Lk 15

Ənû ə mɨgɨ ɨmbə̀ʼ njɨ̀g nɨ nyaʼa nimɨ

(Mt 18.12-14)

1À nyaʼa əni ə mɔʼɔ, məfetɨ mɨ̀tagsɨ̀ nɔnɔʼ mbɨ ə bə̂d nɨə ghɨ̀ ɨnû rɨbɔ̀ŋ nyaʼa wò fetɨ ɨban ə Yeso ɨmbə̀ʼ zwetɨ ənû ze nɨ wɨ̀ nyaʼə ghàə̀. 2Mɨ̀Farisiî mbɨ məchwiə̀ rɨ̀kə̌ nyaʼa zə əne kɔ zuʼnɨ ghàə̀ ni, “Wə̀d wɔ̂ wɨə nɨŋə bə̂d mbe nɨə ghɨ̀ ɨnû rɨbɔ̀ŋ bə̀ jɨgə mbɨ mɨ̀mə̌d.”

3Ənɨ Yeso nyaʼa zu əne, wɨ̀ nyaʼa ghà ənû ə mɨgɨ zɔ̂ əmbɨ mɨ̀mə̌d ni: 4“Wə̀d mɔʼɔ rəbɔʼ nən mɨ berɨ njɨ̀g ɨkɨ fibɨ̀, zɨ fibɨ̀ nim, ka wɨ̀ wa bɨrɨ saŋ i tə̂ ɨwum ə̀bùə chɔ̀b ə̀bùə ɨŋga ɨbad rɨkwàʼi wò kə̀b zɨ fibɨ̀ ze nɨ nimɨ, pè ənɨ wɨ̀ zə ə? 5Wɨ̀ nɨə zə̌, wɨ̀ bɨrɨ gywɨ boŋ əmbə̀ʼ, yènə̀ ghaʼə. 6Ənɨ wɨ̀ pe ə nəb, wɨ̀ bɨrɨ tɔŋ mbi mɨ̀sə̀ʼ mbɨ ə bə̂d rɨ ɨban əkwɨ, ghà əmbɨ mɨ̀mə̌d ni, 'Mbə̀ yeʼe tɨ̀ ghaʼ ɨchî nɨ mə fə zə mɨ njɨ̀g ze nɨ kə̀ʼ nim.' 7Mə ghà ɨ nən ni, à yɨ əndəŋ əndəŋ ni ɨghaʼi bɨrɨ nɔʼ ɨkaŋ ənɨ wə̀d ɨnû rɨbɔ̀ŋ fibɨ̀ beŋ i fîŋ chè ɨchî nɨ wɨ bɨrɨ nɔʼ ɨgwɨ ə bə̂d ɨwum ə̀bùə chɔ̀b ə̀bùə nɨə ghɨ̀ ɨnû nɨ kuʼnɨ nɨ chəi mbɨ berɨ nɨ beŋ tə fîŋ.

Ənû ə mɨgɨ ɨmbə̀ʼ ɨkab nɨ nyaʼa nimɨ

8“Kɨ̀ à kɨ əyi wi nɨ berɨ ɨkab chuʼ wum, #15.8Ɨŋga Ə̀ŋwàʼnɨ̀ ə Ŋwiə̀ à yɨ ni “ɨkab ətənɨ mɨ̀sɨrɨvà wum.” Ɨkab ətənɨ mɔʼ yɨ ɨnun nɨ mbɨ nyaʼə chwɨ ə wə̀d ə̀fàʼì əni ə fibɨ̀. nɨ wɨ fibɨ̀ nim i, nɨ chəi wɨ̀ bɨrɨ che ənam, zə̀ nəb jeŋgɨ kə̀b pè ənɨ wɨ̀ zə ə? 9Ənɨ wɨ̀ zə, wɨ̀ bɨrɨ tɔŋ mbi mɨ̀sə̀ʼ mbɨ ə bə̂d rɨ ɨban əkwɨ ghà ni, 'Mbə̀ yeʼe tɨ̀ ghaʼ ɨchî nɨ mə fə zə ɨkab we nɨ kəʼ nim.' 10Mə ghà ɨ nən ni, à yɨ əndəŋ əndəŋ ni mbɨ̀aŋgɨrə̀ mbɨə ghaʼ ənɨ wə̀d fibɨ̀ tɨ̀ əbɔʼ mbe nɨə ghɨ̀ ɨnû rɨbɔ̀ŋ beŋ i fîŋ.”

Ənû ə mɨgɨ ɨmbə̀ʼ wan mbaŋə̀ nɨ nyaʼa nimɨ

11Yeso nyaʼa wò ɨmbì ghà ni, “Mbaŋə̀ mɔʼɔ zɨə nyaʼa əŋgu nɨ berɨ mbi bɔn mbaŋə̀ mɨ̀be. 12Wɨ kwa rəbɔʼ mɨ̀mə̌d nyaʼa ghà əmbɨ i mbǎʼ ni, 'Mɨ mbǎʼ, ghapɨ mbe ɨghɨ naʼ mɨ əba.' Mbǎʼ mɨ̀mə̌d nyaʼa ghàpɨ̀ mbi ɨghɨ əmbɨ ə bɔn məd mbe mɨbe. 13Ənɨ ɨni mɔʼɔ nyaʼa chě, wan mbaŋə̀ kwa we nyaʼa fèndɨ̀ ɨghɨjìm mbe nɨ mbǎʼ məd nyaʼa naʼ ɨ bɔ, nɨŋ ɨkab we wò ɨŋga əbeŋ ə mɔʼɔ əsa əgha. Ənɨ wɨ̀ nyaʼa pè əŋgu, wɨ̀ nyaʼa chə̀kɨ̀ ɨkab we ɨchî rɨbɔ̀ŋ. 14Ənɨ ɨkab we nyaʼa mi i, njì kǎ kǎ nyaʼa nyɨ ɨŋga əbeŋ ze, əne wɨ̀ nyaʼa kɔ zə ŋgəʼ. 15Əne wɨ̀ nyaʼa wo nyɨ ə̀fàʼì əton wə̀d mɔʼɔ ɨŋga əbeŋ ze. Wə̀d we nyaʼa chà əməd ɨŋga i mbeŋ ni wɨ̀ wo jə mɨ̀kuŋə. 16Wɨ̀ nyaʼa kàŋ kə̀b ni njɨ tə jɨg tɨjɨg mɨ̀kuŋə mbe, àyɨə chəi wə̀d nyaʼa naʼ əghɨ ɨ bɔ ni wɨ̀ jɨg. 17Ənɨ ɨwe məd nyaʼa wɨrɨ bə̀ndɨ̀ yeʼe, wɨ̀ nyaʼa ghà ɨŋga i fîŋ ni, 'Bə̂d ə̀fàʼì mɨjìm mbe nɨ mɨ mbǎʼ nɨŋɨ mbɨə jɨgə korə ə̀bùʼ ə bùʼ, àyɨə mɔ̌ wɔ̂ əgha kwɨə njì! 18Mə bɨrɨ nɔʼ wo əsɨ mɨ mbǎʼ pè ghà ɨ bɔ ni, Mɨ mbǎʼ, mə fə ghɨ̀ ənû rɨbɔ̀ŋ əmbɨ ə Ŋwiə̀ bə̀ ghɨ̀ ɨ ne. 19Chəi mə wɨrɨ kùʼ ni à tɔŋ əmɨ ni mə yɨ e wan. Sɨ nɨŋ əmɨ ɨghabɨ wə̀d ə̀fàʼì mɔʼɔ rəbɔʼ mbe nɨ à nɨŋɨ.' 20Wɨ̀ nyaʼa kɔndɨ əne, nɔ̀ʼ kɔ wo əsɨ i mbǎʼ.

“Ənɨ wɨ̀ nyaʼa kɨrɨ əsa əgha, mbǎʼ məd nyaʼa zə əməd, kə̀nə̀, əne nòrə̀ wò gywɨ̀ əməd yimɨ, sɔɔrɨ ndə̀ʼ rɨ məd. 21Wan mbaŋə̀ we nyaʼa ghà ɨ bɔ ni, 'Mɨ mbǎʼ, mə fə ghɨ ənû rɨbɔ̀ŋ əmbɨ ə Ŋwiə̀ bə̀ ghɨ̀ ɨ ne. Chəi mə wɨrɨ kùʼ ni à tɔŋ əmɨ ni mə yɨ e wan.' 22Wɨ̀ nyaʼa ghà əne, àyɨə mbǎʼ məd nyaʼa ghà əmbɨ mbi bə̂d ə̀fàʼì ni, 'Mbə̀ zambɨ wò nɨŋ ngywɨ̌ ze nɨ bɔ̀ŋ chè tɨ rɨjìm, yeʼe zɨ̀ ɨbom ɨ bɔ, zɨ ə karə ə fi əbɔ məd bə̀ zɨ̀ ɨtabɨ ənɨ ɨwu məd. 23Mbə̀ nɨŋ rɨkun ze nɨ mbɨ jə zɨ̀ jeŋgɨ faŋ yeʼe zwiirɨ, tɨ̀ kud ghɨ̀ ɨghaʼi; 24ɨmbə̀ʼ ɨghəm nɨ mɨ wan wɔ̂ nyaʼa kwɨ, àyɨə tɨ̀nîn ɨ wɨ ɨkǎ, wɨ̀ nyaʼa nim, àyɨə tɨ̀nîn mə fə zə əməd.' Mbɨ nyaʼa ghɨ̀ əne kɔ jɨgə ghaʼə.

25“Ənɨ mbɨ nyaʼə ghɨ̀ əne, wan mbaŋə̀ kyeŋ we wɨə nyaʼa ə mbeŋ. Ənɨ wɨ̀ nyaʼə yeʼe sɨə tindɨ ɨban ə nəb, wɨ̀ nyaʼa zu ənɨ mbɨə kwerə mɨkyî binə. 26Əne wɨ̀ nyaʼa tɔŋ wə̀d ə̀fàʼì mɔʼɔ rəbɔʼ bə̂d ə̀fàʼì mbe biirɨ ɨ bɔ ni, 'À kɨ ənû ə ye ə?' 27Wə̀d ə̀fàʼì we nyaʼa wììrɨ̀ ɨ bɔ ni, 'We aŋgɔb fə yeʼe. Əne e mbǎʼ fə zwiirɨ rɨkun ze nɨ mbɨ jə zɨ̀ jeŋgɨ faŋ ɨmbə̀ʼ ɨghəm nɨ wɨ̀ bə̀ndɨ̀ yeʼe ɨchî chɔ̀m.' 28Aŋgɔb kyeŋ we nyaʼa sə ɨtəm, əne ton ni chəi tə bɨrɨ nyɨ ə nəb. Mbǎʼ məd nyaʼa jwɨ̀ wò buʼ ɨbɔ ɨ bɔ, 29àyɨə wɨ̀ nyaʼa wììrɨ̀ əmbɨ i mbǎʼ ni, 'Zə, ɨghəm ɨwu mbɔ̂ jìm mə fə fàʼ ɨ ne, chəi mə kweʼ ghɨ̀ rɨ̀zuə̀ ɨ ne, àyɨə chəi à kweʼ nàʼ wan gywɨ mɔʼɔ ɨ num ni mə̀ ghɨ ɨghaʼi mbɨ mbɨ mɨ̀sə̀ʼ. 30Àyɨə ənɨ wan wɔ̂ ɨ ne yeʼe, nɨ fə kud mbe ɨghɨ mbɨ ɨ̀kùnɨ̀, à zwiirɨ rɨkun ze nɨ mbɨ jə zɨ̀ jeŋgɨ faŋ ɨ bɔ!' 31Mbǎʼ məd nyaʼa wììrɨ̀ ni, 'Wân, àwɔ̀ wɨ e mbɨ num ɨghəm jìm. Ɨghɨjìm mbe nɨ mə̀ berɨ yɨ mbe. 32Àyɨə zɨə nyaʼa kùʼ ni tɨ̀ ghɨ ɨghaʼi, ɨmbə̀ʼ ɨghəm nɨ we aŋgɔb wɔ̂ nyaʼa kwɨ, àyɨə tɨ̀nîn ɨ wɨ ɨkǎ, wɨ̀ nyaʼa nim, àyɨə tɨ̀nîn mə fə zə əməd.'”

Currently Selected:

Lk 15: mgo

Highlight

Copy