Yokana 14

Yesu niye Kumukhoosi kukuutsya isi Paapa

1Yesu wiloosela waaloma ari, “Mukhaba ni khukhwiyembelela mu myoyo kyeenywe ta. Ni mufukiilile mu Wele, ni nase ni mufukiililemo. 2Muntsu ya Paapa wase mulimo biifwo bikali. Ni nase ndi khuutsya khubaŋoonaŋoonela shifwo. Shino shiba shishikhali shiryo ta, khali ise s'imbaboolele inywe ta. 3Ne n'imba nga namalile khubaŋoonaŋoonela shifwo, indikobola luundi imbayile isi ise ndi, nio isi ise ndi ni nanywe mube ibweene iyo. 4Inywe mwamanya intsila itsya mu shifwo mweesi ise ndikho ntsya.”

5Tomasi waamureeba ari, “Umukasya, sikhwaamanyile ni mu shifwo mweesi ulikho wutsya ta, khunyala khuryeena khwaamanya intsila?”

6Yesu waamwiilamo ari, “Ise niye intsila, naluundi niye bwa ŋali, naluundi niye buulamu. Mbaawo umuundu uwiitsa isi Paapa ta, khurusakho nga abirira mus'iise.”

7Yesu weloosela ari, “Ne ari nga ni muumanyile ise, kane mumanye Paapa wase naye. Ni khukhwaama ari mwamumanyile, naluundi mwamuboone.”

8Filipo waamuloma ari, “Umukasya, iwe n'ukhwokese Paapa, ifwe isho kane shikhumale.”

9Yesu waamukobolamo ari, “Filipo, nabeele ni nanywe khumala imbuka yino yoosi, ne ni khukhwoola ari iwe ushiili khukhumanya ise ta? Uwumbona ise, aba waboone Paapa, khulwashiina kila uloma uri khwokesane Paapa? 10Filipo, iwe s'ufukiilila uri ise ndi mu Paapa, ni Paapa naye ali mus'iise ta? Bilomo byeesi imbaboolela inywe, simbaboolela khulwe bunyala bubwase ta; ne khulwe bunyala bwa Paapa uwikhala mus'iise, waraamba kimilimo kyeewe umweene. 11Ni mufukiilile nga naalomile ndi ise ndi mu Paapa, ni Paapa naye ali mus'iise. Ne noola abe sishili khulwe isho ta, ni mufukiilile khulwe kimilimo kimyeene kyeesi ikhola. 12Ilala, ilala, imbaboolela ndi uyo uwufukiilila ise, naye alikhola kimilimo nikyo mitweela nga kyeesi ise ikhola, ilala alikhola ni kimilimo kikifuurakho ano bukhulu, khulwekhuuba indikho intsya isi Paapa. 13Buli shoosi shoosi sheesi kane muloombatsake mu lisiina lyase, indishikhola, nio shiriifwa sha Paapa shibonekhele mu Mwaana. 14Ni mulinoomba shishiindu shoosi mu lisiina lyase, indishikhola.”

Yesu asuubisa Umwoyo Umukhosefu

15Yesu weloosela ari, “Ni muba nga mungana ise, kane mulondelelatsake kamakaambila kaase. 16Ni nase kane inoombe Paapa, ni naye alibawa Umuyeeti ukuundi, ulibatsaka ni nanywe bifukhu byoosi. 17Umweene uyo niye Umwoyo uwa ŋali, isi shiibala shikhanyala khukhwakaanila ta, khulwekhuuba shiibala seshimubona namwe sishamumanya ta. Ne inywe mwamumanya khulwekhuuba amenya mus'iinywe, akhaabe mus'iinywe.

18“Ise s'indibalekha inywe khuuba bafuubi ta; indikobola isi muli. 19Ne mu mbuka ifwiiti, shiibala sikane shimbone ta, ne inywe kane mumbone. Khulwekhuuba ise ndi umulamu, ni nanywe muliba balamu. 20Khu shifukhu isho, inywe mulimanya muri ise ndi mu Paapa wase, ni nanywe muli mus'iise, ni nase ndi mus'iinywe. 21Uyo umanyile kamakaambila kaase, wakawaamba, aba uyo niye uwungana ise. Ni n'oyo uwungana ise, naye alikanibwa ni Paapa wase. Ni nase ndi mukana, niyokesanise is'ali.”

22Ne Yuda ukuundi, ukhali Isikalyoti ta, wareeba Yesu ari, “Umukasya, shiina kila wutsya khukhwiyokesanisa isi ifwe, ne akhuba isi shiibala ta?”

23Yesu waamukobolamo ari, “Umuundu yeesi uwungana ise, kane awaambe shilomo shase. Ni Paapa wase kane akane umuundu uyo, naluundi kane khwiitse is'ali, khumenye mu bulamu bweewe. 24Ne umuundu ukhangana ise ta, s'awaamba bilomo byase ta. Shilomo sheesi muwulila seshili shishase ta, akhali shili sha Paapa uwandumana ise.

25“Bilomo bino nabibabooleele nga ishiili ni nanywe. 26Ne Umuyeeti, nga niye Umwoyo Umukhosefu, isi Paapa alyakaanisa mu lisiina lyase, alibaleekela inywe bibiindu byoosi. Naluundi alibashebusa ibyo byoosi byeesi imbabooleele. 27Lukoosi nilwo lweesi imbalekheele; lukoosi lwase lulweene nilwo lweesi imbaweele. Ise s'imbawa lukoosi nga shiibala ni shibawa ta. Kimyoyo kyeenywe kikheyembelela namwe kikharya ta. 28Mwambulile nga noma ndi, ‘Indikho intsya, naluundi ndi indikobola isi muli.’ Muba nga mumungana, khali mwekhoyele, khulwekhuuba indikho ntsya isi Paapa. Khulwekhuuba Paapa ali umukhulu khukhufuura ise. 29Ari nababooleele nga shino shishiili khubawo ta, nio akile nga shetsile khukholikha, mufukiilile. 30Ise shinyala ari nakanikha ni nanywe imbuka ingali ta, khulwekhuuba umuwuli uwe shiibala shino alikho etsa. Ne ise s'andikho bunyala bwoositsana taawe. 31Ne shiibala shili ni khumanya shili ise ingana Paapa, shishikila ikhola nga Paapa n'anomela. Ni mwinyukhe khurure ano khutsye.”

Currently Selected:

Yokana 14: LPE

Highlight

Copy