Cakirok 34
34
Sekem nindo gi Dina gi mbaka
1Ndelo acel, Dina nyar Leya m'onywolo ri Yakobo okidho wendo ri mon mar'adec. 2Munyo Sekem wod pa Hamor Jahivi m'oyido obedo rwoth mar'adec oneno go, otero go to riyo go nindo gine. 3Aka cuny Sekem oywayo go bongi Dina nyar Yakobo; omito go aka oweco gine. 4Ameno Sekem oluwo gi bamere Hamor ka waco ni, “Nywom ran nyako me wobedi dhako paran.”
5Yakobo owinjo ni Sekem oriyo nyare Dina nindo gine; to wote oyido jonitie i sa gi dhok pere, ameno go obedo moth cuka jodwoko. 6Ba Sekem Hamor okidho bongi Yakobo luwo gine. 7Wot Yakobo jodwoko wok i sa munyo jowinjo kwoŋe; aka jobwok to nge mako jo swa, rupiri Sekem oyido okelo amien i Isiraili munyo go onindo gi nyar Yakobo. Kole nger gino oyido kiripi timirok. 8Hamor ba Sekem owaco ri Yakobo gi wote ni, “Cuny wodan Sekem oywayo go bongi nyarin; mondo yey jowonywomere. 9Nywomere win gi wan; miy wan win nyir mewin, aka witer nyir mawan. 10Wilabedo gi wan; aka wilabedo kama wimito je, wilatimo mitan, to wibedo gi lim iye.”
11Sekem owaco ri ba Dina gi wutmin go ni, “Weyi anwaŋ wor ruwaŋin, aka gim'inowaci je ran abino miyo. 12Waci ran mic m'imito, aka ikethi nywom malo paka imito; alamiyin gimoro je ma inokway, nyaka miyan nyako wobedi dhako paran.”
13Rupiri Sekem oyido okelo wickwot ri nyamin jo Dina, wot Yakobo jodwoko go gi bamere Hamor gi banirok. 14Jowaco rigo ni, “Wakinyali weyo nyamin wan to nywomere gi ŋata k'othumere, rupiri meno bino bedo giwickwot riwan. 15Nyaka i gimoro acel ama wanyalo yerok kodin, nike wilalokere paka wan aka kisi jacwo je wothumere. 16Nyaka wabino miyo win nyir mawan, aka wan bende to watero nyir mewin, to wabedo gi win, to walokere ji acel. 17To ka wik'owinji wan to withumere, onyo walakwanyo nyar wan to wakadho.”
18Wac pajo osiemo Hamor gi wode Sekem. 19Aka jayac k'ogalo gi timo gino, rupiri oyido omito nyar Yakobo. Onyo go am'oyido nitie gi dwoŋ swa i peco pajo gipi.
20Ameno Hamor gi wode Sekem jokidho i waŋkac ma tindi madwoŋ pajo, aka joluwo gi ji ka jowaco ni, 21“Cwo me jobedo merin mawan; weyi win jowobedi i lowo me gi wan, aka jowotimi mitan i iye; rupiri panen, lowo lac ma romo jo. Weyi wanywom nyir pajo, aka bende wamiy jo nyir mawan. 22To nyaka i gime kende ama cwo me jolayere bedo gi wan, to walokere ji acel; nike kisi jacwo i dier wan wothumere paka jo. 23Kere dhok pajo, lim pajo g'ogwaŋe pajo k'obedi mawan! Nyaka weyi wayere gi jo, to jobedo kanyacel gi wan.” 24Aka ji je m'oyido jokidho i waŋkac ma tindi madwoŋ jowinjo Hamor gi wode Sekem aka kisi jacwo othumere.
25I ndelo mar'adek, munyo cwo fodi jonitie gi adhola, ario kwoŋ cwo pa Yakobo, Simeo gi Levi, wutmin Dina jokwanyo abor aka jobino i tindi madwoŋ ma k'oŋeyere to joneko cwo je. 26Joneko Hamor gi wode Sekem aka jokwanyo nyamin jo Dina wok i ot pa Sekem to jokadho gine. 27Kenyo wot Yakobo jobino kwoŋ cwo m'oneki, aka jonyaga tindi madwoŋ ma culo kwor ma wickwot pa nyamin jo. 28Jotero mwendi pajo, dhok, gi punde pajo, kodi kisi gimoro m'oyido nitie i tindi madwoŋ kodi i ndelin 29lim pajo, nyithindho pajo je kodi mon pajo, kisi gim'oyido nitie i udi jomako.
30Kenyo Yakobo owaco ri Simeo gi Levi ni, “Wikelo teko kwoŋan gi miyo ji ma piny me jowodakan; Jokanan gi Joperiz. Anigi cwo manok, aka ka jocokere to jomonjan, jolareyan gi peco paran.”
31To jodwoko go ni, “Go nyalo tero nyamin wan paka malaya?”
Currently Selected:
Cakirok 34: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
