Jn 15

Yeso yɨ əzed ə vaìn rəsìʼ

1Yeso nyaʼa ghà əmbɨ mbi mə̀mə̀ə̀nɨ̀-ɨnû ni, “Mɔ̌ yɨ əzed ə vaìn rəsìʼ. Mɨ Mbǎʼ yɨə wə̀d we nɨə nəŋgɨə mbeŋ vaìn. 2Məd wɨə sopə rɨtəb jìm te nɨ yeʼ ənɨ ə num, nɨ yeʼ te nɨ chəi tɨə kɔ rɨtam. Məd wɨə bə̀ kwə̀ŋgɨ̀ rɨtəb jìm te nɨə kɔ rɨtam ɨmbə̀ʼ tɨ kɔ nɔʼrɨ. 3Ɨŋgam we nɨ mə fə gha ɨ nən fə ghɨ̀ mbə zeŋ. 4Mbə̀ chub ənɨ ənû ə mɔʼ mbɨ num, ɨchî nɨ mə bə̀ chub ənɨ ənû ə mɔʼ mbɨ nən. Ɨchî nɨ chəi ənɨ tɨ fɨtəb kɔ rɨtam ənɨ i ɨghəm kɨrɨ ənɨ fɨ yeʼ ənɨ əzed ə vaìn, əne bə̂ chəi ənɨ tɨ mbə̀ kɔ rɨtam kɨrɨ ənɨ mbə̀ yeʼ ənɨ ənû ə mɔʼ mbɨ num.

5“Mɔ̌ yɨ əzed ə vaìn. Mbə yɨ rɨtəb vaìn. Wə̀d we nɨ chub ənɨ ənû ə mɔʼ mbɨ num, mə bɨrɨ bɨ chub ənɨ ənû ə mɔʼ mbɨ məd, əne məd bɨrɨ kɔ rɨtam nɔnɔʼ. Chəi ənɨ tɨ̀ mbə ghɨ̀ ənû ə mɔʼɔ ənɨ ə ɨghəm nɨ chəi əmɨ əŋgu. 6Wə̀d mɔʼɔ we nɨ chəi wɨ̀ chub ənɨ ənû ə mɔʼ mbɨ num, mbɨ sob əməd waʼ ɨchî nɨ mbɨə waʼ fɨtəb zobɨ. Bə̂d bɨrɨ fetɨ rɨtəb zobɨ te màʼ ɨŋga ɨwid tɔ̀n. 7Mbə mɨ chub ənɨ ənû ə mɔʼ mbɨ num, mɨ ɨŋgam bə̀ chub ɨŋga nən, mbə bɨrɨ biirɨ ənû ə mɔʼɔ ze nɨ mbə̀ kəbɨ, əne mɨ Mbǎʼ bɨrɨ ghɨ ənû ze ɨ nən. 8Ənû ze nɨ bɨrɨ nàʼ ɨwumnɨ əmbɨ mɨ Mbǎʼ yɨ ni mbə̀ kɔ rɨtam nɔnɔʼ. Əze ə bɨrɨ chwi ni mbə̀ yɨ mbɨ mə̀mə̀ə̀nɨ̀-ɨnû. 9Mə ghaʼ əwən ɨchî nɨ mɨ Mbǎʼ ghaʼ əmɨ, əne mbə̀ chub ənɨ ənû ə mɔʼ mbɨ num ɨmbə̀ʼ mə ghaʼ əwən. 10Mbə mɨ nùŋ tum rɨkə, mə bɨrɨ ghaʼ əwən, ɨchî nɨ mə̀ fə bə nùŋ tɨkə tɨ mɨ Mbǎʼ, əne məd ə bə̀ ghaʼ əmɨ. 11Mə fə gha ɨnû mbɔ̂ ɨ nən ɨmbə̀ʼ ɨghaʼi we nɨ yeʼ ɨŋga mɨ fîŋ bə̀ yeʼ ɨŋga tən fɔrɨ ni ɨghaʼi swi ɨŋga tə fîŋ.

12“Mɨ ɨkə we nɨ mə̀ naʼ ɨ nən yɨ ni, mbə ghaʼ mbə bɔŋgɔb ɨchî nɨ mə bə̀ ghaʼ əwən. 13Chəi ɨghaʼi mɔʼɔ əŋgu nɨ tɨ̀ wɨ chè wɔ̂ ni: wə̀d nyaʼa kwɨ ɨgwɨ ətu mbi mɨ̀sə̀ʼ. 14Mbə yɨ mbɨ mɨ̀sə̀ʼ ənɨ mbə̀ ghɨ ənû ze nɨ mə gha ɨ nən. 15Chəi mɨə wɨrɨə tɔŋ əwən ənɨ bə̂d ə̀fàʼì, ɨmbə̀ʼ ɨghəm nɨ chəi wə̀d ə̀fàʼì kyerɨ əghɨ ze nɨ mbǎʼ ə̀fàʼì məd ə ghɨ̀ə̀. Àyɨə mə wɨə tɔŋ əwən ənɨ mɨ̀sə̀ʼ, ɨmbə̀ʼ ɨghəm nɨ ɨnû jìm mbe nɨ mə zu rɨ əmbɨ mɨ Mbǎʼ, mə fə ghà ɨ nən. 16Kaʼi mbə̀nə nyaʼa chɔʼ əmɨ. À yɨə mɔ̌ nyaʼa chɔʼ əwən tom ni mbə̀ wo kɔ rɨtam, nɨ yeʼ rɨtam te nɨ bɨrɨ ten i koŋ. Mbə mɨ ghɨ̀ əne, Mbǎʼ bɨrɨ naʼ əghɨ ə mɔʼɔ ze nɨ mbə̀ biirɨ ɨ bɔ ənɨ mɨ ɨkum. 17Ɨkə we nɨ mə naʼ ɨ nən yɨ ni: mbə̀ ghaʼ mbə bɔŋgɔb.”

Ɨsɨg ə bàn mə̀mə̀ə̀nɨ̀-ɨnû Yeso

18Yeso nyaʼa wo ɨmbì ghà əmbɨ mbi mə̀mə̀ə̀nɨ̀-ɨnû ni, “Ɨsɨg mɨ bàn əwən, əne mbə̀ kyerɨ ni wɨ̀ nyaʼa fə bè bàn əmɨ bɔŋ wɨ̀ sɨə bàn əwən. 19À kɨ nɨ mbə̀ nyaʼə bə̂d rɨŋga ɨsɨg, njɨ ɨsɨg nyaʼa ghaʼ əwən ɨchî nɨ wɨ̀ ghaʼ mbi bə̂d. Àyɨə mə nyaʼa chɔʼ əwən rɨŋga ɨsɨg ɨmbə̀ʼ ɨghəm nɨ ka mbə̀ yɨ ə bə̂d rɨŋga ɨsɨg. Əzɔ̂ yɨ əton nɨ ɨsɨg ə bàn əwən. 20Mbə̀ kɔndɨ ɨŋgam we nɨ mə̀ nyaʼa gha ɨ nən ni, 'Chəi wə̀d ə̀fàʼì dabə chè i mbǎʼ ə̀fàʼì.' À mɨ yeʼ nɨ mbɨ nyaʼa nwendɨ tum rɨkyerɨ-ɨwu, njɨ mbɨ bɨrɨ bɨ nwendɨ tən. À mɨ yeʼ nɨ mbɨ nyaʼa zu mɨ ɨŋgam, njɨ mbɨ bɨrɨ bɨ zu wən. 21Bə̂d rɨŋga ɨsɨg bɨrɨ ghɨ ɨnû mbɔ̂ jìm ənɨ ə nən ɨmbə̀ʼ ɨghəm nɨ mbə̀ yeʼ mbɨ bə̂d, ɨmbə̀ʼ ɨghəm nɨ chəi mbɨ kyerɨ məd we nɨ nyaʼa tom əmɨ. 22À mɨ yeʼ nɨ chəi mə̀ nyaʼa yeʼe ɨŋga ɨsɨg pè gham əmbɨ mɨ̀mə̌d, njɨ chəi mbɨ nyaʼa ghɨ ɨnû rɨbɔ̀ŋ. Àyɨə tɨ̀nîn, chəi mbɨ berɨ ənû nɨ ghà ɨmbə̀ʼ ɨchî nɨ ɨ mbɨə kɨrɨ ghɨ ɨnû rɨbɔ̀ŋ. 23Wə̀d we nɨ ban əmɨ ə bə̀ bàn mɨ Mbǎʼ. 24À kɨ nɨ chəi mə̀ nyaʼa ghɨ ɨnû əkaʼ mɨ̀mə̌d nɨ chəi wə̀d cherə kweʼ ghɨ̀, njɨ chəi mbɨ nyaʼa ghɨ ɨnû rɨbɔ̀ŋ. Àyɨə tɨ̀nîn mbɨ fə zə ɨnû mbe nɨ mə nyaʼa ghɨ̌, əne ɨ mbɨə bàn əmɨ bə̀ bànə̀ mɨ Mbǎʼ. 25Ənû zɔ̂ ə ghɨ̀ ɨmbə̀ʼ ɨŋgam we nɨ mbɨ nyaʼa ŋwaʼnɨ ɨŋga tɨkə tɨ mɨ̀mə̌d jwɨ ənɨ rəsìʼ ni, 'Mbɨ nyaʼa bàn əmɨ ətu ə̀kǒ.'

26“Ənɨ Ə̀wèèrɨ̀-bə̂d we nɨ mə bɨrɨ tom ɨ nən tɨ əmbɨ ə Mbǎʼ yeʼe, wɨ̀ bɨrɨ gha ɨnû ɨmbə̀ʼ əmɨ. Məd yɨ Əzwî ze nɨ Mbǎʼ chǎ. Məd bɨrɨ du rəsìʼ əsaŋ. 27Mbə̀n bə̂ bɨrɨ bɨ gha ɨnû ɨmbə̀ʼ əmɨ, ɨmbə̀ʼ ɨghəm nɨ mbə̀ mbɨə nyaʼa mbɨ num tɨ ənɨ mə̀ nyaʼa kɔ chwi ɨnû.

Currently Selected:

Jn 15: mgo

Highlight

Copy