Maak 15

1Vari ale veenti la, saluik yokyokwa kaabteerɔ kpaŋŋa ale tɛŋka nisɔmma ale Sinsak sagrɔma ale nisɔmma meena yaa ŋman kpabi tu chaab a zɔk ba le ba nye Yeezu diila. Ba yaa bobi wa nisimaŋa a ta wa cheŋ tɛŋka Gominawa Paalɔt jigi.

2Ba ale ga paari la, Paalɔt yaa bek Yeezu ayen, <<Ka fi ale Juuma naawa la?>> Yeezu yaa tulisi wa ayen, <<Ka fidek ale weeni dila.>>

3Kaabteerɔ kpaŋŋa jam chiini ka wie nna yegayega ayen Yeezu a nye kaasi. 4Dila nyiŋ Paalɔt yaa ŋman bek wa ayen, <<Fi kan wom ba ale a chiini wieŋa nna yegayega a te fu la? Fi ka wari a tulisi ba?>> 5Alege Yeezu a jam sina. Wa an jam weeni wari ya. Ku yaa cha Paalɔt.

6Bena meena ba Gaambasika Tigini a nyiem dan paari, Gominawa Paalɔt a nyiem lak nuru waai ate tɛŋka demma a yaali ayen wa lak ate wa nyini likka dɔkku po a nyini la a basi kama. 7Nuru wanyi ale jam boro ate ba a wi ayen Barabasi ate ba jam maa yik wa a lik dii nyiŋla, wa jam maa nye ka nɔiyeŋ ale wa tɛŋka demma ate ba nye kpaliŋ ale baai ale a nya ba tɛŋka zuk la. Ba ale jam boro a nye kpaliŋka la, ba jam ko ka nuruba gela. 8Nuruba yegayega yaa tigsi chaab a jam Paalɔt jigi a saalim wa ayen wa nye dii ate wa nyiem poom a nye tigini danni la a te ba.

9Wa yaa bek ba ayen, <<Nama a yaali ayen m basi ka Juuma naawa?>> 10Paalɔt a jam seba ayen ka kaabteerɔ kpaŋŋa nyunni nyiŋ ale soa ate ba yik Yeezu a ta jam wa jigi. 11Kaabteerɔ kpaŋŋa yaa weeni nuru boanni ayen ba a saalim ayen wa lak Barabasi.

12Paalɔt yaa bek ba ayen, <<Nuru waai ate nama wi ayen Juuma naab la, m nye wa se?>> 13Ba meena yaa kaari nna yegayega ayen, <<Ko wa.>>

14Paalɔt yaa bek ba ayen, <<Ka boan jaab wabiok ate wa tom?>> Ba yaa kaari a gaam dila a weeni ayen, <<Ko wa.>>

15Paalɔt a jam a yaali kama ayen wa nye ate nuru boanni suipeentik. Wa yaa lak Barabasi a basi, alege basi ate ba miiri Yeezu ale kpaasa alege pai wa a te, ayen ba ta wa ga ko.

16Paalɔt tugurik tɔŋdɔma yaa yik Yeezu a ta jo ba Gominawa yenni dabiaka po a wi ba tugurik tɔŋdɔ chaama ate ba jam. 17Ba yaa pai garuk mɔnuŋ a jo wa ale pai munsa a yɔk zutɔk a vuk wa zukku, 18a yaa puusi wa a weeni ayen, <<Juuma naawa kasim boro taam wuu.>> 19Ba yaa pai diok, a nak wa zukku ale chesi tintueta a basi wa nyiŋ ale kpi duna wa niŋ a potim a nye nna ase ba a te wa ka zula la. 20Ba ale nye wa la a ga nueri la, ba yaa yeeri garuk mɔnuŋku ale pai wadek gattaŋa a jo wa a ta wa nyini cheŋ ayen ba ko.

21Ba ale jam bo suiku po a cheŋ la, ba yaa zik Simon ale wa cheena tɛŋka po ate tugurik tɔŋdɔma a fɛ wa ate wa tuesi Yeezu jabarimu ji. Simon jam ka Sairini tɛŋka denɔ. Wa jam ka Alezanda ale Arufusi ko. 22Ba yaa ta Yeezu a ga paari juijui ate ba a wi ayen Golgota la. Ku kiri ale <<Zukoluku Jigini.>> 23Ba yaa pai tiim a nyo daam po ayen Yeezu nyu, alege wa an jam nyuya. 24Ate ba yaa kpi wa jabarimu zuk ale labi wa gattaŋa a chari chaab. Ba jam a nak ka gbaŋ ayen ba baga a miŋ dii ale magsi ayen waai meena a pai la.

25Ku jam ka baŋ neok saluik ate ba jam ko wa. 26Ba yaa pai tapagi a ŋmarisi di nyiŋ ayen, <<Ka Juuma Naawa Ale Nna,>> a pai di kpi jabarimu nyiŋ. 27Ba jam maa kpi ka zueba baye ŋanbarinta nyiŋ a gum Yeezu po, ate ba wanyi a bo wa juga, nwala mɛ a bo wa gala. 28Ate ba le jam ŋmarisi dii Wen gbaŋka po ayen, <<Ba nye wa ase ka zue la yaa jam chim wensie.>> 29Nuru baai ale jam va dula a taam la yaa zak zuk nya wa a mati ba noa ale a lɛ wa ayen, <<Mm, daa fi ale weeni ayen fi le kaasi Wen Yenni abe fi ŋman sɛ di a nueri daa ŋata po la? 30Nyini jabarimu zuk a siŋ a vari fidek a basi ate ti nya.>>

31Kaabteerɔ kpaŋŋa ale Sinsak sagrɔma mɛ a jam a la wa ale a weeni chaab ayen, <<Wa jam baga a vari nuruba a basi kama, alege wa an baga a vari wadek a basi. 32Basi ate Kirisitawa de, Izirali Naawa de, a nyini jabarimu zuk a siŋ yɔgyɔgla de, ate tama nya a siak te wa.>> Zuema bayewa baai ate ba jam kpi ba a gum Yeezu po la, mɛ a lɛ wa.

33Ku ale jam paari kantueŋ baŋ pi ale buye la, tɛŋka meena yaa jam nye legi nna kpitɔ a ta ga paari kantueŋ baŋ buta. 34Baŋ butawa po, Yeezu yaa kaari ate ku jueli a weeni ale wadek tɛŋka biika ayen, <<Eloi, Eloi, Lama Sabagtani.>>#15:34 Aramaik biika Ku kiri ale, <<Mi Wen yaa, mi Wen yaa, ka boa ate fi zɛri mu?>> (Yiila 22:1)

35Nuru baai ale jam za dula jigini la gela a wom dii ate wa weeni la kama. Ba yaa weeni ayen, <<Wa a wi ka Elaja.>>

36Ba po wanyi yaa chali cheŋ ga pai sosok a lusi damiisiŋ po a pai yik diok woŋ nyiŋ a zak ta jueli Yeezu nɔi. Wa ale diem zak diokku ta la wa yaa cheem weeni baai ale jam za la ayen, <<Ni basi ate ti limisi a nya ase Elaja ale jam yik wa ta nyini jabarimu zuk a siŋ tɛŋ ya.>>

37Yeezu yaa ŋman kaari nna yegayega ale ge a kpi.

38Wa ale jam kpi la, garuk panni dii ate ba jam pai a kasi Wen yenni po la, yaa jam cheeri di ŋmazuk a ta siŋ paari di tɛŋ. 39Tugurik tɔŋdɔma kpagi dii ale jam za Yeezu jabarimu tɛŋ la a jam nya wa ale kpi diila kama. Wa yaa weeni wadek ayen, <<Wensie, nuruwa de sum ka Wen Nidoabili.>>

40Nipooba gela ale jam za niŋ a nya. Ba po jam ka Mɛɛri Magdalene ale Mɛɛri, Jeemsi baaŋka ale Josesi mawa ale Salomi. 41Galili po nipooma de jam va Yeezu kama ale maari wa. Nipooba yega ale jam va wa jam Jerusalem la jam maa boro kama.#15:21-41 Nya fotowa, Matiu 27:38-56.

42Ku jam ka Gomsika Dai, dai dii ale pai a te Vuusum Danni la ale la. Junɔi a jam moata kama. 43Arimatia denɔwa Josefi jam ka Juuma nisɔmma po wanyi. Wa jam a limisi ka Wen naamu, yaa cheŋ Paalɔt jigi ale suinum pagrik a bek ayen wa a pai Yeezu nyiŋka. 44Paalɔt ale ga wom ayen Yeezu a poom kpi kama la, ku deri cha wa. Wa yaa wi wa tugurik tɔŋdɔma kpagni a bek wa ayen wa wom ase Yeezu a sum kpi kama ya. 45Dula jigini Paalɔt a yaa siak ayen Josefi ga yeeri Yeezu nyiŋka jabarimu zuk a ta ga gu. 46Josefi yaa da garuk a yeeri Yeezu nyiŋka jabarimu zuk a yaa pai garukku a vili wa a ta ga dueni piuŋ vɔrup ate ba keri la po. Wa yaa bilim tintain a lik vɔrumu nɔnni. 47Mɛɛri Magdalene ale Josesi mawa Mɛɛri, a jam nya ba ale gu Yeezu juijui la kama.

Currently Selected:

Maak 15: BWU

Highlight

Copy