Cakirok 32

Yakobo yikere romo gi Esau

1Munyo Yakobo nitie i yo, jomalaika pa Were joromo gi go, 2aka munyo Yakobo oneno jo, owaco ni, “Me jolweny pa Were!” Ameno olwoŋo kabedo no ni Mahanayim.#32:2 Mahanayim Me dhohiburu, dwoŋ mere ni Lwak jolweny ario

3Yakobo ooro jomikwenda yuwiye bongi omin go Esau iy'adec ma Seyir, i piny Edom. 4Owaco rijo ni, “Waci win ri jadwoŋ paran Esau ni ŋeca perin Yakobo waco ni, ‘Oyido ti abedo gi Laban kiri gunyo ni, 5aka anitie gi dhok, punde, rombo, diegi, gi ŋecin. Adhiro rin wac jadwoŋ paran ŋey anyal nwaŋo wor ruwaŋin.’ ”

6Jomikwenda jodwoko bongi Yakobo ka jowaco ni, “Wakidho bongi omin in Esau, aka go bino romo kodin gi cwo miya aŋwen.” 7Kenyo Yakobo obwok aka orembo; to tiako ji m'oyido go nitie gine i kitipin ario, mwendi, dhok, gi ŋamin 8ka paro ni, “Ka Esau obin i kitipa acel to reyo woko, m'odoŋ bino ringo.”

9Aka Yakobo okwayo ni, “A Were pa kwara Abraham gi Yakobo kodi Were pa baba Isaka, a Rwoth m'owaco ran ni, ‘Dok i piny perin bongi wade perin, aka abino timo rin bero.’ 10Akiripi gi wor kodi genirok m'itieko nyuthan, ŋeca perin. Rupiri gi nyaka luth paran akalo malawa Yordan, aka onyo pama alokere kitipin ario. 11Bothan, akwayin wok i cingi omin an, wok i cingi Esau, rupiri alworo go, rupiri go nyalo bino to neko wajoje, kiri mon gi nyithindho. 12T'iwaco ni, ‘Abino timo rin bero t'aloko nyikwayin mathoth paka kwoyo ma nam, ma kikwanere.’ ”

13 # Cak 22:17 Ameno onindo kenyo wor no, aka okwanyo wok kwoŋ lim pere mic ri omin go Esau. 14Diegi ma mon 200 wot diegi piero ario, rombo ma mon 200 gi wot rombo piero ario 15ŋamin m'inyedho piero adek gi nyithindho jo, nyikuse dhok piero aŋwen gi thwondhe apar, punde ma mon piero ario, gi ma wote apar. 16Gigipiny me go oketho i cingi ŋecin pere leko kisi nyatoro kende; aka owaco ri ŋecin pere ni, “Tel win yuwiyan, aka wi weyi thwolo i dier kisi dhok.” 17Aka owaco ri ŋeca m'otelo ni, “K'omin an Esau oromo kodin to penjin ni, ‘Ibedo apa ŋa? Ikidho kune? Aka ogwaŋe me apa ŋa?’ 18Kenyo i wac ni, ‘Jobedo apa ŋeca perin Yakobo; mic ma go odhiro ri jadwoŋ pere Esau; aka kiri Yakobo won luwo wan cen.’ ” 19I nger owaco ri ŋeca mar'ario, mar'adek kodi ji ma joluwo dhok je ni, “Wiwaci gimoro acel ri Esau ka wiromo gi go, 20aka wiwaci ni, ‘Kiri Yakobo je nitie cen mawan.’ ” Rupiri Yakobo oparo ni, “Nyalo bedo ni alakisangala go gi mic m'otelo yuwiyan, aka rumacen alaneno waŋe; kono go bino yeyan.” 21Ameno Yakobo odhiro mic yuwiye, aka go won odoŋ to nindo i kambi wor no.

Yakobo tweyo rabok gi malaika

22Wor no won Yakobo oay to kwanyo mon pere ario, ŋecin pere ma mon ario, kodi nyithindho pere apar g'acel, aka jokalo malawa Yabok. 23Munyo jotieko kalo, go ocewo gigipiny je m'oyido go nitie gine. 24To Yakobo won odoŋ cen kende; aka jal moro obino to tweyo rabok gi go kiri munyo piny yawere. 25#Hos 12:4-5Munyo jalo oneno ni kinyal redho go piny, ogeyo bambe, aka bat Yakobo omukere wok i kowino munyo go tweyo rabok gine. 26Kenyo jalo owaco ni, “Weyan akadhi; rupiri piny oyawere.”

Yakobo odwoko ni, “Ak'oweyin ikadhi, kwanyo woko k'imiyan silwany.”

27Jalo openjo go ni, “Nyingin ŋa?”

Go odwoko ni, “Ilwoŋan ni Yakobo.”

28Kenyo jalo owaco ni, “Nyingin doko k'olwoŋ ni Yakobo, to Isiraili.#32:28 Isiraili Ŋat'otweyo rabok gi Were Rupiri itweyo rabok gi Were, t'iloyo.”

29 # Cak 35:10 Yakobo openjo go ni, “Mondo akwayin wac ran nyingin.”

To go dwoko ni, “Raŋo ipenjo nyingan?” Aka kenyo omiyo Yakobo silwany.

30Ameno Yakobo owaco ni, “Atieko neno waŋ Were, to fodi akwo.” Go olwoŋo kenyo ni Peniel.#32:30 Peniel Me dhohiburu ma nyutho ni waŋ Were 31Ceŋ owok munyo Yakobo oyido kadho, aka go oyido komo ro bat mere. 32Riameno Joisiraili kiri konon jokicam fuc ma kowino ma bat, rupiri kenyo ama jalo omuko.

Currently Selected:

Cakirok 32: DHOCDC

Highlight

Copy