Cakirok 28

1Kenyo Isaka olwoŋo Yakobo to miyo go silwany, aka ociko go teltel ni, “Ikir'inywom dhako Jakanan. 2Ay ikadhi Mesopotamia, i ot pa Bethuel ba yokin, aka inywom acel kwoŋ nyir pa nerin Laban omin yokin. 3Were Majameni je womiyin silwany aka womiyin nyithindho kweth, ŋey ibedi ba piny kweth. 4#Cak 17:4-8Weyi go womiyin gi nyikwayin silwany paka omiyo Abraham, ŋey widoŋ gi lowo m'ibed'iye ma Were omiyo Abraham!” 5Ameno to Isaka oro Yakobo kadho. Aka Yakobo okidho Mesopotamia bongi Laban wod pa Bethuel Jaramean, omin Rebeka yok Yakobo gi Esau.

Esau nywomo dhako man

6Onyo Esau oneno ni Isaka oyido otieko miyo Yakobo silwany to dhiro go Mesopotamia rango dhako kenyo, aka ni munyo miyo go silwany ociko go teltel ni, “Ikir'inywom acel kwoŋ mon ma Kanan.” 7Yakobo oyido owinjo bamere gi min to kidho Mesopotamia. 8Ameno munyo Esau oneno ni mon ma Kanan jokisangala Isaka bamere, 9okidho bongi Isimayil wod pa Abraham to nywomo nyare m'ilwoŋo ni Mahalath, m'oyido obedo nyamin Nebayoth.

Yakobo leko i Bethel

10Yakobo oeye Berseba, to kidho yu Haran. 11Aka otundo i kabedo moro to bedo kenyo wor no rupiri waŋceŋ oyido otieko podho. Okwanyo tele acel kanyago to theno gine wiye to nindo. 12#Yoh 1:51Aka oleko kenyo nike oyido nitie madala m'ocom wok piny, to wiye tundo kiri i polo; aka oneno jomalaika pa Were ka joidho aka doko jolor'iye. 13#Cak 13:14-15Go oneno Rwoth ocungo i wiye to waco ni, “An Rwoth, Were pa Abraham benin, aka Were pa Isaka; alamiyin gi nyikwayin lowo m'inind'iye me. 14Nyikwayin jobino cale fukefuke ma piny. Jobino nyay i thenge gi thenge aka luwo kwoŋ jo abino miyo piny je silwany. 15Neni, anitie kodin, aka abino kurin kisi kam'inokidh'iye, t'adwokin i lowo me; rupiri akibino weyin cuka anotiek timo gim'atieko waco rin.”

16Kenyo Yakobo ocew wok i nindo pere aka owaco ni, “Adieri Rwoth nitie ka, aka oyido akuya.” 17Lworo omako go to waco ni, “Kole ka miyo jo lworo! Me k'obedo giman kwanyo woko Ot pa Were, aka me waŋkac ma polo.”

18Ameno Yakobo oay con odikin, aka okwanyo tele m'oyido go otheno gine wiye, to jengo paka siro aka okonjo mo i wiye. 19Go olwoŋo kenyo ni Bethel.#28:19 Bethel Nyutho Ot pa Were To nyingi tindi madwoŋ oyido ilwoŋo ni Luz. 20Kenyo Yakobo otimo cikirok ka waco ni, “Ka Rwoth obedi kodan, to kuran i yo paran m'akidh'iye, to miyan cemo gi nanga aruka, 21ŋey doko adwoki i ot pa baba i siem, nyaka Rwoth bino bedo Were paran 22aka tele me, m'aketho paka siro me, bino bedo Ot pa Were; aka kwoŋ kisi gim'inomiyan je, abino miyin acel wiy apar.”

Currently Selected:

Cakirok 28: DHOCDC

Highlight

Copy