Luuk 12

1Dila po, nuru boanni a kasim jam dɛ ka tusa diichoa jigi yeŋ a tabi chaab zuk, Yeezu a yaa dɛ niŋ a weeni wa ŋaaŋviirɔma ayen, <<Ni kpesi nidek ale Farisiima dabintaŋa, mi a weeni ka ba sakpaŋ zulaŋa. 2Wari karo a suk dua a kan nyini peelim chum diipo. Wari dii meena mɛ ale chim wasusugi la, ku ale nyini peelim ate nuruba seba. 3Dila nyiŋla, fi dan biisi wari legi po, kantueŋ ba le wom di. Wari dii mɛ ate fi waasi dɔk po la, ale jueli gboŋ ate nuruba wom.

4<<M doaba, ni kan a chali yɔgsum ale baai ale baga a ko fi nyiŋka alege ku ŋaaŋnyiŋ wa an ŋman baga a nye fi wari di choa. 5Ni basi ate m kaam ni waai ale magsi ayen ni a chali yɔgsum la, wala ale Wen, waai ale wa ko fu ale ta pagrim a ŋman pai fu a yuk a basi bolim buui ale kan maari a kpi la po. Mm, mi a weeni ni, ni a chali wa la. 6Nuin fiisa sinu a kan da daa ligbie ŋaye yaa? Wen a kan baŋ si bunyi mɛ la wari ya. 7Wensie, Wen a chiini ni zuisaŋa meena ni zuimaŋa po kama. Nya kude nyiŋ nama kan a chali yɔgsum. Ni gaam nuinsaŋa ka nna yegayega Wen nimbie po.

8<<Nuru waai a dan nyini peelim nuruba niŋ a weeni ayen wa va ka mi, Mi Saalɔbiika mɛ ale nye ka dila dekdega Wen maarɔma niŋ. 9Alege waai mɛ a dan nyini peelim nuruba niŋ a zɛri mi, Mi mɛ ale nyini ka peelim a zɛri wa mɛ Wen maarɔma niŋ. 10Nuru waai a dan lɛ Mi Saalɔbiika kula nyɔnɔwa ale nya vɔŋteka kama, alege waai a dan lɛ Wen Chiika, kula nyɔnɔwa kan nya vɔŋteka. 11Nuruba dan yik fu a ta jam zaani tuka diinaŋa po yaase nalima niŋ yaase kpaga niŋ, ayen ba bek fu bega, kan basi ate ku daani fu ale fi le fi nye dii a biisi nyini la yaase fi le fi biisi diila, 12dii nyiŋla, dipo, Wen Chiika ale sak fu ate fi biisi.>>

13Nuru yaa nyini nuru boanni po a bek Yeezu ayen, <<Sagrɔ, weeni m suoku ate wa basi ate ti labi ti kowa nitalimu a chari chaab.>> 14Alege wa yaa weeni wa ayen, <<M doa, ka wana ale te mi suik ayen m bo nama buusa yaase m lueri ŋanta a chari nama niyewa?>> 15Yeezu yaa weeni nuru boanni meena ayen, <<Ni kpesi nidek ate ni kan chim ŋan yaalisa dii nyiŋla, nyuvuri potim daa fi nin nya ŋanta yegayega.>> 16Yeezu yaa magsi wamagsini ayen, <<Jigsirɔ ale jam ta wa talim ate bu yaa ta ŋanta nna yegayega. 17Wa yaa poli ayen, <M ka jigi a nyo m ŋantaŋa de meena du. M le nye ka sɛ?> 18Wa yaa ŋman weeni wadek ayen, <M le nye ka nna: M le nak ka m buaŋa a lɔnsi abe m sɛ bu kpiema a pai m ŋantaŋa meena a nyoro. 19M dan nye dila a nueri, m yaa weeni m dek ayen, m dega, fi ta ŋandiinta ka nna yegayega a dɛ ate ku ga a paari bena yegayega. Kan a yiili, a dɛ abe fi a nyu abe fi a nye fi yaalika.> 20Alege Wen yaa weeni wa ayen, <Fi ka beruk, yokku de fi ale kpi. Be ka wana ale wa soa fi ŋantaŋa de meena ate fi gomsi zaani la?> 21Ku be ka dila ale baai ale kasim pai ŋanta a zaani a jigsi alege an jigsi Wen nimbie po la.>>

22Yeezu yaa weeni wa ŋaaŋviirɔma ayen, <<Dila abe ale soa ate mi a weeni ni ayen ni kaa a yiili ni nyuvooŋa, ayen ni le nya ŋandiinta ka bɛ a dɛ vuugi, yaase gatta a jo lik ni nyiŋsaŋa. 23Dii nyiŋla, nyuvuri a gaam ŋandiinta kama, fi nyiŋka mɛ abe gaam gatta kama. 24Nama dek abe nya tɛŋka nuinsaŋa, si kan bori ŋanta yaase si a che ŋanta, si ka bua ayen si pai ŋanta a nyoro, alege Wen ale a te si ŋandiinta. Nama abe gaam nuinsa kama! 25Ka ni wana ale a yiili ate dila a gum dai du a te wa? 26Fi be dan kan baga a nye wa fiika de, ka boan ale soa ate fi a yiili nyaŋa de meena. 27Ni ŋman nya tiisaŋa ale wuutaŋa ale a nye ba puutaŋa la, ba kan tom yaase ba a yɔk gatta, alege ni basi ate m weeni ni ayen Solomon ale jam jigsi dii nna yegayega la, wa jam ka gatta ate ti nala a paari tiisaŋa ale wuutaŋa de puutaŋa. 28Alege Wen abe dan a te ti ga tila chaab wuutaŋa de tii nyiem ale boro jinla alege chum ba ŋman pai ti nyo bolim po la, ku a fɛ kama ayen wa te nama mɛ gatta. Ka boa ale soa ate nama siaka an soa diiya? 29Dila nyiŋ ni kan kasim a yiili abe ni pai ni popola meena a basi ni ale ni dɛ abe ni nyu jabuui la jigiya. 30Dii nyiŋla, ka baai ale kan seba Wen la ale kasim chali a vi ŋantaŋa de, alege nama Kowa poom seba ayen nama mɛ a yaali ŋantaŋa de kama. 31Dila nyiŋ ni dɛ niŋ a pai ni popola meena a basi Wen naamu po alege ate Wen a yaa basi ate ŋantaŋa de meena mɛ a jo ni nisa po.>> 32Ni kan chali yɔgsummoa, m bisaa, ale ku ka ni Kowa yaalika ayen wa pai naamu a te ni.

33<<Ni pai ni ŋan baai ate ni ta la a da a pai ligraŋa a te ŋanjaksa. Ni yaali ligra foruk tii ale kan maari a kaasi la, ate ni jigsika meena a bo wenŋmazuk juijui ate ŋanta kasim boro taam wuu ate zueba an baga a zu la, yaase ŋanta an baga a de ba la. 34Dii nyiŋla, ni jigsika ale bo juijui la, ni suiniima mɛ a bo ka dula.

35<<Ni gomsi magsi tuima abe ni basi ate ni bolimu a nyaksi. 36Abe ni a nye ase nuruba ale a limisi ba kpagi a nyini yalika tigi a jam diila. Wa dan jam a nak, tuimtomdisaŋa a nye ka nwuli a lak tuoku a te wa. 37Niauŋ ale tuimtomdɔ bala baai ate kpagni a jam paari ale ba kan goa la, wensie ate mi a weeni, wa le basi ate ba kali ate wa ta ŋandiinta a jam chari ba. 38Ba nyɔnɔwa a dan ŋman pilim jam a paari yok diipo ale ba kan goa, tomteerɔ bala ta niauŋ kama.

39<<Alege ni seba kude, ni basi ate m weeni a sak ni ayen, yenni nyɔnɔwa a dan seba diipo ate zuewa ale jam wa yenni la, wa te kan goa alege basi ate ba a kaasi wa yenni a jo di po. 40Dila nyiŋla, nama mɛ gomsi nidek a magsi dii nyiŋla, Mi Saalɔbiika ale jam ka diipo ate ni kan poli ayen m le jam la.>>

41Piita yaa bek Yeezu ayen, <<M Nyɔnɔ Yeezu Kirisita, fi a weeni wamagsini de a sak ka tama nyiini yaa waai meena?>> 42Nyɔnɔwa Yeezu Kirisita yaa weeni ayen, <<Ka wana ale wensie ale yam tomteerɔwa de, waai ate wa kpagni a ta sebchakka ale wa ayen wa pai ŋandiinta a te tomteerɔ ba chaab diipo ale magsi la? 43Tomteerɔ waai ate wa kpagi a jam paari ale wa a tom wa tuini la a ta suipeentik kama. 44Wensie, ate mi a weeni fu ayen wa nyɔnɔwa ale pai wa ŋantaŋa meena a nyo ka wa nisa po ayen wa a nya. 45Alege tomteerɔwa a dan weeni ayen wa nyɔnɔwa goa a beni ka yegayega ale jamka, ate wa yaa yiri a nak wa tomteerɔ chaama, nidoama ale nipooma meena a gum chaab alege nye ŋandiinta a dɛ ale a nyu daam a buk, 46wa nyɔnɔwa ale ŋman pilim a jam ka da dii danni ate wa kan poli ayen wa le jam la. Wa nyɔnɔwa a dan jam paari, wa le te tomteerɔwa de ka waalika ase baai ale kan a va Wen nɔi la. 47Tomteerɔ waai ale seba wa nyɔnɔwa yaalika alege an gomsi a nye wa yaalika la, ale nya ka waalika ale nagta nna yegayega. 48Alege tomteerɔ waai ale kan seba wa nyɔnɔwa ale a yaali ayen wa nye dii a te wa alege wa nye wari dii ale magsi wa nya nagta la, wa le nya ka nagta nna maga. Nuru dan te fu yegayega, wa a poli ayen wa tuesi fi jigi ka yegayega mɛ. Wa be dan te fu nna yegayega gaam taam, wa poli ayen wa tuesi fi jigi ka nna yegayega mɛ a gaam taam.

49<<Mi jam ayen m cheem ka bolim tɛŋzuk de, mi be a yaali ayen bu ti poom ŋaam toati kama. 50M ta ka ninam ayen m nam bu po, ku abe a daani mu ka nna yegayega ka bu nin ga nueri. 51Nama a poli ayen mi jam ayen m ta ka suiyɔgni a jam tɛŋzuk de? Aaya, m jam ayen m poorika kama. 52A ta nyini yɔgyɔgla a cheŋ, nuruba banu a dan bo ba yeri po, ba le poori ka tɔgatɔga ate nuruba bata (3) a maa chaab a ta chaab ale nuruba baye. 53Ate ko ale ta chaab ale wa biik ate biika mɛ a ta chaab ale ka kowa. Ate ma ale ta chaab ale wa lie ate liewa mɛ a ta chaab ale wa mawa. Ate ŋianipɔk ale ta chaab ale wa sampok ate sampowa mɛ a ta chaab ale wa ŋianipowa.>>

54Yeezu yaa weeni nuru boanni ayen, <<Nama a dan nya chiŋmari ale di sobri yeniŋka ni a poli kama ayen ŋmoruk ale a yaali ku ni ate ku sum ni. 55Ni nyiem a dan nya ale viok a nyini yeseok geŋ a cheena, ni a poli kama ayen wulum wein a moata kama ate bu sum jam. 56Ni ka sakpaŋ zula nyam. Ni baga a nya tɛŋka ale chiŋmaaŋa kama a baga a seba ku ale ka diila. Be ka boa ale soa ate ni an baga a miŋ wie ŋaai ale a nye yɔgyɔgla de la?

57<<Ka boa ale soa ate ni an baga a weeni nidek dii ale magsi nyeka la? 58Ase fi ŋmaarɔwa a dan ta fu a cheŋ buusa boka jigi, pii nyiŋ ate fi nya wanni zuk suiku po, kan daa di wa pai fu a te ka buusa boorɔwa, ate wala a pai fu a te kpagni ate kpagni ale pai fu a nyo likka dɔk po. 59Mi a weeni fu, fi kan nyini, ka fi nin tuni pamini.>>

Currently Selected:

Luuk 12: BWU

Highlight

Copy