Maak 11

1Ba yaa jam paari Betfaaji ale Betani tɛŋsaŋa ale Olivi Guuku. Tɛŋsaŋa ale guuku a jam moata ka Jerusalem tɛŋka. Yeezu yaa wi wa ŋaaŋviirɔma po baye a weeni ba ayen, 2<<Ni cheŋ a ga jo tɛŋ fiik kaai ale bo ni niŋ la. Ni dan deri ga jo dula, ni le nya bonpaalik ate ba bobi ka zaani. Nuru an diem a dɔ ka nyaya. Ni foli ka a ta jam te mu. 3Ni dan boro a foli ka, ate nuru bek ni dii nyiŋ ate ni a foli ka la, ni weeni wa ayen ka Nyɔnɔwa Yeezu Kirisita ale a yaali ka. Wa be dan nueri ale ka wa le ŋman basi ate ba ta ka a jam nwuli.>>

4Ba yaa cheŋ ga nya bonpaalik ale ka bobi za yeri nansuiŋ nɔi ate ba yaa foli ka. 5Nuru baai ale jam za dula jigini la, yaa nya ba a bek ayen, <<Ka boa ale soa ate nama a foli ka?>> 6Ba yaa weeni ba dii ate Yeezu a poom weeni ba la, ate nuruma yaa basi ate ba foli ka a ta cheŋ ga te wa. 7Ba yaa ta bonpaalika a ga te Yeezu, yaa yeeri ba gattaŋa a pai vi bonpaalika chiaka zuk ate Yeezu yaa doa. 8Nuruba yegayega yaa jam pai ba gattaŋa a pati suiku niŋ ayen Yeezu a ta wa bonika a cheŋ va ti zuk a taam. Ba gela mɛ a cheŋ suiku nakpiak a ga che tiisa vaata a ta jam pati suiku niŋ. 9Ba ale jam bo suiku po a cheŋ la baai ale jam dɛ niŋka la ale baai mɛ ale jam bo ŋaaŋka la, meena yaa zuli wa a kaari ayen, <<Naawen vari ti a basi. Niaka a bo waai ale cheena Naawen yuenni nyiŋla. (Yiila 118:25-26) 10Naawen niak waai ale cheena ayen wa soa ti kokpieŋka Deevid naam buui ale cheena la. Fi, Naawen dii ale bo wenŋmazuk la, a vari ti a basi.>>

11Yeezu ale jam paari Jerusalem tɛŋka la, wa yaa cheŋ ga jo Wen Yenni po a nyiem nya jaabuuri meena ale bo di po la ale ŋman nyini. Yeezu ale wa ŋaaŋviirɔma pi ale bayewa an jam bo dula jigini a beniya, dii nyiŋla, wenni a jam a siŋ kama. Ba yaa basi dula jigini ale ŋman cheŋ Betani.

12Vari ale jam veenti la, ba yaa ŋman yiti a basi Betani ale nyini. Kom yaa jam ta Yeezu. 13Wa yaa nya kiŋkaŋ a za niŋniŋ ate vaata a lik ka. Wa yaa cheŋ ga paari ka tɛŋ ayen wa nya ase ka ta moota ya ate wa dɛ, alege jaab a jam ka ka zuwa. Ka vaata nyiini ale jam boro, dii nyiŋla ku jam daa moota wein ya. 14Yeezu yaa weeni kiŋkaŋka ayen, <<A nyini jinla danni a ta a cheŋ diipo meena wuu, nuru a kan ŋman nya fi moota a dɛ.>> Wa ŋaaŋviirɔma yaa wom dii ate wa weeni la.

15Ba ale ŋman jam paari Jerusalem tɛŋka la, Yeezu yaa ŋman ga jo Wen Yenni po. Nuruba ale jam bo di po a gerim. Wa yaa yiak ba meena ate ba nyini dula jigini a nyini, a zak nuru baai ale jam ta ligraŋa a tagri la ŋanzaanitaŋa a tulim kpib, a tusi baai ale ta nangbaŋsaŋa a da la zukpagliksaŋa mɛ a lɔnsi. 16Wa an jam siak ayen geruŋdɔba a ji ŋanta a va Wen Yenni po a taam nyini. 17Wa yaa sak nuruma ale bek ba ayen, <<Ba an ŋmarisi kama ayen, <Mi yenni ba le wi di ayen ka tɛŋsa meena puusa yeri la,> (Azaya 56:7) alege nama a pai di chim zueba boka jigi ya?>> (Jeremaya 7:11)

18Yeezu ale ga weeni dila ate kaabteerɔ kpagni ale Sinsak sagrɔma wom la, ba yaa jam a gisi suik ayen ba ko wa. Alege yɔgsum ale jam yik ba ale Yeezu ate ba an jam baga a nya suik a tiri wa. Dii nyiŋla wa sinsaŋŋa a jam cha nuruma kama.

19Junɔi ale jam paari la, Yeezu ale wa ŋaaŋviirɔma a yaa basi Jerusalem tɛŋka ale nyini cheŋ.

20Vari ale ŋman veenti la, ba yaa va suiku a taam a nya kiŋkaŋka ale ka kpi za. 21Piita yaa teeri Yeezu diem ale weeni diila, a yaa weeni wa ayen, <<M Sagrɔ, nya, kiŋkaŋ kaai ate fi diem a ka te la, ka meena a kpi kama.>>

22Yeezu yaa weeni ba ayen, <<Ni ta siaka ale Wen. 23Wensie ate mi a weeni ni, waai ale ta siaka ale Wen ale ka chichama ale sum siak ayen wa ale weeni diila le nye la, a baga a weeni gu kpioŋku kama ayen ku voori dula jigini a ga lo nyakpiemu po ate Wen sum nye a te wa. 24Dila nyiŋ ni dan puusi a te Wen a juisi jaab, ni ta siaka ayen ni nya jaamu kama ate Wen yaa pai a te ni. 25Diipo meena ni daa ni puusi a te Wen ni dɛ niŋ a vɔŋ te baai ale nye ni a kaasi la, abe ni ge a puusi a te Kowa waai ale bo wenŋmazuk la ate wa mɛ a vɔŋ te ni. 26Ni dan kan nye dila, ni Kowa waai ale bo wenŋmazuk la abe kan vɔŋ te nama mɛ.>>

27Ba yaa ŋman jam Jerusalem tɛŋka a ga jo Wen Yenni po. Yeezu ale bo di po a nyiem la, kaabteerɔ kpagni ale Sinsak sagrɔma ale tɛŋka nisɔmma meena yaa tigsi chaab a jam wa jigi 28a bek wa ayen, <<Ka boan pagrim ate fi ta a tom wieŋa de? Ka wana ale te fu suik ate fi a nyiem a tom wieŋa de?>>

29Yeezu yaa tulisi ba ayen, <<Mi mɛ le bek ni wari. M dan bek ni ate ni siak a tulisi mu, mi mɛ le weeni sak ni pagrim buui ate mi ta a tom wieŋa de la. 30Jɔɔn ale jam a te nuruba soka la, ka Wen ale jam te wa pagrimu yaa ka nuru biiga?>>

31Wa le bek ba dila la, ba yaa ta nanpaga ale chaab ayen, <<Ti dan weeni wa ayen ka Wen ale te wa pagrimu, wa le bek ti ayen, <Be ka boa ale soa ate ti an siak a te wa?> 32Ti be an baga a weeni mɛ ayen ka nurubiik ale te wa pagrimu dii nyiŋla, waai meena a seba wa ale jam ka Wen biisiteerɔ la kama.>> Ate ba yaa chali yɔgsum. 33Ba yaa tulisi Yeezu ayen, <<Tama zɛ.>> Yeezu yaa weeni ba ayen, <<Mi mɛ a kan weeni ni pagrim buui ate mi ta a tom wieŋa de la.>>

Currently Selected:

Maak 11: BWU

Highlight

Copy