Piilimka 26

1Yɔgyɔgla de kɔm ale jam bo tɛŋka po, daa kɔm buui ale jam boro Abrayam daaŋa po la. Aizik yaa cheŋ Filistia demma naawa Abimelek jigi Gerar. 2Naawen yaa pai wadek a sak Aizik a weeni wa ayen, <<Kan cheŋ Ejipiti, bo tɛŋ kaai po ate mi a weeni ayen fi boro la. 3Bo tɛŋka de po magadega, ate m bo ale fu abe m niak fu. Fi ale fi ŋaaŋbisaŋa m le pai tɛŋsaŋa de a te abe m sak m le ta pɛ kaai ate m pɛ ale fi kowa Abrayam la. 4M le basi ate fi ŋaaŋbisaŋa a piisi ase chiŋmarisaŋa ale bo wenzukku la. M le te ba tɛŋsaŋa de meena. Fi buuni nyiŋ tɛŋsa meena ale nya niaka, 5dii nyiŋla Abrayam a zuli mu kama, alege ta mi ale a yaali diila ale m wieŋa ale m ŋmarisika ale m sinsaŋŋa.>> 6Aizik yaa jam bo Gerar.

7Dula jigini nidoama ale bek wa, wa powa wari la, wa yaa weeni ba ayen, <<Wa ka mi toa,>> dii nyiŋla wa jam a chali ka yɔgsum ale wa le weeni ayen, <<Wa ka mi pok.>> Wa jam poli kama ayen, <<Dela nuruma ale ko mu Aribeka nyiŋ, dii nyiŋla wa nala kama.>>

8Aizik ale bo dula ate ku beni la, Abimelek Filistia demma naawa yaa va tuokparuk a nya Aizik ale wa a gbaari wa powa Aribeka. 9Abimelek yaa wi Aizik a weeni ayen, <<Wa sum ka fi pok. Ka boa ale soa ate fi weeni ayen, <Wa ka m toa?> >> Aizik yaa tulisi wa ayen, <<Dii nyiŋla mi poli kama ayen mi ni jɔk m nyuvunni wa nyiŋ.>>

10Abimelek yaa weeni ayen, <<Ka boa ate fi nye ti di? Nuruma wanyi ate baga kama a goa ale fi powa, ate fi ta nye kaasuŋ a jam ti zuk.>>

11Abimelek yaa te nɔi nuruma meena, <<Nuru waai a dan namsi nuruwa de yaase wa powa, ba le ko wa.>>

12Aizik yaa bori ŋanta tɛŋ kala bein dila dek a che nna yegayega dii nyiŋla Naawen a niak wa kama. 13Nuruwa yaa jam jigsi, ate wa nitalimu kasim a zuak, ate wa jam jigsi nna yegayega. 14Wa jam ta ka piisa ale niiga nna yegayega ale yɔm ate Filistia demma a de nyuri ale wa. 15Vila ŋaai meena ate wa kowa tomteerɔma jam tu diipo ate wa kowa boro la, Filistia demma a jam kasi ŋa kama ale si ŋa ale tanta.

16Abimelek yaa weeni Aizik ayen, <<Cheŋ abe fi ge ti, fi pagra ka nna yega a te ti.>>

17Aizik yaa basi dula ale ga kali Gerar Viaka po. 18Aizik yaa ŋman guti vila ŋaai ate ba tu wa kowa daaŋa po ate Filistia demma a jam si ŋa Abrayam kummu ŋaaŋnyiŋ la. Wa yaa te ŋa yue ŋaai dek ate wa kowa jam te la.

19Aizik tomteerɔma a jam tu ka viak po a nya nyiam paalik dula. 20Alege Gerar naapeerisaŋa a kpaliŋ ale Aizik naapeerisaŋa a weeni ayen, <<Nyiamu ka tama ale soa.>> Wa yaa te vinni yuei ayen Esek, dii nyiŋla ba nye ka kpaliŋ ale wa. 21Ba ŋman tu dichoa, alege ba ŋman kpaliŋ vili dila mɛ nyiŋ ate wa te di yuei ayen Sitna. 22Wa basi dula ale ga tu dichoa, alege waai an nye kpaliŋ di nyiŋŋa. Ate wa te di yuei ayen Areyobot, ayen, <<Yɔgyɔgla de Naawen a te ti vayɔgsum ti le nya tidek tɛŋka po.>>

23A zaani dula wa yaa cheŋ Beerseba. 24Yok kula Naawen yaa pai wadek a sak wa a weeni ayen, <<Mi ka fi kowa Abrayam Wenni. Kan chali yɔgsum, ale mi a bo le fu kama, m le niak fu abe m basi ate fi ŋaaŋbisaŋa a piisi mi tomteerɔwa Abrayam nyiŋ.>>

25Aizik yaa sɛ kuŋkuŋ dula a wi Naawen yuenni. Dula wa yaa ti wa viuku, ate wa tomteerɔma a tu vili.

26Abimelek yaa nyini Gerar tɛŋka jam dula ale Ayuzzat waai ale a sak wa wie la ale Fikol wa tugurik tɔŋdɔma kpagni. 27Aizik yaa bek ba ayen, <<Ka boa ate nama a jam mi jigi ya, nama ale jam ta nyeka tuem ale mi a yiak mi la?>>

28Ba yaa tulisi ayen, <<Tama nya kama cheri ayen Naawen a jam bo le fu kama, tama yaa weeni ayen, <Ku magsi ka pɛka nɔiyeŋ a bo ti suŋsuŋ, tama ale nama suŋsuŋ.> Basi ate ti nye nɔiyeŋ ale fu, 29ate ni kan nye ti biemmoa, ase tama ale kan jam namsi ni alege nye ni a magsi ale basi ate ni cheŋ ale suiyɔgni la. Ate yɔgyɔgla de Naawen a niak fu la.

30Aizik yaa nye ŋandiinta tigi a te ba, ate ba dɛ ale nyu. 31Vari ale veenti la, saluik yokyokwa nidoama yaa pɛ a te chaab. Aizik yaa basi ba suik, ate ba basi wa ale suiyɔgni.

32Dai dila danni Aizik tomteerɔma yaa jam weeni wa vinni ate ba tu la. Ba weeni ayen, <<Ti nya nyiam kama.>> 33Wa yaa a wi di ayen Siba. A ta jam paari jinla tɛŋka yuei ale Beerseba.

34Iisɔ ale jam ka bena pisinaansi la wa yaa faari Judit. Judit jam ka Beeri Yit denɔwa lie. Wa maa faari ka Basemat. Basemat jam ka Elon Yit denɔwa lie. 35Ba jam chim ka sui domsik a te Aizik ale Aribeka.

Currently Selected:

Piilimka 26: BWU

Highlight

Copy