Yokana 2

Kamayiiya ke Bukhwale i Kana

1Khu shifukhu shikhola khataru, abawo kamayiiya ke bukhwaale i Kana, mu Galilaaya, ni maayi wa Yesu naye abayo. 2Yesu ni baleekelwa beewe nabo baaba babalaangile khu mayiiya.

3Ne iviini niyawawo, maayi wa Yesu wamuloma ari, “Sibali ni iviini ta.”

4Yesu wamulomela ari, “Mukyelemawe, ubeele uryeena ni nase?”

5Ne maayi weewe waloma babakaanisi ari, “Ni mukhole shoosi shoosi sheesi kane abalomele.”

6Aabawo kamayingu kasesaba ke kamabaale, nga buli litweela litsyamo tsisoongwe nga tsitaru. Kamayingu kano kaaraambisibwa ni Bayudaaya lwe khukhwipyeluusa, nga isaambo yaabwe ni yaba. 7Yesu waloma babakaanisi ari, “Ni mwitsuse kamayingu ako ni kameetsi.” Nabo baketsusa khukhwoolela ilala khu minwa. 8Lwanyuma waabaloma ari, “Ni mutahekho muyilile umuraangilisi we kamayiiya.”

Babakaanisi baatahakho baamuyilila.

9Umuraangilisi we kamayiiya n'amuusakho kameetsi ari kakaaba kekyelile iviini, waalekha khumanya isi yaama ta. Ne babakaanisi babaataha kameetsi nibo baaba abe baamanyile. Aryo walaanga umusaani ukhweele, waamwiisa andulo, 10waamuloma ari, “Buli muundu anyoowa khukaba iviini ifuura bulayi, nio lwanyuma lwayo wesawo ilikho aasi, nga babaandu bekurire. Ne bona iwe waabiikhile iviini indayi inyene khukhwoolesa ari.”

11Khano nikho khabonelo khe kamakaanga kheesi Yesu aanyoowelakho khuukholela i Kana, mu Galilaaya. Aryo wokesanisa shiriifwa sheewe, ni baleekelwa beewe baamufukiililamo.

12 # Mat 4.13 Lwanyuma lwe'sho, Yesu weekha i Kaperunaumu, nga ali atweela ni maayi weewe, ni bayaaya beewe, ni baleekelwa beewe. Ibweene iyo, baamalayo bifukhu bikyeekhe biri.

Yesu atsya mu Lisaayilo Likhulu

(Matayo 21.12-13; Mako 11.15-17; Luka 19.45-46)

13 # Luky 12.1-27 Kamayiiya ke Bayudaaya ke Khuubirakho kaaba abe kali aambi khukhwoola, kila Yesu aniina i Yerusalemu. 14Ne mu Lisaayilo Likhulu wanyoolamo babaandu nga bakulisa tsikhaafu, tsisheese, ni kamawuusi. Ni babaandi nga bekhaale abweene awo, bayuusaŋana tsinusu. 15Aryo Yesu wabukula kimikosi warukhamo kumusariti, wabatimisa boosi khurura mu Lisaayilo Likhulu, atweela ni tsisheese, ni tsikhaafu. Wahanyaka tsinusu ts'abo babaaba nga bayuusaŋana tsinusu. Wafumalikhaka ni tsimeetsa tsaabwe.

16Waloma abo babakulisa kamawuusi ari, “Bino ni mubirusewo ano! Shimwaakha mwakalusa intsu ya Paapa wase, mwakikesa khuuba intsu ye khukulaanilamo ta.”

17 # Zab 69.9 Baleekelwa beewe bashebulila bibyaronebwa bikhosefu bibiloma biri, “Libuba lye khukana intsu yoowo liburukha mus'iise nga kumulilo.”

18Baryo baraangilisi be Bayudaaya bakobolamo Yesu nga bamureeba shireebo bari, “Khabonelo shiina khe kamakaanga kheesi uli ni nakho khukhwokesana khari uli ni bunyala khukhola bibiindu bino?”

19 # Mat 26.61; 27.40; Mako 14.58; 15.29 Yesu wabeelamo ari, “Ni mufuniaake Lisaayilo Likhulu lino, ni nase indilyombekhela mu bifukhu bitaru.”

20Bayudaaya kila bamwiilamo bari, “Lisaayilo Likhulu lino lyayila kimiiko kamakhumi kane na kisesaba khulyombekha, ne iwe unyala khulyombekhela mu bifukhu bitaru byonyene?”

21Ne Lisaayilo Likhulu lyeesi Yesu aba nga alomakho, lyaba kumubili kweewe kumweene. 22Ne n'amala khulamukha khukhwaama mu bafu, baleekelwa beewe bashebulila bari aloma shino. Baryo bafukiilila bibyaronebwa bikhosefu ni bilomo byeesi Yesu aloma.

Khumanya khwa Yesu khwe buulamu bwe bubundu

23Aryo Yesu n'aba nga ali mu Yerusalemu khu Mayiiya ke Khuubirakho, babaandu bakali bafukiilila lisiina lyeewe, khulwe bubonelo bwe kamakaanga bweesi akhola. 24Ne Yesu walekha khubeyikina ta, lwekhuuba abe wabamanya boosi bulayi. 25Sishekombebwa umuundu yeesi khumuboolela khubiwaamba khu baandu ta, lwekhuuba umweene amanya bibiindu bibyaba mu myoyo kye babaandu.

Currently Selected:

Yokana 2: LPE

Highlight

Copy