Jn 16

1“Mə fə ghà ɨnû mbɔ̂ ɨ nən ɨmbə̀ʼ tɨ ə ɨbenɨ bɔd i. 2Bə̂d bɨrɨ fid əwən rɨŋga nəb tɨ ə̀kàtɨ̀. À yɨ rəsìʼ ni nyùmə̀ wɨə yeʼe nɨ wə̀d mɔʼɔ we nɨ zwiirɨ əwən bɨrɨ kɔndɨ ni tə wɨə ghɨ̀ə̀ yeʼ ənû ze nɨ Ŋwìə̀ gha ɨ bɔ. 3Mbɨ bɨrɨ ghɨ ɨnû mbɔ̂ ənɨ ə nən ɨmbə̀ʼ ɨghəm nɨ chəi mbɨ kyerɨ ə Mbǎʼ kɨ bè kyerɨ əmɨ. 4Àyɨə mə fə ghà ɨnû mbɔ̂ ɨ nən ɨmbə̀ʼ nyùmə̀ we mɨ kùʼ, mbə bɨrɨ fə kyerɨ ni mə nyaʼa fə patɨ əwən.”

Ənû ze nɨ Əzwî ə Zeŋɨ ə bɨrɨ ghɨ̀

Yeso nyaʼa wo ɨmbì gha ni, “Chəi mə̀ nyaʼa gha ɨnû mbɔ̂ ɨ nən ənɨ mə̀ nyaʼa kɔ chwi ɨnû ɨmbə̀ʼ ɨghəm nɨ mə wɨə nyaʼa kɨrɨ mbɨ nən. 5Tɨ̀nîn mə wɨə wò əsɨ wə̀d we nɨ nyaʼa tom əmɨ, àyɨə chəi wə̀d mɔʼɔ rəbɔʼ nən biirɨ ɨ num ni, 'À kɨə wò ə yi ə?' 6Àyɨə ɨchî nɨ mə̀ fə gha ɨnû mbɔ̂ ɨ nən, ə̀kə̀nɨ̀ ə fə swi ɨŋga tə fîŋ. 7Mə ghà rəsìʼ ɨ nən ni zɨə kàŋ bɔ̀ŋ ni mə̀ wo ə, ɨmbə̀ʼ ɨghəm nɨ mə mɨ rɨka wo əmɨ, njɨ chəi Ə̀wèèrɨ̀-bə̂d we bɨrɨ yeʼe ɨ nən. Mə mɨ wò, mə bɨrɨ cha əməd ɨ nən. 8Ənɨ wɨ̀ yeʼe, wɨ̀ bɨrɨ ghɨ ni bə̂d mbe rɨŋga ɨsɨg kyerɨ ni tɨkɔndɨ tɨ mɨ̀mə̌d ɨmbə̀ʼ ɨnû rɨbɔ̀ŋ, ɨmbə̀ʼ ənû nɨ ghɨ ɨnû nɨ kuʼnɨ fɔrɨ ɨmbə̀ʼ ɨchî nɨ Ŋwìə̀ bɨrɨ saʼ ɨsɨg rɨka kuʼi. 9Tɨkɔndɨ tɨ mɨ̀mə̌d rɨka kuʼi ɨmbə̀ʼ ɨnû rɨbɔ̀ŋ, ɨmbə̀ʼ ɨghəm nɨ chəi mbɨ nuŋ fîŋ ɨgwɨ num. 10Tɨkɔndɨ tɨ mɨ̀mə̌d rɨka kuʼi ɨmbə̀ʼ ənû nɨ ghɨ ɨnû nɨ kuʼnɨ, ɨmbə̀ʼ ɨghəm nɨ mə wɨə wò əsɨ mɨ Mbǎʼ, əne chəi mbə̀ bɨrɨ wɨrɨ nɔ zə əmɨ. 11Tɨkɔndɨ tɨ mɨ̀mə̌d rɨka kuʼi ɨmbə̀ʼ ɨchî nɨ Ŋwìə̀ bɨrɨ saʼ ɨsɨg, ɨmbə̀ʼ ɨghəm nɨ Ŋwìə̀ fə saʼ wə̀d we nɨə tùmbɨ̀ ɨsɨg wɔ̂.

12“Mə kɨrɨ berɨ ɨnû nɔnɔʼ nɨ gha ɨ nən, àyɨə ɨnû mbe ə nɔʼ chè ɨchî nɨ tɨ̀ mbə zu rɨ̀nîn yim ɨjìm. 13Ənɨ Əzwî ze nɨə ghɨ̀ ni bə̂d kyerɨ rəsìʼ ə yeʼe, wɨ̀ bɨrɨ chwi rəsìʼ jìm ɨ nən. Ka wɨ̀ bɨrɨ gham i ənɨ i ɨghəm. Wɨ̀ bɨrɨ ghà yeʼ ənû ze nɨ wɨ̀ zǔ. Wɨ̀ bɨrɨ zeŋnɨ mbə ɨtu ɨmbə̀ʼ ɨnû mbe nɨ yeʼ ɨmbì. 14Wɨ̀ bɨrɨ wumnɨ əmɨ ɨmbə̀ʼ ɨghəm nɨ wɨ̀ bɨrɨ nɨŋ ɨnû mbe nɨ mə̀ gha ɨ bɔ ghà ɨ nən. 15Ɨghɨjìm mbe nɨ mɨ Mbǎʼ berɨ yɨ mbum. À yɨ əton nɨ mə̀ gha ni Əzwî ə bɨrɨ nɨŋ ɨnû mbe nɨ mə̀ gha ɨ bɔ ghà ɨ nən.”

Ə̀kə̀nɨ̀ ə bɨrɨ beŋ ənɨ ɨghaʼi

16Yeso nyaʼa wo ɨmbì gha əmbɨ mɨ̀mə̌d ni, “Chəi mbə̀ bɨrɨ wɨrɨ zə əmɨ ənɨ ɨkə nyùmə̀. À sɨ ənɨ ɨkə nyùmə̀ cherə, mbə bɨrɨ wɨrɨ zə əmɨ.”

17Mə̀mə̀ə̀nɨ̀-ɨnû ɨməd mɔʼɔ nyaʼa biirɨ mbənə mbənə ni, “Əton kɨ ni ye ənɨ ɨŋgam wɔ̂ nɨ wɨ̀ gha ɨ na ni, 'Chəi mbə̀ bɨrɨ wɨrɨ zə əmɨ ənɨ ɨkə nyùmə̀. À sɨ ənɨ ɨkə nyùmə̀ cherə, mbə bɨrɨ wɨrɨ zə əmɨ,' mbɨ ni, 'À yɨ ɨmbə̀ʼ ɨghəm nɨ mɨə wò əsɨ Mbǎʼ' ə?” 18Mbɨ nyaʼa bə̀ biirɨ ni, “Əton ənɨ 'ɨkə nyùmə̀' kɨ ni ye ə? Chəi mba ɨtu kɨrɨ zeŋ ɨmbə̀ʼ ənû zɔ̂ nɨ wɨə ghàə̀.”

19Yeso nyaʼa kyerɨ ni mbɨ nyaʼa kəb biirɨ ɨŋgam we ɨ ni. Əne wɨ̀ nyaʼa ghà əmbɨ mɨ̀mə̌d ni, “Mə kə̀ʼ ghà ni, 'Chəi mbə̀ bɨrɨ wɨrɨ zə əmɨ ənɨ ɨkə nyùmə̀. À sɨ ənɨ ɨkə nyùmə̀ cherə, mbə bɨrɨ wɨrɨ zə əmɨ.' Ɨmbə̀ʼ wɔ̂ yɨ ɨŋgam we nɨ mbə̀ə biirɨə mbənə mbənə ə? 20Mə ghà rəsìʼ ɨ nən ni mbə bɨrɨ chweŋ mɨsɨ, bə̀ dì, àyɨə ɨsɨg bɨrɨ ghaʼ i. Mbə bɨrɨ kə̀nə̀, àyɨə ə̀kə̀nɨ̀ ze ə bɨrɨ bèŋ sɨ ɨghaʼi. 21Ənɨ əyi ə nombɨə, ɨ wɨə kə̀n ɨmbə̀ʼ ɨchî nɨ wɨə zuə rɨbuʼ. Àyɨə ənɨ wɨ̀ fə gywɨ, wɨ̀ bɨrɨ neb rɨbuʼ te. Wɨ̀ bɨrɨ ghaʼ ɨmbə̀ʼ ɨchî nɨ wɨ̀ fə gywɨ. 22Mbə mbɨə kə̀nə̀ tɨ̀nîn, àyɨə mə bɨrɨ wɨrɨ zə əwən. Ənɨ mə̀ wɨrɨ zə əwən, ɨghaʼi bɨrɨ swi ɨŋga tə fîŋ. Chəi wə̀d mɔʼɔ əŋgu nɨ bɨrɨ nɔ̀ chɨ̀ ɨghaʼi we rɨŋga tə fîŋ. 23À sɨ əni ze, chəi mbə̀ bɨrɨ wɨrɨ biirɨ ənû ə mɔʼɔ ɨ num. Mə̀ ghà rəsìʼ ɨ nən ni mbə mɨ biirɨ ənû ə mɔʼɔ tɨ əmbɨ mɨ Mbǎʼ ənɨ mɨ ɨkum, wɨ̀ bɨrɨ ghɨ ənû ze ɨ nən. 24Ɨ pè rɨ̀nîn, chəi mbə̀ kɨrɨ biirɨ ənû ə mɔʼɔ tɨ əmbɨ mɨ Mbǎʼ ənɨ mɨ ɨkum. Mbə̀ biirɨ, wɨ̀ bɨrɨ naʼ ɨ nən, ɨmbə̀ʼ ɨghaʼi swi ɨŋga tə fîŋ.”

Kristo fə baŋ ɨsɨg

25Yeso nyaʼa wo ɨmbì gha əmbɨ mɨ̀mə̌d ni, “Mə fə ghà ɨnû mbɔ̂ ɨ nən ənɨ ɨŋgam maʼi. Mbə̀ kyerɨ ni nyùmə̀ wɨə yeʼe nɨ chəi mə̀ bɨrɨ wɨrɨ ghàm ɨ nən ənɨ ɨŋgam maʼi. Mə bɨrɨ gham ɨ nən əsaŋ əsaŋ ɨmbə̀ʼ ə Mbǎʼ. 26À sɨ əni ze, mbə bɨrɨ biirɨ ɨnû rɨ əmbɨ mɨ Mbǎʼ ənɨ mɨ ɨkum. Chəi mə̀ berɨ əton nɨ biirɨ ənû ə mɔʼɔ ɨ bɔ ənɨ wən rɨ ɨghəm, 27ɨmbə̀ʼ ɨghəm nɨ Mbǎʼ ziə ə ghaʼ əwən. Wɨ̀ ghaʼ əwən ɨmbə̀ʼ ɨghəm nɨ mbə̀ ghaʼ əmɨ bə̀ ben ni à yɨə məd nyaʼa tom əmɨ. 28Mə nyaʼa nɔ̀ʼ rɨ əsɨ Mbǎʼ bɔŋ yeʼe ɨŋga ɨsɨg. Tɨ̀nîn mə wɨə sàŋ ɨsɨg wɨrɨə wò əsɨ Mbǎʼ.”

29Mə̀mə̀ə̀nɨ̀-ɨnû ɨməd nyaʼa ghà ɨ bɔ ni, “Tɨ̀nîn à wɨə sɨə ghàm əsaŋ əsaŋ, kaʼi ənɨ ɨŋgam maʼi! 30Tɨ̀ fə kyerɨ tɨ̀nîn ni à kyerɨ ɨnû jìm, əne chəi əton nɨ tɨ̀ wə̀d mɔʼɔ wɨrɨ biirɨ ənû ɨ ne. Əzɔ̂ ə fə ghɨ̀ tɨ̀ ben ni à yɨə Ŋwìə̀ nyaʼa tom əwe.”

31Yeso nyaʼa wììrɨ̀ əmbɨ mɨ̀mə̌d ni, “Mbə fə benɨ tɨ̀nîn ə? 32Nyùmə̀ wɨə yeʼe, təsìʼ yɨ ni nyùmə̀ we fə yeʼe i nɨ mbə̀ bɨrɨ jàŋə̀. Wə̀d mɔʼ mɔʼ bɨrɨ wo əkwɨ ni, əne mbə̀n mɨjìm bɨrɨ saŋ əmɨ rə̀zìʼ. Àyɨə chəi əmɨ rə̀zìʼ, ɨmbə̀ʼ ɨghəm nɨ Mbǎʼ wɨ i mbɨ num. 33Mə fə ghà ɨnû mbɔ̂ ɨ nən ɨmbə̀ʼ mbə̀ chub ənɨ əbɔrəbɔd ɨchî nɨ mbə̀ yeʼ ənɨ ənû ə mɔʼ mbɨ num. Mbə bɨrɨ zə ŋgəʼ ɨŋga ɨsɨg wɔ̂, àyɨə mbə̀ yim fîŋ, mə fə baŋ ɨsɨg!”

Currently Selected:

Jn 16: mgo

Highlight

Copy