Cakirok 39

Yozefu kodi cipa Potifa

1Onyo Joisimayili oyido jotero Yozefu i piny Misir, aka Potifa, acel kwoŋ jodhum pa Farawo m'oyido obedo jatel pa jokur ma cel pa kere am'onyewo go. 2#Tim 7:9Rwoth oyido nitie gi Yozefu, aka obedo jacwo ma kisi gimoro okidho gi go maber. Go obedo i ot pa jadwoŋ pere ma Jamisir. 3Aka jadwoŋ pere oneno nike Rwoth oyido nitie gine, aka ni Rwoth omiyo kisi gima go otimo kidho maber. 4Ameno Yozefu onwaŋo wor i waŋ Potifa, aka oketho go janeno ma ot pere to ketho go kuro kisi gim'oyido apere. 5Wok i hongo ma Potifa oketho Yozefu janeno i ot pere kodi kwoŋ gim'oyido go nitie gine je, Rwoth omiyo ot pa Jamisir silwany ro Yozefu; silwany pa Rwoth oyido nikwoŋ kisi gima go oyido nitie gine, i ot kodi i ndelin. 6Ameno Potifa oweyo kisi gima go oyido nitie gine i cingi Yozefu aka k'odewo kwoŋ gimoro je kwanyo woko cemo ma go ocamo.

Onyo Yozefu oyido ocweyere maber, aka ŋon. 7Aka munyo hongo moro okadho, cipa jadwoŋ pere obolo waŋe kwoŋ Yozefu, aka owaco ni, “Nindi kodan.” 8To Yozefu okwero to waco ni, “Neni, jadwoŋ paran kidew kwoŋ gimoro je i ot rupiri anitie ka. Go oketho kisi gim'anitie gine i cingan. 9Anigi dwoŋ madit i ot me paka go nitie gine, aka go k'okano gimoro je kwoŋan kwanyowoko in, rupiri ibedo cege. T'onyo d'anotim kidakana madwoŋ me t'atimo reco kwoŋ Were?” 10Aka makada nende go oluwo gi Yozefu ndelo gi ndelo, k'owinjo go nindo gine, kosa bedo gine.

11To ndelo acel, munyo Yozefu odonjo i ot timo tic pere, aka ongoye kwoŋ ŋecin ma ot m'oyido nicegin, 12omako go gi kanzu pere aka owaco ni, “Nindi kodan.” To Yozefu obudhere to weyo kanzu pere i cinge aka oŋweco to wok i ot. 13Munyo go oneno ni go oweyo kanzu pere i cinge, aka oŋweco to wok i ot, 14go olwoŋo ŋecin ma ot pere aka owaco ni, “Neni, Jayuda ma cworan okelo ka me onyo timo roro kwoŋ wan. Obino i kisika paran nindo kodan t'akoko malo. 15Aka munyo go owinjo ni atiŋo dwondan aywak, oweyo kanzu pere i cingan to ringo wok i ot.”

16Kenyo go okano kanzu pere gi go, cuka jadwoŋ pa Yozefu odwoko peco. 17Kenyo go owaco rigo wac acel ni, “Ŋeca ma Jayuda m'ikelo i dier wan, obino i kisika paran to timo roro kwoŋan. 18To tekin atiŋo dwondan t'aywak, go oweyo kanzu pere kabutan to ŋweco wok i ot.”

19Munyo jadwoŋ pere owinjo wac ma cege oluwo rigo, “Me apaka ŋeca perin oteran,” Nge pere oliel. 20Jadwoŋ pa Yozefu otero go to ketho i jiera, kam'oyido ikan'iye jojiera pa kere; aka go obedo kenyo. 21#Tim 7:9To Rwoth oyido nitie gi Yozefu aka onyutho go mar makiwire, aka omiyo go wor i waŋ jakur jiera. 22Aka jakur jiera omiyo Yozefu kuro jojiera man je, aka kisi gim'otimi kenyo go am'oyido jatim. 23Jakur jiera doko k'okuro gimoro je ma Yozefu oyido kuro rupiri Rwoth oyido nitie gi go, aka kisi gima go otimo, Rwoth omiyo kidho maber.

Currently Selected:

Cakirok 39: DHOCDC

Highlight

Copy