Piilimka 28

1Dila nyiŋ Aizik yaa wi Jekob a niak wa ale ŋman weeni wa ayen, <<Kan faari Keenan lie. 2Cheŋ Paddan Araam, fi mawa kowa Betuel yenni. Faari nipok a nyini Laban liema po wanyi, fi mawa toawa. 3Mi a yaali ayen ka Wen Dii Ale A Niak La abe niak fu abe wa nye ate fi buuni a piisi ate fi ŋaaŋsa a chim tɛŋ dem. 4Mi a yaali ayen wa abe te fi ale fi ŋaaŋsaŋa niak kaai ate wa jam te Abrayam la, ate ni soa tɛŋ kaai ate ni bo ka po yɔgyɔgla de a chim nicham la, tɛŋ kaai ate Wen a jam pai te Abrayam la. 5Ate Aizik yaa jam basi Jekob suik, ate wa cheŋ Paddan Araam, Laban ale ka Betuel biik la ate wa chim Araam denɔ la, Iisɔ ale Jekob mawa Aribeka toawa la jigi.

6Yɔgyɔgla de, Iisɔ yaa miŋ kama ayen Aizik a niak Jekob kama ale te ate wa cheŋ Paddan Araam ayen wa ga faari nipok dula, ate wa ale niak wa la, wa weeni wa kama ayen, <<Kan faari nipok waai ale nyini Keenan la, 7ate Jekob yaa nye tuewomma a te wa kowa ale wa mawa ale weeni wa diila a sum cheŋ Paddan Araam. 8Iisɔ ale jam miŋ Keenan nipooma ale jam a nye ate wa kowa Aizik sui a jam a puuri diila, 9wa yaa cheŋ Ismael a ga faari Mayalat, ale ka Nebaiot suok la, Abrayam nidoabinni Ismael lie a gum wa pooma ate wa poom a ta la po.

10Jekob a jam basi Beerseba ale nyini a cheŋ Yaran. 11Wa ga paari ka jigi, a yaa zaani dii nyiŋla wenbinni a siŋ wa, ate wa yaa pai tain a pai chim dafieluk a kpagli ayen wa goa. 12Wa yaa gɔdaasim a nya tiili ale zaani tɛŋ a paari wenzukku, ate Wen maarɔma a jueli ale a siŋ di zuk. 13Naawen yaa bo wenzuk a weeni ayen, <<Mi ka Naawen, fi kowa Abrayam Wenni ale Aizik Wenni. M le pai tɛŋ kaai ate fi doa ka zuk la a te fu ale fi ŋaaŋbisaŋa. 14Fi ŋaaŋbisaŋa ale nye ase ka tɛŋka tantaŋa la, ate ni ale teeri a nyini yeniŋka a ga paari konni po, a ŋman nyini wiiluk a ga paari yeseoku po. Fi ale fi ŋaaŋbisa nyiŋ, nuruba meena ale bo tɛŋka po la ale nya niaka. 15M bo le fu kama ate jigi meena ate fi a cheŋ la, m le nya fi zuk, ate m ŋman ta fu a jam tɛŋka de po. M kan basi fu, ka m nin nye m le puulim fu diila.>>

16Jekob ale yiti wa goomu po la, wa yaa poli ayen, <<Chekki Naawen a bo dela jigini kama alege mi a zɛ.>> 17Yɔgsum yaa ta wa ate wa weeni ayen, <<Jigi kperikaliik ale nna! Dela daa jigi yoŋ alege ka Wen yeri. Wenŋmazuk nansuiŋku ale nna.>>

18Varivientini ku saluik yokyok Jekob yaa pai buntain dii ate wa pai kpagli la, a feri di a zaani a yaa kpiiri kpaam a basi di zuk. 19Wa te jigini yuei ayen Betel,#28:19 Betel kiri ale Wen yeri alege ba jam a wi tɛŋ kala ayen ka Luz.

20Ate Jekob yaa nye pɛka ayen, <<Ase Wen a dan bo ale mu a nya m zuk a ta va chaab ale m nyeerimu de po, a te mu ŋandiinta ate mi a dɛ ale a te mu kɔlima ate mi a jɔ, 21ate mi a ŋman pilim jam m kowa yenni ale nyiŋyɔgsa, Naawen ale chim mi Wen 22ate buntanni de ate mi a ti zaani ase zaŋi la, ale chim Wen yeri, ate fi ale a te mi jaabuuri meena la, m le te ku piika po ku bunyiwa.>>

Currently Selected:

Piilimka 28: BWU

Highlight

Copy