Piilimka 31

1Jekob yaa wom ayen Laban bisaŋa a weeni ayen, <<Jekob a tuesi ti kowa ale soa ŋan baai meena la kama, ate wa yaa nya jigsika de a nyini ti kowa ale jam soa ŋanti baai la.>> 2Ate Jekob yaa jam miŋ ayen Laban nyeka ale wa a kan nye ase ku nyiem ale ka diila.

3Ate Naawen yaa weeni Jekob ayen, <<Ŋman cheŋ fi koma tɛŋka ale fi nuruma jigi, ate mi ale bo ale fu.

4Ate Jekob yaa tom wi Arekel ale Leya ayen ba jam talimu po juijui ate wa ta wa duŋsaŋa boro a nya la. 5Wa yaa weeni ba ayen, <<Mi nya kama ayen ni kowa nyeelaŋa ale mu a kan nye ase ku ale jam ka diila, alege m kowa Wenni a bo ale mu kama. 6Ni seba kama ayen mi tom a te ni kowa ale ka m pagrim meena, 7alege ni kowa a dɛ gaam mu kama ale wa le yik m tutunaŋa a tagri a paari ku naŋtuok nɔi pi la. Alege Wen abe an te suik ayen wa nye mu wariya. 8Wa dan weeni ayen, fi tutuna ale duŋ sii ale a biak ŋan ŋmiŋmirita la, duŋsaŋa mɛ a sum a biak ŋan ŋmiŋmirisa, ate wa dan weeni mɛ ayen fi tutunaŋa a ni ŋaai a ni biak ŋan sobta la, duŋsaŋa mɛ a nyiem sum a biak ŋan sobta. 9Dila nyiŋ Wen a pai ka ni kowa duŋsaŋa a yaa te mi.

10Va ŋaai po ate duŋsaŋa a jueli chaab la, mi jam nya ka goa daasima, ale ka duŋ doataŋa ale a jueli duŋ sii nyiŋsaŋa ale ŋmirisi la ale sii ale sob la. 11Wen maarɔwa yaa weeni mi m gɔdaasimaŋa po ayen, Jekob. Ate mi a tulisi wa ayen, nya mi ale nna. 12Ate wa weeni mi ayen, zak zuk a nya ayen duŋ doataŋa ale a jueli duŋsaŋa la ka ŋan ŋmiŋmirita ale ŋan sobta, diila mi nya dii meena ate Laban a pai a nye fu la kama. 13Wen dii ate fi nya Betel la ale mi, juijui ate fi ti buntanni a zaani ase zaŋŋi la, a yaa kpiiri kpaamu a basi di zuk, a yaa pɛ te mi la. Yɔgyɔgla de, basi tɛŋka de abe fi cheŋ fidek tɛŋka.>>

14Ate Arekel ale Leya yaa tulisi ayen, <<Tama diem ta nitalim ti kowa ŋantaŋa po? 15Wa an pai te a chim daa nyeemjandɔba? Wa an pai ti a da daa daka nyiini, alege wa maa dɛ ba ale tuni ti nyiŋ diila kama. 16Chekki paaruŋ kuui meena ate Wen a tuesi a nyini ti kowa jigi la, ka tama ale ti bisaŋa ale soa. Dila nyiŋ nye Wen ale weeni fu diila.>>

17Jekob yaa pai wa pooma ale wa bisaŋa a kali laalaakomiba zuk, 18ate wa yaa choa wa duŋsaŋa meena a basi wa niŋ, ale wa jaab meena ate wa nya nyini Paddan Araam la, ayen wa cheŋ wa kowa Aizik jigi Keenan tɛŋka po.

19Laban ale nyini a ga boro a gebi wa piisaŋa kɔbtaŋa la, Arekel yaa zu wa kowa yenni wenaŋa. 20Jekob yaa ŋman jam paasi Laban Araam denɔ, wa ale kan baga a weeni wa ayen wa chali a cheŋ kama la. 21Dila nyiŋ wa jam cheŋ ale ka jaab meena ate wa ta la, a ga lɔ Benni a jueli, a cheŋ tuaga Gilead guuku tɛŋka.

22Ku daa ŋatawa danni ate ba weeni Laban ayen Jekob a cheŋ kama. 23Wa yaa pai wa dɔkdemma a gum wa po, ate ba saŋ Jekob ŋaaŋ, ate ku daa ŋayopɔiwa danni, ba ga nya wa Gilead guuku tɛŋka po. 24Ate Laban Araam denɔwa yaa gɔdaasim yokku po, ate Wen a jam wa jigi a weeni wa ayen, <<Be seba ate fi kan weeni biem wari yaase nalim wari a te Jekob.>>

25Jekob yaa jam ti wa viuku ka Gilead guuku tɛŋka po, ate Laban ale wa dɔkdemma a jam gaam wa basi a yaa kali dula dek ale ba. 26Ate Laban yaa weeni Jekob ayen, <<Ka boa ale la ate fi nye? Fi paasi mi kama, fi pai m liema nna se fi pai nyini ka kpaliŋ po la. 27Boan nyiŋ ate fi paasi mu ale yiti a chali nna susugi ya? Boan nyiŋ ate fi an weeni sak mi, ate m basi fu suik ale masim ate ti pai kayaksa ale kpanta a yi yiila? 28Fi an te ate m puusi m ŋaaŋbisaŋa ale weeni m liema ayen ba cheŋ nalimnyiini. Fi tom ka betta. 29M ta pagrim a baga a nye fu wari kama. Alege yokku po, fi kowa Wenni a weeni mu kama ayen. Be seba ate fi kan weeni biem wari yaase nalim wari a te Jekob. 30Yɔgyɔgla fi cheŋ kama dii nyiŋla fi a yaali kama ayen fi ŋman cheŋ fi kowa yenni. Alege ka boan nyiŋ ate fi maa zu m wenaŋa?>>

31Jekob yaa tulisi Laban ayen, <<Mi yɔgsa kama, dii nyiŋla m poli kama ayen fi le tuesi fi liema a nyini m jigi ale pagrim. 32Alege fi dan nya ale waai a ta fi wenaŋa, kula nyɔnɔwa a kan vuugi. Ti nuruma niŋ be gisi nya ase fi jaab a bo ale mi dela jigini ya. Fi dan nya jaab ase dila la, be pai a ta cheŋ.>> Yɔgyɔgla Jekob a jam zɛ ayen ka Arekel ale zu wenaŋa.

33Ate Laban yaa jo Jekob viuku po a ga taam jo Leya ale wa dɔkliema bayewa viitaŋa po, alege wa an nya jaaboa. Wa yaa nyini Leya viuku po, a ga jo Arekel viuku po. 34Yɔgyɔgla Arekel yaa pai yenni wenaŋa a su ka wa laalaakomi dafieluku po a yaa kali ŋa zuk. Laban yaa gisi jaab meena ale bo viuku po la, alege wa an nya jaaboa.

35Arekel yaa weeni wa kowa ayen, <<M nyɔnɔ, kan te fi sui a puuri ale mu m ni kan baga yiti a zaani fi niŋ la. M boka m chiak lɔka po.>> Ate wa gisi alege wa an baga a nya yenni wenaŋa.

36Jekob sui yaa puuri ate wa yaa ta chaab ale Laban. Wa yaa bek Laban ayen, <<M kaasuŋku ale boa? Ka boan biem ate m nye ate fi a vi mu? 37Yɔgyɔgla de ate fi gisi m ŋantaŋa meena po la, ka boan jaab ate fi nya ate ku chim fi yenni po jaaboa? Pai a ta jam dueni mi dɔkdemma ale fi dɔkdemma suŋsuŋ ate ba bo ti nɔi tiye ma buusa.

38Bena pisiye ate mi a kali ale fu. Fi piisaŋa ale fi booŋa an biak kaasi nya ya, yaase m yik fi duŋsaŋa kunyi mɛ a ko ŋɔbi ya. 39Mi an ta fi duŋ a jam sak fu ayen gɔi duŋ ale yik ka. Jaab a dan bɛ ku a chim ka m zuk po wari. Mi dek ale a tuni. Dan poom ka yok yaase kantueŋ ate ba zu jaab, fi a basi kama ate maa tuni fu. 40M le bo diipo la ale nna. Danni po tuilukku a dɛ mu kama ate yokku mɛ ŋoota a ta mu ate goom a nyini m ninaŋa po a chali bɛ. 41Ku a nye ase ka dila ate m pai bo fi yenni po bena pisiyewa la. M tom ka bena pi ale ŋanaansi a magsi chaab ale fi liema bayewa nyiŋ ale pai bena ŋayuebi a nya duŋsaŋa. Ate fi yik m tutunaŋa a gaari a paari ku naŋtuok nɔi pi. 42Fi a ti basi kama ate m cheŋ ale nisim kɔta ase m kowa ale Abrayam Wenni, waai ate Aizik a chali yɔgsum la, a nin kan bo ale mu. Alege Wen nya m nyiŋbiiri ale m le pai nisa a tom nam diila kama, ate wa jam a toariŋ fu yokku po.

43Laban yaa tulisi Jekob ayen, <<Nipooma ka mi lieba, bisaŋa mɛ ka mi bisa ale nye ba, duŋsaŋa ka mi ale soa si. Jaab meena ate fi a nya la ka mi ale soa. Alege mi jinla ale pai m liema ale bisaŋa de ate ba biak la a nye ka boa? 44Jam yɔgyɔgla, basi ate ti nye nɔiyeŋ, mi ale fi, ate ku chim teerika wari a bo mi ale fi suŋsuŋ.

45Ate Jekob yaa pai buntain a feri zaani ase zaŋi la. 46Ate wa weeni wa nuruma ayen, <<Ba tigsi tana.>> Ate ba tigsi tanaŋa a pai ŋa a vi chaab zuk ate ŋa jueli ŋmai, ate ba kali dula a dɛ ŋandiinta. 47Laban yaa wi jigini ayen Jegar Sayaduta ate Jekob a wi ku ayen Galeed.

48Laban yaa weeni ayen, <<Pimpitini de a za kama a chim teerika a te mi ale fi jinla.>> Dila ale soa ate ba a wi ku ayen Galeed. 49Ba ŋman jam a wi ku kama ayen Mizpa, diila wa jam weeni kama ayen, <<Naawen abe a nya ti zuk ase ti le zak ti basi chaab la. 50Fi dan kan nye m liema a magsi, yaase fi ŋman faari nipok wa choa, waai a ka ti po, alege teeri ayen Wen a nya mi ale fi kama.

51Laban yaa ŋman weeni Jekob ayen, <<Nya pimpitini ale nna, be ŋman nya buntanni ate m feri zaani ase zaŋi la mɛ ale nna ate ku boro a chim teerika a bo mi ale fi suŋsuŋ la ale nna. 52Pimpitini de a chim ka teerika, ate buntanni dɛ a ni feri za ase zaŋi la, a chim ka teerika, fi abe kan gaam pimpitini ale tanni a jam mi jigi a daani mu, ate mi mɛ a kan gaam ŋa a jam a daani fu. 53Abrayam ale Nayo ale ba kowa Wenni abe bo ti nɔi tiyema buusa.>> Jekob pɛ kama wa Wenni yuei nyiŋ, Wen dii ate Aizik a chali wa Yɔgsum la. 54Wa yaa nye kaabka tɛŋka guuku zuk, a yaa wi wa nuruma ate ba jam dɛ ŋandiinta, ate ba le dɛ a nueri la, ba yaa goa dula yok kula.

55Varivientini ku saluik yokyok ate Laban yaa gbaari wa ŋaaŋbisaŋa ale wa liema a yaa niak ba. Alege ŋman cheŋ wa yenni.

Currently Selected:

Piilimka 31: BWU

Highlight

Copy