Luuk 13

1Yeezu ale jam boro a biisi la, nuruba gela a yaa jam weeni a sak wa naawa Paalɔt ale ko Galili demma ba gela ba ale jam boro a nye kaabka a te Wen diila. 2Yeezu yaa weeni ba ayen, <<Nama a poli ayen Galili demma de, a chim ka tuimbaata nyam a gaam Galili demma mbala? 3Aaya, ni be dan kan basi ni tuimbaataŋa tomka, nama mɛ le kpi ka bala ale kpi diila. 4Nama a poli ayen nuruba pi ale naanika ate Jerusalem tɛŋka Sailom yeri kpienni a jam lo ba zuk a ko ba la a chim ka tuimbaata nyam a gaam nuru baai meena ale bo Jerusalem tɛŋka po la? 5Aaya, alege mi a weeni kama ayen ni dan kan basi ni tuimbaataŋa nama mɛ le kpi kama.>>

6Yeezu yaa magsi wamagsini ayen, <<Nuru ale jam ta kiŋkaŋ wa kaduk po. Nuruwa yaa yiri dai yeŋ a yaali moota alege wa an nya jaaboa. 7Wa yaa weeni waai ale a nya kadukka zuk la, ayen, <Nya de, bena ŋata ale nna ate mi kasim a yaali moota kiŋkaŋka de zuk alege kan nya jaaboa. Che ka lɔnsi, ale mi zɛ jabuui nyiŋ ale soa ate ka a dɛ tɛŋka ŋandiintaŋa la.> 8Wa yaa tulisi wa ayen, <M nyɔnɔ, basi ate ka zaani benni de ate m tu gilim ka a nye bibaam a yuk gilim ka. 9Bein a dan ŋman paari ate ka yɔni, ku nala, alege bu dan kan yɔni ya, fi yaa che lɔnsi.> >>

10Yeezu yaa jam boro a sak nuruba ba tuka diinaŋa kunyi po. 11Nipok wanyi ale jam boro ate chichirik biok a basi ate wa chim gbaruk bena pi ale naaniŋ. Tuemu a jam nye kama ate wa gori an ŋman baga a teenti wadek a zaani. 12Yeezu ale ga nya wa la, wa yaa wi nipowa ayen, <<Nipowa, fi nya nyiŋyɔgsa kama,>> 13a yaa pai wa nisaŋa a vi nipowa zuk ate wa yaa deri teenti wadek a yiri zaani ŋmai a te Wen pimpauk. 14Alege tuka dɔkku kpagni ale ga nya dila la, wa sui yaa puuri dii nyiŋla, ku jam ka ba Vuusum Dai ate Yeezu nye dila. Tuka dɔkku kpagni a yaa weeni nuruma ayen, <<Daa ŋayuebi ale boro ate ti pai ŋala a tom tuima. Nuru waai a dan a yaali ayen wa nya tebika wa jam daaŋa de po. Ku daa ti Vuusum Danni ate ba a nye dila!>> 15Yeezu yaa tulisi wa ayen, <<Nama ka sakpaŋ zula nyam, nama wanyi wanyi a foli ni niiga ale ni bonsaŋa kama a ta a cheŋ ate ba a nyu nyiam ni Vuusum Danni. 16Ka boa ate nipowa de, ale ka Abrayam lie la ate Sitaana bobi wa bena pi ale naaniŋ la, a kan nya tebika Vuusum Danni?>> 17Yeezu tulisika de a jam pai wa dachaasaŋa nyo ka chivie po ate nuruma sue a jam peenti ale wakperikaliik sii ate Yeezu jam nye la.

18Yeezu yaa bek ayen, <<Wen naamu a nye ase ka boan la? M le pai ka boan jaab a magsi chaab ale bu? 19Bu a nye ase ka biri dii ate ba a wi ayen, mastad,#13:19 Mastad ka biri fiik. ate nuru yaa pai bori wa talim po la. Binni a yaa nyini a chim tiib ate nuinsa yaa jam a yɔk si tugta bu naŋsaŋa nyiŋ.>>

20Yeezu ŋman bek ayen, <<M be le ŋman pai ka boa a magsi chaab ale Wen naamu? 21Bu a nye ase ka dabinta ate nipok a pai nyo taasi kpienni ale boroborok zom po ate bu fuusi a sueri di meena diila.>>

22Yeezu yaa va tɛŋ kpieŋsaŋa ale tɛŋ fiisaŋa po a cheŋ Jerusalem ale a sak nuruma. 23Nuru wanyi a yaa bek wa ayen, <<M Nyɔnɔ Yeezu Kirisita, nuru baai ale ba nya varibasika la an soa diiya?>> Yeezu yaa tulisi ba ayen, 24<<Ni pii nyiŋ a va tuok miglika a jo, mi a weeni kama ayen nuru boari ale a gisi ba va dula a jo, alege ba kan baga. 25Yenni nyɔnɔwa yaa dan yiri lik dɔkku nɔnni ni yaa weeni ayen, <M nyɔnɔ lak dɔkku nɔnni a te ti.> Ate wa le tulisi ni ayen, <Mi zɛ ni ale nyini ka juijui la.> 26Ate ni yaa weeni wa ayen, <Tama ale fi a dɛ ŋandiinta ale chaab kama. Fi be sak nuruba tama tɛŋka kama.> 27Alege wa le ŋman tulisi ayen, <Mi zɛ ni ale nyini ka juijui la. Nama gaasa nyama, ni bɛ mi niŋ!> 28Ni ni a kum kama abe ni a ŋɔbi nyina ase ni nin nya Abrayam ale Aizik ale Jekob ale Wen biisiteerɔma meena a bo Wen naamu po. Alege ate nama bo bu peelim. 29Nuruba ale nyini kori ale yeniŋ ale wiilukku ale yeseoku geŋsa a jam kali Wen naamu po. 30Ate ba gela ale wari ŋaaŋ la ale dɛ niŋ ate baai ale dɛ niŋ la a wari ŋaaŋ.>>

31Yeezu ale boro a biisi la, Farisiima gela a yaa jam wa jigi a weeni wa ayen, <<Basi dela jigini abe fi nyini a cheŋ jigi yoŋ dii nyiŋla, Naawa Ayerod a yaali ayen wa ko fu kama.>>

32Yeezu yaa tulisi ba ayen, <<Ni ga weeni pimpaasima nyɔnɔwa ayen m bo ka dela a yiak chichirik baata nuruba zuima po a basi ale a tebi ba gela mɛ jinla ale chum ate vɔnuŋ a dan paari abe m nueri m tuimaŋa. 33Alege ku a fɛ kama ayen m bo m suiku po a cheŋ jinla ale chum ale vɔnuŋ dii nyiŋla, ku an magsi ayen Wen biisiteerɔwa a kpi jigi jigiya, ka Jerusalem tɛŋka po ate wa le kpi.>>

34<<Jerusalem, Jerusalem, nama a ko Wen biisiteerɔma ale yuk baai ate Wen a tom ba ni jigi la ale tana, ka bu dina ate mi ale tigsi ni bisaŋa jigi yeŋ ase kpiak ale a pɔbi ka bisa diila alege nama a kan siagi? 35Ni be nya m banti ni yenni kama, mi ale a weeni ni ni kan ŋman nya mi, ka nama a nin weeni ayen, <Niaka a bo waai ale cheena Naawen yuenni nyiŋ la.> >> (Yiila 118:26)

Currently Selected:

Luuk 13: BWU

Highlight

Copy