Cakirok 37
37
Yozefu gi wutmin
1Yakobo obedo i lowo ma bamere oyido obed'iye, i piny Kanan. 2Me kigana ma mako kwoŋ peco pa Yakobo.
Yozefu, jayac ma jaoro apar g'abirio, oyido kwayo mwendi gi wutmin go; wot Biliha kodi Zilipa mon pa bamere. Yozefu oyido osa ri bamere gimarac ma wutmin go oyido jotimo.
3Yakobo oyido omaro Yozefu loyo nyithindho pere man, rupiri oyido obedo wode ma tiyo; aka okwoyo ri Yozefu kanzu ma cinge bor. 4To munyo wutmin go joneno ni bajo omaro Yozefu loyo joje, jok'omaro go, aka oyido jokiluwi gine gi siem.
5Onyo to Yozefu leko, aka munyo owaco ri wutmin go, nyaka jok'omaro go kiri loyo. 6Owaco rijo ni, “Winji win lek me, m'aleko. 7Neni, oyido watweyo withi ŋano i ndelo, aka neni withe paran ocungo malo m'otire; aka neni within mewin jocokere thoko to jokule ri aparan.”
8Wutmin jopenjo go ni, “Adieri iladhumo wan? Kosa adieri ilabedo gi meni kwoŋ wan?” Ameno jodak go doko kiri loyo ro lek pere gi ro wac pere.
9Kenyo Yozefu doko oleko lek man, aka owaco ri wutmin go; aka owaco, “Neni, doko aleko lek man, aka neni, waŋceŋ, dwe, gi micalin apar g'acel oyido jokule piny ran.”
10To munyo go owaco lek me ri bamere gi wutmin go, bamere obwoko go aka owaco ni, “Lek aŋo m'ileko me? Iparo ni an gi yokin, kodi wutmin in adieri walabino to wakule piny ruwaŋin?” 11#Tim 7:9Wutmin Yozefu jomako nyeko gi go, to bamere okano wac me i paro pere.
Itana Yozefu aka itero go Misir
12Ndelo acel wutmin Yozefu jokidho kwayo mwendi pa bamere cegin gi Sekem. 13Aka Yakobo owaco ri Yozefu ni, “Kere wutmin in jokikway mwendi i Sekem? Biye alaorin bongi jo.”
Yozefu odwoko ni, “Ayikere.”
14Ameno Yakobo owaco rigo ni, “Kadhi pama, ineni ka wutmin in jober, kanyacel gi mwendi; aka idwok'iwaci ran doko.” Ameno Yakobo ooro go wok milelo Hebron, to go bino Sekem. 15Jal moro onwaŋo go tangatanga i sa aka openjo go ni, “Irango aŋo?”
16Yozefu odwoko ni, “Arango wutmin an. Mondo waci ran kama jokway'iye mwendi.”
17Jalo owaco rigo ni, “Jotieko kadho woko. Kole awinjo ka jowaco ni, ‘Weyi wakadhi i Dothan.’ ” Ameno Yozefu oluwo wutmin to nwaŋo jo i Dothan.
18Wutmin joneno go gi bor, aka mafodi k'otundo cegin gi jo joyere neko go. 19Jowaco wegi gi wegi ni, “Jalek ee bino. 20Biye win, weyi waneki go aka wabol i bur acel; to wawaco ni ogwaŋ madudi ocamo go, aka nyaka walaneno gima lek pere olokere.”
21To munyo Ruben owinjo, obotho go wok i cingi jo, ka waco ni, “Wakiri waneki win go. 22Wikiri wioy remo; bol win go i bur ka, i thim, to wikiri wikethi cingi win kwoŋe.” Ruben owaco gime ŋey wobothi go, aka wodwoki go bongi bamere. 23Ameno munyo Yozefu otundo bongi jo, jolunyo kwoŋe kanzu pere, kanzu mabor ma jacinge mabor 24aka jotero go to jobolo i bur. Bur oyido othwo, pi oyido ongoy'iye.
25Kenyo jobedo piny cemo, aka munyo jotiŋo waŋ gin malo joneno kitipa pa Joisimayili jowotho wok Giliad jokidho Misir. Ŋamia pajo oyido otiŋo gigipiny maŋwe kur, kodi vini m'othwo. 26Kenyo Yuda owaco ri wutmin ni, “Cwe aŋo ma walalimo ka waneko omin wan to waumo tho pere? 27Weyi watana win go ri Joisimayili me, aka cingi wan wokiri wobedi kwoŋe rupiri go omin wan, aka delkwoŋ wan.” Aka wutmin go joyere. 28Aka munyo Jomidian moro ma jomitan joluwo kenyo, jofudho Yozefu wok i bur, aka jotana go gi jono ma feza piero ario aka jono jotero go Misir.
29Munyo Ruben ogik i bur to nwaŋo ni Yozefu oyido ongoye i bur, oyeco woko nangin pere 30aka ogik bongi wutmin go to waco ni, “Jayac ongoye kaca! Aŋo m'akidho timo?”
31Kenyo jokwanyo kanzu pa Yozefu, aka jothumo diel, to jorwako kanzu i remo. 32Jotero kanzu manitie gi cinge mabor bongi bajo aka jowaco ni, “Wanwaŋo gime; neni k'obedo kanzu pa wodin kosa be.”
33Aka oniaŋ kwoŋe to waco ni, “Obedo kanzu pa wodan; ogwaŋ madudi ocamo go; Yozefu m'ongoye kiganagana oyec woko i muma.” 34Yakobo oyeco woko nangin pere i rem to ruko kutiya to ywako wode ma ndelo kweth. 35Wote gi nyir pere je jobino kweyo cunye, to go okwero ni wokwey cunye aka owaco ni, “Be, alakidho i piny pa jom'otho kafodi aywako wodan.” Ameno omedere ywako wode Yozefu.
36Korin Jomidian oyido jotana go i Misir ri Potifa, m'oyido obedo jatel pa jokur cel pa kere.
Currently Selected:
Cakirok 37: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
