Cakirok 33
33
Yakobo romo gi Esau
1Yakobo otiŋo waŋe malo to neno, aka neni, Esau oyido bino gi cwo pere 400. Ameno Yakobo opoko nyithindho ri Leya, Laker, kodi ŋecin pere ma mon ario. 2Aka oketho ŋecin pere ma mon gi nyithindho pajo yuwiye, kenyo Leya gi nyithindho pere, kodi Laker gi Yozefu yucen. 3Go won otelo yuwiy jo, aka okule piny dibirio, cuka otundo bongi omin.
4To Esau ringo, oromo gi go, aka opodho i kore, to podho i ŋute aka ocwiyo lembe, to joywak. 5Aka munyo Esau otiŋo waŋe malo to neno mon gi nyithindho, openjo ni, “Me jokune ma jonikodin?”
Yakobo odwoko ni, “Me nyithindho ma Were omiyo ŋeca perin ro wor pere.” 6Kenyo ŋecin ma mon jocore cegin, jo gi nyithindho pajo, aka jokule piny. 7Ameno Leya kodi nyithindho pere bende jocore cegin to jokule piny; aka macowe, Yozefu kodi Laker bende jocore cegin, aka jokule piny.
8Esau openjo ni, “Aŋo m'inyutho gi kitipa ma romo gine me?”
Yakobo odwoko ni, “Ma nwaŋo wor wok bongi jadwoŋ paran.”
9To Esau waco ni, “Anigi ma romo omin an kani gim'initie gine.”
10Yakobo odwoko ni, “Be, mondo akwayin, k'anwaŋo wor i waŋ jadwoŋ paran, ere yey mic wok i cingan; rupiri adieri neno waŋin cale neno waŋ Were, gi nger wor m'ijolan gine. 11Mondo yey mic m'okel rin, rupiri Were otiyo kodan gi wor, aka rupiri anitie gi ma romo.” Yakobo oywaki gi Esau cuka ojolo mic.
12Esau owaco ni, “Weyi wakadhi i yo mawan, aka abino telo wiyin.”
13To Yakobo dwoko ni, “Jadwoŋ paran iŋeyo nike nyithindho joŋic, aka aripo paro kwoŋ mwendi gi dhok ma jonitie gi nyithindhi gin. K'oredi gi jo ma ndelo acel, joje jobino tho. 14Weyi jadwoŋ paran wotel yuwiy ŋeca pere, aka abino luwo moth, cungo kwoŋ woth pa dhok gi nyithindho ma jonitie yuwiyan, cuka atundo bongi jadwoŋ paran i Seyir.”
15Esau owaco ni, “Weyi awey rin cwo paran man ma jonitie kodan.”
To Yakobo dwoko ni, “Meno gima kiyenyere. Amito ran nyaka nwaŋo kisa ruwaŋin.” 16Ameno Esau omako yo dok Seyir ndelo no. 17To Yakobo okadho Sukoth, aka ogeto ot pere, gi kigo dhok ri ogwaŋe pere. Riameno kabedo no olwoŋi ni Sukoth.#33:17 Sukoth Wac me gi dhohiburu nyutho kigo dhok
18Yakobo otundo maber wok i piny Mesopotamia i tindi madwoŋ Sekem, manitie i piny Kanan to ketho kambi pere kenyo. 19Onyewo adec lowo no wok bongi wot Hamor ba Sekem gi feza miya kama go oyido oget'iye wema pere. 20Kenyo Yakobo oget'iye migam to lwoŋo ni El Elohe Isiraili.#33:20 El Elohe Isiraili Wac me nyutho Were pa Isiraili
Currently Selected:
Cakirok 33: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
