talimu po, 10talim buui ate Abrayam a da Yit demma jigi la. Dula jigini ate ba gu Abrayam ale wa powa. 11Abrayam kummu ŋaaŋnyiŋ Wen yaa niak wa nidoabinni Aizik waai ale jam bo juijui ale moata Beer Layai Aroi la.
12Abrayam nidoabinni Ismael waai ate Saara dɔkliewa Aga ate wa nyini Ejipiti a biak a te Abrayam la buuni ale nna.
13Ismael nidoabilisaŋa ale nna a va chaab ale ba biamu. Nebaiot waai ate wa liŋ biak la, ale Kedar ale Adbeel ale Mibsam 14ale Misma ale Duma ale Massa 15ale Yadad ale Tema ale Jetur ale Nafis ale Kedema. 16Ismael nidoabilisaŋa a jam le nna, ba buura pi ale ŋayewa yuei ale nna, a ta va chaab ale ba le kali diila. 17Ismael benaŋa meena jam ka bena kook ale pisita ale ŋayopɔi. Wa yaa jam kpi kama a cheŋ wa nuruma jigi. 18Wa ŋaaŋbisaŋa a jam kali ka Yavila tɛŋka a ga paari Sur, a moata Ejipiti banni, ase fi nin tuak Assur geŋka. Ba jam ta ka nyeka tuem ale ba suataŋa ba boka po meena.
19Abrayam nidoabinni Aizik buuni jam le nna. Abrayam jam ka Aizik ko. 20Aizik jam ka bena pisinaansi ale faari Aribeka, Betuel Araam denɔwa ate wa nyini Paddan Araam po la lie. Aribeka a jam ka Laban Araam denɔwa toa.
21Aizik yaa zaani wa powa nankula po a puusi a te Naawen dii nyiŋla wa powa jam ka kirik. Naawen yaa tulisi wa puusaŋa ate wa powa Aribeka a yik lɔgi. 22Bisaŋa yaa jaa tusi chaab wa ponni po, ate wa yaa weeni ayen, <<Ka boa ale soa ate wanni de a nye mi nna?>> Wa yaa cheŋ ayen wa bek Naawen a nya.
23Naawen yaa weeni wa ayen, <<Tɛŋsa siye ale bo fi ponni po, nuruba bayewa ale bo fi po la ale poori chaab. Nuru wanyi ale pagra a gaam nwala, ate kpagni ale tom a te baaŋka.>>
24Ku le jam paari wa biamu la, yibsa nidoabilisa ale jam bo wa ponni po. 25Waai ale dɛ niŋ a nyini la jam ka jamɔniŋ, ate nyiŋka meena a nye ase garuk kobtuk la. Ba yaa te wa yuei ayen Iisɔ. 26Kula ŋaaŋnyiŋ wa suoku yaa nyini, ate wa nisa a yik Iisɔ nankpanni a tara. Ba yaa te wala yuei ayen Jekob. Aizik jam ka bena pisiyuebi alege ate Aribeka a biak ba.
27Nidoabilisaŋa yaa chim ate Iisɔ a chim waai ale seba yaaliŋka. Wa jam ka waai ale bo peelim. Alege Jekob a chim waai ale kaa yaa biiga, a bo viitaŋa po. 28Aizik ale jaa yaali gɔi lanta la, a yaali Iisɔ alege Aribeka a yaali Jekob.
29Diipo nna ate Jekob yaa jam boro a dik jenta. Iisɔ yaa nyini peelim a jam ate kɔm a ta wa nna yegayega. 30Wa yaa weeni Jekob ayen, <<Nye nwuli a te mu jen muntaŋa, kɔm ale ta mu.>> Dila ale soa ate ba jam a wi wa mɛ ayen Edom la.
31Jekob yaa tulisi ayen, <<De niŋ a pai fi biam kpaŋtaŋa a da te mu.>>
32Iisɔ yaa weeni ayen, <<Nya, mi a nye ayen m kpi kama, biam kpaŋta a ta boan jaab wamaŋ a te mu?>>
33Alege Jekob a weeni ayen, <<De niŋ a pɛ.>> Dila nyiŋ wa yaa pɛ, a pai wa biam kpaŋtaŋa a da a te Jekob.
34Jekob yaa te Iisɔ boroborok ale jentaŋa. Wa yaa dɛ ale nyu alege a yiti a cheŋ. Wa an pai zula a te wa biam kpaŋtaŋa.
Currently Selected:
Piilimka 25: BWU
Highlight
Share
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
