Cakirok 29
29
Yakobo tundo peco pa Laban
1Yakobo omedere i yo pere, aka otundo i piny pa ji ma yuwok ceŋ. 2Munyo go oŋiyo, oneno waŋ pi i sa, kodi sidwol rombo adek jonindo i thenge; rupiri kenyo ama rombo oyido jomadh'iye pi. Tele ma dhok waŋ pi oyido pando. 3Kisi ka sidwol rombo jocokere, jokwath rombo joŋilo woko tele wok i dhok waŋ pi to jomiyo rombo pi, to doko jodwoko tele.
4Yakobo openjo jokwath rombo ni, “Wutmera, wiwok yukune?”
Jodwoko ni, “Wawok Haran.”
5Openjo jo ni, “Wiŋeyo Laban, wod pa Nahor?”
Jodwoko ni, “Ey, waŋeyo go.”
6Openjo jo ni, “Go ber?”
Jodwoko go ni, “Go ber. Neni, nyare Laker bino gi rombo!”
7Yakobo owaco rijo ni, “Neni win, piny fodi, aka sawa fodi ma dwoko rombo; raŋo wikimiy jo pi to wikadho kwayo jo.”
8To jodwoko go ni, “Wakinyali cuka sidwol je ocoki kanyacel, ka tele oŋil woko wok i dhok waŋ pi; nyaka to wamiyo rombo pi.”
9Munyo Yakobo fodi luwo gi jo, Laker obino gi rombo pa bamere, rupiri go am'oyido kwayo jo. 10Onyo munyo Yakobo oneno Laker nyar Laban ner mere, okidho to ŋilo tele wok i dhok waŋ pi, aka omiyo sidwol rombo pa Laban omin min pi. 11Kenyo Yakobo cwiyo lembi Laker to cwero pi waŋe ma Kisangala. 12Aka Yakobo owaco ri Laker ni go obedo wat pa bamere, aka ni go obedo wod pa Rebeka. Kenyo Laker oŋweco to waco ri bamere. 13Munyo Laban owinjo kwoŋ wac ma mako kwoŋ okewo pere Yakobo, oŋweco romo gi go, aka opodho i kore to cwiyo lembe, aka otero go i ot pere. Yakobo owaco ri Laban gim'oyido otimere je, 14aka Laban owaco ni, “Adieri ibedo coko gi del paran!” Yakobo obedo kenyo ma dwe acel.
Yakobo tiyo ri Laban ro Laker gi Leya
15Kenyo Laban owaco ri Yakobo ni, “Rupiri ibedo wat paran, inotiy ran manono? Waci ran, cul perin labedo aŋo?” 16Laban oyido nitie gi nyir ario; madwoŋ oyido ilwoŋo ni Leya, aka mathin ilwoŋo ni Laker. 17Waŋ Leya oyido lwor, aka Laker oyido ŋon aka ja waŋtek.
18Yakobo oyido omaro Laker aka owaco ni, “Alatic rin ro nyarin Laker ma oro abirio.”
19Laban odwoko ni, “Ber amiyin go loyo miyo jacwo man; bedi kodan ka.” 20Yakobo otiyo ma oro abirio ro Laker, aka ocale rigo pa ndelo manok rupiri oyido omaro Laker.
21Kenyo Yakobo waco ri Laban ni, “Miyan dhako paran anywom go, kole hongo paran orumo.” 22Ameno Laban ocoko kanyacel cwo ma kabedo no, aka otimo kalima. 23To othieno, Laban okwanyo nyare Leya to kelo ri Yakobo, aka Yakobo onindo gine. 24(Laban omiyo Leya ŋeca pere m'ilwoŋo ni Zilipa paka jatic pere.) 25Aka odikin nyaka to Yakobo niaŋ ni oyido obedo Leya. Yakobo openjo Laban ni, “Itimo ran aŋo me? Akitiyo rin ro Laker? Raŋo onyo iwondan?”
26Laban odwoko ni, “Kitimere i piny mawan miyo nyako mathin mafodi makayo. 27Cow sabiti acel me, aka nyaka walamiyin Laker bende k'inotiy ran ma oro abirio doko.”
28Yakobo otimo ameno, aka munyo sabiti acel orumo, Laban omiyo go nyare Laker bedo dhako pere. 29Laban omiyo nyare Laker ŋeca pere m'ilwoŋo ni Biliha tiyo rigo. 30Yakobo onindo gi Laker bende, aka oyido omaro Laker loyo Leya; aka otiyo ri Laban kendo ma oro abirio.
Nyithindho m'onywol ri Yakobo
31Munyo Rwoth oneno ni Yakobo omaro Laker loyo Leya, oyawo iy Leya, to cego apa Laker. 32Leya ogamo iye, to nywolo wode, aka ocwoko nyinge ni Ruben rupiri owaco ni, “Rupiri Rwoth oneno candirok paran; adieri cworan nyaka lamaran.” 33Doko go ogamo iye to nywolo wode to waco ni, “Rupiri Rwoth otieko winjo ni odakan, omiyan wodan me bende.” Go ocwoko nyinge ni Simeo. 34Odoko Leya ogamo iye, aka onywolo wode man, aka owaco ni, “Pama rume cworan bino riwirok kodan; rupiri atieko nywolo rigo cwo adek.” Ameno ocwoko nyinge ni Levi. 35Kenyo doko go gamo iye to onywolo wode man, aka owaco ni, “Rume abino pako Rwoth.” Riameno ocwoko nyinge ni Yuda, kenyo to go cungo nywol.
Currently Selected:
Cakirok 29: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
