Piilimka 30

1Arekel ale nya ayen wa kan biak bisa a te Jekob la, wa yaa jam a dɛ nyuri ale wa suoku. Ate wa yaa weeni Jekob ayen, <<Te mu bisa, dan kan daa di m le kpi.>>

2Jekob sui yaa puuri ale wa ate wa weeni wa ayen, <<Mi ka Wen yaa, ate m nye ate fi a kan biagi?>>

3Ate wa yaa weeni Jekob ayen, <<M dɔkliewa Bilya ale nna, goa ale wa ate wa biak bisa a te mu ate ku va wa nyiŋ ate mi mɛ a nya dɔkdem.>>

4Ate wa yaa pai wa dɔkliewa Bilya a te wa ate wa chim wa pok. Jekob yaa goa ale wa, 5ate wa yik lɔgi a biak nidoabili a te wa. 6Ate Arekel a weeni ayen, <<Naawen a biisi te mu. Wa wom m juisim a te mu nidoabili.>> Dila nyiŋ wa te biika yuei ayen Dan.

7Bilya Arekel dɔkliewa a ŋman yik lɔgi a biak nidoabili a nye buye a te Jekob. 8Ate Arekel yaa weeni ayen m nye ka gigelik nna yegayega ale m suoku, m be nya nakdeka wa zuk kama.>> Ate wa yaa te biika yuei ayen Nafitali.

9Leya ale ga nya ayen wa gebiri bisa biam la, wa yaa pai Zilpa ale ka wa dɔklie la a te Jekob ayen wa chim wa pok. 10Zilpa ale ka Leya dɔklie la yaa biak nidoabili a te Jekob. 11Ate Leya yaa weeni ayen, <<Ka boan zumasuk ale nna!>> Ate wa te biika yuei ayen Gad.

12Zilpa ale ka Leya dɔklie la a ŋman biak nidoabili a saari buye a te Jekob. 13Ate wa yaa weeni ayen, <<Nya m sui ale peenti a soa dii yaa! Nipooma ale wi mu ayen suipeentik nyɔnɔ.>> Ate wa te biika yuei ayen Asɛ.

14Ŋankpaantaŋa cheka vaaŋa po, ate Aruben yaa cheŋ tattaŋa po a nya ŋanva tii ale a nye ate nipok a baga a yik lɔgi la a jam te wa mawa Leya. Arekel yaa weeni Leya ayen wa nye ŋanvaataŋa ate wa biika a ta jam te wa la maga a te wa.

15Alege wa tulisi wa kama ayen, <<Fi ni vari m chorɔwa a nyini m jigi la an diem a magsi fu? Fi a yaali ayen fi ŋman pai ka m biika ale ta ŋanva tii a jam te mu la mɛ?>> Arekel yaa weeni ayen ku nala kama, <<Wa baga a goa ale fu kama yokku de ate ku magsi chaab ale fi biika ŋanvaataŋa.>>

16Junɔinni ate Jekob a nyini talim a cheena la, Leya yaa cheŋ ga tu wa suik. Wa yaa weeni wa ayen, <<Fi magsi fi goa ale mu kama dii nyiŋla m pai ka m biika ŋanvaata a tuni fi nyiŋ.>> Ate wa sum goa ale wa yok kula.

17Wen a jam wom Leya kama, ate wa yik lɔgi a biak nidoabili kaai ale a saari banu la a te Jekob. 18Ate Leya a weeni ayen, <<Wen a te mu m tutuna kama, wa ale pai m dɔkliewa a te m chorɔwa la nyiŋ.>> Ate wa te biika yuei ayen Isaka.

19Leya a ŋman yik lɔgi a biak nidoabili kaai ale a saari bayuebi la a te Jekob. 20Ate Leya a weeni ayen, <<Wen a pai ka tiirim maŋ a te mu. M chorɔwa yaa ni pai zula a te mu, dii nyiŋla m biaka bisa bayuebi a te wa.>> Ate wa yaa te biika yuei ayen Zebulun.

21Ku yaa ŋman ga paari diipo ate wa biak lie ate wa te wa yuei ayen Daina.

22Ate Wen a teeri Arekel. Wa jam wom wa a yaa lak wa ponni a magsi biam. 23Wa jam yik lɔgi a biak nidoabili a yaa weeni ayen, <<Wen a pai m chivieŋa a nyini m zuk.>> 24Wa yaa te biika yuei ayen Josefi, a yaa weeni ayen, <<Naawen abe ŋman pai nidoabilik ka choa a gum du a te mu.>>

25Ku ŋaaŋnyiŋ ate Arekel a biak Josefi la, Jekob yaa weeni Laban ayen, Basi mu suik ate m ŋman cheŋ m dek tɛŋka. 26Te mu m pooma ale m bisaŋa, baai nyiŋ ate m tom a te fu la, ate m lɔ suik po. Fi seba mi le tom a soa dii a te fu la kama.>>

27Alege Laban a jam weeni wa kama ayen, <<Ase fi a dan ta ŋmanteka ale mu, mi a saalim fu kama ayen fi kali ale mu.>> M kpesi nya kama ka fi nyiŋ ate Naawen a niak mu.>> 28Wa ŋman weeni gum du ayen, <<Weeni fi tutunaŋa ale ka diila ate m tuni fu.>>

29Jekob yaa weeni wa ayen, <<Fi seba mi ale tom a soa dii a te fu la kama, ate m nya fi duŋsaŋa zuk ate si chim a soa diila kama. 30Fi ale jam ta mag kaai alege ate mi jam la, yaa le piisi a soa diila, ate Naawen a kasim a niak fu juijui meena ate mi cheŋ la. Alege yɔgyɔgla de, ka din po ate mi ale baga a nye wari a te m dɔkdemma?>>

31Wa yaa bek wa ayen, <<M te fu boa>> Jekob yaa tulisi wa ayen, <<Kan te mu jaaboa.>> Alege fi dan baga a nye wayeŋka de a te mu, m le kasim a nya fi piisaŋa zuk. 32Basi ate jinla m va fi duŋsaŋa po a yik pa sobta ale bua ŋaai nyiŋsaŋa ale ŋmirisi la, ate ŋa chim m tutuna. 33Ate chum po m wensieŋa ale weeni m le ka nuru waai choa la, ate diipo meena ate fi kpesi a nya ŋan baai ate fi pai a tuni mu la. Ate m dan ta buuk ate ku nyiŋka an ŋmirisi, yaase posuk ate ku an sobri ya, nya ku nna ase m zu a nyini ka fi jigi la>>

34Laban yaa weeni ayen, <<M siak ya. Be te ti nye fi ale weeni diila.>> 35Di danni dek ate wa yeeri buduktaŋa ale busaaŋa ate ŋa nyiŋsaŋa a ŋmirisi la ale pa sobtaŋa a te wa bisaŋa ayen ba a nya ŋa zuk. 36Ate wa yaa poori wadek nyini Jekob jigi a cheŋ a ga bo jigi yoŋ a paari daa ŋata, alege ate Jekob a boro a nya Laban piisa ŋaai ale tali la zuk.

37Jekob yaa pai niak tiib ale almond tiib#30:37 Almond tiib a nye ase ka kangbegi tiib la. ale dapeelita tiib naŋ yɔgsisa ate ba che la a po, a yaa pai daataŋa ate wa poa ate ŋa peenti la a dueni peelim. 38Ate wa yaa pai tinaŋsaŋa ate wa poa la a dueni nyaataŋa nɔi, ate ŋa bo piisaŋa niŋ ase ŋa a nin jam ayen ŋa nyu nyiam, diipo ate pasaaŋa a yaali juelika la. 39Ate piisaŋa a jueli chaab tinaŋsaŋa ate wa poa la niŋ, ate ŋa yaa biak pabiik sii nyiŋsa ale sobri yaase si ŋmirisi. 40Jekob yaa gaari piisaŋa ale buo ŋaai ale paala la a nyini Laban duŋsaŋa po, wa yaa nye ate ŋa a nya buo ŋmiŋmiritaŋa ale pa sobtaŋa ate Laban a soa la, ate ŋa biak buduk ŋmiŋmirita ale pabiik sobta. Wa nye dela kama ate wa duŋsaŋa a piisi ate wa gaari si a nyini Laban duŋsaŋa po. 41Duŋ sii ale pagra la a dan boro a jueli chaab, Jekob nyiem ga pai ka tiisaŋa naŋsaŋa a dueni piisaŋa ale a de juijui la a bo duŋsaŋa niŋ. Ate ŋa jueli chaab a moata tiisaŋa naŋsaŋa, 42alege duŋsaŋa a dan wobsa, wa kan pai a dueni. Ate duŋ sii ale wobsa la a cheŋ Laban jigi, ate sii ale pagra la a cheŋ Jekob jigi. 43Nya kude nyiŋ nuruwa a jam jigsi ka nna yegayega, ate wa jam soa duŋsa ale dɔklieba ale nidoaba tomteerɔba ale laalaakomiba ale bonsa.

Currently Selected:

Piilimka 30: BWU

Highlight

Copy