Piilimka 29

1Jekob yaa tom wa nyeerimu du a cheŋ ga paari nuru baai ale bo konni po la. 2Dula wa yaa nya vili ale bo talimu po, ate piisa beŋsa buta doa a moata vinni dii nyiŋla ŋa a nyu nyiam a nyini ka dula. Buntain dii ale jam lik vinni nɔnni la a jam zuak kama. 3Piisaŋa meena a dan tigsi dula, naapeerisaŋa nyiem bilim buntanni vinni nɔi a basi kama alege yaa ŋari nyiamu a te piisaŋa. Ba dan nueri ba ŋman pai buntanni a ŋman lik vinni nɔnni.

4Jekob yaa bek naapeerisaŋa ayen, <<M suata, nama nyini ka bɛ?>> Ba yaa tulisi ayen, <<Tama nyini ka Yaran.>>

5Wa yaa weeni ba ayen, <<Nama seba Laban, Nayo ŋaaŋbiika?>> Ate ba tulisi wa ayen, <<Mm ti seba wa kama.>>

6Ate Jekob yaa bek ba ayen, <<Wa ta nyiŋyɔgsa?>> Ba yaa tulisi wa ayen, <<Mm wa ta nyiŋyɔgsa kama. Be nya wa liewa Arekel ale la cheena ale piisa.>>

7Jekob yaa weeni ayen, <<Ni nya kantueŋka a diem pagra kama. Ku an diem paari piisaŋa naakuui jam ka. Ni te ŋa nyiam abe ni ta ŋa a cheŋ wuuk po ate ŋa dɛ.>>

8Ba yaa tulisi ayen, <<Tama an baga a nye dila nin ka piisaŋa meena a nin tigsi jigi yeŋ ate tama yaa bilim buntanni vinni nɔi a basi. Abe ti yaa te piisaŋa nyiam.>>

9Wa le boro a biisi ale ba la, Arekel yaa ta wa kowa piisaŋa a cheŋ ba jigi, dii nyiŋla wa jam ka naapeerik. 10Jekob ale nya wa ŋesawa Laban liewa Arekel ale Laban piisaŋa la, wa yaa cheŋ ga bilim buntanni vinni nɔi a basi ale te wa ŋesawa piisaŋa nyiam. 11Ate Jekob yaa ga gbaari Arekel ale kum nna yegayega. 12Wa weeni Arekel ayen wa ale wa kowa a moata chaab kama ale ŋman chim Aribeka biik. Ate wa yaa chali a ga weeni wa kowa.

13Laban ale ga wom Jekob wa toa nidoabinni wari la, wa yaa nye nwuli a ga tu wa suik. Wa yaa gbaari wa ale ta wa a kuli wa yenni, ate Jekob a yaa weeni wa wieŋa de meena. 14Ate Laban yaa weeni wa ayen, <<Fi ka mi dek nyiŋlam ale ziim.>> Jekob ale kali ale wa a paari chi yeŋ la, 15Laban a yaa weeni wa ayen, <<M le fu ale moata chaab la, a kan sak kama ayen fi a tom a te mu kinla nyiŋ ŋa? Weeni mu fi tutunaŋa ale magsi ayen ŋa chim diila.>>

16Yɔgyɔgla de Laban a jam ta ka lieba baye. Kpagni yuei ale Leya, baaŋka mɛ yuei ale Arekel. 17Leya a jam ta ka nin baasima alege Arekel nyiŋka a jam boka jigi yeŋ ale nala mɛ. 18Jekob a jam ta yaalika ale ka Arekel ate wa yaa weeni ayen, <<Mi ale tom bena ŋayopɔi a te fu a magsi chaab ale fi lie baaŋka Arekel nyiŋ.>>

19Laban yaa weeni ayen, <<M dan pai wa a te fi a zunchoŋŋa nuru yoŋ. Kali dela ale mu.>> 20Dila nyiŋ Jekob a jam tom ka bena ŋayopɔi Arekel nyiŋ, alege ku poom a nye wa jigi nna se ka daa maga la, diila wa ale ta yaalika ale wa la nyiŋ.

21Ate Jekob yaa weeni Laban ayen, <<Pai m powa a te mu. M le dak diipo la a paari kama, ate mi a yaali ayen m faari wa.

22Ate Laban a yaa ta nuruma meena ale bo jigini la a jam jigi yeŋ a nye tigi. 23Alege ku ale paari junɔinni la wa pai wa liewa Leya a te Jekob, ate wa duak ale wa. 24Ate Laban yaa pai Zilpa wa nipokbili tomteerɔwa a te wa liewa ayen wa chim wa dɔklie a tom a te wa.

25Vanni ale veenti la, wa nya ka Leya ale bo ale wa. Ate Jekob yaa weeni Laban ayen, <<Ka boa ale la ate fi a pai nye mu? Ka Arekel nyiŋ ate mi tom a te, yaa daa di? Ka boan nyiŋ ate fi paasi mu?>>

26Laban yaa tulisi ayen, <<Tama jigi ti kan pai baaŋka a dɛ niŋ a te yalika alege ate kpagni a kala. 27Dɛ liewa de pok fiaka bakoanni a nueri. Ate ti pai baaŋka a te fu, abe fi ŋman tom bena ŋayopɔi magsi wa nyiŋ.>>

28Ate Jekob a sum nye wa le weeni diila. Wa nueri bakoanni ale Leya kama, ate Laban a pai wa liewa Arekel a te wa ayen wa chim wa pok. 29Laban yaa pai Bilya wa nipokbili tomteerɔwa a te wa liewa Arekel ayen wa chim wa dɔklie a tom a te wa. 30Jekob yaa jam ŋman duak ale Arekel, ate wa jam ta yaalika ale Arekel a gaam Leya. Ate wa jam tom bena ŋayopɔi ŋman gum du a te Laban.

31Naawen ale nya ayen wa ka yaalika ale Leya la, Wa yaa nye ate Leya a biak alege ate Arekel a chim kirik. 32Leya a jam yik lɔgi a biak nidoabili. Wa te biika yuei ayen Aruben, diila wa weeni kama ayen, <<Ka Naawen ale nya m ninammu la nyiŋ, chekki m chorɔwa a yaa le ta yaalika ale mu.>>

33Wa ŋman yik lɔgi, ate wa le nya ayen wa biaka nidoabili la wa yaa weeni ayen, <<Naawen ale wom ayen m chorɔwa kan yaali mu la nyiŋ ale soa ti wa ŋman pai wade a te mu.>> Ate wa yaa te wa yuei ayen Simeyon.

34Ate wa ŋman yik lɔgi, ate wa ale ga biak nidoabili la wa yaa weeni ayen, <<Yɔgyɔgla de ku nueri ya m chorɔwa a yaa le kpari maŋ mu, diila m biaka nidoabilisa bata a te wa.>> Ate wa te wa yuei ayen Livai.

35Ate wa ŋman yik lɔgi, ate wa le ga biak nidoabili la wa yaa weeni ayen, <<Yɔgyɔgla de m le pak Naawen.>> Ate wa te wa yuei ayen Juda. Ate wa yaa gebiri biam.

Currently Selected:

Piilimka 29: BWU

Highlight

Copy