Piilimka 27

1Aizik ale kpaŋ ate wa ninaŋa paam ate wa an ŋman baga a nya la, wa yaa wi wa bikpagni Iisɔ a weeni wa ayen, <<M biiga.>> Ate wa tulisi wa ayen, <<Nya mi ale nna.>>

2Aizik yaa weeni ayen, <<Mi yaa ka nisɔmma a zɛ diipo ate mi ale kpi la. 3Yɔgyɔgla de pai fi yaalim ŋantaŋa, fi namarika ale fi tommu a nyini peelim a yaalim a ko jaab a ta jam te mu. 4Nye ŋandiin tii ale masa ate mi a yaali la a ta jam te mu ate m dɛ, abe m niak fu abe m ge a kpi.

5Yɔgyɔgla de Aribeka a wom Aizik ale biisi a te wa nidoabinni Iisɔ la kama. Iisɔ ale nyini peelim ayen wa yaalim a ko jaab a ta jam la, 6Aribeka yaa weeni wa nidoabinni Jekob ayen, <<Nya mi wom fi kowa a boro a weeni fi suoku ayen, 7<Ta gɔi jaab a jam nye ŋandiin tii ale masa ate m dɛ, abe m niak fu Naawen niŋ abe m ge kpi.> 8Yɔgyɔgla de, m biiga, chiib wom nalimnyiini a nye dii ate mi a weeni fu la. 9Nyini cheŋ booŋa jigini a lueri bo paala ŋaye a ta jam, ate m nye ŋandiin masa a te fi kowa, ase wa le a yaali diila. 10Ate fi yaa cheŋ ga te fi kowa ate wa dɛ, abe wa te fu wa niauŋku abe wa ge kpi.>>

11Jekob yaa weeni wa mawa Aribeka ayen, <<Alege mi suoku ka waai ale chim kɔbta nuru la, ate mi chim nuru waai ale ta nyiŋ saalik la. 12Alege m kowa a nin tiri mu? Ku le nye ase mi a paasi wa kama ate m ta kikaasa a jam m dek zuk alege daa niauŋŋoa.>>

13Wa mawa yaa weeni wa ayen, <<M biiga, basi ate kikaasaŋa a jam mi zuk. Nye dii ate mi a weeni la, ga ta ŋa jam te mu.>>

14Wa yaa ga ta ŋa jam te wa mawa ate wa nye ŋandiin masa tii ate wa kowa a yaali la. 15Aribeka yaa pai Iisɔ wa bikpagni garuk naluŋ ate wa ta yenni po la a jo wa bi baaŋka Jekob. 16Wa maa lik wa nisimaŋa ale wa ŋinni ale saala la ale buuk gbana. 17Wa yaa pai ŋandiin tii ale masa la ale boroborok ate wa nye la a te wa nidoabinni Jekob.

18Wa yaa cheŋ wa kowa jigi a weeni wa ayen, <<M koa.>> Wa kowa yaa tulisi wa ayen, <<M biiga, ka wana?>>

19Jekob yaa tulisi wa kowa ayen, <<Mi ka Iisɔ fi bikpagni. Fi le weeni diila, mi nye kama. Mi a saalim yiti kali a dɛ ŋan baai ate mi yaalim la abe fi te mu fi niauŋku.>>

20Aizik yaa bek wa nidoabinni ayen, <<Fi nye ka sɛ a nya nna nwuli, m biiga?>> Wa yaa tulisi ayen, <<Naawen fi Wenni ale maari mu.>>

21Aizik yaa weeni Jekob ayen, <<Forisi jam ate m tiri fu m biiga, ate m seba ase fi sum ka m nidoabinni Iisɔ yaase daa wa.>>

22Jekob yaa forisi paari wa kowa Aizik, ate wa tiri wa a weeni ayen, <<Lueluku a nye ase ka Jekob lueluk la, alege nisimaŋa a nye ase Iisɔ nisima la.>> 23Wa an jam miŋ wa, diila wa nisimaŋa a ta ka kɔbta ase wa suoku Iisɔ la, ate wa niak wa. 24Wa yaa bek ayen, <<Fi sum ka m nidoabinni?>> Ate wa tulisi ayen, <<Ka mi.>>

25Wa yaa weeni ayen, <<M biiga, ta fi le yaalim jabuui la a jam ate m dɛ, ate m te fu m niauŋku.>> Jekob yaa ta jam te wa ate wa dɛ, ale ta daam mɛ jam te wa ate wa nyu. 26Wa kowa Aizik yaa weeni wa ayen, <<Jam dela, m biiga, a puusi mu.>>

27Wa yaa cheŋ wa jigi a puusi wa. Aizik ale wom wa gattaŋa nyummu la, wa yaa niak wa a weeni ayen, <<Aa, m biiga nyummu a nye ase ka talim ate Naawen a niak la. 28Mi a yaali ayen Wen a te fu wenzuk maglim ale tɛŋzuk jigsika kpari ŋanta ale da paalik. 29Mi a yaali ayen tɛŋsa a tom te fu abe nuruba a koori tɛŋ a zuli fu. Chim kpagi fi suataŋa zuk, abe fi mawa bisaŋa a koori tɛŋ a zuli fu. Baai ale ka a te fu la ale nya kikaasa abe baai ale a niak fu la a nya niaka.>>

30Aizik ale niak wa a nueri la, Jekob an basi wa kowa ate ku beni ya, wa suoku Iisɔ deri nyini yaalim jam. 31Wa mɛ yaa nye ŋandiin tii ale masa a ta jam te wa kowa. A yaa weeni wa ayen, <<M koa yiti kali a dɛ m yaalimu ŋantaŋa, abe fi te mu fi niaka.>>

32Wa kowa Aizik yaa bek ayen, <<Fi ka wana?>> Wa yaa tulisi ayen, <<Mi ka fi nidoabinni, fi bikpagni Iisɔ.>> 33Aizik nyiŋ a deri a gɔk nna yegayega ate wa weeni ayen, <<Be ka wana ale yaalim a ta jam te mi? Ate mi dɛ alege ate fi jam ate mi niak wa, wa be za wa nya niaka kama.

34Iisɔ ale wom wa kowa biika la, wa deri choa kaarik basi ale sui kaasuŋ a weeni wa kowa ayen, <<Niak mu, niak mi mɛ, m koa.>>

35Alege Aizik a weeni ayen, <<Fi suoku a jam kama ale pimpaasima a tuesi niaka.>>

36Iisɔ yaa weeni ayen, <<Daa wa yuenni sum ale Jekob ya? Wa paasi mu nna wa ka buye. Wa pa m biamu kpaŋtaŋa, yɔgyɔgla a pa m niaka.>> Wa yaa bek ayen, <<Fi an tali niaka a magsi mi?>>

37Aizik yaa tulisi ayen, <<Mi basi ate wa chim ka kpagi fi zuk ale basi ate wa mabisaŋa meena a chim wa tomteerɔba, ale niak wa ale kpari ŋanta ale da paalik ayen ba maari wa. M baga a nye ka boa a te fu, m biiga?>>

38Iisɔ a weeni wa kowa ayen, <<Fi ta niaka bunyi dekki m koa? Niak mi mɛ, m koa. Iisɔ yaa a kaari.

39Wa kowa Aizik yaa tulisi wa ayen, <<Fi boka jigi ale yalima kama ale tɛŋka jigsika, ale yalima ale wenzuk maglimu. 40Fi le boro ale ka gebik abe fi tom a te fi suoku. Alege fi dan kaa nya vuusum fi le yeeri wa niiga duoku a yuk basi.>>

41Iisɔ yaa jam ta chaab ale Jekob dii nyiŋla niaka ate wa kowa a te wa la. Wa yaa weeni wadek ayen, <<Mi kowa kummu daaŋa a moata kama, m le ko m suoku Jekob.>>

42Ba le weeni Aribeka wa bikpagni ale weeni diila, wa yaa tom wi wa bi baaŋka Jekob a weeni wa ayen, <<Fi suoku ale ta popola ŋaai ale ŋa yɔk wa suinni la ale wa ko fu. 43Yɔgyɔgla de, m biiga, nye dii ate mi a weeni la. Chali nwuli a cheŋ mi toawa Laban jigi Yaran. 44Bo dula ale wa ate fi suoku suinni a yɔk. 45Fi suoku sui dan kan ŋmaa puuri ate wa baŋ fi le nye wa diila, m le tom te fi nɔi ate fi nyini dula jam. Ka boa ate maa jɔk ni nɔi niyewa dai yeŋŋa?>>

46Aribeka yaa weeni Aizik ayen, <<Boka an masa te mu Yit nipooma de nyiŋ. Jekob a dan faari nipok tɛŋka de nipooma po, a nyini Yit nipooma de nna po, mi boka a kan ta kiri ya.>>

Currently Selected:

Piilimka 27: BWU

Highlight

Copy