Maak 10

1Yeezu yaa basi dula jigini alege va Judia tɛŋka po a taam paari Jodan benni kauk kunkula. Nuru boari yegayega yaa tigsi chaab a jam wa jigi ate wa sak ba ase wa nyiem ale poom a sak ba diila.

2Farisiima gela yaa jam wa jigi ayen ba choa wa nɔi a nya. Ba yaa bek wa ayen, <<Ti Sinsaŋŋa a siak ayen nuru a basi wa powa?>>

3Yeezu yaa bek ba ayen, <<Moosis a sak ni ka sɛ?>> 4Ba yaa tulisi wa ayen, <<Wa sak ti kama ayen wa ŋmarisi gbaŋ a basi ti wa cheŋ.>>#10:4 Teerika 24:1-4

5Yeezu yaa weeni ba ayen, <<Moosis a sak ni kama, ayen ni va suik kula dii nyiŋla, ni ta ka tukpari. 6Alege ku piilimka po ate Wen a nye tɛŋka meena la, <Wa nye ŋanta meena ka jaduok ale jasari, nidoa ale nipok.> (Piilimka 1:27) 7A yaa weeni ayen, <Ku nala kama ate nidoa a basi wa ko ale wa ma ale ge a ga faari nipok ate 8ba nɔi bayewa a chim bunyi.> (Piilimka 2:24) Ba ŋman daa nuruba baye, ba yaa ka nuru yeŋ. 9Dila nyiŋla baai ate Wen a basi ate ba chim nuru yeŋ la, ku an magsi ayen nuru a poori ba.>>

10Yeezu ale wa ŋaaŋviirɔma yaa ŋman ga jo yeri po ate ba bek wa dii ate wa poom weeni ba la kiri. 11Wa yaa weeni ba ayen, <<Nuru waai a dan basi wa pok alege a ŋman faari wa choa, wa nye wa powa a kaasi kama. Wa nye ka kaboŋ, 12ate wa dan basi wa chorɔwa ale yali nuru yoŋ, nipowa a nye ka kaboŋ.>>

13Dula jigini nuruba gela yaa pai bisa a ta jam Yeezu jigi ayen wa niak ba. Ba ale nye dila la, wa ŋaaŋviirɔma yaa toariŋ ba. 14Yeezu ale ga nya dii ate ba nye la, wa sui yaa jam a puuri nna yegayega ale wa ŋaaŋviirɔma ate wa weeni ba ayen, <<Ni te bisaŋa suik ate ba jam mi jigi. Ni kan yiak ba, ale ka bala ale soa Wen naamu. 15Wensie ate mi a weeni ni, waai a dan kan tuesi Wen naamu ase biik la wa kan baga a jo bu po.>> 16Yeezu yaa pai ba a nyo wa nigoruk po yaa pai wa nisaŋa a ji ba zuima a niak ba.

17Yeezu ale basi dula jigini ale a cheŋ la, nuru yaa chali jam tu wa a kpi duna tɛŋ wa niŋ a bek wa ayen, <<Sagrɔ maŋŋa, mi le nye ka sɛ ate m nya nyuvuri dii ale kan ta kpeglimka la?>>

18Yeezu yaa bek wa ayen, <<Ka boa ate fi a wi mu ayen nuru maŋŋa? Nuru waai karo a chim nuru maŋŋa, ka Wen dek nyiini. 19Fi poom seba Moosis Sinsaŋŋa kama. Naawen a weeni ayen kan ko nuru, kan nye kaboŋsa, kan zu, kan chim seerɔ waai ale a velim la, kan a yaali degaamka. Ku a fɛ ate fi zuli fi ko ale fi ma.>>#10:19 Nyinika 20:12-16; Teerika 5:16-20, 24:14

20Nuruwa yaa weeni wa ayen, <<Sagrɔ, mi kasim va sinsaŋŋa de meena kama a ta nyini m paalim po a jam paari jinla.>> 21Yeezu yaa nya wa ate wa jiirim dari wa ate wa weeni wa ayen, <<Wa yeŋ dekki ale tali fi jigi. Cheŋ a ga pai fi ŋantaŋa meena a da a tuesi ligraŋa a te niwomma. Fi dan nye dila alege jam va mi, fi le jigsi wenŋmazuk.>>

22Yeezu ale weeni wa dila la wa sui yaa deri kaasi ate wa yaa deri cheŋ ale sui kaasuŋ dii nyiŋla wa jam ka ŋanta nyɔnɔ a kan siak wa ŋantaŋa nyiŋŋa.

23Yeezu yaa nya wa ŋaaŋviirɔma ale weeni ba ayen, <<Ku toa kama ate ŋanta nyam a baga a jo Wen naamu po.>>

24Wa ale weeni dila la ku yaa cha ba. Wa yaa ŋman weeni ba ayen, <<M bisa, ku toa kama ale Wen naamu po joka. 25Ku ka moali ate laalaakomi a baga va garuk pein vɔrup po a nyini a gaam jigsirɔ a nin baga a jo Wen naamu po.>>

26Yeezu ale weeni ba dila la, ku yaa cha ba. Ba yaa weeni chaab ayen, <<Ku be dan ka dila, ka wana le wa baga nya varibasika?>>

27Yeezu yaa nya ba a weeni ayen, <<Ku toa kama nurubiik jigi, alege ku ka moali Wen jigi, dii nyiŋla Wen baga wie meena a nye kama.>>

28Dula jigini Piita yaa weeni wa ayen, <<Nya, tama basi ka ti ŋanta meena ale jam va fu.>>

29Yeezu yaa ŋman weeni ba ayen, <<Wensie ate mi a weeni ni, nuru waai ale basi wa yeri ale wa ko ale wa ma ale wa suata ale wa toaba ale wa bisa ale wa kaduksa, mi ale Wen wamaŋsaŋa nyiŋla, 30wa le nya ŋanta ale nuruba nna yegayega jinla a gaam baai meena ate wa basi la. Wa le ŋman nya yie, ale maba ale suata ale toaba ale bisa ale kaduksa alege wa le nya ninam mɛ nna yegayega abe chum diipo wa yaa nya nyuvuri dii ale kan ta kpeglimka la. 31Baai ale dɛ niŋ la yega ale jam wari ŋaaŋ ate baai ale wari ŋaaŋ la jam dɛ niŋ.>>

32Ba ale jam bo suiku po a cheŋ Jerusalem tɛŋka la, Yeezu yaa dɛ ba niŋ ate ba a cheŋ. Baai meena ale jam va wa la, ku yaa cha ba alege baai ale va la jam a chali yɔgsum. Wa yaa poori wa ŋaaŋviirɔma pi ale bayewa a weeni ba dii ate nuruba ayen ba nye wa la. 33Wa yaa weeni ba ayen, <<Ni nya, ti a cheŋ ka Jerusalem tɛŋka. Ti dan paari dula jigini, nuruba ale yik Mi Saalɔbiika a ta mu a ga nyo kaabteerɔ kpaŋŋa ale Sinsak sagrɔma nisima po. Ba le bo m kum buusa abe ba ta mu a ga nyo baai ale kan daa Juuba la nisima po. 34Ba le la mu abe ba chesi tintueta a basi m nyiŋ, a nak mu abe ba yaa ko mu. Daa ŋata a dan paari mi le yiti kum po.>>

35Dula jigini Zebedi nidoabilisaŋa Jeemsi ale Jɔɔn, yaa jam Yeezu jigi a weeni wa ayen, <<Ti Sagrɔ, ti a yaali ayen ti saalim fu kama ate fi nye wari a te ti.>>

36Wa yaa bek ba ayen, <<Ka boa ate nama a yaali ayen mi nye a te ni?>>

37Ba yaa weeni wa ayen, <<Fi dan jam chim naab a soa nuru meena zuk a nya, ti a yaali kama ayen fi basi ate ti wanyi a kali fi juga, wanyi mɛ a kali fi gala.>>

38Yeezu yaa weeni ba ayen, <<Nama zɛ dii ate ni a bek la. Ni ale baga a nyu beerik kaai ate mi ale nyu laa yaase so kaai ate mi ale so laa?>>#10:38 Maak 14:36

39Ba yaa weeni wa ayen, <<Ti le baga a maa nam.>> Yeezu yaa ŋman weeni ba ayen, <<Wensie ni ale nyu beerik kaai ate mi ale nyu la abe ni so, so kaai ate mi ale so la. 40Alege mi ka suik a lueri baai ale ba kali mi juga ale mi gala la. Ka Wen le wa pai dula a te baai ate wa gomsi magsi ba la.>>

41Wa ŋaaŋviirɔ mbala piwa ale wom Jeemsi ale Jɔɔn ale bek Yeezu diila, ba sue yaa puuri nna yegayega ale ba. 42Yeezu yaa wi ba ate ba jam tigsi chaab wa jigi ate wa weeni ba ayen, <<Tɛŋzuk de nalima ta pagrim ba nuruma zuk kama a nye ba ale a yaali diila. Ba kpaŋŋa mɛ ta pagrim ba zuk kama. 43Alege ku an magsi ayen ku chim dila nama jigiya. Nuru waai a dan a yaali ayen wa chim nama kpagi, ku a fɛ ate wa chim ni meena tomteerɔ. 44Nuru waai a daa a yaali ayen wa chim nama kpagi, ku a fɛ ate wa chim nama meena yɔma. 45Mi Saalɔbiika an jam ayen ka nuruba a tom a te mu alege ka m tom a te nuruba. M jam ayen m tom a te ka tɛŋka meena demma abe m kpi a tuesi ba a basi.>>

46Ba yaa jam paari Jeriko tɛŋka, ate nuruba yegayega yaa tigsi chaab a jam Yeezu jigi. Ba le jam basi dula jigini ale a nyini la, ba yaa nya yio ale wa kala suiku nɔi a juisi. Wa yuei jam le Baatimiusi. Di kiri ale Timiusi nidoabili. 47Wa ale wom ayen ka Yeezu Nazaret denɔwa ale a taam la, wa yaa kaari a wi wa ayen, <<Yeezu, fi Deevid nidoabinni, ta jiirim ale mu.>>

48Nuruma yega yaa weeni wa ayen wa goori wa wanni, alege wa zɛri ale a kaari nna yegayega a gum du a weeni wa ayen, <<Deevid Nidoabinni, ta jiirim ale mu.>>

49Yeezu yaa zaani a weeni ba ayen ba wi wa ate wa yiti jam wa jigi. Ba yaa weeni wa ayen, <<Te fi sui peenti abe fi yiti jam, dii nyiŋla wa a wi fu kama.>> 50Yiowa yaa yeeri wa kasaauku a dueni, ale yiti a zaani ŋmai a cheŋ Yeezu jigi.

51Yeezu yaa bek wa ayen, <<Fi a yaali ayen mi nye ka boa a te fu?>> Wa yaa weeni wa ayen, <<Sagrɔ, mi a yaali ayen fi nye kama ate m ninaŋa a lagri a te mu.>>

52Yeezu yaa weeni wa ayen, <<Be cheŋ. Fi ale ta siaka ale mu diila a basi kama ate fi ninaŋa a lagri.>> Wa ninaŋa yaa deri lagri ate wa yaa va Yeezu a cheŋ.

Currently Selected:

Maak 10: BWU

Highlight

Copy