Maak 14

1Ku jam tali ka daa ŋaye ate Gaambasika Tigini ale Boroborok Kuui Ale Kan Ta Dabinta La Tigini a paari, ate kaabteerɔ kpaŋŋa ale Sinsak sagrɔma a gisi suik ayen ba mak yik Yeezu a ko.#14:1 Nyinika 12:1-27 2Ba yaa weeni ayen, <<Ti kan yik wa tigini po, kan daa di nuruma le nye kpaliŋ kpieŋ.>>

3Yeezu yaa cheŋ Betani tɛŋka a ga jo Simon, waai ate gama tuem a jam yik wa la yenni po. Wa yaa jam kala a dɛ ŋandiinta ate nipok wanyi a ta kpaam jam. Kpaamu nyummu a jam masa kama ate bu diak a pagra. Nipowa yaa pai kpaamu a kpiiri basi Yeezu zuk.

4Nuru baai ale jam kala dula jigini la gela yaa nya dii ate nipowa a nye la, ate ba sue yaa puuri ale wa. Ba yaa poli ba zuima po ayen, <<Ka boa ate nipowa de a pai kpaamu a yik kaasi dila? 5Wa dan pai bu a da kama nna, wa ti le nya ligra ka nna yegayega a te ŋanjaksaŋa. Kula a gaam dii ate wa nye la kama.>> Ba yaa jam toariŋ wa.

6Yeezu yaa weeni ba ayen, <<Ni basi wa. Ka boa ate ni a daani wa? Wa nye ka wamaŋ a te mu. 7Niwomma a bo ale ni kama daa meena ate ni daa a yaali ni baga a maari ba. Alege mi a kan kasim bo ale ni. 8Wa nye ka wa ale baga a nye dii meena la a te mu. Wa kpiiri kpa masika de mi nyiŋka kama a gomsi ka a magsi guka. 9Wensie ate mi a weeni ni, juijui meena ate nuruba a sak Wen wamaŋsaŋa la, ba le weeni nipowa de ale nye dii a te mi la. Ba le kasim a teeri wa yuei diipo meena wuu.>>

10Dula jigini Yeezu ŋaaŋviirɔma pi ale bayewa po wanyi, Judas Iskariot yaa cheŋ kaabteerɔ kpaŋŋa jigi a ga weeni ba ayen wa baga a maari ba kama ate ba a yik Yeezu. 11Ba ale ga wom dila la, ba sue yaa peenti nna yegayega, ate ba weeni wa ayen wa dan baga a maari ba, ba le te wa ligra. Judas yaa basi dula jigini ale a gisi suik kuui wa le wa va ate ba baga a yik Yeezu la.

12Yeezu ŋaaŋviirɔma yaa jam wa jigi tigi dii ate ba a ŋɔbi boroborok kuui ale kan ta dabinta la piilimka danni. Da dila mɛ ale ba a ko Gaambasika Tigini piisaŋa. Ba yaa bek Yeezu ayen, <<Ka be ate fi a yaali ayen ti ga gomsi Gaambasika Tigini ŋandiintaŋa ate ti dɛ?>>#14:12 Nyinika 12

13Wa yaa weeni wa ŋaaŋviirɔma po baye ayen, <<Ni cheŋ a ga jo tɛŋka po. Dula jigini ni le nya nidoa a ji nyiam ale samɔniŋ. 14Ni va wa a ga jo yeri diipo ate wa a jo la. Ni dan ga jo ni weeni yenni nyɔnɔwa ayen, <Ti Sagrɔwa ale tom ti ayen ti jam bek fu dɔk kuui po ate wa ale wa ŋaaŋviirɔma ayen ba jam dɛ Gaambasika Tigini ŋandiintaŋa la.> 15Wa le dak ŋmazuk dɔk kpioŋ kunyi a ta ŋanta meena ku po a magsi. Ni gomsi a magsi ti dula jigini.>>

16Ba yaa cheŋ ga jo tɛŋka po a nya dii meena ate Yeezu a poom weeni ba la, ate ba yaa gomsi ba Gaambasika Tigini ŋandiintaŋa.

17Junɔi ale jam paari la, Yeezu ale wa ŋaaŋviirɔma pi ale bayewa yaa jam kala a dɛ. 18Ba ale boro a dɛ la, Yeezu yaa weeni ba ayen, <<Wensie ate mi a weeni ni meena ale kala a dɛ ale mu la, ni po wanyi le wa ta mu a ga bobri sak m dachaasaŋa.>>

19Wa ŋaaŋviirɔma sui yaa kaasi ate ba bek wa wanyi wanyi ayen, <<Ka mi? Ka mi?>>

20Yeezu yaa weeni ba ayen, <<Ku le chim ka nama pi ale bayewa po wanyi, waai ale a ŋmari boroboroku a suiik jentaŋa ale mu la, ale wa ta mu a ga bobri sak. 21Mi Saalɔbiika ale kpi ase ka ba ale ŋmarisi dii Wen gbaŋka po la. Alege ku le pagra kama a te waai dek ale wa ta mu a ga bobri sak la. Ku zunchoŋ kama ale ba nin poom kan biak wa.>>

22Ba ale boro a dɛ ŋandiintaŋa la, Yeezu yaa pai boroborok a puusi a te Wen a nye wa jiam, alege ŋmari ku a chari wa ŋaaŋviirɔma ale weeni ba ayen, <<Ni ŋoa ŋɔbi, mi nyiŋka ale nna.>>

23Wa yaa ŋman pai beerik ale daam a puusi a te Wen jiam, alege pai te ba ate ba nyu. 24Wa yaa weeni ba ayen, <<Ka mi nɔiyeŋ paalika ziimu ale nna. Buui ale a nyini nuruba yega nyiŋla. 25Wensie ate mi a weeni ni, m kan ŋman nyu daamu de nin ka dai dii danni ate m ŋman a nyu da paalimu Wen naamu po la.>>

26Ba yaa yi yiili alege a nyini ga jueli Olivi Guuku zuk.

27Yeezu yaa weeni ba ayen, <<Ni meena ale chali abe ni ge mu dii nyiŋla ba ŋmarisi Wen gbaŋka po kama ayen, <Naawen le jam ko naapeerika, ate piisaŋa yaa chali waaŋ chaab.> (Zakaria 13:7) 28Alege m dan yiti kum po, m le dɛ ni niŋ a cheŋ Galili tɛŋka.>>

29Piita yaa weeni wa ayen, <<Mbala meena a dan poom basi fu, mi kan maa basi fu diipo diipo.>> 30Yeezu yaa weeni wa ayen, <<Basi ate m weeni a sak fu ayen, yokku de fi le pagsi mu ku nɔi buta ayen fi zɛ mu, alege ate vari kpadiaka a kum a nye buye.>>

31Piita yaa pii nyiŋ a ŋman weeni wa ayen, <<Mi kan weeni diipo diipo ayen m zɛ fu. Mi dan poom ayen m kpi ale fu, mi kan weeni dila.>> Wa ŋaaŋviirɔ mbala meena mɛ yaa weeni dila dekdega.#14:12-31 Nya fotowa, Matiu 26:20-29.

32Ba yaa jam paari Getsemani, ate Yeezu yaa weeni wa ŋaaŋviirɔma ayen, <<Ni kali dela ate m ga puusi a te Wen abe m jam.>> 33Wa ale a cheŋ la, wa yaa basi ate Piita ale Jeemsi ale Jɔɔn a va wa. Wa sui yaa jam kaasi nna yegayega, ate 34wa weeni ba ayen, <<M sui ale kaasi nna yegayega, ate ku a nye nna ase mi a yaali ayen m kpi kama la. Ni be limisi dela ate m jam, abe ni kpesi a nya.>>

35Wa ale ga cheŋ magadek la, wa yaa kpi duna tɛŋ a puusi a te Wen ayen dan ka dii wa yeeri ninam buui ate wa za wa nam la wa jigi a basi. 36Wa puusi a te Wen kama ayen, <<M Koa, fi baga a nye wari meena kama. Yeeri ninam beerika de m jigi a basi. Alege, nye fidek ale a yaali diila, daa mi ale a yaali diila.>>

37Wa yaa pilim jam a paari wa ŋaaŋviirɔma batawa ale ba dua a goa. Wa yaa weeni Piita ayen, <<Simon, ni a goa kama? Nama an baga nya ate ku a beni fiik fiik ale kan goa? 38Ni a kpesi abe ni a puusi a te ni kan jo nyenyaka po, chiika a yaali kama alege nyiŋka a wobsa.>>

39Wa yaa ŋman ga puusi a te Wen a weeni wa ale poom a weeni diila. 40Wa yaa ŋman jam wa ŋaaŋviirɔma jigi ale ba ŋman dua a goa, dii nyiŋla, goom ale jam ta ba nna yegayega, ate ba zɛ ba ale ba weeni wa diila.

41Wa ale ŋman jam ku nɔi butawa la, wa yaa weeni ayen, <<Ni diem a goa kama? Ku magsi ya. Di danni a paari ya. Ba le bobri Mi Saalɔbiika a nyo nuru baata nisima po. 42Ni yiti ate ti cheŋ. Nuru waai ale ta mu a ga bobri sak la ale la a cheena.>>

43Yeezu ale diem boro a biisi la, wa ŋaaŋviirɔma pi ale bayewa po wanyiwa Judas, yaa jam wa jigi ale nuru boari. Kaabteerɔ kpaŋŋa ale Sinsak sagrɔma ale tɛŋka kpaŋŋa ale tom ba. Ba jam ta ka gebi kpieŋsa ale dua a jam ayen ba yik wa.

44Bumbobrɔwa a poom weeni ba kama ayen, <<Ti dan ga paari ba, nuru waai ate mi a puusi ale a gbaari wa la, ka waai ate ni a yaali la ale la. Ni yik wa a ta cheŋ abe ni kan te wa bɛ.>> 45Ba ale ga paari Yeezu la, Judas yaa deri ga wa jigi a wi wa ayen, <<M Sagrɔ,>> a yaa alege a puusi ale gbaari wa. 46Judas ale nye dila la, nuruma yaa deri yik Yeezu ale pagrim. 47Yeezu ŋaaŋviirɔma po wanyi yaa deri yeeri wa gebi kpieŋ a che kaabteerɔ kpioŋku tomteerɔwa turi a lɔnsi tɛŋ.

48Yeezu yaa bek nuru boanni ayen, <<Mi ka zue ate ni ta gebi kpieŋsa ale dua a jam ayen ni yik mu? 49Daa meena mi kasim bo ale ni kama Wen Yenni po a sak nuruba, alege ni an yik mu. Alege ku a fɛ kama ayen ba ale ŋmarisi Wen gbaŋka po diila, a jam chim wensie.>> 50Dula jigini Yeezu ŋaaŋviirɔma meena yaa chali alege wa.

51Nidoa wanyi ale jam maa va Yeezu a yulum gatta peelik. Ba jam a yaali ayen ba yik wa kama, 52ate wa foli gattiaka a basi te ba alege chali ale chaboala.

53Ba yaa ta Yeezu a cheŋ kaabteerɔ kpioŋku yenni. Kaabteerɔ kpaŋŋa ale tɛŋka kpaŋŋa ale Sinsak sagrɔma yaa jam tigsi chaab. 54Piita yaa mag va ba ŋaaŋ a ga jo kaabteerɔ kpioŋku yenni dabiaka po a ga kala ale limisidɔma a ŋuuŋ bolim.

55Kaabteerɔ kpaŋŋa ale nisɔmma meena yaa jam bek nuruba ayen ba wom Yeezu wakaasuŋ ba jigi ate ba nya suik a ko wa. Alege ba an baga a nya wari ya. 56Nuruba yegayega a jam velim wie a te wa kama alege ba noaŋa jam daa bunyi.

57Ba gela a nyini biisi venta wie ayen, 58<<Tama wom ale wa a weeni ayen wa baga a kaasi Wen Yenni dii ate nuruba a sɛ la kama, abe wa ŋman sɛ di daa ŋata po. Wa be kan pai nuruba ate ba sɛ di.>> 59Alege ba mɛ wieŋa a jam daa nɔiyeŋ wie.

60Kaabteerɔ kpioŋku yaa yiti zaani ba meena niŋ a bek Yeezu ayen, <<Fi ka wari a tulisi wieŋa de meena ate ba a biisi la po?>> 61Yeezu yaa sina. Wa ŋman bek wa ayen, <<Ka fi ale Kirisitawa Niauŋ Nyɔnɔwa Nidoabinni?>>

62Yeezu yaa weeni wa ayen, <<Mm, mi ale la. Dai yeŋ ni le nya Mi Saalɔbiika ale m kali Wen Kpienni juga geŋ a nyini chiŋmaaŋa po a cheena.>>#14:62 Yiila 110:1

63Kaabteerɔ kpioŋku yaa yik wadek garukku a dari cheeri ale weeni ayen, <<Ti an ŋmaa yaali seerɔba. 64Ni meena a wom wa ale pai wadek a magsi chaab ale Wen la kama. Nama a poli ka sɛ? Wa lɔ yaa wa an lɔ ya?>> Ba meena a yaa bo mini wa ayen ku a magsi kama ayen wa kpi. 65Nuruma gela yaa chesi tintueta a basi wa nyiŋ ale pai garuk a bobi lik wa ninaŋa a nak wa ale a bek ayen, <<Fi seba waai dek ale nak fu la?>> Nuru baai mɛ ale ga yik Yeezu la yaa fɔbi wa a gum du.

66Piita ale diem jam bo yenni dabiaka po la, kaabteerɔ kpioŋku dɔkliema wanyi a yaa nya wa. 67Wa ale nya Piita ale wa kala a ŋuuŋ bolimu la, wa yaa nya wa ziin a weeni wa ayen, <<Fi mɛ ka Yeezu Nazaret denɔwa ŋaaŋviirɔma po wanyi.>>

68Piita yaa pagsi ayen, <<Mi zɛ fi ale a weeni diila.>> Wa yaa yiti a cheŋ ga za pɔsuku nɔi.

69Nipokbinni ale ŋman nya wa ale wa za dula jigini la wa yaa weeni baai ale za dula la ayen, <<Nuruwa de ka Yeezu ŋaaŋviirɔma po wanyi.>> 70Piita yaa ŋman pagsi ayen wa daa Yeezu ŋaaŋviirɔma po wanyi. Ku ŋaaŋnyiŋ, nuru baai ale jam za moata wa la yaa weeni wa ayen, <<Fi ka ba po wanyi, dii nyiŋla fi mɛ nyini ka Galili tɛŋka.>>

71Piita yaa pɛ ayen wa zɛ nuru waai ate ba a weeni wa wie la.

72Vari kpadiaka yaa deri kum a nye buye ate Piita teeri dii ate Yeezu a poom weeni wa ayen, wa le pagsi ku nɔi buta ayen wa zɛ wa alege ate vari kpadiaka a kum a nye buye la. Piita sui yaa kaasi ate wa kum.

Currently Selected:

Maak 14: BWU

Highlight

Copy