Cakirok 40
40
Yozefu tito lek pa jajiera
1Hongo moro rumacen ma gime, jadwoŋ pa jotimi vini ri kere kodi jadwoŋ pa jotedi ri kere mugat jotimo raco kwoŋ jadwoŋ pajo kere. 2Aka Farawo omako nge kodi jodhum pere ario, 3aka oketho jo i twec i ot pa jakur i jiera m'oyido okan'iye Yozefu. 4Jakur ma jiera omiyo Yozefu kuro jo, aka jobedo ma hongo malac i jiera.
5Wor acel, joje joleko aka lek pa kisi nyatoro oyido nitie gi dwoŋ pere. 6Munyo Yozefu obino bongi jo odikin to neno jo, oyido paro pajo onywowere. 7Ameno go openjo ni, “Raŋo wicalo joma rembo konon?”
8Jodwoko go ni, “Wajoje waleko, aka ongoye ŋat'otiti riwan dwoŋ pajo.”
Yozefu owaco ni, “Obedo Were ama miyo nyalo ma tito lek. Akwayo wiwaci ran lek mewin.”
9Ameno jatel pa jotimi vini owaco ri Yozefu lek pere ni, “I lek paran oyido nitie yath vini ruwaŋan, 10aka oyido nitie gi jange adek. Tekin boke mere lothi, othiwo, to nyinge cek. 11Kikopo pa Farawo oyido nitie i cingan, aka akwanyo nyingi vini t'abiy'iye, aka amiyo go i cinge.”
12Yozefu owaco ni, “Me dwoŋ mere. Jangi vini adek jobedo ndelo adek. 13I ndelo adek Farawo bino gonyin to dwokin i kabedo perin; aka doko ilaketho kikopo pa Farawo i cinge paka con mere munyo oyido ijatel pa jotimi rigo vini. 14To poyan, ka ber kodin aka itimi ran wor akwayin tucan ri Farawo t'ikonyan wok i ot me. 15Rupiri okwalan adieri wok i piny pa Joebulaniya, aka kiri ka, ongoye gim'atimo ma ripo wokethan i jiera.”
16Munyo jatel pa jotedi mugat oneno ni dwoŋ ma lek pa jatel pa jotimi vini ber ye, owaco ri Yozefu ni, “An bende aleko ni, oyido atiŋo aditin adek ma mugat i wiyan, 17aka iy'adita ma wiye mere oyido nitie nger cemo je m'otedi ri Farawo, to winyin oyido jocamo wok iy'adita gi wiyan.”
18Yozefu odwoko ni, “Me dwoŋ mere. Aditin adek meno ndelo adek. 19I ndelo adek Farawo bino ŋado wiyin to ŋawin wi yath aka winyin jobino camo delkwoŋin.”
20I ndelo mar'adek, m'oyido obedo ndelo ma poyo nywolirok pa Farawo, otimo kalima ri ŋecin pere je, aka ogonyo jatel pa jotimi vini kodi jatel pa jotedi mugat. 21Odwoko jatel pa jotimi vini i kabedo pere, aka oketho kikopo i cingi Farawo, 22to ŋawo jatel pa jotedi mugat paka Yozefu oyido otito rijo. 23To jatel pa jotimi vini k'opoyo Yozefu, wiye owil gi go.
Currently Selected:
Cakirok 40: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
