Piilimka 32

1Jekob mɛ yaa lɔ wa suik po a cheŋ, ate Wen maarɔma yaa tu wa suik. 2Jekob ale ga nya ba la wa yaa weeni ayen, <<Ka Wen tigsuŋ ale nna.>> Ate wa te jigini yuei ayen Mayanaim.

3Jekob yaa dɛ niŋ a tom nuruba ayen ba cheŋ ga nya wa suoku Iisɔ Seir tɛŋka, ale bo Edom tɛŋka po la. 4Wa dak ba kama ayen ba weeni ayen. M kpagi Iisɔ. Fi tomteerɔwa Jekob ayen, M bo ale ka Laban a jam paari yɔgyɔgla de. 5M ta ka niiga ale bonsa ale piisa ale bua ale nidoa tomteerɔba ale dɔklieba. Yɔgyɔgla, m be tom ka wari ayen ba jam weeni m nyɔnɔwa, ayen m le baga a nya ŋmanteka fi jigi ya.

6Tintomdɔma de ale ŋman cheŋ Jekob jigi la, ba weeni wa kama ayen. Ti cheŋ fi suoku Iisɔ jigi kama ate wa cheena ale nuruba kobsinaansi ayen ba tu fu suik.

7Jekob yaa jam yɔgsa ate wa kpaziim a nak ate dila nyiŋ wa lab nuruma ale jam va wa la beŋsa buye ale piisaŋa ale booŋa ale niiŋa ale laalaakomima meena beŋsa buye buye. 8Wa jam poli kama ayen, <<Ase Iisɔ a zaan nye kpaliŋ ale ba ate wa baga a ko ba abe mbala a baga chali bɛ.>>

9Ate Jekob yaa puusi ayen, <<M kowa Abrayam ale m kowa Aizik Wen yaa, Naawen yaa, waai ale weeni mi ayen, <Ŋman cheŋ fi tɛŋka ale fi nuruma jigi, ate m le basi ate fi jigsi.> 10Mi an magsi ayen fi sak fi ŋmanteka ale fi wensieŋa meena ale mi fi tomteerɔwa. Mi jam ta ka m dachekka nyiini m nisa po a lɔ Jodan benni a jueli, alege yɔgyɔgla m chim ka beŋsa siye. 11Mi a puusi kama ayen fi vari mu basi, diila m yɔgsa kama ale m suoku Iisɔ, wa zaan jam nye kpaliŋ ale mu ale m bisaŋa ale ba ma ma. 12Alege fi weeni kama ayen, <Fi le sum nye ate m jigsi, ate m ŋaaŋsaŋa ale nye ase nyakpiemu tintain busuŋku la, ate waai a kan baga a chiini.> >>

13Wa bo ka dula yokku meena, ate wa le ta ŋan baai la, wa yaa yeeri ŋa po ate ku chim tiirim a ta cheŋ ga te wa suoku Iisɔ. 14Ŋa jam ka, bu saari kobsiye ale budukta pisiye ale pa saari kobsiye ale padaasa pisiye 15ale laalaakomi saari pisita ale ŋa bisa ale niiga pisinaansi ale lalisa pi ale bon saari pisiye ale bon doata pi. 16Wa jam pai te ka wa tomteerɔma ayen ba a nya si zuk, yaa nye ate duŋsa meena a bo tɔgatɔga ate wa yaa weeni wa tomteerɔma ayen ba dɛ wa niŋ a cheŋ, abe ba basi ate vuuta a bo naapeerisaŋa ale duŋsaŋa suŋsuŋ.

17Wa yaa weeni waai le dɛ niŋ la ayen, <<Ase m suoku Iisɔ a dan tu fu suik a bek fu ayen, <Ka wana ale soa fi, fi be a cheŋ ka bɛ, ka wana ale soa duŋsaŋa de meena ale bo fi niŋ la?> 18Fi yaa weeni wa ayen, <Ka fi tomteerɔwa Jekob ale soa. Ŋa ka tiirim ate wa pai tom ayen m ta jam te m nyɔnɔwa Iisɔ, wa abe bo ka ti ŋaaŋ a cheena.> >>

19Wa ŋman weeni waai ale pai a saŋ buyewa la, ale waai ale a saari butawa, ale baai meena ale a vi duŋsaŋa ba beŋ beŋka la. Ate wa weeni ba ayen ni magsi ni weeni Iisɔ ka wa yeŋ ase nama nin tu wa suik. 20Abe ni seba ate ni weeni ayen, <<Fi tomteerɔwa Jekob a bo ŋaaŋ a cheena.>> Diila wa poli kama ayen, <<M le pai tiiritaŋa a dɛ niŋ a tom te wa ate ku nye ate ti niak chaab, la ate ti yaa dan nya chaab, wa yaa tuesi mu.>> 21Dila nyiŋ Jekob tiiritaŋa a jam dɛ ka wa niŋ, alege yokku wadek a jam wari a bo viuku po.

22Yok kula po ate wa yiti ale wa pooma bayewa ale wa dɔkliema bayewa ale wa bisa pi ale wanyiwa a lɔ Jabbok beli naŋka a jueli. 23Wa ale ta ba a lɔ beli naŋka a jueli nueri la, wa jam nya kama ate wa ŋantaŋa meena mɛ a lɔ juel. 24Ate ku yaa jam tali Jekob dek wa nyiini, ate nuru yaa jam a jɛ ale wa ate vanni a ga veenti. 25Nuruwa ale ga nya ayen wa an bag wa la, wa yaa tiri Jekob kɔsukku ate wa kɔsukku a choa diipo ate ba boro a jɛ la. 26Ate nuruwa yaa weeni wa ayen. <<Basi mu ate m cheŋ, ale ka vari ale a veenti mu>> Alege Jekob a tulisi wa ayen, <<Fi dan kan niak mu, m kan basi fu ate fi a cheŋŋi.>>

27Nuruwa yaa bek wa ayen, <<Fi yuei ale boa?>> Wa yaa tulisi ayen, <<Jekob.>>

28Nuruwa yaa ayen, <<Fi yuenni a kan ŋman chim Jekob, alege ka Izirali, dii nyiŋla fi jɛ ale ka Wen ale nuruba a nya nakdeka.>>

29Jekob yaa weeni wa ayen, <<Mi a saalim fu, wi fu yuei a sak mu.>> Alege wa tulisi wa ayen, <<Ka boan nyiŋ ate fi a bek mi yuei ya?>> Ate wa yaa niak wa dula.

30Ate Jekob yaa te jigini yuei ayen. Peniel, a weeni ayen, <<Ku le ka diila ale nna, m le Wen nya chaab kama alege ate jaab an nye m nyuvunni.

31Wenbinni yaa pusi jueli a bo wa zuk ase wa le va Peniel a taam la, ate wa kɔsukku nyiŋ wa yaa cheŋ a duksi. 32Dila nyiŋ a jam paari jinla Izirali demma a kan ŋɔbi lam buui ale ka jaab kɔsuk la, diila Jekob kɔsukku ate wa jam tiri la nyiŋ.

Currently Selected:

Piilimka 32: BWU

Highlight

Copy